Kapitulo 6
Si Jesu-Cristo—Isinugo daw nin Dios?
1, 2. (a) Ano an ebidensia na si Jesu-Cristo tunay na persona? (b) Anong mga hapot an pinalalataw manongod ki Jesus?
HAROS gabos ngonyan nakadangog na dapit ki Jesu-Cristo. An impluwensia nia sa kasaysayan mas dakula kisa siisay pa man na ibang tawo. An totoo, an mismong kalendaryo na ginagamit sa kadaklan na parte kan kinaban basado sa taon na pinaghohonang ikinamundag nia! Arog kan sabi kan The World Book Encyclopedia: “An mga petsa bago kan taon na iyan isinusurat na B.C., o before Christ (bago si Cristo). An mga petsa pakalihis kan taon na iyan isinusurat na A.D., o anno Domini (sa taon kan satong Kagurangnan).”
2 Kaya si Jesus bakong persona na iniimahinar sana. Sia talagang nabuhay bilang tawo sa daga. “Kan suanoy na mga panahon pati an mga kontra sa Kristianismo dai noarin man pinagdudahan an [aktuwal na pagkabuhay] ni Jesus,” sabi kan Encyclopædia Britannica. Kaya siisay man nanggad si Jesus? Talaga daw na sia isinugo nin Dios? Taano ta bantogon sia?
NABUHAY NA SIA KAIDTO
3. (a) Sono sa mga tataramon kan anghel, si Maria mangangaki kan aki niisay? (b) Paano nagin posible para sa daragang si Maria na ipangidam si Jesus?
3 Bakong arog nin siisay pa man na tawo, si Jesus ipinangaki nin sarong daraga. An ngaran nia Maria. An sarong anghel nagsabi manongod sa saiyang aki: “An sarong ini magigin dakula asin aapodon Aki kan Kaharohalangkawe.” (Lucas 1:28-33; Mateo 1:20-25) Alagad paano puwedeng magkaaki an sarong babae na dai pa noarin man nakidorog sa lalaki? Paagi sa banal na espiritu nin Dios. Ibinalyo ni Jehova an buhay kan saiyang makapangyarihan na espiritung Aki hale sa langit pasiring sa matris kan daragang si Maria. Idto sarong milagro! Tunay na an Saro na guminibo sa enot na babae na may makangangalas na abilidad na mangaki kayang papangyarihon na an sarong babae magbados na mayo nin amang tawo. An Biblia nagpapaliwanag: “Kan dumatong na an kalubosan kan panahon, isinugo nin Dios an saiyang Aki, na naghale sa sarong babae.”—Galacia 4:4.
4. (a) Ano an nagin buhay ni Jesus bago sia namundag bilang aki? (b) Ano an isinabi ni Jesus tanganing iparisa na sia nabuhay kaidto sa langit?
4 Kaya bago namundag sa daga bilang tawo si Jesus dati nang nasa langit bilang makapangyarihan na espiritung persona. Igwa sia kaidto nin espiritung hawak na dai naheheling nin tawo, kapareho nin Dios. (Juan 4:24) Si Jesus mismo parateng nagtaram dapit sa halangkaw na katongdan nia sa langit. Sarong beses sia namibi: “Ama, pamurawaya ako sa kataed mo kan kamurawayan na dating yaon sa sako bago an kinaban.” (Juan 17:5) Sinabihan man nia an mga naghihinanyog sa saiya: “Kamo mga tagaibaba; ako tagaitaas.” “Kaya ano kun maheling nindo an Aki nin tawo na minasakat sa dati niang namumugtakan?” “Bago mamundag si Abraham, iyo na ako.”—Juan 8:23; 6:62; 8:58; 3:13; 6:51.
5. (a) Taano si Jesus ta inapod na “Tataramon,” “Panganay” asin “bugtong”? (b) Sa anong gibohon si Jesus nagtabang sa Dios?
