Akoon an Tabang nin Dios Tanganing Mapangganahan an Hilom na mga Kasalan
“Igwa ako kan kosog para sa gabos na bagay huli sa saiya na nagtatao nin kapangyarihan sa sako.”— FILIPOS 4:13.
1. Anong pakiolay an ginibo nin sarong nariribokar na ama?
AN LALAKI igwang helang na subisubi.a Nagsabo an saiyang ngoso, nagtotoog, asin kun beses napupukan sa tubig o sa kalayo. An saiyang nahahadit na ama hinanap an lalaki na midbid sa pagbolong kan mga may helang. Kan marisa na igwa nin kakulangan sa pagsarig sa nagbobolong, an ama nagkurahaw: “Nagtutubod ako! Tabangi ako kun saen ako nagkulang nin pagtubod!”
2. Paano niato masisiguro na gusto nin Dios na tumabang sato na mapangganahan an mga kasalan?
2 Makakanood kita sa amang ini na naghagad kan tabang ni Jesus. Inako kan lalaki na an saiyang pagtubod tibaad igwang diperensia; sierto man nia na si Jesus gustong tumabang. Puwedeng mangyari man iyan sa sato mantang inaatubang niato an satong sadiring mga kasalan—maski pa an mga hilom—asin gibohon na mapangganahan iyan. Makakasarig kita na gusto ni Jehova Dios na tumabang sato, siring na tinabangan nia an iba kaidto. (Ikomparar an Marcos 1:40-42.) Halimbawa, tinabangan nia si apostol Pablo na atubangon an mga kasalan na minagikan sa kaigwahan o kadaihan. An nagtitios na tawo tibaad magmawot nin kayamanan; an nagigin kaluyahan nin sarong mayaman na tawo tibaad sobrang pagtiwala sa saiyang kapangganahan asin minimenos an dukha. (Job 31:24, 25, 28) Paano daw nalikayan o napangganahan ni Pablo an siring na mga kasalan? Sinasabi nia: “Igwa ako kan kosog para sa gabos na bagay huli sa saiya na nagtatao nin kapangyarihan sa sako.”—Filipos 4:11-13.
3. Taano ta madonong na hingoahon niatong madaog an satong mga kaluyahan?
3 An paghagad nin kosog sa Dios, madonong na dadaogon an satong mga kasalan, dai iyan pagpalimanlimanan huli sana ta tibaad sa presente hilom. An salmista nagsabi ki Jehova: “Huli ta naaaraman nia an mga sekreto kan puso.” (Salmo 44:21) Kun dai niato daogon an satong mga kasalan, puwedeng lumataw iyan sa orog niatong ikakaraot. An prinsipyo minaaplikar: “An mga kasalan nin nagkapira nahahayag sa dakol, na nagdadara tolos nin silot, alagad sa iba an saindang mga kasalan nahahayag man sa huri.” (1 Timoteo 5:24) Siyasaton niato an duwang komon na kasalan na nangangaipong tawan nin atensyon nin mga Kristiano na boot makapaoyon ki Jehova.
Sarong Hilom na Kasalan Kalabot an Sekswal na Horot
4, 5. (a) Anong balanseng pagmansay an ipinapaheling kan Biblia sa sekswal na horot? (b) Anong mga patanid na makukua niato sa Kasuratan dapit sa sekswal na horot?
4 Saro sa pinakamarahay na regalo nin Dios iyo an pag-agom, kaiba an kakayahan asin pagmawot na magdakol. (Genesis 1:28) Natural asin malinig an sekswal na mawot sa tahaw nin pag-inagoman. Inoomaw kan Biblia an pakakua nin sekswal na kaogmahan sa magagom. (Talinhaga 5:15-19) Minsan siring, an sekswal na pagkagusto dai puwedeng daing kontrol. Sa pagkomparar, isipa an satong mawot sa pagkakan. Na huli sa igwa kita nin maganang apetito dai nangangahulogan na magkaigwa kita nin dai mapogolan na pagmawot sa kakanon, o na dai na nakokontrol sa kun noarin, saen, asin kun paano makakan.—Talinhaga 25:16, 27.
