An Pantubos ni Cristo an Paagi nin Dios sa Pagliligtas
“An Dios namoot na gayo sa kinaban na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.”—JUAN 3:16.
1, 2. Iladawan an nagin masakit na kamugtakan may labot sa rasa nin tawo.
IMAHINARA na kamo may helang na seguradong matapos kan saindong buhay apuera sana kun kamo operaran. Ano an mamamatean nindo kun an bayad sa operasyon harayoon sa kaya nindo? Ano kun minsan an pinag-iribang kuarta kan saindong pamilya asin mga katood dai kayang bayadan iyan? Magigin nakapanluluya sa boot an mapaatubang sa siring na masakit na kamugtakan na nagsasapeligro kan buhay!
2 Ini nag-iilustrar nin sarong nagin kamugtakan mapadapit sa rasa nin tawo. An enot niatong mga magurang, si Adan asin Eva, linalang na sangkap. (Deuteronomio 32:4) Igwa sinda kan oportunidad na mabuhay sagkod lamang asin otobon an katuyohan nin Dios: “Pangagbunga asin pangagdakol kamo asin panoa nindo an daga patin sakopa nindo iyan.” (Genesis 1:28) Minsan siring, si Adan asin Eva nagrebelde tumang sa saindang Kaglalang. (Genesis 3:1-6) An saindang pakisuway nagbunga nin kasalan bako sanang ki Adan asin Eva mismo kundi pati sa saindang mga gikan na dai pa namumundag. An fiel na tawong si Job sa huri nagsabi: “Siisay an makakapaluwas nin tawong malinig hale sa tawong maati? Mayo ni saro.”—Job 14:4.
3. Paano nakalakop an kagadanan sa gabos na tawo?
3 Sa siring an kasalan garo helang na nakakontaminar sa lambang saro sa sato, ta sinasabi kan Biblia na “an gabos nagkasala.” An kamugtakan na ini may mga resultang nagsasapeligro kan buhay. Tunay nanggad, “an ibinabayad nin kasalan kagadanan.” (Roma 3:23; 6:23) Mayo sa sato na makalilikay dian. An gabos na tawo nagkakasala, huli kaini, an gabos na tawo nagagadan. Bilang mga gikan ni Adan, kita namundag sa masakit na kamugtakan na ini. (Salmo 51:5) “Paagi sa sarong tawo,” an isinurat ni Pablo, “an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” (Roma 5:12) Alagad ini dai nangangahulogan na kita mayo nin paglaom na makaligtas.
Paghale kan Kasalan Asin Kagadanan
4. Taano ta dai kayang haleon nin solo kan mga tawo an helang asin kagadanan?
4 Ano an kaipuhan tanganing haleon an kasalan asin an resulta kaiyan, an kagadanan? Malinaw nanggad, sarong bagay na labi sa kayang itao nin siisay man na tawo. An salmista nag-agrangay: “An bayad sa buhay nin tawo dakulaon. An kaya niang ibayad nungka na magigin igo na sia dai mapaduman sa lolobngan, na sia mabuhay sagkod lamang.” (Salmo 49:8, 9, Today’s English Version) Ipamugtak na tibaad mahimo niatong palawigon an satong buhay sa laog nin pirang taon paagi sa pagkakan na marahay sa salud asin medikal na pag-asikaso, pero mayo sa sato na kayang paomayan an satong minanang makasalan na kamugtakan. Mayo sa sato na kayang baliktadon an nakakapagpaluyang mga epekto kan paggurang asin ibalik an satong hawak sa pagkasangkap na orihinal na intension nin Dios para dian. Tunay nanggad na dai nagpapasobra si Pablo kan isurat nia na huli sa kasalan ni Adan, an linalang na mga tawo “ipinasakop sa kasayangan”—o arog kan pagkatradusir dian kan The Jerusalem Bible, “ginibo na dai makaabot sa katuyohan kaiyan.” (Roma 8:20) Pero, marahay sana ta dai kita inabandonar kan Kaglalang. Sia guminibo nin probisyon na haleon an kasalan asin kagadanan nin sararoan sana. Paano?
