Kapitulo Desiotso

Si Daniel Pinanugaan ni Jehova nin Marahayon na Balos

1, 2. (a) Anong mahalagang kualidad an kaipuhan nin sarong nakikipareha tanganing magin mapanggana? (b) Paano ibinaing ni apostol Pablo sa sarong paorumbasan an buhay nin pagigin maimbod sa paglilingkod ki Jehova?

PINIPIRIT nin sarong nakikipareha na makaabot sa sagkodan kan pareha. Haros ubos na an kosog nia, alagad ta mantang natatanaw na an saiyang pasohan, iinuubos nia an bilog niang kosog sa huring pirang lakad. Pinupuersa an gabos niang kalamnan, nakaabot man giraray sia sa sagkodan! Maheheling sa saiyang lalauogon an pakaginhawa asin kapangganahan. Nagbunga nin kapangganahan an pagtagal sagkod sa katapusan.

² Sa pagtatapos kan Daniel kapitulo 12, manonompongan niato an namomotan na marhay na propeta na harani na sa sagkodan kan sadiri niang “paorumbasan”​—an saiyang buhay nin paglilingkod ki Jehova. Pakasitara kan manlaenlaen na halimbawa nin pagtubod sa mga lingkod ni Jehova bago kan mga Kristiano, nagsurat si apostol Pablo: “Kaya, kun siring, huli ta napapalibotan kita nin dakulaon na panganoron nin mga saksi, pabayaan ta man an gabos na kagabatan asin an kasalan na pasil sanang nakakagapos sa sato, asin dumalagan kita na may pakatagal sa paorumbasan na ibinugtak sa atubangan ta, mantang kita nagheheling nin maingat sa Pangenot na Ahente asin Parasangkap kan satong pagtubod, si Jesus. Huli kan kagayagayahan na ibinugtak sa atubangan nia tinagalan nia an hariging pasakitan, na hinamak an kasupganan, asin nagtukaw sa too kan trono nin Dios.”​—Hebreo 12:1, 2.

3. (a) Ano an nakamotibar ki Daniel na ‘dumalagan na may pakatagal’? (b) Anong tolong laen-laen na bagay an sinabi ki Daniel kan anghel ni Jehova?

³ Kabilang sa “dakulaon na panganoron nin mga saksi” na iyan si Daniel. Tunay na sia saro na kinaipuhan na ‘dumalagan na may pakatagal,’ asin namotibar siang gibohon iyan nin hararom na pagkamoot sa Dios. Dakol an ihinayag ni Jehova ki Daniel manongod sa ngapit nin kinabanon na mga gobyerno, alagad ngonyan ipinadara Nia sa saiya an personal na pagparigon na ini sa boot: “Kun para man sa saimo mismo, paduman ka sa katapusan; asin mapahingalo ka, alagad ika matindog para sa saimong kabtang sa katapusan kan mga aldaw.” (Daniel 12:13) Tolong laen-laen na bagay an sinasabi ki Daniel kan anghel ni Jehova: (1) na si Daniel maninigong ‘paduman sa katapusan,’ (2) na sia “mapahingalo,” asin (3) na sia “matindog” giraray sa maabot na panahon. Paano an mga tataramon na ini makakaparigon sa boot nin mga Kristiano ngonyan na magtagal sagkod sa sagkodan sa paorumbasan para sa buhay?

“PADUMAN KA SA KATAPUSAN”

4. Ano an boot sabihon kan anghel ni Jehova sa pagsabing “paduman ka sa katapusan,” asin taano iyan ta tibaad nagtao nin kadepisilan ki Daniel?

⁴ Ano an boot sabihon kan anghel kan sabihan nia si Daniel: “Kun para man sa saimo mismo, paduman ka sa katapusan”? Katapusan nin ano? Bueno, mantang haros 100 anyos na si Daniel, minalataw na ini pagkasambit sa katapusan kan sadiri niang buhay, na posibleng marhay na harani na.a Si Daniel sinasadol kan anghel na maimbod na magtagal sagkod sa kagadanan. Alagad an paggibo nin siring bako man na pirmeng pasil. Naheling ni Daniel na nadaog an Babilonya asin nagpuli sa Juda asin Jerusalem an natatada sa desterradong mga Judio. Segurado na iyan nagtao nin dakulang kagayagayahan sa gurang nang propeta. Pero, mayo nin rekord na sia uminiba sa pagbaklay na iyan. Tibaad gurang na siang marhay asin maluya na an hawak kan panahon na idto. O tibaad kabotan ni Jehova na sia magdanay sa Babilonya. Sa paano man, dai malilikayan na isipon nin saro kun baga si Daniel nakamate nin medyo paghimuyawot mantang pahale an saiyang mga kahimanwa pasiring sa Juda.

