Ano an Kahulogan sa Saindo kan Kagadanan ni Jesus?
“AN GABOS na hukbong nagmartsa, an gabos na armadang tinindog, an gabos na parlamentong nagtiripon, asin an gabos na hadeng nagsakop, kun pag-iiribanon, dai nakaapektar sa buhay nin tawo sa ibabaw kan dagang ini nin arog kakosog sa ginibo kan sarong nagsosolong personalidad na ini.” Iyan an isinurat kan autor na si James A. Francis manongod ki Jesu-Cristo.
Laen-laen an pagheling nin mga tawo ki Jesus, alagad ipinamimidbid sia kan Biblia bilang Aki nin Dios asin tawong may mapagsakripisyong pagkamoot. Sinitar ni Jesus an sarong pangenot na paagi na saiyang ipinaheling an pagkamoot na iyan kan sia magsabi manongod sa saiyang sadiri: “An Aki nin tawo nagdigdi, bakong tanganing paglingkodan, kundi tanganing maglingkod asin magtao kan saiyang kalag bilang pantubos na karibay nin dakol.”—Mateo 20:28.
Ano an kahulogan kan pantubos na ini? Taano ta kinaipuhan iyan? Siisay an tinubos? Sa katotoohan, ano an kahulogan sa saindo kan kagadanan ni Jesus?
Ano Iyan?
An pantubos sarong bagay na nagtatao nin pagkabutas. An pagtubos sa saro nangangahulogan nin pagkalda sa saiya sa pagkabihag o padusa paagi sa pagbayad. Sa espirituwal na sentido, an “pagtubos” nangangahulogan nin pagkalda sa kasalan asin sa penalidad kaiyan. Iyan an dahelan na si Jesus nagadan. Arog kan isinurat kan Kristianong apostol na si Pablo: “An ibinabayad nin kasalan kagadanan, alagad an regalo na itinatao nin Dios daing sagkod na buhay paagi ki Cristo Jesus na satong Kagurangnan.”—Roma 6:23.
An halagang pambalukat iinaasosyar sa Kasuratan sa pagbayad nin pantubos. An Salmo 49:6-9 nagsasabi: “An mga nananarig sa saindang kabuhayan, asin padagos na namamansag dapit sa kadakulan kan saindang kayamanan, mayo ni saro sa sainda an sa ano man na paagi makababalukat minsan sa tugang, ni makatatao sa Dios nin pantubos para sa saiya; (asin an halagang pambalukat sa saindang kalag dakulaon an halaga na iyan nag-ontok na sagkod sa panahon na daing sagkod) tanganing sia mabuhay pa sagkod lamang asin dai makaheling kan kotkot.” An pantubos pagbalukat na ginigibo nin Dios, bakong nin siisay man na tawong bakong sangkap.
Taano ta Kaipuhan?
Kaipuhan an pantubos ta an satong enot na ama, si Adan, nagkasala. Sa siring sia nawaran nin daing sagkod na sangkap na buhay, makatanosan na sinentensiahan na magadan, asin sa katapustapusi nagadan man nanggad. (Genesis 2:15-17; 3:1-7, 17-19; 5:5) Bilang saiyang mga gikan, kita nagmana nin kasalan asin kagadanan. “Paagi sa sarong tawo an kasalan naglaog sa kinaban asin an kagadanan huli sa kasalan,” an isinurat ni Pablo, “asin kaya an kagadanan nakalakop sa gabos na tawo huli ta sinda gabos nagkasala.” (Roma 5:12) Iyo, “an gabos nagagadan dian ki Adan.” (1 Corinto 15:22) Kaya an salmistang si David tama an pagkasabi: “Sa karatan ako ipinangaki, asin sa kasalan ipinangidam ako kan sakong ina.”—Salmo 51:5.
