An mga Hayop sa Apocalipsis—Taano ta Babasahon Pa an Manongod sa mga Iyan?
APOCALIPSIS! Saro iyan sa nakakaapod sa atension na ngaran na itinao sa huring libro kan Biblia. Iyan inaapod man na libro nin Kapahayagan. An libro pano nin buhay na mga paglaladawan, na lataw na gayo an mga manongod sa dragon asin sa tolong mababangis na hayop. An iba natatakot sa mga hayop na ini. An iba man ipinamumugtak na iyan mga pag-imahinar sana nin sarong gurang. Kun siring, taano kamo ta maninigong magbasa manongod sa mga hayop sa Apocalipsis? Huli ta kalabot an saindong kaogmahan.
Totoo, si apostol Juan gurang na kan isurat nia an librong Kapahayagan haros 1,900 na taon na an nakaagi. Alagad iyan daw nangangahulogan na an mga hayop na ilinaladawan kaiyan mga imahinasyon sana nin sarong ulianon na? Bako, asin si Juan bakong an enot na gurang na nagkaigwa nin siring na mga bisyon. An sarong tawo na an ngaran Daniel nakaheling man nin mga bisyon na hayop sa saiyang kagurangan, asin an mga bisyon na ini napatunayan na tamang mga hula manongod sa mga pagkaliwat sa gobyerno nin tawo. (Daniel, kapitulo 7 asin 8) Saro pa, si Jesu-Cristo mismo ibinilang si Daniel na pinasabngan nin Dios, na inaapod siang propeta asin nagkokotar sa saiyang mga sinurat.—Mateo 24:15.
Ipinarisa ni Jesus na an saiyang mga apostol maako nin dugang pang mga instruksion hale sa Dios pagkagadan nia. (Juan 16:12, 13) Asin mantang an dakol na kabtang kan librong Kapahayagan naotob sa makangangalas na paagi, makaseseguro kita na an mga bisyon ni apostol Juan manongod sa mga hayop sa Apocalipsis ipinasabong man nin Dios.—2 Timoteo 3:16.
An introduksion kan librong Kapahayagan nagsasabi: “Sarong kapahayagan ni Jesu-Cristo, na itinao sa saiya nin Dios . . . Asin sinugo nia an saiyang anghel asin itinao iyan sa mga tanda paagi sa saiya sa saiyang oripon na si Juan.” (Kapahayagan 1:1) Kaya, an mga paglaladawan sa librong Kapahayagan, kabale na an mga hayop, simboliko, bakong literal. Dai kaipuhan na matakot sa pagbasa manongod sa mga iyan. An simbolikong mga hayop na ini nagtatao nin mahalagang kaaraman sa mga Kristiano, na nagpapangyari sainda na mapagdanay an saindang relasyon sa Dios. Kaya ngani, ikinasurat ni apostol Juan: “Maogma an nagbabasa nin makosog asin nagdadangog sa mga tataramon kan hulang ini, asin an nagkukuyog sa mga bagay na nasusurat dian; huli ta harani na an itinalaan na panahon.” Iyo, an pakasabot nindo sa mga simbolong ini makapagtatao nin kaogmahan ngonyan asin sa ngapit.—Kapahayagan 1:3.