5 Si Pablo puwedeng nakapagagom na, asin aram nia na an normal na sekswal na kapahayagan angay sa tahaw nin magagom. (1 Corinto 7:1-5) Kaya igwa siang ibang boot sabihon kan sia magsurat: “Kaya gadanon nindo an mga kabtang kan saindong hawak na yaon sa ibabaw kan daga kun dapit sa pakikisaro, karigsokan, sekswal na horot, maraot na mawot, asin kaaraan.” (Colosas 3:5) Boot niang sabihon sekswal na kapahayagan na lihis sa tamang pagkamugtak sa pag-agom asin mga paagi. An apostol nagsabi pa: “An lambang saro sa saindo makanood na magkapot sa saiyang sadiring lalagan sa kabanalan asin kagalangan, bakong sa maaraon na horot sa sekso.” (1 Tesalonica 4:4, 5) Ining prangka, ipinasabong na sadol kaipuhan pareho sa may agom asin daing agom na mga Kristiano.
6. Taano ta tamang likayan nin mga Kristiano an pag-abuso sa sadiri?
6 Sarong paagi na an siring na “mawot nin makahayop na horot” (1 Tesalonica 4:5, The New Testament for English Readers, ni Henry Alford) parate ikinakaluwas paagi sa pagpaagresibo kan saiyang sekswal na organo para sa kasingawan na imbuwelto. Inaapod ining masturbasyon, o pag-abuso sa sadiri. Ini uso sa tahaw nin mga daing agom na lalaki asin mga babae. Alagad ini ginigibo man nin dakol na may agom na. An kausohan kaiyan naggiya sa dakol na doktor na magsabing iyan normal asin kaipuhan pa ngani. Minsan siring, an gibong ini minakontra sa sadol nin Dios tumang sa “maaaraon na horot sa sekso.” Orog na maaapresyar niato kun taano, asin taano an mga Kristiano ta dapat daogon an gaweng ini, paagi sa paghorophorop sa nagkapirang sadol na itinao ni Jesus.
7. Paano an Mateo 5:28 nagtatao nin dagdag na rason na maglikay sa masturbasyon?
7 Si Jesus nagsabi: “An siisay man na magparaheling sa sarong babae na may pagkaara sa saiya nagsasambay na sa saiya sa saiyang puso.” (Mateo 5:28) Aram nia na an malaswang mga kaisipan nin pagsambay parate na minagiya sa mga inmoral na mga gibo. Alagad, minsan an nagpapakangmatanos sa masturbasyon minaako na iyan parate minaimbuwelto nin sekswal na pantasya. Pakasambita kan “pagtaong atensyon sa pagmate na itinatao nin masturbasyon,” sa mga hobenes an librong Talking With Your Teenager nagdagdag: “Puwedeng imahinaron ninda na yaon sinda sa malaswang sekswal na kamugtakan o na kadorog nin kasekso o nin mas gurang na mga tawo arog kan maestra, partedaryos, minsan [mga magurang]. Tibaad igwang pantasya sinda dapit sa sekswal na kadahasan. Gabos kaini absolutong normal.” Alagad iyan daw? Paano ikakabilang nin mga Kristiano an siring na pantasya asin masturbasyon na “normal” sa liwanag kan patanid ni Jesus dapit sa ‘pagsambay sa puso’ o sa sadol ni Pablo tumang sa “maaraon na horot sa sekso”? Dai, an siring na mga pantasya o pag-abuso sa sadiri—magin man nin hoben o nin may edad na, nin sarong daing agom o may agom—kaipuhan na daogon.