5. Paano an Ley na itinao sa Israel nagpapabanaag nin makosog na pagpahalaga sa hustisya?
5 Si Jehova “mamomoton sa katanosan asin hustisya.” (Salmo 33:5) An Ley na itinao nia sa Israel nagpapabanaag nin makosog na pagpahalaga sa pagkatimbang asin hustisyang mayong ipinaoorog. Halimbawa, sa laog kan grupong ini nin mga ley, mababasa niato na ‘buhay an maninigong ibayad sa buhay.’ Sa ibang pagtaram, kun an sarong Israelita may ginadan, an buhay nia kaipuhan na itao bilang karibay kan saiyang kinua. (Exodo 21:23; Bilang 35:21) Sa siring mababalanse an timbangan kan hustisya nin Dios.—Ikomparar an Exodo 21:30.
6. (a) Sa anong sentido na maaapod na paragadan si Adan? (b) Anong klaseng buhay an iwinara ni Adan, asin anong klaseng atang an kakaipuhanon tanganing mabalanse an timbangan nin hustisya?
6 Kan magkasala si Adan, sia nagin paragadan. Sa anong sentido? Sa bagay na ipamamana nia an saiyang makasalan na kamugtakan—asin huli kaini an kagadanan—sa gabos niang gikan. Huli sa pakisuway ni Adan na sa mismong oras na ini, an satong hawak nagluluya, daing ontok na minapasiring sa lolobngan. (Salmo 90:10) An kasalan ni Adan may mas seryoso pang kahulogan. Girumdoma, an iwinara ni Adan para sa saiya man sana asin sa saiyang mga gikan bakong ordinaryong buhay na mga 70 o 80 anyos sana. An iwinara nia sangkap na buhay—an totoo, buhay na daing katapusan. Kaya kun ‘buhay an maninigong mawara karibay nin buhay,’ anong klaseng buhay an kaipuhan na itao tanganing mapanigoan an hustisya sa kasong ini? Rasonable sana, iyan kaipuhan na sangkap na buhay nin tawo—buhay na, arog kan ki Adan, may potensial na mangaki nin sangkap na mga gikan na tawo. Kun idodolot bilang atang, an sangkap na buhay nin tawo bako sanang pagbabalansehon an timbangan nin hustisya kundi papangyayarihon man an biyong pagkawara nin kasalan asin kan resulta kaiyan, an kagadanan.
Pagbayad sa Danyos nin Kasalan
7. Sabihon kun ano an kahulogan kan terminong “pantubos.”
7 An bayad na kaipuhan tanganing makalda kita sa kasalan inaapod sa Biblia na “pantubos.” (Salmo 49:7) Sa Ingles an terminong “ransom” (sa Bicol, “pantubos”) puedeng ipanongod sa bayad na hinahagad nin sarong nagkidnap bilang karibay nin saro na saiyang kinidnap. Siempre, an pantubos na itinao ni Jehova mayong kalabot na pagkidnap. Pareho man sana an ideya nin pagtao nin bayad. Sa katunayan, an pormang berbo kan termino sa Hebreo na trinadusir na “pantubos” sa literal nangangahulogan “takopan.” Tanganing enmendaran an kasalan, an pantubos dapat na eksakto sa dapat na takopan kaiyan—an sangkap na buhay nin tawo ni Adan.
8. (a) Sabihon kun ano an prinsipyo nin pagbalukat. (b) Paano an prinsipyo nin pagbalukat may koneksion sa sato bilang mga parakasala?
8 Ini kaoyon nin sarong prinsipyo na yaon sa Ley ni Moises—an prinsipyo nin pagbalukat. Kun an sarong Israelita magin dukha asin ipabakal an saiyang sadiri sa kaoripnan sa sarong bakong Israelita, puede siang balukaton (o, tuboson) nin sarong paryente paagi sa pagbayad nin halaga na ibinibilang na kapantay sa halaga kan oripon. (Levitico 25:47-49) Sinasabi kan Biblia na bilang mga tawong bakong sangkap kita “oripon nin kasalan.” (Roma 6:6; 7:14, 25) Ano an kaipuhan tanganing mabalukat kita? Arog kan naheling niato, an pagkawara nin sarong sangkap na buhay nin tawo magkakaipo kan bayad na sarong sangkap na buhay nin tawo—daing sobra, daing kulang.