An pagkakalda sa pagkakondenar sa kasalan asin kagadanan kaipuhan tanganing mag-ako nin buhay na daing sagkod an siisay man na makasalan na gikan ni Adan. Mantang dai ikatatao nin bakong sangkap na mga tawo an pantubos na ini, iyan mamomoton na ginibo ni Jehova paagi ki Jesu-Cristo. Pero, ano an binakal kan pantubos? Bueno, kan magkasala si Adan, nawara sa saiya an daing katapusan na sangkap na buhay bilang tawo, kaiba an gabos na diretso asin malalaoman kaiyan. Kaya, iyo man sana iyan an binalukat paagi sa atang na pantubos ni Jesus.
Kun Ano an Pinagigin Posible Kaiyan
Napanigoan an hustisya sa pag-agi nin tawo sa kagadanan, an penalidad sa kasalan. Kaya an pantubos sarong akto kan pagkaherak asin mamomoton na kabootan nin Dios. An sangkap na buhay ni Jesus bilang tawo, kaiba an gabos na diretso asin malalaoman kaiyan, itinao sa kagadanan asin noarin man dai binawi, huli ta sia dai binuhay liwat bilang tawong may laman asin dugo kundi bilang inmortal na espiritung linalang. (1 Corinto 15:50; 1 Pedro 3:18) Kun siring an iinatang na buhay ni Jesu-Cristo bilang tawo nagpadagos na igwa nin nakababalukat, o nakatutubos, na kapangyarihan.
Bilang tawong daing kasalan, si Jesus nasa kamugtakan na kapareho kan dating kamugtakan kan sangkap na si Adan. Huli sa pagigin makinuyog sa Dios sagkod sa kagadanan, si Jesus ginibo bilang an dakulang Halangkaw na Saserdote, asin iprenesentar nia an halaga kan saiyang sangkap na atang na tawo sa langit. (Hebreo 9:24-26) Huling inako nin Dios an halagang pambalukat na ini, puwedeng balukaton ni Jesus sa kasalan asin kagadanan an may pagtubod na mga gikan ni Adan paagi sa pag-aplikar kan merito kan saiyang atang para sa sainda. (1 Corinto 6:20; 7:23; 1 Juan 2:1, 2) Sa siring si Jesus “nagtao nin daing sagkod na kaligtasan sa gabos na nagkukuyog sa saiya.” (Hebreo 5:8, 9) Pinagin posible kaini para sa sainda na makaabot sa matanos na kamugtakan sa atubang nin Dios paagi sa saiyang Aki.
Siisay an Tinubos?
Kun siring, siisay an nakikinabang sa pantubos? An mga tawo na nagtutubod sa probisyon na ini asin sa siring nagigin kaoyon nin Dios. Paagi sa maimbod na paglilingkod sa saiya, sinda puwedeng makabutas sa kasalan asin sa penalidad kaiyan na kagadanan patin umako nin buhay na daing sagkod.—Juan 17:3.
An enot na tawo makapagdedesisyon kun baga makuyog sa Dios o dai. Pinili nia an pagmasumbikal. “Si Adan dai nadaya,” kundi nagadan sia bilang tuyong parakasala. (1 Timoteo 2:14) Pero, kumusta man an mga gikan ni Adan? Puwede sindang pumili magsalang maglingkod sa Dios sa pinakamaaabot kan saindang bakong sangkap na abilidad o makisuway sa saindang Kaglalang.—Josue 24:15.
Si Jesus napadigdi tanganing “itao an saiyang kalag na pantubos karibay kan dakol.” (Marcos 10:45) Alagad ta siisay an “dakol”? Malinaw na puwera si Adan ta sia sangkap na tawo na tuyong pinili an pakisuway sa Dios asin nagadan bilang habong magsolsol, tuyong parakasala. Alagad kumusta man an dakula niang pamilya, na may bilang na rinibong milyon? Paagi sa katimbang na halaga, nababawi ni Jesu-Cristo an minanang pagkakondenar sa pamilya ni Adan. (Ikomparar an 1 Timoteo 2:5, 6.) Para sa “dakol” na nagtutubod, iinaaplikar ni Jesus an merito kan saiyang halagang pambalukat.