5 Bago nagdigdi sa daga si Jesus inapod na Tataramon nin Dios. Ipinaheheling kan titulong ini na sia naglingkod sa langit bilang an saro na nagtataram para sa Dios. Inaapod man siang “Panganay” nin Dios, saka an saiyang “bugtong” na Aki. (Juan 1:14; 3:16; Hebreo 1:6) Ini nangangahulogan na sia linalang nin enot sa gabos na iba pang espiritung aki nin Dios, asin na sia sana an direktang linalang nin Dios. Ipinaliliwanag kan Biblia na an “panganay” na Aking ini katabang ni Jehova sa paglalang sa gabos na ibang bagay. (Colosas 1:15, 16) Kaya kan an Dios magsabi, “Gibohon niato an tawo sa satong ladawan,” kaolay nia an Aking ini. Iyo, an mismong saro na sa huri nagdigdi sa daga asin ipinangaki nin sarong babae nakatabang sa paglalang sa gabos na bagay! Nabuhay na sia sa langit kaiba kan saiyang Ama sa laog nin dai maaraman na bilang nin mga taon!—Genesis 1:26; Talinhaga 8:22, 30; Juan 1:3.
AN SAIYANG BUHAY DIGDI SA DAGA
6. (a) Ano an mga nangyari dai mahaloy bago asin pagkamundag ni Jesus? (b) Saen namundag si Jesus asin saen sia nagdakula?
6 Si Maria katratong pakasal ki Jose. Alagad kan maaraman ni Jose na sia bados paghona ni Jose nakidorog sia sa ibang lalaki, kaya habo na ni Jose na sia pakasalan. Minsan siring, kan sabihan si Jose ni Jehova na paagi sa Saiyang banal na espiritu na ipinangidam an aki, pinakasalan ni Jose si Maria. (Mateo 1:18-20, 24, 25) Dangan, kan sinda nasa siudad nin Betlehem, namundag si Jesus. (Lucas 2:1-7; Miqueas 5:2) Kan omboy pa si Jesus, pinagmaigotan ni Hadeng Herodes na gadanon sia. Alagad ta pinatanidan ni Jehova si Jose kaya dinara nia an saiyang pamilya asin nagdulag pasiring sa Egipto. Pagkagadan ni Hadeng Herodes, si Jose asin Maria nagpuli kaiba si Jesus sa siudad nin Nazaret sa Galilea. Duman sia nagdakula.—Mateo 2:13-15, 19-23.
7. (a) Ano an nangyari kan si Jesus 12 anyos? (b) Anong trabaho an nanodan ni Jesus kan sia nagdadakula?
7 Kan si Jesus 12 anyos sia nag-iba sa saiyang pamilya pasiring sa Jerusalem tanganing umatender sa espesyal na selebrasyon na inaapod Paskua. Kan yaon duman tolong aldaw sia sa templo na naghihinanyog sa mga paratokdo asin naghahapot sa sainda. An gabos na nakadangog sa saiya napangalas sa dakol niang aram. (Lucas 2:41-52) Kan si Jesus nagdadakula sa Nazaret, nakanood siang magin panday. Daing duwa-duwa na sia tinokdoan kan trabahong ini kan saiyang ama-amahan, si Jose, na saro man na panday.—Marcos 6:3; Mateo 13:55.
8. Ano an nangyari kan si Jesus 30 anyos?
8 Sa edad na 30 may dakulang pagkaliwat na nangyari sa buhay ni Jesus. Sia nagduman ki Juan Bautista asin nagpabautismo, tanganing biyong ibuntog sa Salog nin Jordan. An Biblia nagbabareta: “Kan mabautismohan na si Jesus tolos man naghawas sa tubig; asin, uya! an kalangitan nagkaburukasan, asin naheling nia an espiritu nin Dios na nag-iibaba siring sa salampati asin nagtogdon sa saiya. Uya! May nadangog man na tingog sa langit na nagsasabi: ‘Ini an sakong Aki, an namomotan, na sakong inooyonan.’ ” (Mateo 3:16, 17) Dai na nin pagduwaduwa sa isip ni Juan na si Jesus isinugo nin Dios.
9. (a) Kasuarin si Jesus totoong nagin Cristo, asin taano ta kaidto? (b) Paagi sa saiyang pagpabautismo, iprenepresentar ni Jesus an saiyang sadiri na gibohon an ano?