9. Paano si Jehova guminibo nin probisyon tanganing mabayadan an kasalan?
9 Siempre, kitang mga tawo namundag na bakong sangkap. Mayo ni saro sa sato na kapantay ni Adan; mayo ni saro sa sato na makababayad kan pantubos na hinahagad nin hustisya. Arog kan nasambitan sa kapinonan, garo kita may helang na nagsasapeligro kan buhay asin dai niato kayang bayadan an operasyon na makakapaomay kaiyan. Sa siring na situwasyon, dai daw kita magpapasalamat kun may mangoltanan para sa sato asin bayadan an kantidad? Ini an eksaktong ginibo ni Jehova! Guminibo sia nin probisyon na kaldahon kita sa kasalan, makasaro asin sagkod lamang. Iyo, andam siang itao sa sato an nungka niatong makakaya sa sato sanang sadiri. Paano? “An regalo na itinatao nin Dios,” an isinurat ni Pablo, “buhay na daing katapusan paagi ki Cristo Jesus na satong Kagurangnan.” (Roma 6:23) Ilinadawan ni Juan si Jesus bilang “an Kordero nin Dios na naghahale kan kasalan kan kinaban.” (Juan 1:29) Helingon niato kun paano ginamit ni Jehova an saiyang namomotan na marhay na Aki na pambayad sa pantubos.
“Katimbang na Pantubos”
10. Paano an mga hula mapadapit sa “banhi” napasentro ki Jose saka Maria?
10 Pagkatapos tolos kan pagrebelde sa Eden, ipinaisi ni Jehova an saiyang katuyohan na magpaluwas nin “banhi,” o aki, na matubos kan katawohan sa kasalan. (Genesis 3:15) Paagi sa serye nin mga kapahayagan nin Dios, sinabi ni Jehova kun arin na pamilya an luluwasan kan banhi. Pag-abot nin panahon, an mga kapahayagan na ini nasentro ki Jose saka Maria, magkatratong pakasal na nag-iistar sa Palestina. Sa sarong pangatorogan, sinabi ki Jose na si Maria bados paagi sa banal na espiritu. Sinabi kan anghel: “Sia mangangaki nin sarong lalaki, asin kaipuhan na apodon mo an saiyang ngaran na Jesus, huling ililigtas nia an saiyang banwaan sa saindang mga kasalan.”—Mateo 1:20, 21.
11. (a) Paano iinareglo ni Jehova na an saiyang Aki mamundag bilang sangkap na tawo? (b) Taano ta ikinatao ni Jesus an “katimbang na pantubos”?
11 Ini bako nanggad na ordinaryong pagbabados, ta si Jesus nabuhay na sa langit bago nagin tawo. (Talinhaga 8:22-31; Colosas 1:15) An saiyang buhay ibinalyo paagi kan milagrosong kapangyarihan ni Jehova pasiring sa matris ni Maria, na nagpangyari na an namomotan na marhay na Aki nin Dios na ini mamundag bilang tawo. (Juan 1:1-3, 14; Filipos 2:6, 7) Giniyahan ni Jehova an mga bagay tangani na si Jesus dai maulakitan kan kasalan ni Adan. Al kontraryo, si Jesus namundag na sangkap. Sa siring, igwa sia kan iwinara ni Adan—sangkap na buhay nin tawo. Sa katapustapusi, sarong tawo na kayang bayadan an danyos nin kasalan! Asin iyan an eksaktong ginibo ni Jesus kan Nisan 14, 33 C.E. Kan historikong aldaw na idto, nagpabaya si Jesus na gadanon kan mga kontra sa saiya, na paagi kaiyan nagtatao nin “katimbang na pantubos.”—1 Timoteo 2:6.
