Ano an Sinasabi kan Bibliya Manungod sa Giyera Nuklear?

Padagos na namemeligro an satong kinaban sa posibilidad na magkaigwa nin giyera nuklear huli sa padagos na paggibo kan makapangyarihan na mga nasyon nin nuklear na mga armas. Natural sanang mahadit an mga tawo huling pag mas dakul an nuklear na armas, mas dakula man an posibilidad na magkaigwa nin giyera nuklear. Natatakot ngani an mga tawo na sa paggamit nin dawa saro sanang sadit na nuklear na armas, puwede iyan magin mitsa nin giyera nuklear na siguradong maraot sa satong kinaban. Arog kan sinasabi kan Bulletin of the Atomic Scientists, nabubuhay kita sa panahon nin “dai nawawarang posibilidad nin pagkaigwa nin giyera nuklear.”

Posible daw na mangyari an giyera nuklear? Kun iyo, ano an mangyayari sa satong planeta? Asin ano an makakatabang sato na dai mahadit na marhay sa posibilidad na magkaigwa nin giyera nuklear? Ano an sinasabi kan Bibliya?

Sa artikulong ini

Patiinot na daw na sinabi kan Bibliya na magkakaigwa nin giyera nuklear?

Dai espesipikong sinambit kan Bibliya an manungod sa giyera nuklear. Pero ihinula kan Bibliya an mga pag-uugali saka pangyayari na puwedeng magin dahilan na mangyari an giyerang iyan.

Pag-isipan an minasunod na teksto sa Bibliya na konektado sa mga pangyayari sa kinaban ngunyan:

Teksto sa Bibliya: Naghapot an mga disipulo ni Jesus: “Ano an magigin tanda kan saimong presensiya saka kan pagtatapos kan sistema nin mga bagay?” Nagsimbag si Jesus: “An nasyon makikilaban sa nasyon asin an kahadian makikilaban sa kahadian.”—Mateo 24:3, 7.

Mga pangyayari sa kinaban ngunyan: Dakul na nasyon an may tendensiya na makigiyera, lalo na idtong may mga nuklear na armas o may kakayahan na gumibo kaiyan.

“Sa nag-agi pa sanang mga taon, mas naggagrabe an kadahasan sa kinaban: mas nagdadakul an nangyayaring iriwal.”—The Armed Conflict Location & Event Data Project.

Teksto sa Bibliya: “Sa panahon kan katapusan, makikipagtuklangan sa [hadi kan norte] an hadi kan timog.”—Daniel 11:40.

Mga pangyayari sa kinaban ngunyan: Arog kan ihinula kan Bibliya, an magkalaban na mga nasyon asin an saindang mga kaalyado nakikipagtuklangan, o nakikipagkumpetensiya, para magin an pinakamakapangyarihan sa mga nasyon. Dawa ngani dai man nakikigiyera an mga nasyon na may puwersa nuklear, pero padagos nindang pinapakusog an saindang mga nuklear na armas.

“Nahiling ta an pagdakul kan nangyayaring iriwal kan mga nasyon sa naglihis na dekada, kaiba na diyan an pagsuporta kan makapangyarihan na mga nasyon sa mag-ibong na lado.”—The Uppsala Conflict Data Program.

Teksto sa Bibliya: “Sa huring mga aldaw maabot an delikado asin masakit na mga panahon. Huli ta an mga tawo magigin . . . habo [sa] ano man na kasunduan, parapakaraot, daing pagpupugol sa sadiri, maringis.”—2 Timoteo 3:1-3.

Mga pangyayari sa kinaban ngunyan: Arog kan dakul na tawo ngunyan, an mga lider kan mga nasyon parating dai nagkakauruyon. Imbes na resolberan sa matuninong na paagi an saindang mga dai pagkauruyon, inaagi ninda iyan sa mga pananakot o pamumuwersa. An arog kaiyan na mga aksiyon puwedeng magresulta sa giyera nuklear.

“Kun dai magigibuhan nin paagi para magkasararo, magrabe pa an mga iriwal.”—S. Saran asin J. Harman, World Economic Forum.

Itutugot daw kan Diyos na magkaigwa nin giyera nuklear?