9 Sa pagbubo kan Saiyang banal na espiritu ki Jesus, sia linalahidan o ninonombrahan ni Jehova na magin hade sa Saiyang nagdadangadang na kahadean. Mantang linahidan kan espiritu, si Jesus nagin an “Mesiyas,” o “Cristo,” mga termino sa Hebreo asin Griego na nangangahulogan “Linahidan.” Kun siring, sia nagin Jesu-Cristo, o Jesus na Linahidan. Kaya an saiyang apostol na si Pedro nagtaram manongod ki “Jesus na taga-Nazaret, na linahidan nin Dios nin banal na espiritu asin kapangyarihan.” (Gibo 10:38) Siring man, paagi sa saiyang bautismo sa tubig iprenepresentar ni Jesus an saiyang sadiri sa Dios na otobon an gibohon na isinugo sa saiya nin Dios na gibohon sa daga. Ano an mahalagang gibohon na iyan?
KUN TAANO SIA TA NAGDIGDI SA DAGA
10. Si Jesus napadigdi sa daga tanganing ipahayag an anong mga katotoohan?
10 Sa pagpaliwanag kun taano ta nagdigdi sia sa daga, sinabihan ni Jesus an Romanong gobernador na si Poncio Pilato: “Ako namundag dahel kaini, asin dahel kaini [katuyohan na ini] ako napadigdi sa kinaban, tanganing ako magpatotoo sa katotoohan.” (Juan 18:37) Alagad anong mga katotoohan an kaipuhan na ipamidbid ni Jesus kaya sia isinugo sa daga? Enot, mga katotoohan manongod sa saiyang langitnon na Ama. Tinokdoan nia an saiyang mga parasunod na mamibi na “sambahon” logod, o pakangbanalon, an ngaran kan saiyang Ama. (Mateo 6:9, King James Version) Asin sia namibi: “Ipinahayag ko an saimong ngaran sa mga tawo na itinao mo sa sako.” (Juan 17:6) Siring man, sia nagsabi: “Kaipuhan na ipahayag ko . . . an maogmang bareta kan kahadean nin Dios, huli ta dahelan kaini na ako isinugo.”—Lucas 4:43.
11. (a) Taano ta ibinilang ni Jesus na napakahalaga kan saiyang gibohon? (b) Ano an dai noarin man pinogolan na gibohon ni Jesus? Kaya ano an maninigo niatong gibohon?
11 Gurano kahalaga para ki Jesus kan gibohon na ini nin pagpamidbid kan ngaran asin kahadean kan saiyang Ama? Sinabihan nia an saiyang mga disipulo: “An sakong kakanon iyo an sakong paggibo kan kabotan nia na nagsugo sako asin pagtapos kan saiyang gibohon.” (Juan 4:34) Taano ta ibinilang ni Jesus an gibohon nin Dios na arog kahalaga nin kakanon? Iyan huli ta an Kahadean iyo an paagi na ootobon nin Dios an saiyang makangangalas na mga katuyohan para sa katawohan. An kahadean na ini iyo an malaglag sa gabos na karatan asin mahale sa paglanghad na itinambak sa ngaran ni Jehova. (Daniel 2:44; Kapahayagan 21:3, 4) Kaya si Jesus noarin man dai nagpogol sa pagpamidbid sa ngaran asin kahadean nin Dios. (Mateo 4:17; Lucas 8:1; Juan 17:26; Hebreo 2:12) Permi niang itinataram an katotoohan, baga man iyan popular o bako. Sa siring sia nagtao nin halimbawa na maninigo niatong arogon kun boot niatong mapaogma an Dios.—1 Pedro 2:21.
12. Huli sa ano pang ibang mahalagang dahelan na si Jesus napadigdi sa daga?
12 Pero, tanganing gibohon na posible para sa sato na magkamit nin buhay na daing katapusan sa pagsakop kan kahadean nin Dios, kaipuhan na ibubo ni Jesus an saiyang dugo sa kagadanan. Arog kan sabi kan duwang apostol ni Jesus: “Kita ngonyan ikinapahayag nang matanos huli sa saiyang dugo.” “An dugo ni Jesus na . . . Aki [nin Dios] naglilinig sato sa gabos na kasalan.” (Roma 5:9; 1 Juan 1:7) Kaya an sarong mahalagang dahelan na si Jesus nagdigdi sa daga iyo an magadan para sa sato. Sia nagsabi: “An Aki nin tawo nagdigdi, bakong tanganing paglingkodan, kundi tanganing maglingkod asin magtao kan saiyang kalag [o, buhay] bilang pantubos na karibay nin dakol.” (Mateo 20:28) Alagad ano an boot sabihon kan pagtao ni Cristo kan saiyang buhay bilang “pantubos”? Taano an pagbubo kan saiyang dugo sa kagadanan ta kaipuhan para sa satong kaligtasan?
