Pagkaligtas Pasiring sa Bagong Daga
Kapitulo 2: An mga Isyu na Nagdedeterminar sa Satong Ngapit
1. (a) Anong presenteng mga isyu an nasa isip nin dakol na tawo, asin saen sinda naghahanap nin solusyon? (b) Ano an parateng dai ninda nakokonsiderar?
Sa nakakaagi pa sanang mga taon an mainit na mga isyu na may labot sa satong ngapit sunod-sunod na iinatubang sato. Grabe an kamugtakan kaya an mga tawo sa gabos na lugar desesperadong nagmamawot nin kaginhawahan. Tibaad nagtutubod sinda sa Dios, pero tibaad naghohona sinda na tanganing rumahay an kamugtakan digdi sa daga, an mga tawo an kaipuhan na gumibo kaiyan. An iba pinoprobaran na gibohon iyan paagi sa nag-eeksister na mga gobyerno o paagi sa lagduan na pagprotesta tumang sa mga desisyon kan mga gobyernong ini. An iba nagtutubod na rebolusyon sana an solamenteng paagi. Sinda naghohona na an pagliwat sa mga ley, pagsalida sa mga namomoon o pati sa mga gobyerno seguradong maparahay sa mga kamugtakan. Alagad ano an ipinaheheling kan mga katunayan? Pakatapos nin paghihingoa sa rinibong taon, an mga tawo dai nakapatindog nin minsan sarong gobyerno na nagtao nin daing pagpalaen na hustisya, tunay na katiwasayan asin nagdadanay na kaogmahan sa gabos na sakop kaiyan. Ano an dahelan kaini?
2. Taano ta maraoton an kamugtakan sa kinaban?
2 Minsan pa gurano karahay kan mga katuyohan nin mga may kapangyarihan, an gabos na gobyerno nin tawo minamaniobra nin mga puwersa na dai kayang makontrol nin mga tawong nasa katongdan. Niisay? Nin mas makapangyarihan sa tawong mga espiritu, si Satanas na Diablo asin kan saiyang mga demonyo. Totoo, dakol an pinagngingisihan an paniniwala sa espiritung mga personang arog kaiyan. Pero si Jesu-Cristo dai. Personal niang aram an pinaghalean ni Satanas asin inapod siang “poon kan kinaban na ini.” (Juan 12:31) Sa simbolikong pananaram, ilinaladawan kan Biblia an panglobong sistema politikal na mabangis na hayop asin ihinahayag na “an dragon [si Satanas] nagtao sa hayop kan kapangyarihan kaiyan asin kan trono kaiyan patin dakulang autoridad.” (Kapahayagan 13:1, 2; ikomparar an Daniel 7:2-8, 12, 23-26.) Asin para sa satong kaaldawan an Biblia naghula nin orog na kasakitan sa daga “huli ta huminilig na dian saindo an Diablo.” (Kapahayagan 12:12) Mayo nin ibang ikatataong paliwanag sa karibarawan na nahologan kan sosyedad nin tawo. Alagad paano iyan nangyari? Ano an magigibo niato tanganing makaginhawa?
An Isyu nin Soberaniya
3. Ano an ipinaheheling kan Genesis 2:16, 17 kun manongod sa tamang relasyon nin katawohan sa Dios?
3 An enot na mga kapitulo sa Biblia nagsasabi sato na kan lalangon ni Jehova Dios an enot na mag-agom na tawo, si Adan asin Eva, asin ibugtak sinda sa tatamnan nin Eden tinawan nia sinda nin instruksion manongod sa saindang relasyon sa saiya. Sia an Saindang Ama, an saindang matinaong Paratagama, saka Unibersal na Soberano. Para sa saindang ikakarahay, kaipuhan na masabotan ninda na an saindang padagos na pagkabuhay depende sa pagkuyog sa Dios.—Genesis 2:16, 17; ikomparar an Gibo 17:24, 25.
4. (a) Saen hale si Satanas? (b) Anong salang kamawotan an pinabayaan niang tumubo?
4 Kan panahon na idto sangkap an gabos na linalang. Bakong arog kan mga hayop, an mga anghel asin tawo igwa kan kakayahan nin libreng kabotan. Alagad dai nahaloy pakalalanga sa tawo an saro sa mga anghel, sa pag-abuso sa makangangalas na kakayahan na gumibo nin personal na mga desisyon, nagrebelde tumang sa soberaniya ni Jehova. Kaya ginibo nia an sadiri na kaiwal, o paratumang, na iyo an literal na kahulogan kan ngaran na Satanas. (Ikomparar an Santiago 1:14, 15; Kapahayagan 12:9.) Huli sa ambisyon, hiningoa ni Satanas na irayo ki Jehova Dios an enot na mag-agom na tawo asin ipasakop sinda sa saiyang impluwensia. Naheling nia sa sainda an potensial nin sarong kinaban na pano nin mga tawo na nag-oomaw sa saiya bilang saindang dios. (Ikomparar an Isaias 14:12-14; Lucas 4:5-7.) An kasaysayan kan nangyari sa Eden bakong eroestorya sana. Sinabi ni Jesu-Cristo na iyan makasaysayan.—Mateo 19:4, 5.
