An Huma nin Nuklear—Hinale Na Para sa Ikararahay!
AN PAMUMUHAY na may makangingiring takot bako an boot nin Dios para sa katawohan. Bilang an “maogmang Dios,” boot nia na sinda magkamit nin katoninongan asin mamuhay sa katiwasayan—sa halipot, magin maogma. (1 Timoteo 1:11) Sa sarong kinaban na pano nin huma nin nuklear, ini malinaw na imposible.
“Katoninongan Asin Katiwasayan”—Palsipikado
Maninigo na magin malinaw na an huma nin nuklear dai pa talaga tapos. Minsan siring, sa ibong kan politikal, ekonomiko, asin sosyal na kahandalan, an mga nasyon garo baga sa pankagabsan nagigin mapaglaom sa pinakamarahay. An danay na paghihingoa na haleon an peligro nagin risa magpoon kan Internasyonal na Taon nin Katoninongan kan NU kan 1986.
An The Bulletin of the Atomic Scientists kan nakaaging dekada binirik an relo kaiyan sa pagkatunaw kan kinaban—an paagi kaiyan sa pagpaheling kan probabilidad nin guerra nuklear—hale sa 3 minutos bago an matanga pabalik sa 17 minutos bago an matanga. Kan 1989 an Stockholm International Peace Research Institute nagsabi na an “paglaom para sa matoninong na resolusyon sa iriwal mas marahay an basihan kisa sa arin man na taon magpoon kan katapusan nin Guerra Mundial II.”
Sa nakaagi pa sanang mga taon an Naciones Unidas pinakosog sa paghusay sa internasyonal na mga lugar nin iriwal. An kapangganahan kaiyan, minsan ngani bakong lubos, igo nang makakontribuwir sa pankagabsan na espiritu nin paglaom sa marahay na ibubunga. An ngapit posibleng madara nin dugang pang mga kapangganahan. An mga kurahaw nin “katoninongan asin katiwasayan” posibleng magigin mas makosog asin mas mapuwersa. Puwede pa ngani iyan na magkamit nin pagtitiwala.
Alagad mag-ingat! “Sa panahon na sinda nagsasarabi: ‘Katoninongan asin katiwasayan,’” an Biblia nagpapatanid, “dangan an biglang pagkalaglag madaling maabot sainda siring sa kolog nin kasakitan kan bados na babae; asin dai sinda makaliligtas minsan sa anong paagi.” Kaya, an mga kurahaw nin “katoninongan asin katiwasayan” magtatanda kan oras nin Dios sa “paglaglag sa mga naglalaglag kan daga [paagi sa polusyon, nuklear asin iba pa].”—1 Tesalonica 5:3, 4; Kapahayagan 11:18.
Mangnoha na an Biblia dai nagsasabi na an mga nasyon magkakamit nin “katoninongan asin katiwasayan.” Sinda malinaw na mag-oorolay manongod kaiyan sa sarong pambihirang paagi, na nagpapahayag nin paglaom sa marahay na ibubunga asin nin kombiksion na dati dai namatean. An mga posibilidad sa pagkamit nin katoninongan asin katiwasayan minalataw na mas harani na kisa kaidto. Sa ibong nin nagpapadagos na huma nin nuklear, an mga nasyon papamugtakon an boot sa falsong pakamate nin katiwasayan.
Alagad, an tunay na mga Kristiano dai madadaya. May orog na interes sinda magtatanaw sa sarong bagay na mas marahay na lihis pa sa sa-tawong katoninongan asin katiwasayan!
Katoninongan Asin Katiwasayan—An Katunayan
Sono sa Salmo 4:8, an tunay na katoninongan asin katiwasayan manonompongan solamente sa laog kan areglo ni Jehova Dios: “Sa katoninongan ako mahigda asin matotorog, huli ta ika sana, O Jehova, an nagpapaontok sa sako sa katiwasayan.” An ano man na kurahaw nin “katoninongan asin katiwasayan” na ipinahahayag sa luwas kan konteksto nin areglo sa Kahadean ni Jehova palsipikado sana. Iyan dai magkakamit nin ano man na may nagdadanay na halaga.
An parsial na mga solusyon bako pang igo para sa Kahadean nin Dios sa irarom ni Cristo. An gobyerno nin Dios magibo nin orog pa sa pag-ina sa bilang nin mga armas nuklear: iyan biyong hahaleon kaiyan asin an gabos na iba pang armas sa guerra. An Salmo 46:9 nanunuga: “Pinaoontok nia an mga ralaban sagkod sa kaporoporohi kan daga. An arko saiyang binabari asin pinagpuputolputol an garod; an mga karro saiyang sinosolo sa kalayo.”
Siring man, an mga huma nin nuklear huli sa pagdeperensia nin mga reaktor nuklear o huli sa radyoaktibong basura magigin mga bagay na nakalihis na. Ta kun dai an mga tataramon bakong totoo: “Sinda magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda; huli ta an mismong ngoso ni Jehova nin mga hukbo iyo an nagtaram kaiyan.” An Dios dai makakapagputik. Mayo kitang dahelan na pagdudahan an saiyang mga tataramon.—Miqueas 4:4; Tito 1:2.
Kakamtan daw nindo an pagkakaigwa kan paglaom na mabuhay sa sarong kinaban na an huma nin nuklear hinale na para sa ikararahay? Puwede, huli ta malinaw na itinatao kan Tataramon nin Dios an mga kahagadan. Paagi sa pag-adal manongod kaiyan asin paagi sa pamumuhay sono dian, puwedeng sarong aldaw magkaigwa kamo kan kagayagayahan na magsabing may pakaginhawa: “An huma nin nuklear—tapos na sa katapustapusi!”
[Ritrato sa pahina 7]
An katoninongan magdadanay sa bagong kinaban nin Dios na mayo nin ano man na mga huma nin nuklear
[Credit Line]
M. Thonig/H. Armstrong Roberts
[Picture Credit Line sa pahina 6]
Retrato kan U.S. National Archives