Pagdaog Kaining Pribadong Kasalan
8, 9. Sa pagpahalaga nin anong mga katunayan makakatabang sa sarong tawo na mahale an gawe nin masturbasyon?
8 Kun an sarong Kristiano igwa kaining sekretong kasalan, ano an magigibo tanganing madaog iyan, “na an lambang saro saindo makanood sa saiyang sadiring lalagan sa kabanalan asin sa kagalangan”? (1 Tesalonica 4:4) Paagi sa saiyang tataramon nagtatao an Dios nin mahalagang tabang.
9 Enot mahalaga na midbidon na si Jehova igwa nin mga pamantayan. Liniwanag nia an kasalaan nin pakipagsekso sa luwas nin paginagoman, an pakikisaro asin pagsambay. (Hebreo 13:4) Kaya, kun nagtutubod kita na an saiyang dalan iyo an pinakamarahay, hahanapon niato an nakakakontentong mga balos nin sekswal na kapahayagan sa laog sana nin paginagoman. (Salmo 25:4, 5) An librong Adolescence, ni E. Atwater, nagsasabi na an masturbasyon, parateng ipinapahayag nin mga hobenes an ‘pagkasilensyo, kasupganan asin pagduwaduwa.’ Sarong rason na itinao iyo na ‘an pagkadayupot nin relasyon sa pagkamoot na sinusondan nin sekswal na pagdorog nawawara sa masturbasyon.’ Iyo, igwa nin pakinabang na pogolon an sekswal na horot sagkod na dai ikapahayag sa mamomoton na relasyon nin pagagom.
10. Ano an nagkapirang lakdang an puwedeng gibohon nin saro tanganing matabangan sia na mapangganahan an siring na gibo?
10 Nagtatao nin dagdag na tabang an tataramon nin Dios sa pagsadol: ‘Ano man an totoo ano man na seryosong bagay, ano man na matanos, ano man na malinig, ano man na makawiwili, ano man na marahay na dangog, ano man na marahay asin ano man na inoomaw, padagos na horophoropon an mga bagay na ini.’ (Filipos 4:8) Malinaw, an erotikong mga retrato asin inmoral na mga nobela bakong ‘malinig asin marahay an dangog o maoomaw.’ Alagad an mga bagay na ini iyo an parateng paborito nin mga masturbador. An siisay man na determinado na daogon an kasalan na ini kaipuhan, absolutong likayan an erotikong mga herelingon. Napatunayan nin eksperiyensya na kun an horot nin tawo magpoon na mabotong pasiring sa erotikong paagi na dating naholog sa masturbasyon, an determinadong konsentrasyon sa matanos asin malinig makakapakulpa sa siring na mga horot. Lalong importante ini kun an saro nagsosolo o nasa madiklom, na dian an hilom na kasalan parateng mangyari.b—Roma 13:12-14.
11. Isaysay an dagdag pang mga bagay na napatunayan na kapakipakinabang sa pag-atubang kan kasalan na ini?
11 Makakatabang pa iyo an pagdanay na aktibo, na konektado sa sadol na: “Kaya magmaan kamong marahay na an sindong paglakaw bakong siring sa mga mangmang kundi siring sa mga madonong, na tinutubos an panahon para sa saindo man sana, huli ta an mga aldaw maraot.” (Efeso 5:15, 16) Humagad nin mga suhestiyon sa sarong maygurang na Kristianong pinagtitiwalaan dapit sa positibong mga bagay na gigibohon. (Isaias 32:2) Inako nin dakol na nandaog sa kasalan na ini an pagkaigwa nin nangungunlabot na Kristiano na nagmamanman sa saindang pag-oswag nakatabang na mahaman an pagpopogol sa sadiri. Siyempre, an Saro na magigin pinakadayupot na pinagtitiwalaan iyo si Jehova. Kaya mahalaga na dumolok saiya sa pamibi, na hagadon an saiyang tabang. (Filipos 4:6, 7) Kun an saro na haloy nang linalabanan an kasalan na ini “masingkog,” makakahagad sia sa Dios nin kosog, dangan mababago nia an saiyang mga paghihingoa asin manggana giraray, nin mas halawig na panahon.—Hebreo 12:12, 13; Salmo 103:13, 14.
