An Punto-de-Vista kan Biblia sa Katoninongan Asin Katiwasayan

An dakol naniniwala sa garo baga tendensia pasiring sa orog na pagkasararo kan kinaban asin sa katoninongan saka katiwasayan na puwedeng itao kaini. Sinda naglalaom na an siring na mobimiento magiya pasiring sa mas marahay na kinaban. Alagad ta ipinaririsa kan Biblia na an kalabot dian orog pa sa ipinaheheling nin panluwas na mga bagay.

AN TEMANG katoninongan asin katiwasayan nangorognang interesante sa mga Kristiano huli sa isinurat ni apostol Pablo sa irarom nin pasabong sa sarong Kristianong kongregasyon kan enot na siglo. An saiyang mga tataramon nasusurat sa Biblia sa 1 Tesalonica 5:3: “Sa panahon na sinda nagsasarabi: ‘Katoninongan asin katiwasayan!’ dangan an biglang pagkalaglag madaling maabot sainda siring sa kolog kan bados na babae; asin dai sinda makaliligtas minsan sa anong paagi.” An tekstong ini nagpapalataw nin mahahalagang hapot.

Katoninongan Asin Katiwasayan—Kapinonan nin Ano?

Kun babasahon nindo an konteksto kan mga tataramon ni Pablo na kinotar sa itaas, maheheling nindo na an mga nagsasabi nin “katoninongan asin katiwasayan” bakong nagpupukang mga Kristiano, kundi imbes, mga indibiduwal na torog sa talagang nangyayari. Sinda nasa peligrosong kamugtakan alagad ta dai nakaaaram kaiyan ta an paghona ninda marahay an kamugtakan nin mga bagay. Alagad manongod sa mga Kristiano, si Pablo nagsabi: “Kun dapit sa mga panahon asin mga kapanahonan, mga tugang, dai na kamo nangangaipo na suratan pa nin ano man.” (1 Tesalonica 5:1) Iyo, maninigo na aram niato an iskedyul nin Dios sa mga bagay. Taano? Huli ta sinabi ni Pablo na an sarong panahon nin biglang pagkalaglag, na inaapod “aldaw ni Jehova,” madatong na “kabaing na gayo nin parahabon kun banggi.”—1 Tesalonica 5:2.

Ano an kaiba sa ihinulang pagtaram nin katoninongan asin katiwasayan? Malinaw na iyan labi sa pagtaram sana. An mga tawo nagtataram manongod sa katoninongan nin haros arog kalawig kan saindang pagraralaban. An mga tataramon ni Pablo seguradong nagtotokdo sa panahon na an mga nasyon garo baga nakagigibo na nin katoninongan asin katiwasayan sa pambihirang paagi. Pero ini artipisyal sana. An garo baga katoninongan asin katiwasayan na magbubunga nin biglang pagkalaglag maliwanag na bakong tunay na katoninongan o katiwasayan.

Si Jesus nagtaram man manongod sa biglang pagkalaglag na ini. Inapod nia iyan na “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” Mga pirang gatos na taon bago si Jesus, si propeta Daniel nagtaram man manongod kaiyan, asin inapod nia iyan na “panahon nin kasakitan na dai pa nangyari poon na magkaigwa nin nasyon sagkod sa panahon na iyan.”—Mateo 24:21; Daniel 12:1.

Baga man iyan apodon na dakulang kahorasaan o baga man iyan apodon na panahon nin kasakitan—arin man sa duwa, sono sa mga hula, paparaon kaiyan an gabos na gira kan daganon na palakaw ni Satanas. Imbes na mangahulogan nin banal na pag-oyon, an ihinulang pagsabi nin katoninongan asin katiwasayan magbubunga kan kabaliktaran!—Ikomparar an Sofonias 3:8.

An mga Kamugtakan nin Panahon Ibinuyagyag!

