Kita Daw Nabubuhay sa “Panahon kan Katapusan”?
“Kun para sa saimo, O Daniel, ihilom mo an mga tataramon asin pintoan mo an libro, sagkod sa panahon kan katapusan.”—Daniel 12:4.
NARIRIBONG an nagkakakan sa restawran. Sa pagtanaw nia sa bintana nin sarong restawran sa tahaw nin Manhattan na dinudungaw an Times Square, Siudad nin Nueva York, pabalikbalik an mata nia sa tolong magkakasuhay na relong digital, na gabos nagpapaheling kan oras sa darakulaon na letra. An sarong relo nagsasabing alas 11:28. An saro man, na garo baga duda sa pagigin huri na kan oras, atrasado sa oras na alas 11:26, mantang an ikatolo apurado sa oras na alas 11:29.
‘Dai man nin diperensia an saro o duwang minuto,’ tibaad sabihon nindo. Pero probaran nindong kombensiron dian an saro na nabayaan pa sana kan lulunadan niang awto, tren, o eroplano, bakong nin pirang minuto kundi nin pira sanang segundo! Mahalagang maaraman an tamang oras. Orog pang mahalagang maaraman kun yaon na kita saen sa iskedyul nin Dios.
An Posibilidad kan Aldaw nin Paghokom
Siyempre, arog kan tibaad aram na nindo, dati nang pinag-oolayan nin mga tawo an “panahon kan katapusan”—an iba inaapod iyan na ‘katapusan kan kinaban’ o ‘aldaw nin paghokom’—sa nag-aging mga siglo. Si propeta Daniel nagtaram manongod dian kaidtong 25 siglo na an nakaagi. (Daniel 12:4) Alagad ngonyan, sono sa independienteng parasurat na si James David Besser, “dai na kaipuhan an relihiyoso o lihis sa natural na pagtubod tanganing akoon an posibilidad nin aldaw nin paghokom; kaipuhan sanang maheling an mga bareta sa telebisyon.” Dai daw kamo minaoyon?
Daing duwa-duwa, huli sa telebisyon mas madaling maaraman an bareta sa kinaban paagi sa pagdara kan aksion mismo sa satong sala. Ginigibo kaiyan an mga problema na garo mas harani asin mas personal. Ipinagigirumdom kaiyan sato na an siudad o banwaan na natunaw sa posibleng nuklear na pagkalaglag, an aking lalaki o babae na pinagkurihan sa krimen na posibleng mangyari, an ina o ama na ginibong bihag sa posibleng pagsalakay nin mga terorista—an gabos na problemang ini puwedeng magin sato. Pero, an mga posibilidad na ini sana dai man nagpapatunay na madali nang umabot an aldaw nin paghokom. Pero ginigibo iyan kaiyan na mas posible, na ginigibo an hapot na, Kita daw nabubuhay sa “panahon kan katapusan?” na mas apretado.
Si Jesus, si Daniel, Asin an Katapusan kan Kinaban
Kaidtong labi nang 19 siglo an nakaagi, an mga disipulo ni Jesus naghapot sa saiya: “Ano an magigin tanda kan saimong presensia asin kan pagtatapos kan palakaw nin mga bagay [“katapusan kan kinaban,” King James Version]?” (Mateo 24:3) Sa pagtao sainda nin tanda, si Jesus nagtaram manongod sa dakol na ebidensia, na gabos magpaparisa na kita nakaabot na sa “pagtatapos kan palakaw nin mga bagay.” Buksan sa saindong Biblia an Mateo kapitulo 24 asin 25, Marcos kapitulo 13, asin Lucas kapitulo 21, asin basahon nindo iyan mismo.
Tibaad mapangalas kamong maheling na an saindong binabasa garo sumaryo kan bareta ngonyan sa telebisyon. Mababasa nindo an manongod sa mga guerra, makokosog na linog, peste, asin kakulangan sa pagkakan—na gabos nangyayari sa bilog na kinaban. Mababasa man nindo an manongod sa “kahandalan nin mga nasyon, na dai naaaraman an gigibohon,” asin an manongod sa mga tawo na “nalulunosan huli sa takot asin paghalat sa mga bagay na maabot sa ineerokan na daga.” May makukua daw kamong mas tamang mga tataramon sa pagladawan sa kamugtakan kan kinaban, na manongod dian kadakol kan sinasabi sato kan mga programa ngonyan sa telebisyon?—Lucas 21:10, 11, 25, 26.
An makosog na ebidensia sirkumstansial na ini na kita nabubuhay na sa “panahon kan katapusan” bako sanang iyo an nasa sato. Arog kan nasabi sa enotan, makakakua kita nin nagsusuportar na ebidensia paagi sa pagbuwelta nin 500 na taon pa sa kaaldawan kan Judiong propetang si Daniel. Si Jesus nagtaram manongod sa saiya sa ngaran, asin itinokdo an kaotoban kan saiyang hula. (Ikomparar an Mateo 24:3, 15, 21 sa Daniel 11:31; 12:1, 4.) Sa paggibo kaini, ipinaheling ni Jesus na dai nia ibinilang na lipas na sa panahon o daing kahulogan an mga tataramon ni Daniel sa “Daan na Tipan.” Ni maninigo man niatong ibilang iyan nin siring.
Mangnoha an pagkakaagid kan mga tataramon ni Daniel asin ni Jesus siring sa ipinaheheling sa itaas. Dangan ihapot sa sadiri, ‘Bako daw na pareho an sinasabi ninda?’
Malinaw na si Daniel asin Jesus pareho naghula kan iyo man sanang bagay, “an panahon kan katapusan,” na sa panahon na iyan si Cristo magigin presente sa makahadeng kapangyarihan. Sa katapusan kan panahon na iyan, paparaon nia an gabos niang kaiwal digdi sa daga sa sarong dakulang kahorasaan. Alagad an banwaan nin Dios makaliligtas.
Boot daw nindong makabilang sa mga maliligtas na iyan? Kun siring helingon nindo an ebidensia na itinatao ni Daniel manongod sa “panahon kan katapusan.” Nakatatabang sato na maaraman nin eksakto kun yaon na kita saen sa banal na iskedyul.
[Kahon sa pahina 4]
DANIEL
“Sa panahon kan katapusan . . . si Miguel [si Jesu-Cristo] matindog . . . asin mangyayari an panahon nin kasakitan na dai pa nangyari poon na magkaigwa nin nasyon. . . . Asin sa panahon na iyan an saimong banwaan madulag.”—Daniel 11:40; 12:1.
JESUS
“Ano an magigin tanda kan saimong presensia asin kan pagtatapos kan palakaw nin mga bagay? . . .
“Magkakaigwa nin dakulang kahorasaan na dai pang kaagid na nangyari poon sa kapinonan kan kinaban . . .
“Kun dai pahalipoton an mga aldaw na iyan, mayong laman na makaliligtas; alagad . . . an mga aldaw na iyan papahalipoton.”—Mateo 24:3, 21, 22.