Paglaban sa Dai Tamang Paggamit nin Alkohol
12. Ano an pagmansay nin mga Kristiano sa mga inomon na de alkohol?
12 ‘An arak nagpapaogma sa Dios asin sa mga tawo,’ olay nin sarong bersikulo sa Biblia. (Hokom 9:13) Tibaad maoyon kamo, huli ta an mga inomon na de alkohol nakakatabang sa pagrelaks asin gikanan nin kaogmahan para sa kadaklan. (Salmo 104:15) Minsan siring, igwa nin makontra, na an paggamit nin alkohol nagbubugtak nin pisikal asin moral na peligro. Sarong mayor na problema iyo an tuyong pagburat. An kasalan na ini seryosong gayo na pinapatanidan nin Dios an mga paraburat na puwedeng matiwalag sa kongregasyon asin iluwas sa Kahadean. (1 Corinto 5:11-13; Galacia 5:19-21) Minamaanan nin mga Kristiano ini asin maoyon na sinda dapat maglikay sa pagkaburat. Alagad, apuwera sa kaburatan, paano puwedeng an alkohol magin sarong hilom na kasalan.
13. Iilustrar kun paano nagpopoon an pagkadepende sa alkohol.
13 An Kristiano makakainom nin tamang-tama, alagad igwa pa nin seryosong kasalan. Horophoropa an eksperyensia nin sarong lalaki na aapodon niatong Heinz.
Sia, an saiyang agom, asin mga aki nagin tunay na mga Kristiano asin aktibong gayo sa lokal na kongregasyon. Nag-abot an panahon na si Heinz inapuwentaran bilang magurang asin minidbid bilang sarong harigi sa tahaw kan mga kongregasyon sa siudad. (Galacia 2:9) Maliwanag, napaatubang sia sa pangigipit sa pagpadakula kan saiyang pamilya asin nagkapirang kahaditan asin pagasikaso kan aripompon. (2 Corinto 11:28) An saiyang trabaho, siring man, nagdara saiya nin grabeng paghadit huli ta an kompaniya na pinagtatrabawohan nia nagdadakula, asin gusto kan amo asikasohon nia an dakol na mga problema asin mga desisyon.
Hadit na gayo si Heinz sa laog nin dakol na banggi. Nanompongan nia na an saro o an duwang lagok nakakatabang saiya na magrelaks. Siyempre, bilang maygurang na Kristiano maingat na lilikayan nia an sobrang paginom o kaburatan. Minsan ngani igwa sia nin inomon sa pagrelaks kun banggi, dai na kaipuhan an alkohol kun aldaw, ni na minainom sia sa lambang pagkakan. Bako sia midbid na ‘makiarak.’—1 Timoteo 3:8.
Sa dai linalaoman si Heinz naospital para sa sarong komon na operasyon. Naglataw an pambihirang mga sintomas. An causa? Madaling nadeterminaran kan mga mediko na si Heinz nakakaeksperyensia nin sintomas na bunga nin pag-inom. Iyo, an saiyang hawak nagin nang depende sa alkohol. Nagin surpresa ini sa pamilya, alagad pinalibotan sia ninda asin sinuportaran an saiyang desisyon na totalmenteng likayan an alkohol.
