Introduksiyon

An Mga Teksto Para sa Kristiyanong Pamumuhay matabang saimo para madaling makahanap nin mga teksto asin mga halimbawa sa Bibliya na makakatabang saimo na makayanan an mga kasakitan na inaagihan mo. Makakatabang man ini saimo na makahanap nin angay na mga teksto sa Bibliya para mapakusog an iba asin tabangan sinda na makagibo nin mga desisyon na magtataong onra ki Jehova. Hanapon an topikong kaipuhan mo, dangan gamiton bilang giya an mga hapot asin haralipot na sumaryo kan mga halimbawa sa Bibliya. (Hilingon an kahon na “Kun Paano Gagamiton an Publikasyon na Ini.”) Makakahanap ka tulos nin dakul asin kapaki-pakinabang na konseho, giya, asin karangahan hali sa Tataramon nin Diyos. Makakakua ka man nin espirituwal na mga kayamanan na puwede mong ihiras sa iba—mga teksto sa Bibliya na makakaranga sa sainda, makakatabang sa mga problema ninda, asin makakatao sainda nin konseho saka pampakusog nin buot.

Kun Paano Gagamiton an Publikasyon na Ini

Para mahanap an sarong topiko, puwede mong gamiton an search box, o puwede kang maghanap sa mga kategoriya. An Mga Teksto Para sa Kristiyanong Pamumuhay nababanga sa pitong mahiwas na kategoriya: Espirituwalidad, Kongregasyon, Kuwalidad, Mga Kadipisilan, Paggawi, Pamilya, asin Pang-aroaldaw na Buhay. Puwede mong makua an topiko na hinahanap mo sa saro sa mga kategoriyang iyan. Pilion an angay na kategoriya, dangan i-scroll pababa an nakalistang mga topiko. Pero, kun dai ka sigurado kun sain na kategoriya makukua an topikong hinahanap mo, i-click an Gabos dangan magpili sa nakalistang mga topiko. Sa irarom kan kada topiko, makakahiling ka nin naka-bold na mga titulo. An iba mga frase; an iba mga hapot. Mantang binabasa mo an naka-bold na sitadong mga teksto kasunod kan titulo, pag-isipan asin hurop-hurupon kun paano kaiyan sinusuportaran an frase o kun paano kaiyan sinisimbag an hapot. Sa nagkapirang pagkakataon, an sarong topiko binaranga sa mga subsection para tabangan kang mahiling tulos an impormasyon na hinahanap mo. Igwa kun minsan nin nakalaag na “Hilingon man” para sa dugang pang mga teksto. Nagtatao iyan nin mga punto na konektado sa topiko. Sa dakul na pagkakataon, may mahihiling kang mga “Halimbawa sa Bibliya.” Dangan may sentence na nag-iintrodusir kan panginot na punto o leksiyon sa sitadong teksto. Gigiyahan ka kan sentence na iyan kun anong punto an dapat mong pag-isipan mantang binabasa mo an teksto.

Dai nakalista sa publikasyon na ini an gabos na teksto mapadapit sa sarong topiko. Pero marahayon ining pantabang sa pagpupuon kan saimong pagsiyasat. (Tal 2:1-6) Para sa urog pang pagsiyasat, gamiton an mga marginal reference asin study note sa New World Translation of the Holy Scriptures. Gamiton an Giya sa Pag-research Para sa Mga Saksi ni Jehova o an Watch Tower Publications Index para urog pang pag-adalan an kahulugan kan sarong teksto o an aplikasyon kaiyan. Gamiton an pinakabagong mga publikasyon para masigurado na an pinakabagong pakasabot sa mga katotoohan sa Kasuratan an makukua mo.

Lugod na an Mga Teksto Para sa Kristiyanong Pamumuhay makatabang saimo na manumpungan an kadunungan, kaaraman, asin pakasabot na yaon sa Banal na Kasuratan. Mantang ginagamit mo an publikasyon na ini, mas lalo ka pang makukumbinsir na “an tataramon nin Diyos buhay asin igwa nin puwersa.”—Heb 4:12.