Mayong espesipikong sinasabi an Bibliya. Pero, sinasabi kaiyan na magkakaigwa nin “makatatakot na mga tanawon” na mangyayari sa panahon ta. (Lucas 21:11) Sarong halimbawa kaiyan an mga bomba atomika na ihinulog durante kan Ikaduwang Giyera Mundiyal. Ipinapaliwanag kan Bibliya kun taano ta tinutugutan nin Diyos na mangyari an mga giyera. Para sa dagdag na impormasyon, hilingon an video na Taano ta Tinutugutan nin Diyos an Pagsakit?

Ano an mangyayari sa planetang Daga?

Dawa ngani gamiton giraray kan mga tawo an nuklear na mga armas, dai itutugot nin Diyos na maggrabe an kamugtakan na magigin dahilan na malaglag o biyong maraot an kinaban. Sinasabi kan Bibliya na an satong planeta magdadanay asin iistaran kan mga tawo sagkod pa man.

“An daga nagdadanay sagkod lamang.”—Eclesiastes 1:4.

“[An] Diyos, an Saro na naghaman kan daga, . . . dai iyan linalang na mayong katuyuhan, kundi hinaman iyan tanganing istaran.”—Isaias 45:18.

Iniisip kan iba na sa maabot na panahon an daga magigin tiwangwang asin grabe na an polusyon huli sa epekto kan giyera nuklear; dikit na tawo na sana an natatada diyan asin nasasakitan mabuhay. Alagad, sinasabi kan Bibliya na ibabalik sa dati an kamugtakan kan daga asin dai na mahihiling pa an danyos na kawsa nin mga giyera.

“An kaawagan asin an alang na daga maggagaya-gayang marhay, asin an disyertong kapatagan magigin maugma asin mamumurak arog kan azafran.”—Isaias 35:1.

Mga tawo na maugmang nag-iiribanan saka nagtatrabaho sa sarong paraisong daga. — Gusto nin Diyos na mabuhay kita nin maugma sa sarong magayon na daga

Dinisenyo kan satong Kaglalang an daga na may pambihirang kakayahan na hirahayon an sadiri kaiyan. Asin aram man niyato na gagamiton nin Diyos an saiyang kapangyarihan para ibalik sa dati an marahay na kamugtakan kan daga; magigin magayunon iyan na istaran kan mga tawo sagkod pa man.—Salmo 37:11, 29; Kapahayagan 21:5.

Ano an makakatabang saimo na dai mahadit na marhay sa posibilidad na magkaigwa nin giyera nuklear?

May nagkapira na tibaad nahahadit na marhay sa posibilidad na magkaigwa nin giyera nuklear asin sa maraot na mga epekto kaiyan. Makakatabang sa sainda an mga panuga asin sadol kan Bibliya na dai mahadit na marhay asin mabawasan an takot. Paano?

May sinasabi an Bibliya na sarong magayunon na paglaom para sa daga asin sa mga nag-iistar diyan. Magseserbing “angkla para sa satuyang buhay” an pakaaram ta sa paglaom na iyan asin makakatabang sato na dai gayong magparahadit. (Hebreo 6:19, nota sa ibaba) Makakatabang man kun dai ta pagpaparaisipon an mga puwedeng mangyari sa maabot. Arog kan sinabi ni Jesus, “tama na sa kada aldaw an sadiri kaiyan na mga problema.”—Mateo 6:34.

Sa katunayan, mahalagang atamanon ta an satong mental asin emosyonal na salud. Magigibo ta iyan kun lilikayan ta an pagbasa, paghiling, o pagdangog nin mga impormasyon na puwedeng makapahadit sa sato, arog kan mga pag-urulay, prediksiyon, asin opinyon manungod sa pinakabagong mga bareta may koneksiyon sa nuklear na mga armas. Dai man buot sabihon kaini na mayo na kitang pakiaram. Imbes, habo ta lang magparapokus sa mga pangyayari na mayo kitang kontrol asin na tibaad dai man ngani mangyari.

“An kahaditan sa puso nin tawo iyo an nakakapagabat diyan, pero an marahay na tataramon iyo an nakakapagaya-gaya kaiyan.”—Talinhaga 12:25.

Likayan nguna an magparahiling o magparadangog nin maraot na mga bareta asin magpokus sa positibong mga bagay sa buhay mo.

“Lugod na an Diyos na nagtatao nin paglaom panuon kamo nin lubos na kaugmahan asin katuninungan huli sa pagtitiwala nindo sa saiya.”—Roma 15:13.