5. Ano an nagpaparisa na si Daniel nagtagal sagkod sa katapusan?

⁵ Daing duwa-duwa na nakakua si Daniel nin dakulang kosog sa maboot na sinabi kan anghel: “Paduman ka sa katapusan.” Tibaad ipagirumdom kaini sa sato an mga tataramon na sinabi ni Jesu-Cristo pakalihis nin mga anom na siglo: “An nakatagal sagkod sa katapusan iyo an maliligtas.” (Mateo 24:13) Daing duwa-duwa na iyan an ginibo ni Daniel. Sia nagtagal sagkod sa katapusan, na maimbod na nagdalagan sa paorumbasan para sa buhay sagkod sa sagkodan kaiyan. Tibaad saro iyan na dahelan na sa huri sia nasasambitan nin paborable sa Tataramon nin Dios. (Hebreo 11:32, 33) Ano an nagpangyari ki Daniel na makatagal sagkod sa katapusan? An rekord kan saiyang buhay nakakatabang sa sato na maaraman an simbag.

PAGTAGAL BILANG ESTUDYANTE KAN TATARAMON NIN DIOS

6. Paano niato naaaraman na si Daniel maigot na estudyante kan Tataramon nin Dios?

⁶ Para ki Daniel, kalabot sa pagtagal sagkod sa katapusan an padagos na pag-adal asin hararom na pagpensar sa nakakapukaw sa boot na mga panuga nin Dios. Aram niato na si Daniel debotong estudyante kan Tataramon nin Dios. Ta kun dai, paano nia naaraman an panuga ni Jehova ki Jeremias na an pagkadistiero magigin 70 taon kalawig? Si Daniel mismo nagsurat: “Ako . . . nakamansay paagi sa mga libro kan kabilangan kan mga taon.” (Daniel 9:2; Jeremias 25:11, 12) Daing duda, hinanap ni Daniel an mga libro kan Tataramon nin Dios na nag-eeksister kaidto. An mga isinurat ni Moises, David, Salomon, Isaias, Jeremias, Ezequiel​—ano man na nakua nia—​seguradong nagtao ki Daniel nin dakol na nakakaogmang oras sa pagbasa asin paghorophorop.

7. Kun ikinokomparar niato an satong panahon sa kaaldawan ni Daniel, ano an mga bentaha niato sa pag-adal kan Tataramon nin Dios?

⁷ An pag-adal kan Tataramon nin Dios, na lubos an atension dian, mahalagang marhay tangani na mapatalubo niato an pakatagal ngonyan. (Roma 15:4-6; 1 Timoteo 4:15) Asin nasa sato an kompletong Biblia, na kaiba an nasusurat na rekord kun paano naotob pakalihis nin mga siglo an nagkapira sa mga hula ni Daniel. Dugang pa, naoogma kitang mabuhay durante kan “panahon kan katapusan,” na ihinula sa Daniel 12:4. Sa satong kaaldawan, an mga linahidan binendisyonan nin espirituwal na pakarorop, na nagliliwanag bilang mga tingraw nin katotoohan sa madiklom na kinaban na ini. Bilang resulta, an dakol sa hararom na mga hula sa libro ni Daniel, na an nagkapira pinagngalasan nia, makahulogan na marhay para sa sato ngonyan. Kun siring, ipagpadagos niato an pag-adal kan Tataramon nin Dios aroaldaw, na nungka na binabali-wala an mga bagay na ini. An paggibo nin siring makakatabang sa sato na magtagal.

