An Papa Asin an Apocalipsis
AN AVERTING ARMAGEDDON iyo an titulo na itinao nin duwang peryodista sa saindang libro kan 1984 manongod sa bago pa sanang mga politika kan papa. Si Gordon Thomas asin Max Morgan-Witts labi nang 17 taon na nagbabareta manongod sa papado. Anong pagmansay an makukua niato gikan sa sainda dapit sa paghadit manongod sa apocalipsis kan mga nasa halangkaw na katongdan sa Iglesya Katolika?
Sono sa mga parabaretang ini, si Monsenyor Emery Kabongo, personal na sekretaryo ni Juan Paulo II, nagsabi: “An Papa garo espirituwal na Hercules na naghihingoa na papagdanayon na separado an pinakamakapangyarihan na mga nasyon, na naghihingoa na olangon an nuklear na Armagedon.”
Minalataw na an mga namomoon sa iglesya nangorognang naghahadit manongod sa kalaglagan kan globo paagi sa mga gibo nin tawo imbes na manongod sa namimiling pangunlabot nin Dios sa mga gibo-gibo nin tawo—an apocalipsis na ihinuhula kan Biblia. Kaya, an Averting Armageddon nagsasabi: “Sa tahaw kan mga nagtatrabaho para ki Kabongo, mayo nin panluwas na tanda nin tension sa paghihingoa na olangon an apocalipsis na naririsa ninda. . . . Alagad sa likod kan rutinang ini igwa nin tension na direktang tada kan internasyonal na Sinodo nin mga Obispo. Tinapos kaiyan an mga orolay sa pano nin kapahamakan na tono, na ikinamomondo an ‘garo nakikiguerrang pagkaagresibo, kadahasan asin terorismo, an pagdakol nin bakong nuklear asin espesyalmente nin nuklear na mga armas, asin an makasosopog na pagnenegosyo sa gabos na armas sa guerra.” Minsan an papa kalabot. Si Thomas asin Morgan-Witts nagbabareta na sa mga estante nin libro sa saiyang librariya yaon an mga libro na arog baga kan International Defense Review, The Problems of Military Readiness, asin Surprise Attack: Lessons for Defense Planning. Idinugang ninda:
“Kataed kan mga surat kan papa sa mga obispo an mga libro na manongod sa tema na dian napapako an atension kan Papa: eskatolohiya, an pag-adal sa mga katokdoan kan Biblia na nangangatanosan na iinaguraron nin Dios an Saiyang Kahadean sa daga paagi sa sunod-sunod na ‘mga pangyayari’ tanganing tapuson an sarong panahon. Si Juan Paulo malaad na nagtutubod . . . na, seguro bago matapos an siglong ini, may sarong bagay na ‘nagdedesisyon’ na tibaad mangyari sa kinaban. Posible daw na iyan peste, ikaduwang epidemyang Black Death? O dai pag-oran o gutom sa sokol na dai maimahinar? O guerra nuklear? Parate ngonyan na kinatatakotan nia an huri; seguro, iniisip-isip nia, sia itinalagang mamayo sa Iglesya sa panahon kan ultimong dekada kan kinaban bago iyan permanenteng laglagon nin nuklear na pagkatunaw.”
An Averting Armageddon nag-apod man kan atension sa simbolikong “relo kan aldaw nin paghokom” na dayaday na nasa Bulletin of the Atomic Scientists. Kan an “relong” ini enot na ipublikar kan Disyembre 1947, iyan ibinugtak sa pitong minuto bago an matangang banggi tanganing ipaheling “kun gurano kaharani kan kinaban sa nuklear na Armagedon.” Pakalihis kan arms limitation agreement (SALT) kan 1972, an relo isinibog sa 12 minutos bago an matangang banggi. Kan 1984 si Thomas asin Morgan-Witts nagsurat: “An relo tolong minuto na sana ngonyan bago an matangang banggi. Ini an pinakaharani sa aldaw nin paghokom sa laog nin treinta anyos.”
Sa ibong nin ano man na paghihingoa kan papa na “olangon an nuklear na Armagedon,” kan Nobyembre 1985, an relo tolong minuto pa man giraray bago an matangang banggi. Alagad dai kita magpabaya na malingling kan pagkahadit dapit sa kun baga lalaglagon kan mga nasyon an katawohan. Imbes na pagmaigotan na likayan an apocalipsis, magigin madonong kita na hanapon an dalan nin Dios nin kaligtasan hale sa apocalipsis, huli ta ini seguradong “madatong sa bilog na ineerokan na daga.”—Kapahayagan 3:10.