Kan Masudya an mga Pangarap sa Katoninongan
KAKADIKIT na tawo an naglaom na an 1914 magigin orog pa kisa sa ordinaryong taon. An totoo, an ngapit pambihira kagayon kun paghelingon kan mga tawo kan naenot na mga taon. An siensia nanggagana tumang sa helang. Asin an guerra? Bueno, siring kan sinabi kan diaryo sa Vaticano na L’Osservatore Romano kan Pebrero 1991, bago an 1914 an publiko “naniwala na an guerra harayoon na sa girumdoman nin kasaysayan” asin na an tawo sa katapustapusi nabubuhay sa “sarong kapanahonan na dian an guerra ibinabawal kan naliwanagan na mga tawo asin gobyerno.”
Alagad, an 1914 asin an kasunod na mga taon may naghahalat na nagkapirang mariringis na sorpresa para sa daing pag-intinding katawohan. An enot iyo an inaapod na Dakulang Guerra kan 1914-18 na nagsudya sa mga pangarap sa katoninongan. An totoo, inapod iyan kan L’Osservatore Romano na “an enot na dakulang madugong garadanan sa modernong kasaysayan, tinandaan, apuwera sa ibang bagay, nin teknikal na mga nadiskobre na sa paniniwala kan darakulang sientista kan nakaaging kapag-arakian gagamiton sa matoninong na mga katuyohan.” An guerra nag-olog-olog sa siensia bilang paagi sa pagkakaigwa nin katoninongan; imbes, an siensia nagtao sa guerra kan daing kabaing na kakayahan kaiyan para sa grabeng paggadan.
Asin pakatapos kan grabeng paggadan kan guerra, saro pang maringis na paggadan an nagpoon. An trangkaso Española kan 1918-19 naggadan nin labing 20 milyones katawo—labi nanggad kisa sa dakulang bilang nin nagadan sa Dakulang Guerra mismo. Ginamit an desperadong mga paagi; an pagpalakop kan helang idineklarar na krimen sa nagkapirang nasyon. An pulisiya nag-arestar pa ngani sa mga tawo na nagbahon sa publiko! Alagad daing kamanungdanan. Arog sa bagyo, an helang nandanyar na dai naoolang sagkod na natapos iyan mismo. Napara an bilog na mga banwaan. An mga hawak natambak sa mga morge kan siudad.
An kapanahonan nin pagbago na pinangyari kan 1914 naggibo sa tawo na magripaydipay. An saiyang salang paniniwala sa kapangganahan sa guerra asin helang, an saiyang mga pangarap sa pankinaban na katoninongan na pangyayarihon kan kadonongan nin tawo, nagin kaherakherak na mga kasudyaan. Asin mantang an mga bagay padagos na nagraraot, mantang an Dakulang Guerra ibinaba sa Guerra Mundial I kan dakulaon na kasalihid kaiyan, an Guerra Mundial II, mantang an helang, kadaihon, gutom, asin katampalasanan padagos na nangyayari siring sa epidemiya sa bilog na kinaban, an mga historyador nagpopoon na midbidon an 1914 bilang an dakulang pagkaliwat sa kasaysayan nin tawo.
Alagad bakong arog kan kadaklan sa kinaban, an Internasyonal na mga Estudyante sa Biblia (siring kan pag-apod sa mga Saksi ni Jehova kaidto) naglaom na an 1914 magigin mahalagang taon haloy pa bago iyan mag-abot. Asin sa mga taon magpoon kaidto, an mga Saksi ni Jehova dai nagngangalas na maheling na nagraraot an kinaban sagkod na iyan magin garo nalamos na daing paglaom ngonyan. An mga hula sa Biblia nakatabang sainda na laoman an mga pangyayaring ini asin laoman pa ngani an mamuraway na panahon nin paglaom sa enotan. Paano iyan nagin posible? Sa masunod na panahon na songkoon kamo nin mga Saksi ni Jehova, tibaad booton nindong hapoton sinda manongod kaiyan. O puwede kamong sumurat sa mga kagpublikar kan magasin na ini.
[Picture Credit Line sa pahina 32]
Ipininta giraray hale sa gibo ni Franklin Booth