ITINAO NIA AN SAIYANG BUHAY NA PANTUBOS
13. (a) Ano an pantubos? (b) Ano an pantubos na ibinayad ni Jesus tanganing makalda kita sa kasalan asin kagadanan?
13 An terminong “pantubos” parateng ginagamit kun may pagkidnap. Pakatapos na bihagon nin parakidnap an saro, tibaad sabihon nia na ibabalik nia an tawo kun bayadan an isinabing halaga nin kuwarta bilang pantubos. Kaya an pantubos sarong bagay na nagdadara kan kaligtasan nin sarong nabibihag. Iyan bagay na ibinabayad tanganing dai sia mawaran kan saiyang buhay. An sangkap na buhay ni Jesus bilang tawo itinao tanganing makalda an katawohan sa pagkaoripon sa kasalan asin kagadanan. (1 Pedro 1:18, 19; Efeso 1:7) Taano ta kinaipuhan an siring na pagkalda?
14. Taano ta kaipuhan an pantubos na itinao ni Jesus?
14 Ini huli ta si Adan, an apoon niato gabos, nagrebelde tumang sa Dios. An saiyang tampalasan na gawe ginibo siang parakasala, ta an Biblia nagpapaliwanag na “an kasalan katampalasanan.” (1 Juan 3:4; 5:17) Bilang resulta, dai sia maninigong mag-ako kan balaog nin Dios na buhay na daing katapusan. (Roma 6:23) Kaya iwinara ni Adan an sangkap na buhay bilang tawo sa sarong paraisong daga. Iwinara man nia an makangangalas na paglaom na ini para sa gabos na ipangangaki nia. ‘Pero taano,’ tibaad ihapot nindo, ‘ta kaipuhan na magadan an gabos niang aki, mantang si Adan an nagkasala?’
15. Mantang si Adan an nagkasala, taano ta kinaipuhan na magsakit asin magadan an saiyang mga aki?
15 Ini huli ta si Adan, kan sia magin parakasala, nagpamana nin kasalan asin kagadanan sa saiyang mga aki, kabale an gabos na tawo na nabubuhay ngonyan. (Job 14:4; Roma 5:12) “An gabos nagkasala asin nagkulang sa kamurawayan nin Dios,” sabi kan Biblia. (Roma 3:23; 1 Hade 8:46) Minsan an diosnon na si David nagsabi: “Sa karatan ako ipinangaki, asin sa kasalan ipinangidam ako kan sakong ina.” (Salmo 51:5) Kaya, an mga tawo nagagadan huli sa kasalan na namana ki Adan. Kun siring, paano nahimo kan pag-atang kan buhay ni Jesus na kaldahon an gabos sa pagkaoripon sa kasalan asin kagadanan?
16. (a) Sa pagtao kan pantubos, paano an Dios nagpaheling nin pagpahalaga sa saiyang pagboot na ‘an buhay ibabayad sa buhay’? (b) Taano ta si Jesus an solamenteng tawo na makababayad kan pantubos?
16 Napapalabot an legal na prinsipyo sa pagboot nin Dios para sa nasyon nin Israel. Iyan nagsasabi na ‘an buhay ibabayad sa buhay.’ (Exodo 21:23; Deuteronomio 19:21) Huli sa saiyang pagmasumbikal iwinara kan sangkap na tawong si Adan an sangkap na buhay sa paraisong daga para sa saiya man sana asin sa gabos niang aki. Itinao ni Jesu-Cristo an saiyang sangkap na buhay tanganing balukaton an iwinara ni Adan. Iyo, si Jesus “nagtao kan saiyang sadiri bilang katimbang na pantubos para sa gabos.” (1 Timoteo 2:5, 6) Huling sia sangkap na tawo, kapareho kaidto ni Adan, si Jesus inapod na “an huring Adan.” (1 Corinto 15:45) Mayo nin tawo apuwera ki Jesus na makapagtatao kan pantubos. Ini huli ta si Jesus an solamenteng tawong nabuhay na katimbang ni Adan bilang sangkap na tawong aki nin Dios.—Salmo 49:7; Lucas 1:32; 3:38.