Kabilang sa tinubos na mga nagtutubod kapwa an mga Judio asin Hentil, o mga tawo kan mga nasyon. Sabi ni Pablo: “Kun paanong paagi sa sarong paglapas an bunga sa gabos na tawo iyo an silot, siring man paagi sa sarong gibo nin pagpapakangmatanos an bunga sa gabos na tawo iyo an pagpapahayag sa sainda na matanos para sa buhay.” (Roma 5:18) Paagi sa pagkagadan sa hariging pasakitan, “tinubos [an mga Judio] ni Cristo sa sumpa kan Pagboot paagi sa pagigin sumpa imbes na [sinda], huli ta nasusurat: ‘Isinumpa an lambang tawo na binitay sa harigi.’” (Galacia 3:13; Deuteronomio 21:23) Nananambitan kan Roma 4:11 an mga Hentil sa pagsabi kaiyan na mantang si Abraham, an apoon kan mga Judio, dai pa tinuri, sia nagin “ama kan gabos na igwa nin pagtubod mantang nasa dai pagkaturi.” Kun siring, an pantubos na atang ni Jesus nagtatao nin pakinabang sa nagtutubod na mga Judio asin Hentil.
An igagawe kan kada indibiduwal nagdedeterminar kun baga sia makikinabang sa atang ni Jesus. Kapareho ni Adan, an tuyong paragibo nin maraot dai pinipirit na magkamit kan merito kan pantubos asin kan buhay na daing sagkod. Arog kan sabi ni Cristo: “An nagtutubod sa Aki igwa nin buhay na daing katapusan; an nakikisuway sa Aki dai makakaheling nin buhay, kundi magdadanay sa saiya an kaanggotan nin Dios.” (Juan 3:36) Pinagigin posible man kan pantubos an pagkabuhay liwat para sa mga nagadan na nasa memorya nin Dios. (Juan 5:28, 29) Kun sinda mapatunayan na makinuyog asin mapag-apresyar, an pag-aplikar sa sainda kan mga pakinabang kan pantubos nangangahulogan na sinda mabubuhay sagkod lamang. Alagad para sa mga nabubuhay sa “huring mga aldaw” na ini, yaon an posibilidad na mabuhay sagkod lamang na dai na kaipuhan na magadan pa.—2 Timoteo 3:1-5; Mateo 24:3-14, 21, 34; Juan 11:25, 26.
Mga Dahelan na Magpasalamat
An siisay man na boot na makinabang sa pantubos dapat na magkaigwa nin hararom na pag-apresyar dian. Asin angay nanggad an siring na pagpasalamat! Total, an pantubos naghagad nin abundang pagkamoot nin Dios asin ni Cristo.
Si Jehova Dios nagpaheling nin dakulang pagkamoot sa pagtao kan pantubos paagi sa kagadanan kan saiyang Aki. Sabi ni Jesus: “An Dios namoot na gayo sa kinaban [nin katawohan] na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan. Huli ta an Dios nagsugo kan saiyang Aki sa kinaban, bakong tanganing sia maghokom sa kinaban, kundi tanganing ikaligtas an kinaban paagi sa saiya.” (Juan 3:16, 17) Dai daw nindo maninigong apresyaron an kapahayagan na ini kan pagkamoot nin Dios?
Orog pang horophoropon an rarom kan pagkamoot ni Jehova sa paggibo nin probisyon para sa pantubos. Bago isinugo sa daga an Aki nin Dios tanganing mabuhay asin magadan bilang sangkap na tawo, sia dati nang nabubuhay bago nagin tawo. Sia “an panganay sa gabos na linalang,” na paagi sa saiya “an gabos na iba pang bagay linalang sa kalangitan asin sa daga, an mga bagay na naheheling asin an mga bagay na dai naheheling.” (Colosas 1:13-16) Kanigoan an pagkamoot ni Jehova sa saiyang Aki! Minsan siring, dai isinugo nin Dios an kun siisay sana sa minilyon na matanos na mga anghel na pumadigdi sa daga. Kanigoan kadakula kan saiyang pagkamoot sa katawohan na isinugo nia an saiyang panganay na Aki.