14. Ano an puwedeng gumiya na pagolog-ologon nin mga inomon na de alkohol?
14 Namate nin iba na an alkohol nakagibo nin panbihirang trabaho sa saindang buhay, kaya itinatago ninda an saindang paginom, na habong maaraman nin pamilya asin mga kaamigo kun gurano kadakol an saindang maiinom o gurano kaparate. Tibaad dai mamatean nin iba na sinda depende sa alkohol, padagos, an paginom nagigin punteriya kan saindang aldaw. Sa ano man na okasyon an mga nasa kategoriyang ini namumugtak sa grabeng peligro nin sobrang pag-inom o sa pagigin natatagong mga alkoholiko. Horophoropa an talinhagang ini: “An arak paraolog-olog, an nakakaburat na arak paraparibok asin gabos na nalalagalag huli kaiyan bakong madonong.” (Talinhaga 20:1) An punto iyo na an paginom nin sobra nagigin causa sa saro na magin maribok asin paraolog-olog. Minsan siring, tibaad olog-ologon nin arak an saro sa ibang sentido. An saro magaako nin pagologolog kun iniisip nia na an saiyang paginom natatago sa Dios.
15. Paano daw minaaplikar an mga tataramon ni Pablo sa 1 Corinto 9:24-27 sa Kristiano sa paggamit nin alkohol?
15 Saro sa mga bunga nin espiritu nin Dios iyo an pagpopogol sa sadiri, asin kaipuhan niato iyan sa gabos na kabtang nin buhay. (Galacia 5:22, 23) Iinagid ni Pablo an Kristiano sa sarong paradalagan. Sa normal na paorombasan an paradalagan “nagpopogol sa gabos na bagay” tangani sanang “makakua nin malalapaon na korona.” Siring man an Kristiano kaipuhan magpaheling nin “pagpopogol sa gabos na bagay” tanganing kamtan an mas mahalagang premyo—BUHAY. Idinoon ni Pablo na kaipuhan na ‘oriponon niato an satong hawak’ tanganing masiguro ‘na pakatapos na makapaghulit sa iba kita mismo dai isikwal minsan sa ano man na paagi,’ dahel sa hilom na kasalan na may labot sa alkohol.—1 Corinto 9:24-27.
16. Paano maaraman nin saro kun baga an alkohol nagigin nang kasalan sa saiyang kaso?
16 Ano an makakatabang sa Kristiano na mapangganahan an kasalan na ini? Makakatabang na apresyaron na maski tinatago nin parainom sa ibang tawo an saiyang ginigibo, dai nia iyan natatago sa Dios. (1 Corinto 4:5) Kaya, sa pagheling nin Dios—sadiosan na isipon nin saro an saiyang ugale sa paginom. (Boot niatong sabihon an paginom para sa pagaling-aling o pagpasawa, bako sanang dikit siring sa ordinaryong inomon sa pagkakan.) An iba tibaad magsabi, ‘Alagad dai ako kaipuhan uminom. Gusto ko sana; nakakarelaks iyan sako. Puwede akong dai uminom kun gusto ko.’ Bueno, kun dapit sa potensyal na peligro nin sobrang paginom o pagsarig sa arak, taano ta dai gibohon iyan sa laog nin saro o duwang bulan? O, mantang makosog an tendensia na paindahan na igwa nin problema, kun nagigin ugale an pag-inom gibohon nin sarong bulan na dulagan iyan sa gabos na panahon. Halimbawa, an tawo na parateng igwang inomon pakatapos nin trabaho, bago magtorog, o sa mga katiriponan puwedeng gibohon iyan. Kun siring maaraman nia kun ano an saiyang pagmate. Kun depisil iyan, o ‘dai na basta narerelaks,’ igwa sia nin seryosong kasalan.