5. (a) Anong mga isyu an pinalataw sa Eden? (b) Siisay an apektado kaiyan?
5 Si Jesus nagsabi manongod sa Diablo: “Dai sia nagdanay sa katotoohan . . . Sia putikon asin iyo an ama kan kaputikan.” (Juan 8:44) An enot na nasusurat na kaputikan kan Diablo isinabi ki Eva kan ibugtak nia sa pagduda an pagigin sadiosan nin Dios. Isinadol nia an pagsikwal sa pagboot nin Dios asin nangatanosan na magigin kapakipakinabang para sa kada saro na magbugtak kan sadiri niang pamantayan sa buhay. (Genesis 3:1-5; ikomparar an Jeremias 10:23.) Kaya an soberaniya ni Jehova inangat duman sa Eden. Arog kan ipinaheheling kan nahuhuring mga pangyayari, ibinugtak man sa pagduda an integridad sa Dios kan gabos na intelihenteng linalang. Sinda daw naglilingkod sa Dios huli ta sinda talagang namomoot sa saiya, o puwede daw sindang madara na tumalikod sa saiya? (Job 1:7-12; 2:3-5; Lucas 22:31) An mga isyung ini makakaapektar sa gabos na nasa langit asin sa daga. Ano an ginibo kan Unibersal na Soberano?
6. Taano ta dai tolos linaglag ni Jehova an mga rebelde?
6 Imbes na laglagon tolos an mga rebelde, si Jehova madonong na nagtao nin panahon na an mga isyu mahusay nin makasaro asin sagkod lamang. Ini ginibo nin Dios, bakong tanganing patunayan an ano man na punto sa saiyang sadiri, kundi tanganing togotan an mga linalang na may libreng kabotan na maheling mismo an maraot na ibinubunga nin pagrebelde tumang sa saiyang soberaniya, saka tawan sinda nin oportunidad na ipaheling kun ano an personal nindang paninindogan sa mahahalagang bagay na ini. Kun mahusay na an isyu, dai na noarin man totogotan giraray an siisay man na raoton an katoninongan.
7. (a) Paano nagpoon an mga gobyerno nin tawo? (b) Anong klaseng rekord an ginibo ninda?
7 Si Jehova Dios, huling Kaglalang sa katawohan, iyo man an may diretsong Hade ninda. (Kapahayagan 4:11) Alagad pag-abot nin panahon pinonan ni Satanas asin kan saiyang mga demonyo na pukawon sa tawo an pagmawot na bako sanang magbugtak kan sadiri nindang pamantayan kun ano an marahay asin maraot kundi paghadean man an saindang kapwa. Si Nimrod an enot na naggibo sa sadiri na magin hade, na pinaghahadean an mga siudad sa Mesopotamia. Sia “makosog na paraayam [nin mga hayop asin tawo] tumang ki Jehova.” (Genesis 10:8-12) Poon kan kaaldawan ni Nimrod sagkod ngonyan, prinobaran an gabos na klaseng gobyerno nin tawo. Alagad an pankagabsan na rekord, siring sa aram nin siisay man na nag-aadal sa kasaysayan, iyo an karatan asin pagpabolos nin dugo.—Eclesiastes 8:9.
8. Taano ta nagsayuma si Jesus na mapalabot sa sistema politikal kan kinaban?
8 Kan si Jesu-Cristo nasa daga, prinobaran ni Satanas na pati sia ipairarom sa saiyang impluwensia. Iinalok nia ki Jesus “an gabos na kahadean sa ineerokan na daga” bilang karibay sa sarong akto nin pagsamba. Si Jesus nagsayuma. (Lucas 4:1-13) Kan huri gusto kan banwaan na gibohon siang hade, alagad si Jesus naghale. (Juan 6:15) Aram nia kun ano an sistema politikal kan kinaban, asin aram nia na bakong kabotan nin Dios para sa saiya na probaran na parahayon iyan.
9. (a) Tanganing maresolberan an mga problema nin katawohan, ano an kaipuhan na gibohon na magigibo sana kan Kahadean nin Dios? (b) Ano an Kahadean na iyan?