Horophoropon man an hararom na pagkamoot na ipinaheling ni Jesus may koneksion sa pantubos. Bilang espiritung linalang sa langit, sia an “pangenot na trabahador” nin Dios. Totoo, “an mga bagay na kinaoogmahan [kan Aki nin Dios] iyaon sa mga aki nin mga tawo.” (Talinhaga 8:22-31) Pero, dai nagin madali para sa saiya na bayaan an langit, na may marahayon na kamugtakan kaiba kan saiyang Ama asin nin riniboribong matanos na mga anghel. Sa saiyang halangkaw na kamugtakan sa langit, naheheling kan Aki nin Dios an maraot na mga kamugtakan sa daga asin an danyos kan kasalan asin kagadanan sa katawohan. Aram man nia na an pagtao kan pantubos mangangaipo kan saiyang kagadanan. Pero, sia “buminaing sa sarong oripon asin nagin kaagid nin mga tawo. Orog pa kaiyan, . . . sia nagpakumbaba asin nagin makinuyog sagkod sa kagadanan.” Huli sa siring na kaimbodan, si Jesus binuhay sa mamuraway na langitnon na buhay. (Filipos 2:5-11) Kanigoan na pagkamoot an ipinaheling nia mapadapit sa pantubos! Inaapresyar daw nindo an ginibo ni Jesus?
Ano an Gigibohon Nindo?
An Ingles na prelado na si Richard na taga-Chichester (c. 1198-1253) sarong beses namibi na logod an mga lalaki asin babae “mamidbid si Jesu-Cristo nin mas malinaw, kamotan sia nin mas lipotok, asin sunodon sia nin mas tama.” An pantubos na atang ni Jesus tunay na nagtatao nin sarong marahay na dahelan na midbidon, kamotan, asin sunodon sia.
Kun bakong huli sa pantubos, bilang mga parakasala kita magagadan na mayo nin paglaom, ta “an sogod na nagbubunga nin kagadanan iyo an kasalan.” (1 Corinto 15:56) Kun siring, tanganing maligtas sa kagadanan na ibubunga huli ta kamo nasogod nin kasalan, ano an dapat nindong gibohon? Kaipuhan na pag-adalan nindo an probisyon nin Dios para sa kaligtasan paagi ki Jesu-Cristo. Dangan kaipuhan na ipaheling nindo na kamo nagtutubod sa pantubos. Paano? Paagi sa pagpaheling nin odok sa pusong pag-apresyar dian, pagdusay kan saindong sadiri sa Dios, asin pagsabi sa iba kan manongod sa makangangalas na probisyon na ini para sa kaligtasan.
Ibubugtak kamo kan dalan na ini na makabilang kan “dakulang kadaklan” na “nagluwas sa dakulang kahorasaan, asin hinugasan . . . an saindang mga gubing asin pinaputi iyan sa dugo kan Kordero,” si Jesu-Cristo. (Kapahayagan 7:9, 14) An paglaom ninda buhay na daing sagkod sa sarong daganon na paraiso. (Lucas 23:43) Iyo, asin puwede kamong makabilang sa maogmang kasararoan na iyan, kun an kagadanan ni Jesus bagay na talagang mahalaga sa saindo.
[Ritrato sa pahina 4]
An daing kasalan na si Jesus nasa kamugtakan na kapareho kan dating kamugtakan kan sangkap na si Adan
[Ritrato sa pahina 6]
Nasasabotan daw nindo an tunay na kahulogan kan kagadanan ni Jesus?