17. Kasuarin binayadan sa Dios an pantubos?
17 Si Jesus nagadan sa edad na 331/2 taon. Alagad sa ikatolong aldaw pagkagadan nia sia binuhay liwat. Pakalihis nin apat na polong aldaw sia nagbuwelta sa langit. (Gibo 1:3, 9-11) Duman, bilang espiritung persona giraray, sia nagtindog “sa atubang nin Dios para sa sato,” na dara an halaga kan saiyang pantubos na atang. (Hebreo 9:12, 24) Kan panahon na idto an pantubos ibinayad sa Dios duman sa langit. May kaligtasan na ngonyan an katawohan. Alagad noarin makakamtan an mga pakinabang kaiyan?
18. (a) Paano kita puwedeng makinabang minsan ngonyan sa pantubos? (b) Ano an pinapangyayari kan pantubos sa ngapit?
18 Ngonyan pa an pantubos na atang ni Jesus puwede na niatong pakinabangan. Paano? Paagi sa pagtubod dian puwede kitang magkaigwa nin malinig na kamugtakan sa atubang nin Dios asin mapairarom sa saiyang mamomoton asin maboot na pangataman. (Kapahayagan 7:9, 10, 13-15) An dakol sa sato tibaad nakagibo nin grabeng mga kasalan bago niato naaraman an manongod sa Dios. Asin dawa ngonyan kita nasasala, kun beses seryoso. Alagad kita daing pag-alangan na makahahagad nin tawad sa Dios basado sa pantubos, na may pagsarig na dadangogon nia kita. (1 Juan 2:1, 2; 1 Corinto 6:9-11) Siring man, sa maabot na mga aldaw, bubukasan kan pantubos an dalan para sa sato na resibihon an balaog nin Dios na buhay na daing katapusan sa saiyang matanos na bagong kinaban. (2 Pedro 3:13) Sa panahon na iyan an gabos na nagtutubod sa pantubos biyong makakalda sa pagkaoripon sa kasalan asin kagadanan. Sinda makalalaom sa buhay sagkod lamang sa pagkasangkap!
19. (a) Ano an epekto sa saindo kan pagtao kan pantubos? (b) Paano daa sabi ni apostol Pablo maninigo niatong ipaheling an satong pagtanaw nin utang na boot sa pantubos?
19 Ano an namamatean nindo ngonyan na naaraman nindo an manongod sa pantubos? Dai daw nakapupukaw nin pagkamoot sa saindong puso para ki Jehova Dios an pakaaram na labi-labi an pagkamoot nia sa saindo kaya itinao nia an saiyang namomotan na Aki para sa saindo? (Juan 3:16; 1 Juan 4:9, 10) Alagad isip-isipa man an pagkamoot ni Cristo. Sia boluntad na nagdigdi sa daga tanganing magadan para sa sato. Dai daw kita maninigong magpasalamat? Si apostol Pablo nagpaliwanag kun paano niato maninigong ipaheling an satong pagtanaw nin utang na boot kan sia magsabi: “Sia nagadan para sa gabos tanganing idtong mga nabubuhay dai na mabuhay para sa sainda man sana, kundi para sa saiya na nagadan para sa sainda asin binuhay liwat.” (2 Corinto 5:14, 15) Ipaheheling daw nindo an saindong pagtanaw nin utang na boot paagi sa saindong paggamit sa saindong buhay na maglingkod sa Dios asin sa saiyang langitnon na Aki na si Jesu-Cristo?
KUN TAANO SI JESUS TA NAGMILAGRO
20. Ano an manonodan niato manongod ki Jesus sa saiyang pagpaomay sa leproso?
20 Si Jesus midbid sa mga milagrong ginibo nia. Sia may pagkaherak sa mga tawong may problema, asin gustong-gusto nia na gamiton an saiyang kapangyarihan na itinao nin Dios tanganing tabangan sinda. Halimbawa, an saro na igwa kan makatatakot na helang na lepra nagdolok sa saiya asin nagsabi: “Kun boot mo sana, mapalilinig mo ako.” Si Jesus “naherak, asin inunat nia an saiyang takyag asin dinootan sia, asin sia nagsabi sa saiya: ‘Boot ko. Luminig ka.’ ” Asin an may helang naomayan!—Marcos 1:40-42.
