Pig-abante kan mga Siyentista an Doomsday Clock—Ano an Sinasabi kan Bibliya?

Kan Enero 24, 2023, pig-adjust kan mga siyentista an Doomsday Clocka asin urog nindang irinani iyan sa kamatangaan nin banggi, na nanunungod sa katapusan kan kinaban.

“An ‘Doomsday Clock’ na nagsisimbolisar sa mga peligro sa katawuhan nag-abante kaidtong Martes nin pinakaharani kasuarin man sa kamatangaan nin banggi huli kan giyera sa Ukraine, mga huma na magkaigwa nin giyera nuklear asin peligrosong kamugtakan nin klima.”—AFP International Text Wire.
“Sinabi kan mga siyentista kaidtong Martes na an ‘Doomsday Clock’ pig-abante nin 90 segundos bago kamatangaan nin banggi—an pinakaharani kasuarin man kan katawuhan pasiring sa armagedon.”—ABC News.
“Sarong grupo nin mga siyentista hali sa manlain-lain na nasyon an nagpatanid na an padagos na pag-eksister kan katawuhan urog ngunyan na namemeligro kisa kasuarin man.”—The Guardian.

Padangadang na daw an katapusan kan katawuhan asin kan satong planeta? Kaipuhan ta daw ikatakot an mangyayari sa maabot? Ano an sinasabi kan Bibliya?

Kun ano an mangyayari sa maabot

Sigun sa Bibliya, “an daga nagdadanay sagkod lamang” asin may mga tawo na “maistar . . . diyan nin daing sagkod.” (Eclesiastes 1:4; Salmo 37:29) Kaya dai malalaglag kan mga tawo an daga; ni magigibo man ninda na an bilog na planeta dai na makasustenir nin buhay.

Pero an Bibliya may sinasambit na katapusan. Halimbawa, sinasabi kaiyan na “an kinaban mapapara.”—1 Juan 2:17.

Para maaraman kun ano an buot sabihon kan Bibliya pag sinasambit kaiyan an manungod sa katapusan kan kinaban, basahon an artikulo na “Malapit Na Ba ang Katapusan ng Mundo? Sinasabi Ba sa Bibliya na Magugunaw ang Mundo?”
Para maaraman kun ano an sinasabi kan Bibliya manungod sa mga mangyayari sa kinaban asin kun nuarin iyan maabot, basahon an artikulong “Nuarin an Katapusan kan Kinaban?”

Pagdanay na positibo

Matatabangan kita kan Bibliya na magdanay na positibo sa ibong kan mga problema ngunyan sa kinaban. Paano?

Tinatawan kita kan Bibliya nin praktikal na sadol. (2 Timoteo 3:16, 17) Halimbawa, basahon an artikulong “Kung Paano Mababawasan ang Pag-aalala” para maaraman kun paano ka matatabangan kan Bibliya na magdanay na positibo sa ibong kan mga kadipisilan sa buhay.
Nagtatao an Bibliya nin mapagtitiwalaan na paglaom para sa maabot na panahon. (Roma 15:4) Eksaktong ipinapaliwanag kaiyan kun ano an puwedeng asahan niyato ngunyan asin sa maabot na panahon, na nakakatabang sa sato na magdanay na may kumpiyansa sa ibong kan mga nangyayari sa kinaban.

Para lubos kang makinabang sa Bibliya, maugma mi ikang iniimbitaran na purbaran an samong libreng pag-adal sa Bibliya na may matabang saimo.

a “An Doomsday Clock sarong ilustrasyon na nagpapatanid sa publiko manungod sa kun gurano na karani na malaglag ta an satong planeta dahil sa peligrosong mga teknolohiya na kita man sana an may gibo. Saro ining metapora, sarong pagirumdom kan mga peligro na dapat niyatong tawan nin atensiyon kun gusto niyatong magdanay na buhay sa planetang ini.”—Bulletin of the Atomic Scientists.