An bago pa sana daw na risang mga mobimiento pasiring sa orog na pagkasararo kan kinaban asin an ibinubungang mga paglaom sa katoninongan asin katiwasayan kaotoban kan makahulang patanid ni Pablo? Bueno, arog kan parateng idinodoon kan magasin na ini, poon kan 1914 naheling niato an kaotoban nin nagkapirang hula sa Biblia mapadapit sa langitnon na presensia ni Jesus na kapot an kapangyarihan sa Kahadean. (Mateo, kapitulo 24, 25; 2 Timoteo 3:1-5; Kapahayagan 6:1-8) Ipinarisa ni Jesus na an aldaw ni Jehova, na an biglang kalaglagan maabot sa mga maraot, madatong mantang buhay pa an kairiba sa kapag-arakian na nakaheling sa pagpopoon kan panahon na ini.—Lucas 21:29-33.

Iinintrodusir man ni apostol Pablo an sarong kamugtakan nin panahon. Sabi nia: “Mantang sinda nagtataram manongod sa katoninongan asin katiwasayan, sa panale madatong sainda an kalamidad.” An pagkatradusir na ini kan mga tataramon ni Pablo sa The New English Bible malinaw na nagpapaheling na an dakulang kahorasaan mangyayari “mantang sinda nagtataram.” Siring sa parahabon kun banggi—dai linalaoman—maabot an kalaglagan kun kasuarin iyan dai linalaoman, kun an atension kan kadaklan na tawo nasa saindang linalaoman na katoninongan asin katiwasayan. Kun siring, mantang sa ngonyan dai niato masasabi nin segurado na an presenteng situwasyon nin katoninongan asin katiwasayan nakaootob sa mga tataramon ni Pablo—o kun gurano pang pagtaram manongod sa katoninongan asin katiwasayan an kaipuhan na mangyari—an bagay na an siring na pagtaram nadadangog na ngonyan sa sokol na dai pang kaagid minapukaw sa mga Kristiano sa pangangaipo na magpuka sa gabos na panahon.

‘Suagan’ nin mga Kapangyarihan Pankinaban

Kan sia magtaram manongod sa panahon nin kasakitan, si propeta Daniel may sinabi man na kamugtakan nin panahon. Ipinaheling nia na an panahon nin kasakitan mangyayari sa katapusan kan haloyon nang pag-iiwal nin duwang makapangyarihan na grupo, an saro inaapod na “hade sa amihanan” asin an saro man, “hade sa timog.” (Daniel 11:5-43) Poon kan matapos an Guerra Mundial II, an makapangyarihan na mga grupong ini irenepresentar nin kapitalistikong “hade sa timog” asin nin sosyalistikong “hade sa amihanan.”

Ihinula ni Daniel na an mapait na pagriribal kan duwang grupong ini, na narisa sa nakaaging 45 taon, magigin garo ‘suagan,’ garo duwang paragumol na naghihingoang magkabentaha. Kasuarin pa sana, garo baga nagluya na an suagan. Halimbawa, kan Mayo kan nakaaging taon, an Sobyet na ministrong panluwas nagsabi na tapos na an Malipot na Guerra. Kan Hunyo, nasambitan kan magasin na Time an komperensia kan pinakahalangkaw na mga opisyales nin Estados Unidos asin Unyon Sobyet asin nagsabi: “An pira sa mga napagkaoyonan manongod sa pagkontrol sa armas asin nuklear na pagprobar garo dai mapaniwalaan kun kaidtong pirang taon na an nakaagi. Ngonyan, minsan pagsararoon, iyan garo baga daing gayo mahalaga.”

Kun baga temporaryo o permanente an garo baga pagkaaramigo kan duwang pinakamakapangyarihan na nasyon, panahon sana an makapagsasabi. Pero sarong bagay an malinaw. Halawig na an linakaw kan panahon na sinabi ni Jesus. Asin an mga nangyayari sa kinaban nagpaparisa na kita harani na sa mga pangyayaring ihinula ni apostol Pablo asin ni propeta Daniel. Minsan pa an bago pa sanang mga pangyayari politikal sa kadikit huli sa impluwensia kan mga iglesya kan Kakristianohan, iyan dai magiya pasiring sa nagdadanay na katoninongan. An ebidensia iyo na iyan magiya pasiring sa kabaliktaran para sa mga nasyon kan kinaban na ini.

[Mga Retrato para sa pahina 6]

Panahon an magsasabi kun gurano an ilalawig kan garo baga pagkaaramigo kan duwang pinakamakapangyarihan na nasyon

[Pasasalamat para sa Pinagkuanan]

Mga Sugo kan USSR sa NU