21. Paano tinabangan ni Jesus an mga kadaklan?
21 Helinga an saro pang kasaysayan sa Biblia, asin imahinara an pagkaherak ni Jesus sa mga tawong ilinaladawan: “Nagdorolok sa saiya an darakulang kadaklan, na may darang mga pilay, kimay, buta, pula, asin dakol pang iba, asin haros iinapon ninda sinda sa saiyang pamitisan, asin pinaomayan nia sinda; kaya an kadaklan nagngaralas kan maheling ninda na an pula nagtataram asin an pilay naglalakaw patin an buta nakakaheling, asin pinamuraway ninda an Dios nin Israel.”—Mateo 15:30, 31.
22. Ano an nagpapaheling na si Jesus talagang may pagmakolog sa mga tawong tinabangan nia?
22 Na si Jesus talagang nagmamakolog sa mga nagsasakit na tawong idto asin tunay na gustong tumabang sa sainda maheheling sa suminunod niang isinabi sa saiyang mga disipulo. Sia nagsabi: “Naheherak ako sa kadaklan, huli ta tolong aldaw na sindang nagdanay sa kaibanan ko asin mayo sinda nin pagkakan; asin habo kong pahaleon sinda na nagugutom. Tibaad sinda panluyahon sa dalan.” Kaya si Jesus, paagi sa pitong tinapay asin pirang sira, milagrosong pinakakan an “apat na ribong lalaki, apuwera an mga babae asin aki.”—Mateo 15:32-38.
23. Ano an nagpahiro ki Jesus na buhayon liwat an gadan na aki nin sarong balo?
23 Sa saro pang okasyon nasabat ni Jesus an prosisyon sa paglobong na paluwas sa siudad nin Nain. Ilinaladawan iyan kan Biblia, na an sabi: “Ilinuluwas an sarong gadan, an bugtong na aki kan saiyang ina. Laen pa kaiyan, sia balo. . . . Asin kan maheling sia kan Kagurangnan, naherak sia sa saiya.” Namatean na gayo ni Jesus an kamondoan kan balo. Kaya, sa pagtaram sa gadan, si Jesus nagboot: “Barobata, ako nagsasabi sa saimo, Bangon!” Asin ta kamakangangalas! “An gadan nagbangon asin nagpoon na magtaram, asin itinao nia sia sa saiyang ina.” Isip-isipa na sana kun ano an namatean kan inang idto! Ano daw an mamamatean nindo? An bareta manongod sa pambihirang pangyayaring ini nakalakop. Bakong makangangalas na midbid na marhay si Jesus.—Lucas 7:11-17.
24. Ano an ipinaheling kan mga milagro ni Jesus manongod sa ngapit?
24 Pero an mga milagrong ginibo ni Jesus temporaryo sana an itinaong pakinabang. An mga tawong pinaomayan nia nagkaigwa giraray nin pisikal na mga problema. Asin an saiyang mga binuhay liwat nagadan giraray. Alagad an mga milagro ni Jesus nagpatunay na sia isinugo nin Dios, na sia tunay na Aki nin Dios. Asin iyan nagpatunay na, paagi sa kapangyarihan nin Dios, an gabos na problema nin tawo mareresolberan. Iyo, ipinaheling kaiyan sa sadit na paagi an mangyayari sa daga sa pagsakop kan kahadean nin Dios. Sa panahon na iyan an nagugutom pakakakanon, an may helang paoomayan, asin pati an gadan bubuhayon liwat! Asin an helang, kagadanan o ano man na ibang problema noarin man dai na magtatao nin kamondoan. Kanigoan kamakangangalas na bendisyon kaiyan!—Kapahayagan 21:3, 4; Mateo 11:4, 5.
HADE SA KAHADEAN NIN DIOS
25. Sa anong tolong kabtang puwedeng banga-bangaon an buhay ni Jesus?
25 May tolong kabtang an buhay kan Aki nin Dios. Enot, yaon an dai aram kun pirang taon na ikinabuhay nia kaiba kan saiyang Ama sa langit bago sia nagin tawo. Ikaduwa, an 331/2 taon na ginamit nia sa daga pagkamundag nia. Asin ngonyan yaon an saiyang buhay duman giraray sa langit bilang espiritung persona. Ano an nagin katongdan nia sa langit poon kan sia buhayon liwat?