An Halaga nin Sangkap na Buhay nin Tawo
12. (a) Sabihon kun ano an importanteng pagkakalaen kan kagadanan ni Jesus asin kan ki Adan. (b) Paano si Jesus nagin an “Amang Daing Sagkod” nin makinuyog na katawohan?
12 May pagkakalaen an kagadanan ni Jesus asin an ki Adan—pagkakalaen na nagtatampok kan halaga kan pantubos. An kagadanan ni Adan maninigo, ta tuyo siang nakisuway sa saiyang Kaglalang. (Genesis 2:16, 17) Sa kabaliktaran, an kagadanan ni Jesus biyong dai maninigo, ta “dai sia nakaginibo nin kasalan.” (1 Pedro 2:22) Kaya kan si Jesus magadan, sia igwa nin bagay na dakulaon an halaga na mayo sa parakasalang si Adan kan ini magadan—an diretso sa sangkap na buhay nin tawo. Sa siring, may halagang pan-atang an kagadanan ni Jesus. Pagkasakat sa langit bilang espiritung persona, iprinesentar nia ki Jehova an halaga kan saiyang atang. (Hebreo 9:24) Sa paggibo kaiyan, binakal ni Jesus an makasalan na katawohan asin sia nagin saindang bagong Ama, kasalida ni Adan. (1 Corinto 15:45) May marahay na dahelan, si Jesus inaapod na “Amang Daing Sagkod.” (Isaias 9:6) Isip-isipa an kahulogan kaini! Si Adan, sarong makasalan na ama, nagpalakop nin kagadanan sa gabos niang gikan. Si Jesus, sarong sangkap na Ama, ginagamit an halaga kan saiyang atang sa pagtao nin buhay na daing sagkod sa makinuyog na mga tawo.
13. (a) Iilustrar kun paano kinanselar ni Jesus an nagin utang ni Adan. (b) Taano an atang ni Jesus ta dai nakababayad sa kasalan kan enot niatong mga magurang?
13 Pero paano an kagadanan nin saro sanang tawo makababayad sa mga kasalan nin dakol? (Mateo 20:28) Sa sarong artikulo nagkapirang taon na an nakaagi, iinilustrar niato nin arog kaini an pantubos: “Imahinara an sarong dakulang pabrika na ginatos an empleyado. Pinierde nin sarong madayang manedyer kan pabrika an negosyo; nagsirra an pabrika. Ginatos ngonyan an mayong trabaho asin dai nakakapamayad kan saindang mga utang. An saindang agom, mga aki, asin, iyo, mga inutangan gabos nagdudusa huli sa karatan kan sarong tawong iyan! Dangan uya may sarong mayaman na paratabang na binayadan an utang kan kompanya asin binuksan liwat an pabrika. An pagkanselar kan sarong utang na iyan nagtatao man nin lubos na pakaginhawa sa dakol na empleyado, sa saindang mga pamilya, asin sa mga inutangan. Alagad nakakapakikabtang daw sa bagong prosperidad an orihinal na manedyer? Dai, sia nasa karsel asin sa siring permanente nang hinale sa saiyang trabaho! Kaagid kaiyan, an pagkakanselar kan sarong utang ni Adan nagtatao nin pakinabang sa minilyon niang gikan—alagad bakong ki Adan.”
14, 15. Taano ta maaapod na tuyong mga parakasala si Adan asin Eva, asin paano an satong kamugtakan laen sa kamugtakan ninda?
14 Ini rasonable. Girumdoma, si Adan asin Eva tuyong mga parakasala. Ginusto nindang makisuway sa Dios. Sa kabaliktaran, kita namundag sa kasalan. Mayo kita nin maginibo. Gurano man an pagmamaigot niato, dai kita biyong makalilikay sa pagkakasala. (1 Juan 1:8) Kun beses tibaad an pagmate niato arog ni Pablo, na nagsurat: “Kun boot kong gibohon an tama, an maraot iyo an yaon sa sako. Tunay na ako naoogma sa ley nin Dios segun sa sakong pagkatawo sa laog, alagad nakaheheling ako sa mga kabtang kan sakong hawak nin saro pang ley na nakikilaban sa ley kan sakong isip asin dinadara akong bihag kan ley nin kasalan na yaon sa mga kabtang kan sakong hawak. Herak man sa sako!”—Roma 7:21-24.