17. Taano an Kristiano na igwa nin natatagong kasalan na may labot sa alkohol ta kaipuhan na hingoahon na madaog iyan?
17 Kun marealisar nin sarong sinserong Kristiano sa atubang nin Dios na igwa sia nin kasalan may labot sa alkohol, magigin pasil na mapangganahan iyan. Tibaad aram na nia na sinasabi kan Biblia na ‘sarong kamangmangan’ an magrason na an ‘hinabonan na tubig mahamis, asin an tinapay [o alkohol] na kinakan sa tago managom.’ Minsan siring, an Talinhaga nagsasabi na an siring maabot sa dai malilikayan na kagadanan. Al kontraryo, an tawong madonong namomoot sa pagsagwe, asin maogmang ‘binabayaan an mga kablas asin nagdadanay na buhay sa paglakaw nin matanos sa dalan nin pakasabot.’ (Talinhaga 9:1, 6, 8, 13-18) Iyo, an Dios nagtatao pa nin dagdag na tabang tanganing mapangganahan an hilom na mga kasalan paagi sa pagpasabot sa kun ano an naghahalat, an magigin resulta kan katapusan.
Binabalosan nin Dios an Pribadong Mga Hiro
18. Mantang dinadaog niato an hilom na mga kasalan, sa ano kita makakasarig? (Talinhaga 24:12; 2 Samuel 22:25-27)
18 Nabubuhay an mga tawo sa takot na an saindang mga maraot na mga dalan madiskubre nin tawo o nin Dios. Dai logod iyan mangyari sato. Imbes, mamuhay logod kitang alisto na dai niato matatago an mga bagay sa Saiya, “huli ta an tunay na Dios dadarahon nia mismo sa paghokom an gabos na klaseng gibo dapit sa lambang natatagong bagay, magin marahay man o maraot.” (Parahulit 12:14) Akoon logod niato an tabang ni Jehova na madaog an satong mga kasalan, minsan an mga natatago. Dangan halaton niato an panahon kun “an sekretong mga bagay nin kadikloman” ihayag sa liwanag asin an “mga mawot kan puso” mahayag. “Dangan an lambang saro maako kan saiyang kaomawan hale sa Dios.”—1 Corinto 4:5; Roma 2:6, 7, 16.
[Mga Nota sa Ibaba]
a An Mateo 17:14-18, Marcos 9:17-24, asin Lucas 9:38-43 nagpapaheling na an pagkasaro nin demonyo iyo an dahelan kan siayang kamugtakan. Linalaen kan Biblia an subisubing ini sa natural na mga kadahelanan.—Mateo 4:24.
b Sa pagkatorog an hawak nakakaeksperyensia nin dai tinutuyong sekswal na pagtuga, na sa natural na pangyayari bakong kapareho nin may pakaising pag-abuso sa sadiri.
Nagigirumdoman Daw Nindo?
◻ Ano daw an pagmate nin Dios dapit sa hilom na mga kasalan na tibaad ginigibo niato?
◻ Anong Makakasuratan na sadol an nagpapaheling na dapat likayan an pag-abuso sa sadiri?
◻ Paano daw mapapangganahan nin Kristiano an gaweng pagabuso sa sadiri?
◻ Mantang iyan dai kinokondenar kan Biblia, paano puwede na an paggamit nin alkohol magin sarong hilom na kasalan?
◻ Anong madonong na mga lakdang an puwedeng gibohon sa pagatubang nin pribadong kasalan imbuwelto an mga inomon na de alkohol?
[Kahon sa pahina 10]
Napangganahan Nia an Pag-abuso sa Sadiri
BILANG SOLTERO, si C——— igwang normal na pagmate sa sekso. Alagad igwa sia nin problema. Poon sa edad na 13 igwa sia kan gawe nin pag-abuso sa sadiri, parate kun sia sana sa saiyang kuwarto. Medyo nasosopog sia kaiyan, alagad sa paghona nia mayo nin siisay pa man na nakokolgan.
Kan sia 19 na, an gaweng ini nag-orog. Sarong beses si C——— nagtuga sa saiyang padi, alagad sinabihan sia na minsan sala, bako man ini gayong seryoso. Kan si C——— magin militar, dai na siyang lugar na magsolo. Kaya, bihira siyang maholog sa pag-abuso sa sadiri, na, sa pagkanorongod, nagpaheling na an saiyang nakaaging gawe bakong resulta nin dai mapogolan na horot.