SI DANIEL NAGMAIGOT SA PAMIMIBI

8. Anong halimbawa an itinao ni Daniel kun dapit sa pamibi?

⁸ An pamibi nakatabang man ki Daniel na makatagal sagkod sa katapusan. Aroaldaw sia minadolok ki Jehova Dios asin daing tago-tago na nakikipag-olay sa saiya na an puso pano nin pagtubod asin kompiansa. Midbid nia si Jehova bilang an “Paradangog nin pamibi.” (Salmo 65:2; ikomparar an Hebreo 11:6.) Kan an puso ni Daniel nagagabatan sa kamondoan huli sa rebeldeng gawe-gawe kan Israel, biyo niang ipinahayag ki Jehova an saiyang mga saboot. (Daniel 9:4-19) Dawa kan ipagboot ni Dario na sia sana an hagadan sa laog nin 30 aldaw, dai itinogot ni Daniel na iyan makapapondo sa saiya sa pamimibi ki Jehova Dios. (Daniel 6:10) Dai daw nakakapahiro sa satong puso na imahinaron an maimbod na gurang na iyan na pusoan na inatubang an sarong lungib na pano nin mga leon imbes na isuko an mahalagang marhay na pribilehiong mamibi? Daing duda na si Daniel maimbod na nagduman sa saiyang katapusan, na odok na namimibi ki Jehova aroaldaw.

9. Taano ta maninigo na nungka na baliwalaon niato an pribilehiong mamibi?

⁹ An pamimibi simple sanang gibohon. Makakapamibi kita haros ano man na oras, saen man, makosog o silensio. Pero, nungka na basangbasangon niato an mahalagang marhay na pribilehiong ini. Ikinokonektar kan Biblia an pamibi sa pakatagal, pagmamaigot, asin pagpuka sa espirituwal. (Lucas 18:1; Roma 12:12; Efeso 6:18; Colosas 4:2) Bako daw na pambihira na kita may daing olang asin bukas na pinakapaagihan sa pagkomunikar sa kaharohalangkaweng personahe sa uniberso? Asin sia naghihinanyog! Girumdoma an pangyayari kan si Daniel mamibi, asin nagsugo si Jehova nin anghel bilang simbag. Uminabot an anghel mantang namimibi pa si Daniel! (Daniel 9:20-21) An panahon niato tibaad bako nang para sa siring na mga pagsongko nin anghel, alagad dai nagbago si Jehova. (Malaquias 3:6) Kun paanong dinangog nia an pamibi ni Daniel, hihinanyogon nia an pamibi niato. Asin mantang kita namimibi, kita magigin mas dayupot ki Jehova, na nagkakaigwa nin bogkos na makakatabang sa sato na makatagal sagkod sa katapusan, arog ni Daniel.

PAGTAGAL BILANG PARATOKDO KAN TATARAMON NIN DIOS

10. Taano ta mahalaga ki Daniel an pagtotokdo kan katotoohan kan Tataramon nin Dios?

¹⁰ Si Daniel kaipuhan na ‘paduman sa katapusan’ sa saro pang sentido. Sia kaipuhan na magtagal bilang paratokdo kan katotoohan. Nungka niang liningawan na saro sia sa piniling banwaan na manongod dian sinabi kan Kasuratan: “‘Kamo an sakong mga saksi,’ an sabi ni Jehova, ‘an sakong lingkod na sakong pinili.’” (Isaias 43:10) Ginibo ni Daniel an bilog niang makakaya na maotob an sugong iyan. Posibleng marhay na kaiba sa gibohon nia an pagtotokdo sa sadiri niang banwaan na desterrado sa Babilonya. Kadikit an aram niato manongod sa saiyang relasyon sa saiyang mga kapwa Judio apuera sa koneksion nia sa tolo na inaapod na “saiyang kairiba”​—si Hananias, Misael, asin Azarias. (Daniel 1:7; 2:13, 17, 18) An dayupot nindang pagkakatood seguradong dakula an ikinatabang sa lambang saro sa sainda na magtagal. (Talinhaga 17:17) Si Daniel, na binendisyonan ni Jehova nin espesyal na pakarorop, dakol na ikakatokdo sa saiyang mga katood. (Daniel 1:17) Alagad may iba pa siang pagtotokdo na dapat gibohon.

11. (a) Ano an napapalaen sa gibohon ni Daniel? (b) Gurano kaepektibo si Daniel sa pag-otob sa saiyang pambihirang asignasyon?