15 Pero, huli sa pantubos, kita may paglaom! Si Jesus an banhi na paagi sa saiya, arog kan ipinanuga nin Dios, “an gabos na nasyon sa daga magbebendisyon nanggad kan saindang sadiri.” (Genesis 22:18; Roma 8:20) An atang ni Jesus nagbubukas kan pinto pasiring sa marahayon na mga oportunidad para sa mga nagtutubod sa saiya. Estudyaran niato an nagkapira kaini.
Pagkinabang sa Pantubos ni Cristo
16. Sa ibong kan satong makasalan na kamugtakan, anong mga pakinabang an puede niatong kamtan ngonyan huli sa pantubos ni Jesus?
16 Rinerekonoser kan kagsurat kan Biblia na si Santiago na “kita gabos nasisingkog nin dakol na beses.” (Santiago 3:2) Minsan siring, huli sa pantubos ni Cristo, napatatawad an satong mga sala. Isinurat ni Juan: “Kun an siisay man makaginibo nin kasalan, igwa kita nin parasurog sa Ama, si Jesu-Cristo, sarong matanos. Asin sia sarong pampagian nin boot na atang para sa satong mga kasalan.” (1 Juan 2:1, 2) Siempre, dai kita maninigong magin indiperente sa kasalan. (Judas 4; ikomparar an 1 Corinto 9:27.) Minsan siring, kun kita napapasala, puede niatong ipahayag nin biyo ki Jehova an nasa satong puso, na kompiado na sia “andam na magpatawad.” (Salmo 86:5; 130:3, 4; Isaias 1:18; 55:7; Gibo 3:19) Sa siring pinapangyayari kan pantubos na kita makapaglingkod sa Dios na may malinig na konsensia asin pinagigin posible na kita dumolok sa saiya sa pamibi paagi sa ngaran ni Jesu-Cristo.—Juan 14:13, 14; Hebreo 9:14.
17. Huli sa pantubos, anong mga bendisyon sa ngapit an posible?
17 An pantubos ni Cristo nagbubukas kan dalan para sa kaotoban kan katuyohan nin Dios—na an makinuyog na mga tawo mabuhay sagkod lamang sa Paraiso digdi sa daga. (Salmo 37:29) Si Pablo nagsurat: “Minsan gurano kadakol kan mga panuga nin Dios, an mga iyan nagin Iyo paagi sa saiya [si Jesus].” (2 Corinto 1:20) Totoo, an kagadanan “namahala bilang hade.” (Roma 5:17) An pantubos nagtatao nin basehan na paraon nin Dios an “ultimong kaiwal” na ini. (1 Corinto 15:26; Kapahayagan 21:4) An pantubos ni Jesus puede pa nganing pakinabangan kan mga nagadan. “An oras maabot,” sabi ni Jesus, “na an gabos na nasa mga lolobngan na girumdoman makadadangog kan saiyang [ni Jesus] tingog asin maruluwas.”—Juan 5:28, 29; 1 Corinto 15:20-22.
18. Ano an nagin makaturotristeng epekto sa mga tawo kan kasalan, asin paano ini babaliktadon sa bagong kinaban nin Dios?
18 Isip-isipa kun gurano kanakaoogmang marhay na maeksperyensiahan an buhay siring sa intension para dian—mayo kan mga kahaditan na nakapagagabat sa sato ngonyan! An kasalan ginibo kitang bako nang kaoyon bako sanang nin Dios kundi pati kan sato mismong isip, puso, asin hawak. Minsan siring, ipinanunuga kan Biblia na sa bagong kinaban nin Dios, “mayo nin nag-eerok na masabi: ‘Naghehelang ako.’” Iyo, an pisikal asin emosyonal na mga helang dai na mandadamat sa katawohan. Taano? Minasimbag si Isaias: “An mga tawo na nag-eerok sa daga iyo an mga pinatawad sa saindang kasalan.”—Isaias 33:24.
