Pagtanaw nin Lihis Pa sa Gibong-Tawong “Katoninongan Asin Katiwasayan”
An totoo, an mga tawo nungka na makatatao nin tunay, nagdadanay na katoninongan. Taano ta dai? Huli ta an mga tawo bakong iyo an tunay na mga paraparibok, minsan ngani may kabtang sinda sa kasalan sa saindang kasaysayan na namantsahan nin dugo. An tunay na paraparibok mas makapangyarihan kisa tawo. Iyan daing iba kundi si Satanas na Diablo, na sinasabi sa Biblia na “nandadaya sa bilog na ineerokan na daga.”—Kapahayagan 12:9.
AN Biblia nagsasabi: “An bilog na kinaban namumugtak sa kapangyarihan kan maraot [si Satanas].” (1 Juan 5:19) Kun siring, an pagkakamit nin tunay na katoninongan asin nagdadanay na katiwasayan dapat na kalabot an paghale ki Satanas kaiba an palakaw sa kinaban na saiyang itinogdok asin malinaw na pinamomogolan. (Ikomparar an Isaias 48:22; Roma 16:20.) Ini dai kayang gibohon nin mga tawo.
Kun siring, paano makakamtan an katoninongan asin katiwasayan? Paagi sa kapangyarihan kan Saro na mas makosog nanggad ki Satanas. An Makakamhan sa gabos na Dios nagtalaan nin limiteng panahon sa aktibidad ni Satanas sa tahaw nin katawohan. Pag-abot kan limiteng panahon na iyan, maabot an “biglang pagkalaglag” sa kinaban na namumugtak sa kapangyarihan ni Satanas. (1 Tesalonica 5:3-7) An gabos na ebidensia naggigiya sa konklusyon na ini mangyayari sa dai na mahahaloy.
Katoninongan Asin Katiwasayan Ngonyan!
Alagad kumusta man ngonyan? Minsan ngonyan posible an igong tunay na katoninongan asin katiwasayan. Paano? Bakong arog kan hiningoa nin dakol na namomoon sa relihiyon, na pakikilabot sa politika kan kinaban na ini, kundi, imbes, paagi sa pagkuyog sa mga pagboot asin hatol nin Dios.
Talaga daw na nagbubunga nin katoninongan an siring na gawe? Iyo nanggad. Halimbawa, an mga Saksi ni Jehova prinobaran iyan asin napatunayan na talagang puwedeng magkamit nin tunay na katoninongan saka igong katiwasayan. An pagkuyog sa mga pagboot nin Dios na ipinahayag sa Biblia nagpangyari sainda na magkasararo bilang internasyonal na organisasyon na may tunay na katoninongan, ano man an saindang rasa, nasyonalidad, o tataramon.—Salmo 133:1.
Bilang pagkuyog sa banal na pagboot, simboliko nindang ‘dinaragopdop an mga minasbad na magin mga tarom nin arado asin dai na sinda nag-aadal na makilaban.’ (Isaias 2:2-4) Sinda tiwasay sa pagkamoot nin Dios asin may kompiansa na an saindang espirituwal na mga tugang nagmamakolog sa sainda. (Roma 8:28, 35-39; Filipos 4:7) Kun nagdududa kamo kun baga ini totoo, inaagda mi kamong songkoon sinda sa saro kan saindang mga Kingdom Hall asin helingon mismo nindo.
Katoninongan Asin Katiwasayan sa Bilog na Kinaban
Minsan siring, bako ini an ultimong kaotoban kan panuga sa Biblia na tunay na katoninongan asin katiwasayan. Bako nanggad! Iyan patanaw sana kan magigin kamugtakan kan kinaban na ini kun an gabos magkuyog na sa mga pagboot nin Dios. Sa dai na mahahaloy an patanaw na iyan magigin katunayan.
Si apostol Pablo nagsabi: “Sa panahon na sinda [an mga dai naglilingkod sa Dios] nagsasarabi: ‘Katoninongan asin katiwasayan!’ [sa paghona na sa katapustapusi ikinatao ninda an katoninongan asin katiwasayan sa sadiri nindang paagi] dangan an biglang pagkalaglag madaling maabot sainda.” (1 Tesalonica 5:3) Magdedesisyon an Dios na bastante na an ilinawig kan pandadaya ni Satanas sa katawohan. Sa siring panahon nang sia haleon, kaiba kan maraot na palakaw sa kinaban na nasa saiyang kapangyarihan. Dangan iyan na an panahon para sa kaotoban kan hula ni Daniel: “Sa mga aldaw kan mga hadeng idto an Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa ibang banwaan. Iyan an maronot asin matapos kan gabos na ining kahadean, asin iyan magdadanay sagkod lamang.”—Daniel 2:44.
Ini daw bakong makatanosan na akto nin Dios? Bako nanggad. An biglang pagkalaglag maabot sana sa mga maninigong mag-ako kaiyan sono sa paghokom nin Dios, sa mga pamantayan nin Dios. Nagsasarig daw kamo sa Kaglalang na makadesisyon nin makatanosan sa bagay na ini? Tunay na ikawawalat na niato nin segurado an bagay na iyan sa saiyang kamot! Asin ano an magigin bunga kan saiyang paghokom? An talinhaga nagsasabi: “An mga matanos iyo an mag-eerok sa daga, asin an mga daing kanawayan iyo an matatada dian. Kun manongod sa mga maraot, sinda popohoon sa daga.” (Talinhaga 2:21, 22) Ikamomondo daw nin siisay man an pagkawara kan mga maraot?
Mantang hinale na an mga paraparibok, tunay na katoninongan asin katiwasayan an kakamtan kan katawohan sa bilog na daga sakop kan maboot na pamamahala kan Kahadean nin Dios. “Dai sinda magibo nin maraot o manraraot sa bilog na sakuyang banal na bukid; huli ta an daga mapapano kan kaaraman dapit ki Jehova kun paanong an tubig nakatatahob sa mismong kadagatan.” (Isaias 11:9) Nagtutubod daw kamo sa panugang ini kan Biblia? Nananarig daw kamo na an mga bagay na ini mangyayari sa madali na? Kun kamo may pagduda, dinadagka mi kamong siyasaton pa nin orog an bagay. An totoo, an paagi nin Dios an solamenteng paagi na maabot nin tawo an haloy nang hinihimuyawot na pasohan na tunay na katoninongan asin katiwasayan.
[Ritrato sa pahina 8]
An banwaan ni Jehova may tunay na katoninongan asin igong katiwasayan ngonyan