¹¹ Nakakalabi sa siisay man na ibang propeta, si Daniel may gibohon na pagpatotoo sa mga dignitaryong Hentil. Minsan ngani parate na kaipuhan siang magtao nin mga mensaheng ikinakauyam, dai nia trinatar an mga namamahalang ini na garo baga sinda makasusurang nin makuri o minsan paano hababa sa saiya. Sia nakipag-olay sa sainda sa magalang asin ekspertong paagi. May nagkapira​—arog baga kan nauuri, mapagpakanang mga satrapa—​na gustong gadanon si Daniel. Pero, iginalang sia nin ibang dignitaryo. Huli ta si Daniel pinapangyari ni Jehova na ipaliwanag an mga hilom na nakataranta sa mga hade asin madodonong, nabantog na marhay an propeta. (Daniel 2:47, 48; 5:29) Totoo, mantang sia naggugurang, dai na sia puedeng magin arog kaaktibo kan sia hoben pa. Alagad segurado na sia nagduman sa saiyang katapusan na maimbod na naghahanap pa man giraray nin ano man na paagi na sia makapaglingkod bilang saksi kan saiyang namomotan na marhay na Dios.

12. (a) Anong mga aktibidad sa pagtotokdo an ginigibo niato ngonyan bilang mga Kristiano? (b) Paano niato makukuyog an hatol ni Pablo na “padagos kamong maglakaw sa kadonongan manongod sa mga nasa luwas”?

¹² Sa Kristianong kongregasyon ngonyan, puede kitang makanompong nin maimbod na kairiba na matabang sa sato na magtagal, kun paanong si Daniel asin an tolo niang kairiba nagtinabangan. Kita nagtitinokdoan man, na nagtatao nin “pagriribayan nin pagparigon sa boot.” (Roma 1:11, 12) Arog ni Daniel, kita isinugong magpatotoo sa mga daing pagtubod. (Mateo 24:14; 28:19, 20) Kun siring, kaipuhan na pakarhayon niato an satong mga abilidad tangani na satuyang ‘magamit an tataramon kan katotoohan sa tamang paagi’ sa pakikipag-olay sa mga tawo manongod ki Jehova. (2 Timoteo 2:15) Asin makakatabang kun kuyogon niato an hatol ni apostol Pablo: “Padagos kamong maglakaw sa kadonongan manongod sa mga nasa luwas.” (Colosas 4:5) Kaiba sa siring na kadonongan an timbang na punto de vista sa mga bako niatong kapagtubod. Dai niato minemenos an siring na mga tawo, na ibinibilang an satong sadiri na nakakalabi. (1 Pedro 3:15) Imbes, hinihingoa niato na akiton sinda sa katotoohan, na ginagamit an Tataramon nin Dios sa mataktika asin ekspertong paagi tangani na maabot an saindang puso. Kun magibo niatong mapahiro an saro, abaa kadakulang kagayagayahan an itinatao kaini sa sato! An siring na kagayagayahan nakakatabang nanggad sa sato na magtagal sagkod sa katapusan, arog ni Daniel.

“MAPAHINGALO KA”

13, 14. Taano an dakol na Babilonyo ta nasindak sa posibilidad na magadan, asin paano napalaen an punto de vista ni Daniel?

¹³ Sunod na sinierto kan anghel ki Daniel: “Mapahingalo ka.” (Daniel 12:13) Ano an boot sabihon kan mga tataramon na idto? Bueno, aram ni Daniel na nasa enotan nia an kagadanan. An kagadanan nagin an dai malilikayan na katapusan nin gabos na tawo, poon kan kaaldawan ni Adan sagkod niato. Tamang-tama na inaapod kan Biblia an kagadanan na “kaiwal.” (1 Corinto 15:26) Minsan siring, para ki Daniel an posibilidad na magadan biyong laen an kahulogan sa kahulogan kaiyan para sa mga Babilonyo na nasa palibot nia. Para sa sainda, na sagom sa komplikadong pagsamba sa mga 4,000 na falsong dios, an kagadanan may kaibang gabos na klase nin grabeng takot. Naniwala sinda na pagkagadan, an mga bakong maogma an nagin buhay o madahas an nagin kagadanan nagigin benggatibong mga espiritu na nagsosongko sa mga buhay. Naniwala man an mga Babilonyo sa nakakasindak na kinaban kan mga gadan, na iniistaran nin makangingiring mga impakto na korteng tawo asin hayop.

