Apocalipsis—Ano daw Iyan?

“AN APOCALIPSIS!” Ano an minasabong sa saindong isip kun nadadangog nindo an mga tataramon na iyan? An aldaw nin paghokom daw? Pagkatunaw? Guerra Mundial III? Katapusan kan kinaban? Kun an mga ini an napapaladawan sa saindong isip, dai kamo nasosolo. Madiklom an paglaladawan kan siensia asin kan mga babasahon saka dadalanon sa ngapit nin tawo. Kaya makangangalas daw na iinaasosyar nin dakol an apocalipsis sa pagkapara nin tawo paagi sa sarong kapahapahamak na pangyayari?

“An apocalipsis ngonyan bako sanang paglaladawan kan Biblia kundi iyan nagin tunay nanggad na posibilidad,” an patanid ni Sekretaryo-Heneral Javier Pérez de Cuéllar nin NU sa saiyang diskurso sa inagurasyon. “Dai pa nangyari kaidto sa eksperyensia nin tawo na kita namugtak sa hayakpit na pag-oltanan nin kapahamakan asin kaligtasan.” Ano an boot niang sabihon? An nuklear na paglalaban na gikan sa pag-orog kan presenteng paorumbasan sa armas. Sa pagsuportar sa saiyang patanid sa Naciones Unidas, sia nagsabi na “mga 500,000 na sientista sa bilog na kinaban an nagdudusay kan saindang kaaraman sa paghanap nin mga armas na mas moderno asin mas nakagagadan.”

An iba nakakarisa man sa situwasyon ngonyan. Si Hans Jonas, an retiradong propesor nin pilosopiya sa New School for Social Research, nagsasabi na an saiyang pangenot na kinatatakotan iyo an “apocalipsis na magikan sa dai tinutuyong dalagan nin teknikal na sibilisasyon.” Iinaasosyar nia an apocalipsis sa ‘pagkaubos, polusyon, pagkalaglag kan planeta, saka sa peligro nin biglang pagkalaglag paagi sa bomba atomika.’

Siring man, an historyador na si Golo Mann nagsabi: “Dai kita puwedeng magkaigwa nin saro pang guerra mundial. An guerra salang termino. Maninigo na ipagbawal niato an terminong ‘Guerra Mundial III’ asin imbes gamiton an apocalipsis o pagkatunaw.”—Die Zeit nin Hamburg, Agosto 30, 1985 na kinotar sa World Press Review, (magasin, EU), Nobyembre 1985, p. 34.

Iyo, namimidbid nin tawo na sia nasa gati nin paglaglag sa sadiri. Alagad ta sia daw an magpopoon sa apocalipsis? Bako sono sa Biblia, na nagsasabi na si “Jehova Dios, an Makakamhan sa gabos”—bakong an tawo—an ‘malaglag sa mga naglalaglag kan daga.’ (Kapahayagan 11:17, 18) Kaya, an pakasabot kun ano an apocalipsis sa punto-de-vista kan Biblia puwedeng magtao saindo nin ibang punto-de-vista, na biyong bago asin mas maogma.

Kun Ano Talaga Iyan

An apocalipsis ilinaladawan sa sarong surat sa mga taga-Tesalonica. Dian si apostol Pablo nagsasabi: “Matanos para sa Dios na balosan nin kasakitan an mga nagpapasakit sa saindo . . . alagad, sa saindo na mga nagsasakit, kapahingaloan sa kaibahan mi sa kapahayagan [o, apocalipsis] kan Kagurangnan na Jesus hale sa langit kaiba an saiyang makapangyarihan na mga anghel sa naglalaad na kalayo, kun sia mamalos na sa mga dai nakakamidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus. An mga ini mismo magtitios kan silot nin daing sagkod na pagkalaglag.”—2 Tesalonica 1:6-10.

Kun siring, an apocalipsis iyo an pagkahayag ni Jesus sa sarong panahon nin “dakulang kahorasaan.” (Mateo 24:21) Sono sa An Expository Dictionary of New Testament Words ni W. E. Vine, an termino sa Griego na a·po·kaʹly·psis nanonongod sa “Kagurangnan na Jesu-Cristo kun Sia dumatong tanganing itao an mga paghokom nin Dios.” Sa ibang parte, inaapod kan Biblia an kapahayagan, o apocalipsis, na ini bilang “an ralaban kan dakulang aldaw nin Dios na Makakamhan sa gabos” sa Armagedon.—Kapahayagan 16:14, 16; 19:11-21.a

Totoo, manonongod sa apocalipsis, naheling niato na an Biblia nagtataram manongod sa “kasakitan,” ‘pamamalos,’ asin “silot.” Minsan siring, iyan nagtataram man manongod sa “kapahingaloan” para sa mga daing kasalan na nagsasakit. An Tataramon nin Dios nanunuga sa sato na “dai na mahahaloy, asin ta an maraot mawawara na.” (Salmo 37:10) Kaya an apocalipsis magtatao sa katawohan nin kapahingaloan sa gabos na maraot na impluwensia. Iyan magigin panahon nin pagkaliwat sa mas marahay na mga kamugtakan para sa mga may sadiosan na puso—bakong sarong pangyayari na dapat nindang katakotan.

Kaya, imbes na biyong pagkapara nin gabos, o pagkatunaw, an apocalipsis iyo an magigin matanos na solusyon sa mga problema nin tawo. Bako daw na an ideya na mabuhay sa sarong bagong panahon—panahon nin katanosan, katoninongan, asin katrangkilohan—marahay sa pagdangog nindo asin kan saindong pamilya?

Alagad ta nagdadangadang na daw kita sa apocalipsis kan Biblia? Kun iyo, igwa daw kita nin paagi na maaraman an eksaktong panahon kaiyan?

[Mga Nota sa Ibaba]