Collage: Sarong lalaki na may kumpiyansang nakahiling sa inutan. 1. Mahihiling sa likod niya an mga nakikigiyera, pati na an eroplanong pangmilitar, mga nuclear missile, asin mahibugon na panganuron na korteng mushroom. 2. Sa inutan niya, mahihiling an sarong malinig asin matuninong na daga na may kabukidan, maberdeng kababan, salog, asin mga gamgam. — Nagtatao an Bibliya nin sarong masasarigan na paglaom na matao nin magayon na puturo

Pag mas naaaraman mo an mga panuga nin Diyos, matao iyan saimo nin paglaom, kaugmahan, asin panglaog na katuninungan.

Iprinopesiya daw kan Bibliya na mangyayari an nuklear na Armagedon?

Iniisip kan nagkapira na an Armagedon iyo an pangglobong giyera nuklear. Kaya talagang kapahapahamak na mga resulta an naiisip ninda pag nangyari iyan.

Pero, sinasabi kan Bibliya na an “Armagedon” nanunungod sa ralaban kan “mga hadi sa bilog na daga,” o mga gobyerno nin tawo, asin kan Diyos.a (Kapahayagan 16:14, 16) Sa Armagedon, dai basta-basta gagadanon dawa siisay na lang saka dai man mararaot an daga, bakong arog kan sa giyera nuklear. Imbes, an mga maraot sana an lalaglagon diyan nin Diyos, kaya posible nang makamtan an tunay na katuninungan asin katiwasayan.—Salmo 37:9, 10; Isaias 32:17, 18; Mateo 6:10.

Ano an sinasabi kan Bibliya na solusyon para matapos an giyera?

“Pinapapundo niya an mga giyera sa bilog na daga. Binabari niya an pana asin pinuputol-putol an garod; sinusulo niya an mga karetang panggiyera.”—Salmo 46:9.

Ipapahiling kan Diyos na Jehovab an saiyang awtoridad sa mga nagraralaban na nasyon paagi sa pagpapundo kan saindang mga iriwal asin pagraot kan saindang mga armas na panggiyera. Gigibuhon niya ini paagi sa saiyang Kahadian, sarong gobyerno sa langit na iyo an masalida sa mga gobyerno na namamahala sa daga.—Daniel 2:44.

Tutukduan kan Kahadian nin Diyos an mga tawo na mamuhay nin matuninong asin may pagkasararo. Huling saro na lang an gobyerno na mamamahala sa bilog na daga, mawawara na an dai pagkauruyon kan mga nasyon; an mga tawo dai na nanggad mag-aadal pa nin pakikigiyera! (Mikas 4:1-3) Ano an resulta? ‘Matuninong na mamumuhay an lambang saro sa tahaw kan sadiri niyang ubasan saka mga kahoy na higera, asin mayo nang magpapatakot saiya.’—Mikas 4:4, An Marahay na Bareta Biblia.

a Hilingon an artikulong “Ano an Ralaban nin Armagedon?”

b Jehova an personal na pangaran nin Diyos. (Salmo 83:18) Hilingon an artikulong “Siisay si Jehova?”

An sinasabi daw sa libro kan Bibliya na Kapahayagan nanunungod sa giyera nuklear?

Iniisip kan nagkapira na an libro nin Kapahayagan nanunungod sa biyong pagkaraot kan daga na resulta kan giyera nuklear. (Kapahayagan 6:14; 8:7-12; 16:1-21) Halimbawa, sinasabi kaiyan na may ‘mababang kalayo sa daga hali sa langit.’ (Kapahayagan 13:11-13) Nasabutan kan mga Saksi ni Jehova na nanunungod iyan sa paggamit nin mga bomba atomika kan panahon kan Ikaduwang Giyera Mundiyal, bako sa giyera nuklear na puwedeng mangyari daa sa bilog na kinaban.

Iyo, may sinasabi an libro nin Kapahayagan manungod sa mga pangyayari na may gagamiton na nuklear na mga armas, pero an katuyuhan kaiyan bako na magtao nin nakakatakot na mga detalye. Pag binabasa an libro nin Kapahayagan, tandaan:

Naggagamit an libro nin dakul na tanda, o mga simbolo, na dai dapat sabuton sa literal na paagi.—Kapahayagan 1:1.
Bakong katuyuhan kan libro na takuton an mga parabasa. Imbes, an mensahe kaiyan nagtatao nin kaugmahan sa mga tawo na nakakasabot asin nagsusunod diyan.—Kapahayagan 1:3.

Para sa dagdag na impormasyon, hilingon an artikulong “An Libro nin Kapahayagan—Ano an Kahulugan Kaiyan?”