26. Paagi sa saiyang kaimbodan sa daga, pinatunayan ni Jesus na sia maninigo na magin ano?
26 Malinaw na si Jesus magigin hade. Minsan an anghel nagpaisi ki Maria: “Sia magsasakop bilang hade . . . sagkod lamang, asin dai magkakaigwa nin katapusan an saiyang kahadean.” (Lucas 1:33) Kaidtong saiyang ministeryo sa daga permi siang nagtataram manongod sa kahadean nin Dios. Tinokdoan nia an saiyang mga parasunod na mamibi: “Dumatong logod an kahadean mo. Gibohon logod an boot mo, kun paano sa langit, siring man sa daga.” Asin sinadol nia sinda na “padagos na hanapon nguna an kahadean.” (Mateo 6:10, 33) Paagi sa saiyang kaimbodan sa daga, pinatunayan ni Jesus na sia maninigong magin hade sa kahadean nin Dios. Sia daw nagpoon na maghade tolos kan sia makabuwelta sa langit?
27. (a) Ano an ginibo ni Jesus pagkabuwelta nia sa langit? (b) Ano an enot na ginibo ni Jesus bilang hade sa kahadean nin Dios?
27 Dai. Sinasambit ni apostol Pablo an Salmo 110:1, na ipinaliliwanag: “An tawong ini [si Jesus] nagdolot nin sarong atang para sa mga kasalan para sa gabos na panahon asin nagtukaw sa too nin Dios, na poon kaidto naghahalat sagkod na an saiyang mga kaiwal ibugtak na magin tongtongan kan saiyang mga bitis.” (Hebreo 10:12, 13) Hinahalat ni Jesus an pagboot ni Jehova: “Mandaog ka sa tahaw kan saimong mga kaiwal.” (Salmo 110:2) Kan umabot an panahon na iyan, pinonan niang linigon sa kalangitan si Satanas asin an saiyang mga anghel. An resulta kan ralaban na iyan sa langit sinasabi sa mga tataramon na ini: “Nangyari na an kaligtasan asin an kapangyarihan asin an kahadean kan satong Dios asin an autoridad kan saiyang Cristo, huli ta ihinolog na an parasumbong sa satong mga tugang, na nagsusumbong sa sainda aldaw asin banggi sa atubang nin satong Dios!” (Kapahayagan 12:10) Arog kan nasabotan sa mas naeenot na kapitulo kan librong ini, ipinaheheling nin mga katunayan na an ralaban na ini sa langit nangyari na, asin si Jesu-Cristo naghahade ngonyan mismo sa tahaw kan saiyang mga kaiwal.
28. (a) Ano an madali nang gibohon ni Cristo? (b) Ano an dapat niatong gibohon tanganing kamtan an saiyang pagprotehir?
28 Sa madalion nang panahon si Cristo asin an saiyang langitnon na mga anghel mahiro tanganing haleon sa daga an gabos na presenteng gobyerno kan kinaban. (Daniel 2:44; Kapahayagan 17:14) Sinasabi kan Biblia na sia may “matarom na halabang minasbad, tanganing ipanlugad nia sa mga nasyon, asin sia magpapastor sa sainda paagi sa sogkod na batbat.” (Kapahayagan 19:11-16) Tanganing patunayan na kita maninigong ingatan sa nagdadangadang na kalaglagan na ini, kaipuhan na kita tumubod ki Jesu-Cristo. (Juan 3:36) Kaipuhan na kita magin saiyang mga disipulo asin pumasakop kita sa saiya bilang an satong langitnon na Hade. Gigibohon daw nindo iyan?
[Ritrato sa pahina 58]
Binayaan ni Jesus an saiyang trabahong pagpanday tanganing pabautismo asin magin an linahidan ni Jehova
[Ritrato sa pahina 63]
Si Jesus an katimbang kan sangkap na tawong si Adan
[Mga ritrato sa pahina 64]
Si Jesus pinahiro nin pagkaherak na tabangan an mga may helang asin nagugutom
[Ritrato sa pahina 67]
Paagi sa pagbuhay liwat sa gadan, ipinaheling ni Jesus kun ano an gigibohon nia nin mas mahiwas kun nagsasakop na an kahadean nin Dios