Pagkamundag ni Jesus Sagkod sa Kagadanan Niya

Sinugo an anghel na si Gabriel sa daragang si Maria. Sinabi kan anghel ki Maria na magkakaigwa ini nin sarong aki na maghahadi nin daing katapusan. An aking ini, si Jesus, namundag sa kuwadra asin dinalaw siya diyan nin mga pastor. Paghaloy-haloy, may mga lalaki hali sa Sirangan na giniyahan nin sarong bituon pasiring sa aking si Jesus. Maaaraman ta kun siisay an nagpasirang kan bituon na iyan, asin kun paano nakaligtas si Jesus sa paghihinguwang gadanon siya.

Kan 12 anyos na si Jesus, mahihiling ta siya na nakikipag-ulay sa mga paratukdo sa templo. Pakalihis nin 18 taon, binawtismuhan siya asin pinunan niyang itukdo sa mga tawo an manungod sa Kahadian nin Diyos. Tanganing tabangan siya sa gibuhon na ini, nagpili si Jesus nin 12 lalaki para magin mga apostol.

Naggibo man si Jesus nin dakul na milagro. Pinakakan niya an rinibong tawo paagi sa pipira sanang sadit na sira asin diit na tinapay. Nagpaumay siya nin mga may hilang asin nagbuhay pa ngani nin mga gadan. Sa huri, maaaraman ta an dakul na nangyari ki Jesus kan ultimong aldaw kan buhay niya, asin kun paano siya ginadan. Nagtukdo siya sa mga tawo sa laog nin tulo may kabangang taon, kaya lampas nin kadikit sa 34 taon nin kasaysayan an laog kan KABTANG SAIS.