¹⁴ Para ki Daniel, an kagadanan dai nangangahulogan kan arin man sa mga bagay na iyan. Ginatos na taon bago an kaaldawan ni Daniel, si Hadeng Salomon pinasabngan nin Dios na magsabi: “Kun dapit sa mga gadan, mayo man lamang sinda nin pakaaram.” (Eclesiastes 9:5) Asin may labot sa sarong nagadan, inawit kan salmista: “An saiyang espiritu minaluwas, minabalik sia sa saiyang daga; sa aldaw na iyan an saiyang mga pag-isip napapara.” (Salmo 146:4) Kaya aram ni Daniel na magigin totoo an mga tataramon sa saiya kan anghel. An kagadanan nangangahulogan nin kapahingaloan. Mayo nin mga pag-isip, mayo nin mapait na mga kabasolan, mayo nin pasakit​—asin mayo nanggad nin mga impakto. Arog man kaiyan an pagkasabi ni Jesu-Cristo kan magadan si Lazaro. Sabi nia: “Si Lazaro na katood niato nagpahingalo.”​—Juan 11:11.

15. Paano mangyayari na an aldaw nin pagkagadan mas marahay kisa aldaw nin pagkamundag?

¹⁵ Pensara an saro pang dahelan kun taano an posibilidad na magadan ta dai ikinatakot nin grabe ni Daniel. Sinasabi kan Tataramon nin Dios: “An ngaran mas marahay kisa marahay na lana, asin an aldaw nin pagkagadan kisa aldaw nin pagkamundag.” (Eclesiastes 7:1) Paano mangyayari na an aldaw nin pagkagadan, na saro nanggad na mamondong panahon, mas marahay kisa magayagayang aldaw nin pagkamundag? An nagdedeterminar na bagay nasa “ngaran.” An “marahay na lana” puedeng magin mahalon na marhay. An tugang ni Lazaro na si Maria sarong beses linahidan an mga bitis ni Jesus nin ungguento na an kantidad haros sarong taon na sueldo! (Juan 12:1-7) Paano magigin mahal na marhay an saro sanang ngaran? Sa Eclesiastes 7:1, an sinasabi kan Griegong Septuaginta, “marahay na ngaran.” An mahalagang marhay bako sanang an ngaran kundi an irinerepresentar kaiyan. Sa saiyang pagkamundag, mayo nin reputasyon, mayo nin rekord nin marahay na mga gibo, mayo nin pinakamamahal na rekuerdo sa personalidad asin mga kualidad kan may ngaran. Alagad sa katapusan nin buhay, an ngaran nangangahulogan kan gabos na bagay na ini. Asin kun iyan marahay na ngaran sa punto de vista nin Dios, iyan mas mahal na marhay kisa ano man na materyal na rogaring.

16. (a) Paano naghingoa si Daniel na gumibo nin marahay na ngaran sa Dios? (b) Taano ta makakapahingalo si Daniel na bilog an kompiansa na sia nakagibo nin marahay na ngaran ki Jehova?

¹⁶ Sa bilog niang buhay, ginibo ni Daniel an gabos na makakaya nia na makagibo nin marahay na ngaran sa Dios, asin mayo nin linipasan digdi si Jehova. Pinagmasdan nia si Daniel asin siniyasat an puso kaini. Iyan man an ginibo nin Dios ki Hadeng David, na nag-awit: “O Jehova, siniyasat mo ako, asin midbid mo ako. Ika mismo nakaaram kan sakong pagtukaw asin kan sakong pagtindog. Inestudyaran mo an sakong pag-isip hale sa harayo.” (Salmo 139:1, 2) Totoo, bakong sangkap si Daniel. Sia gikan kan parakasalang si Adan asin miembro nin sarong makasalan na nasyon. (Roma 3:23) Alagad pinagsolsolan ni Daniel an saiyang pagigin makasalan asin padagos siang naghingoa na maglakaw kaiba kan saiyang Dios sa tanos na paagi. Kun siring, makakapagkompiar an maimbod na propeta na papatawadon ni Jehova an saiyang mga kasalan asin nungka iyan na ipapaghinanakit sa saiya. (Salmo 103:10-14; Isaias 1:18) Ginugusto ni Jehova na girumdomon an marahay na mga gibo kan saiyang maimbod na mga lingkod. (Hebreo 6:10) Sa siring, duwang beses na inapod si Daniel kan anghel ni Jehova na “tawo na kawiliwiling gayo.” (Daniel 10:11, 19) Ini nangahulogan na si Daniel namomotan na marhay nin Dios. Si Daniel makakapahingalo na kontento, sa pakaaram na sia nakagibo nin marahay na ngaran ki Jehova.