An Pantubos—Sarong Kapahayagan nin Pagkamoot
19. Ano an maninigo na magin reaksion kan lambang saro sa sato sa pantubos ni Cristo?
19 Pagkamoot an nagpahiro ki Jehova na isugo an saiyang namomotan na marhay na Aki. (Roma 5:8; 1 Juan 4:9) Pagkamoot man an nagpahiro ki Jesus na “magnamit nin kagadanan para sa lambang tawo.” (Hebreo 2:9; Juan 15:13) May marahay na dahelan, isinurat ni Pablo: “Itinutulod kami kan pagkamoot na yaon sa Cristo . . . Sia nagadan para sa gabos tanganing idtong mga nabubuhay dai na mabuhay para sa sainda man sana, kundi para sa saiya na nagadan para sa sainda asin binuhay liwat.” (2 Corinto 5:14, 15) Kun inaapresyar niato an ginibo ni Jesus para sa sato, kita mapaheling nin marahay na reaksion. Total, pinagigin posible kan pantubos na kita isalbar sa kagadanan! Daing duwa-duwa na habo niato na iparisa paagi sa satong mga gawe-gawe na ibinibilang niatong ordinaryo sana an atang ni Jesus.—Hebreo 10:29.
20. Ano an nagkapirang paagi na dian inootob niato an “tataramon” ni Jesus?
20 Paano niato ikapaheheling an odok sa pusong pag-apresyar sa pantubos? Dai nahaloy bago an pag-arestar sa saiya, si Jesus nagsabi: “Kun an siisay man namomoot sa sako, ootobon nia an sakong tataramon.” (Juan 14:23) Kaiba sa “tataramon” ni Jesus an pagboot nia na kita magkaigwa nin maigot na kabtang sa pag-otob kan sugo: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda.” (Mateo 28:19) Hinahagad man kan pagkuyog ki Jesus na kita magpaheling nin pagkamoot sa satong mga tugang sa espirituwal.—Juan 13:34, 35.
21. Taano ta maninigo kitang mag-atender sa selebrasyon nin Memorial sa Abril 1?
21 An saro sa pinakamarahay na paagi na kita makapagpapaheling nin pag-apresyar sa pantubos iyo an pag-atender sa Memorial kan kagadanan ni Cristo, na ngonyan na taon gigibohon sa Abril 1.a Ini kabtang man kan “tataramon” ni Jesus, ta kan ineestablisar an selebrasyon na ini, pinagbotan ni Jesus an saiyang mga parasunod: “Padagos na gibohon nindo ini sa paggirumdom sa sako.” (Lucas 22:19) Paagi sa pag-atender niato sa pinakamahalagang okasyon na ini asin paagi sa alisto niatong pag-atento sa gabos na ipinagboot ni Cristo, ipaheheling niato an marigon niatong kombiksion na an pantubos ni Jesus iyo an paagi nin Dios sa pagliligtas. Totoo nanggad, “mayo nin kaligtasan sa siisay pa man na iba.”—Gibo 4:12.
[Nota sa ibaba]
a Ngonyan na taon, an Abril 1 katimbang kan Nisan 14, 33 C.E., an petsa na si Jesus nagadan. Ihapot sa Mga Saksi ni Jehova sa lokal an oras asin lugar kan selebrasyon nin Memorial.
Nagigirumdoman daw Nindo?
◻ Taano ta dai maeenmendaran nin mga tawo an saindang makasalan na kamugtakan?
◻ Sa anong paagi na si Jesus “katimbang na pantubos”?
◻ Paano ginamit ni Jesus an saiyang diretso sa sangkap na buhay nin tawo para sa bentaha niato?
◻ Anong mga bendisyon an napapasa katawohan huli sa pantubos ni Cristo?
[Retrato sa pahina 15]
Solamente sangkap na tawo—an katumbas ni Adan—an makakapabalanse kan timbangan nin hustisya
[Retrato sa pahina 16]
Mantang si Jesus may diretso sa sangkap na buhay nin tawo, an saiyang kagadanan may halagang pan-atang