May Pakinabang daw an Pagkasadiosan?

SA PAKAHELING sa grabeng kadayaan sa tahaw nin mga adulto, parateng inaarog kan mga hobenes an saindang halimbawa. Kaya, nakarerepresko nanggad​—siring man pambihira—​kun an saro sadiosan! Inintrodusir kan Sports Illustrated an siring na halimbawa nin pagkasadiosan sa komentong: “Uya an sarong estorya tanganing ibalik an pagtitiwala nin saro.”

Ibinareta kan magasin an sarong kawat na baseball nin mga hobenes sa Florida, sa Estados Unidos. Nakua kan enot na baseman an bola asin pinagmaigotan na dakopon an nagdadalagan hale sa enot na base pasiring sa ikaduwa. An umpire, si Laura Benson, nagdesisyon na out an nagdadalagan, pero sinabihan sia kan enot na baseman na: “Ma’am, dai ko po nadakop an nagdadalagan.” Kaya pinagdanay ni Benson an nagdadalagan asin pinabalyo sa ikaduwang base.

Sa saro pang kawat duwang semana pakatapos, an iyo man sanang hoben napalabot sa kaagid na situwasyon. Si Benson giraray an umpire. Ngonyan hinona niang dai nakadakop an hoben, asin nagdesisyon siang nasa base an nagdadalagan. Minsan ngani daing sinabing ano man an hoben mantang nagbalik sia sa saiyang posisyon, narealisar ni Benson na sala sia paagi sa pagheling saiya kan hoben. Kaya nagdolok sia sa hoben asin naghapot: “Nadakop mo an nagdadalagan?”

“Iyo po,” an sabi nia.

Kan binaliktad ni Benson an saiyang desisyon asin sinabing out an nagdadalagan, nagprotesta an magkakontrang coach. Pero ipinaliwanag nia an nangyari duwang semana an nakaagi asin nagsabi: “Kun an aki siring kaiyan kasadiosan, kaipuhan kong itao an paborableng desisyon saiya.”

An bakong sadiosan na mga tawo garo nag-ooswag sa kinaban ngonyan. Iyan siring kan narisa kan salmista kaidto: “Ini an mga maraot, na nasa kapasilan sagkod noarin pa man. Dinugangan ninda an saindang kabuhayan.” (Salmo 73:12) Pero, sa katunayan sa katapustapusi an pagkasadiosan an magkakaigwa kan pinakamarahay na pakinabang. Iyan nagtatao sa saro kan paggalang nin kapwa tawo. Pero an mas mahalaga, iyan nag-aako kan pag-oyon ni Jehova Dios, na mabalos sa saro nin buhay na daing katapusan.