17. Taano ta kaipuhan na marhay na kita gumibo nin marahay na ngaran ki Jehova ngonyan?

¹⁷ An balang saro sa sato marahay na maghapot, ‘Nakagibo daw ako nin marahay na ngaran ki Jehova?’ Nabubuhay kita sa purisaw na mga panahon. Bakong pagigin makimakarimarimang mga bagay kundi pagigin sanang realistiko an pagmidbid na an kagadanan puedeng umabot sa siisay man sa sato sa ano man na oras. (Eclesiastes 9:11) Kun siring, mahalagang marhay na an balang saro sa sato magdesisyon na gumibo nin marahay na ngaran sa Dios ngonyan mismo, na daing pag-atraso. Kun gigibohon niato iyan, dai kita kaipuhan na matakot sa kagadanan. Iyan pagpahingalo sana​—arog nin pagtorog. Asin arog nin pagtorog, iyan sinusundan nin pagmata!

“IKA MATINDOG”

18, 19. (a) Ano an boot sabihon kan anghel kan ihula nia na si Daniel “matindog” sa ngapit? (b) Taano ta pamilyar si Daniel sa paglaom na pagkabuhay liwat?

¹⁸ An libro ni Daniel natatapos sa saro sa pinakamagayon na panuga na itinao nin Dios sa sarong tawo kasuarin man. Sinabi ki Daniel kan anghel ni Jehova: “Ika matindog para sa saimong kabtang sa katapusan kan mga aldaw.” Ano an boot sabihon kan anghel? Bueno, mantang an ‘pahingalo’ na nasasambitan pa sana nia kagadanan, an panuga na si Daniel “matindog” sa huring panahon saro sanang bagay an puedeng magin kahulogan​—pagkabuhay liwat!b Sa katunayan, positibong sinasabi nin nagkapirang intelektuwal na nasa Daniel kapitulo 12 an enot na malinaw na pagkasambit sa pagkabuhay liwat na yaon sa Hebreong Kasuratan. (Daniel 12:2) Pero, nasasala sinda digdi. Si Daniel pamilyar na marhay sa paglaom na pagkabuhay liwat.

¹⁹ Halimbawa, daing duwa-duwa na aram ni Daniel an mga tataramon na ini na isinurat ni Isaias duwang siglo bago kaidto: “An saimong mga gadan magkakaburuhay. Sakuyang bangkay​—sinda maburuhat. Pagmata kamo asin kurahaw kamo sa kagayagayahan, kamong mga nag-eerok sa kabokabo! Huli ta . . . minsan an mga daing kosog sa kagadanan papangyayarihon mismo kan daga na mamundag.” (Isaias 26:19) Haloy pa bago kaidto, tinawan ni Jehova nin kapangyarihan si Elias asin Eliseo na aktuwal na bumuhay liwat. (1 Hade 17:17-24; 2 Hade 4:32-37) Mas enot pa, si Ana, an ina kan propetang si Samuel, nag-admitir na kaya ni Jehova na ibangon an mga tawo hale sa Sheol, an lolobngan. (1 Samuel 2:6) Mas enot pang marhay, an maimbod na si Job nagpahayag kan sadiri niang paglaom sa mga tataramon na ini: “Kun an pusog na lalaki magadan puede pa daw siang mabuhay giraray? Sa gabos na aldaw kan sakong obligadong paglilingkod ako maghahalat, sagkod na umabot an sakuyang pagkakalda. Ika maapod, asin ako mismo masimbag sa saimo. Para sa ginibo kan saimong mga kamot ika magkakaigwa nin paghimuyawot.”​—Job 14:14, 15.

20, 21. (a) Si Daniel seguradong magigin kabtang kan anong pagkabuhay liwat? (b) Sa anong paagi na posibleng marhay na mangyari an pagkabuhay liwat sa Paraiso?

²⁰ Arog ni Job, may dahelan si Daniel na magkompiar na si Jehova talagang maghihimuyawot na buhayon sia giraray sa ngapit. Pero, segurado na dakulang karangahan na madangog na kinokompirmar nin sarong poderosong espiritung linalang an paglaom na iyan. Iyo, si Daniel matindog “sa pagkabuhay liwat kan mga matanos,” na mangyayari durante kan Milenyal na Paghade ni Cristo. (Lucas 14:14) Magigin ano iyan para ki Daniel? Dakol an sinasabi sa sato kan Tataramon nin Dios manongod dian.