Kan magpondo sia sa pagkamilitar, si C——— nagpuli. Nagpoon magbakal nin pornograpikong mga babasahon asin, napukawan kaini, dangan buwelta na naman sa dating gawe. Kan sia magsolo na naman, pasil na makakua nin nakakapalibog na babasahon. Parateng nakakagibo sia nin masturbasyon nin pirang beses sa sarong aldaw.
Dangan nagpoon siang mag-adal kan Biblia kaiba nin sarong ministro nin mga Saksi ni Jehova. Mantang nanonodan nia an pagmansay nin Dios sa inmoralidad, si C——— nasopog nang magbakal nin pornograpikong mga babasahon, asin gusto na niang haleon an gawe nin pag-abuso sa sadiri. Inaprobaran nia. Alagad pakalihis nin saro o duwang semana nakamate sia nin sekswal na kainitan, nag-ontok sa tindahan nin diaryo, asin sekswal na napapainit kan inmoral na babasahon. Pagpuli sa harong, hinohona niang naholog na sia, mapadagos na sana giraray sa otro lakdang. Pagkatapos, yaon na an pagbasol sa sadiri. Dai na daw nanggad nia mahahale an maraot na gaweng ini?
Katapustapusi si C——— nagsabi sa sarong espirituwal na magurang sa kongregasyon. Maboot an ministrong ini asin tinabangan sia na hanapon an gikan sa Bibliang mga bagay na matabang saiya na mapaoswag an saiyang pagpopogol sa sadiri. An ministro siring man nagpaliwanag:
‘Imahinaron an horot na siring sa kadena. An enot na sogpon sadit asin maluya. Alagad an sunod-sunod na mga sogpon padakula nang padakula. Siring kaiyan an horot na minagiya sa masturbasyon. Kaya tolos-tolos kaipuhan pondohon an hugop-hugop. An orog na paglawig kaiyan, orog man na nagigin makosog an horot. Sa ultimo haros dai na mapogolan. Iyo hingoahon na potolon an kadena sa enot na sogpon. Sa oras mismo na namate nindo na nagdadangandang an pagmawot, GUMIBO NIN MASKI ANO! Bumangon asin bagohon an posisyon, pakintabon an saindong sapatos, iapon an basura—ano man na maputol kan sogpon. Tibaad magbasa kamo nin makosog, siring kan Biblia o sarong Kristinong publikasyon na magiya kan saindong kaisipan sa malinig na bagay.’
An ministrong ini hinahapot si C——— sa mga pagtiripon kun ano na an nangyayari, regular na kinokomendaran asin pinapakosog sia sa saiyang desisyon. Sa laog nin pitong semana si C——— nagin mapanggana dangan kan sia madisganar asin mabigo sa sarong problema naholog na naman sia, nagbakal nin mga erotikong mga babasahon. Iyan naggiya sa pagkasala giraray. An siring na mga pangyayari sarong pagsibog, alagad an ministro pinakosog giraray sia na ipadagos an paghihingoa. Luwayluway na naglawig an pagoltanan nin 9 na semana dangan 17 semana, asin mas halawig na. Luwayluway na an saiyang pagsarig nagtalubo sagkod na makaya na niang mapangganahan an sekretong problema.
Katapustapusi namidbid ni C——— an katunayan na aram ni Jehova an gabos na saiyang ginigibo. Kaya, kun boot niang maglingkod ki Jehova na igwa nin biyong malinig na konsensya, kaipuhan biyong haleon nia an gaweng ini sa saiyang buhay.Ginibo nia iyan! Ngonyan dai nia nagigirumdoman kun gurano kalawig iyan. Bilang arogan na Kristiano, si C——— tinawan nin responsibilidad sa kongregasyon, asin nagplanong paoswagon an saiyang paglilingkod sa ikaoomaw nin Dios. Napapalaen siang tawo.