²¹ Si Jehova “sarong Dios, bakong nin karibarawan, kundi nin katoninongan.” (1 Corinto 14:33) Kun siring, risang-risa na an pagkabuhay liwat sa Paraiso mangyayari sa aregladong paagi. Tibaad harohalawig nang panahon an nakaagi poon kan Armagedon. (Kapahayagan 16:14, 16) Nawara na an gabos na gira kan daan na sistema nin mga bagay, asin daing duwa-duwa na nagibo na an mga preparasyon sa pagsabat sa mga gadan. Kun manongod sa pagkasunodsunod kan pagbuelta kan mga gadan, itinatao kan Biblia an susundan na ini: “An lambang saro sa saiyang sadiring ranggo.” (1 Corinto 15:23) Garo baga posibleng marhay na pag-abot sa ‘pagkabuhay liwat kan mga matanos asin kan mga bakong matanos,’ an mga matanos enot na bubuhayon liwat. (Gibo 24:15) Sa paaging iyan, an mga maimbod kan suanoy, arog baga ni Daniel, makakatabang sa pag-administrar sa mga bagay-bagay digdi sa daga, pati an pagtokdo sa binilyon na “bakong matanos” na binuhay liwat.​—Salmo 45:16.

22. Ano an nagkapirang hapot na daing duwa-duwa na magagalaga si Daniel na masimbag?

²² Bago si Daniel magin andam na isaabaga an siring na mga paninimbagan, segurado na may nagkapira siang hapot. Total, mapadapit sa nagkapira sa harararom na hula na ipinaniwala sa saiya, sinabi nia: “Ako nakadangog, alagad dai ako nakasabot.” (Daniel 12:8) Mapapalukso an puso nia na sa katapustapusi masabotan an mga misteryong ini nin Dios! Daing duwa-duwa na bobooton niang madangog an gabos manongod sa Mesiyas. May pagkawiling manonodan ni Daniel an manongod sa pag-abante nin mga kapangyarihan pankinaban poon kan saiyang kaaldawan sagkod sa satong kaaldawan, an manongod sa kun siisay an maimbod na “mga banal kan Supremo”​—na nagmaigot sa ibong nin paglamag durante kan “panahon kan katapusan”—​asin an manongod sa pangultimong paglaglag kan Mesiyanikong Kahadean nin Dios sa gabos na kahadean nin tawo.​—Daniel 2:44; 7:22; 12:4.

AN KABTANG NI DANIEL SA PARAISO​—ASIN NINDO!

23, 24. (a) Paano an kinaban na dian bubuhayon liwat si Daniel mapapalaen sa kinaban na midbid nia? (b) Magkakaigwa daw nin lugar si Daniel sa Paraiso, asin paano niato naaaraman?

²³ Bobooton ni Daniel na makanood manongod sa kinaban na mamumugtakan nia sa panahon na iyan​—sarong kinaban na ibang-iba sa kinaban kan saiyang kaaldawan. Mayo na an gabos na gira kan mga guerra asin pan-aapi na nakapakanos sa kinaban na midbid nia. Mayo na nin pagkamondo, mayo na nin helang, mayo na nin kagadanan. (Isaias 25:8; 33:24) Alagad magkakaigwa nin abundang kakanon, dakol na istaran, asin nakakakontentong trabaho para sa gabos. (Salmo 72:16; Isaias 65:21, 22) An katawohan magigin sararo, maogmang pamilya.

²⁴ Si Daniel magkakaigwa nanggad nin lugar sa kinaban na iyan. “Ika matindog para sa saimong kabtang,” an sabi sa saiya kan anghel. An termino sa Hebreo na trinadusir digding “kabtang” kapareho kan ginagamit para sa literal na mga lote.c Tibaad pamilyar si Daniel sa hula ni Ezequiel manongod sa paghiriras kan nakabalik na daga nin Israel. (Ezequiel 47:13–48:35) Sa kaotoban kaiyan sa Paraiso, ano an isinusuherir kan hula ni Ezequiel? Na an gabos sa banwaan nin Dios magkakaigwa nin lugar sa Paraiso, na dawa an daga mismo paghihirirason sa areglado asin makatanosan na paagi. Siempre, bako sanang daga an kalabot sa kabtang ni Daniel sa Paraiso. Kaiba dian an saiyang puesto sa katuyohan nin Dios duman. Garantisado an ipinanugang balos ki Daniel.

25. (a) Ano an nagkapirang tinatanaw sa buhay sa Paraiso na nakakaakit sa saindo? (b) Taano ta masasabi na an mga tawo para sa Paraiso?

²⁵ Pero, kumusta man an saindong kabtang? Puedeng umaplikar sa saindo an iyo man sanang mga panuga. Gusto ni Jehova na an makinuyog na mga tawo ‘tumindog’ para sa saindang kabtang, magkaigwa nin lugar sa Paraiso. Isip-isipa na sana! Daing duwa-duwa, mapapalukso an satong puso na makamidbid mismo si Daniel, kaiba an iba pang maimbod na mga lalaki asin babae kaidtong mga panahon kan Biblia. Dangan may dai mabilang na iba pa na mabalik hale sa kagadanan, na nagkakaipong tokdoan tanganing mamidbid asin kamotan si Jehova Dios. Imahinara an saindong sadiri na nag-aasikaso sa satong daganon na istaran asin nagtatabang na gibohon iyan na paraiso na may daing katapusan na pagkalaenlaen asin daing sagkod na kagayonan. Isip-isipa an bagay na kamo tinotokdoan ni Jehova, na nakakanood na mamuhay sa paagi na katuyohan niang magin pamumuhay nin katawohan. (Isaias 11:9; Juan 6:45) Iyo, may lugar kamo sa Paraiso. Minsan ngani tibaad bakong pamilyar sa pagdangog nin nagkapira ngonyan an Paraiso, girumdoma na sa kapoonpooni dinisenyo ni Jehova an katawohan na mamuhay sa siring na lugar. (Genesis 2:7-9) Sa sentidong iyan, an Paraiso an natural na istaran kan binilyon sa daga. Sinda talagang para dian. An pakaduman magigin garo pagpuli sa sadiring harong.

26. Paano minimidbid ni Jehova na an paghalat sa katapusan kan sistemang ini bakong pasil para sa sato?

²⁶ An satong puso nag-aarab-adab huli sa apresasyon kun iniisip-isip niato an gabos na ini, bako daw? Bako daw na kamo mismo naghihimuyawot na makaduman? Kun siring, bakong makangangalas na gustong-gustong maaraman kan Mga Saksi ni Jehova kun noarin maabot an katapusan kan sistemang ini nin mga bagay! Bakong pasil an maghalat. Inaadmitir man iyan ni Jehova, ta sinasadol nia kita na ‘padagos na halaton’ an katapusan “dawa pa iyan maatraso.” An boot niang sabihon iyan tibaad garo baga maatraso sa punto de vista niato, ta sa iyo man sanang teksto, sinisierto sa sato: “Dai iyan mahuhuri.” (Habacuc 2:3; ikomparar an Talinhaga 13:12.) Iyo, an katapusan maabot nin eksakto sa panahon.

27. Ano an dapat nindong gibohon tanganing makatindog sa atubangan nin Dios sa bilog na panahon na daing sagkod?

²⁷ Ano an maninigo nindong gibohon mantang nagdadangadang an katapusan? Arog kan namomotan na marhay na propeta ni Jehova na si Daniel, maimbod na magtagal. Utitok na adalan an Tataramon nin Dios. Odok na mamibi. Mamomoton na makiasosyar sa mga kapagtubod. Maigot na itokdo an katotoohan sa iba. Mantang parani na nin parani aroaldaw an katapusan kan maraot na sistemang ini nin mga bagay, magdanay na determinado na magin maimbod na lingkod kan Kaharohalangkawe asin marigon na parasuportar sa saiyang Tataramon. Tunay nanggad, tawan nin atension an hula ni Daniel! Asin itao logod sa saindo kan Soberanong Kagurangnan na Jehova an pribilehio na magayagayang tumindog sa atubangan nia sa bilog na panahon na daing sagkod!

[Mga Nota sa Ibaba]

ANO AN NAMANSAYAN NINDO?

• Ano an nakatabang ki Daniel na makatagal sagkod sa katapusan?

• Taano an posibilidad na magadan ta dai ikinatakot nin grabe ni Daniel?

• Paano maootob an panuga kan anghel na si Daniel ‘matindog para sa saiyang kabtang’?

• Paano kamo personal na nakinabang sa pagtao nin atension sa hula ni Daniel?