9 Si Jesus nagpaheling nin lubos na kaimbodan ki Jehova, an saiyang Dios asin Ama. Sia namomoot sa mga dalan kan saiyang Ama asin perming ginigibo an ikinaoogma nia. (Juan 8:29) Aram nia na an solusyon sa mga problema nin katawohan maabot paagi sa Kahadean nin Dios, na tunay na gobyerno na maghahade hale sa langit asin magtatao kan matanos asin mamomoton na paggiya na kinakaipuhan nin katawohan. Solamente an Kahadean na iyan an makahahale sa impluwensia ni Satanas asin kan saiyang mga demonyo. Iyan sana an makabobogkos sa mga tawo hale sa gabos na rasa asin nasyon na magin sarong panglobong pamilya na nag-eerok na may katoninongan. Iyan sana an makakakalda sa katawohan hale sa pagkaoripon sa kasalan asin kagadanan. Iyan sana an makapagtatao nin nagdadanay na kaogmahan sa katawohan. An Kahadean na ini bakong areglo na ginibo nin mga politiko asin binendisyonan kan klero. An tunay na mga Kristiano dai naggagamit nin mga armas sa karnal na pakikilaban tanganing mapaoswag an intereses kaiyan. Iyan gobyerno nin Dios, na may sangkap na langitnon na Hade na pinatukaw mismo nin Dios sa trono. Ini an Kahadean na ihinulit ni Jesus asin itinokdo nia sa saiyang mga parasunod na ipamibi.—Daniel 2:44; Kapahayagan 20:1, 2; 21:3, 4.
Arin na Kampi an Pipilion Nindo?
10. (a) Ano an dakulang isyu na kaipuhan na atubangon kan lambang saro sato? (b) Ano an maninigo niatong gibohon manongod dian?
10 An isyu na kaipuhan nindong atubangon iyo ini: Minimidbid daw nindo na si Jehova Dios, an Kaglalang kan uniberso, iyo man an may diretsong Soberano dian, an Supremong Hade dian? Kamo daw nagtao nin panahon na manodan an saiyang katuyohan asin an saiyang mga kahagadan na yaon sa Biblia? Huli sa paggalang sa saiyang katongdan asin pag-apresyar sa saiyang mga dalan, pinatutunayan daw nindo na kamo may pagkamoot na makinuyog sa saiya?—Salmo 24:1, 10; Juan 17:3; 1 Juan 5:3.
11. Taano an pagpili sa ibang dalan ta dai nagtatao nin kaogmahan?
11 Mas maogma daw an mga tawo na pinipili an ibang dalan? Ano an ibinunga kan argumento ni Satanas na an mga tawo makikinabang sa pagpirit kan saindang independensia imbes na maghinanyog sa Dios? An pagsayumang midbidon na sadiri nin Dios an daga asin na an bilog na katawohan, bilang gikan sa orihinal na mag-agom, dapat na magin magturugang nagbunga kan paggadan sa kisuerra 99 milyones na lalaki, babae asin aki sa mga guerra sa siglo sanang ini. An dai pag-aplikar kan moral na mga pamantayan kan Biblia nagbunga nin laglag na mga pamilya, mga epidemya nin helang benereal, pagdanyar sa salud paagi sa pagkaadikto sa droga, asin madahas na krimen. Minsan an mga tawo na nakalilikay sa madahas na kagadanan napapaatubang sa kagadanan huli sa kasalan na minana ki Adan. An gabos na ebidensia nagpapaheling na kinokologan sana nin tawo an saindang sadiri asin an mga nasa palibot ninda kun dai ninda kinukuyog an madonong asin mamomoton na mga kahagadan kan Kaglalang. (Roma 5:12; ikomparar an Isaias 48:17, 18.) Segurado na bako iyan an buhay na gusto nindo. Makakapili kamo nin mas marahay nanggad.
12. (a) Anong mainit na pag-agda an itinatao sato kan Biblia? (b) Mantang progresibo niatong iinaaplikar an Tataramon nin Dios sa satong buhay, ano an maeeksperyensiahan niato?
12 May mainit na pandagka, an Biblia nag-aagda: “Namitan nindo asin helingon nindo na si Jehova marahay, o banwaan; maogma an makosog na tawo na nagpapaili sa saiya.” (Salmo 34:8) Tanganing magibo iyan, kaipuhan na mamidbid nindo si Jehova dangan iaplikar an saiyang hatol. Sa paggibo nin siring, an saindong buhay mapapano nin kahulogan. Imbes na aprobetsaran an madalian na kaogmahan na tibaad makatabang na malingawan nindo sa kadikit na panahon an mga problema pero parate na sa huri nagbubunga nin kakologan sa boot, makakanood kamo kun paano maaatubang an mga problema sa buhay asin kun paano magkakaigwa nin nagdadanay na kagayagayahan. (Talinhaga 3:5, 6; 4:10-13; 1:30-33) Magkakaigwa man kamo kan paglaom na makikabtang sa makangangalas na mga bendisyon na maabot paagi sa Kahadean nin Dios. Kun ini an buhay na minamawot nindo, mahalaga na humiro na ngonyan. Taano?
An Gabos na Nasyon Pasiring sa Armagedon
13. Taano ta mahalaga na marigon na manindogan na ngonyan sa kampi ni Jehova?
13 Dai sagkod lamang na pababayaan ni Jehova an mga tawo asin organisasyon na tuyo o may pagkaindiperenteng nagkukuyog ki Satanas. Dai sinda totogotan na padagos na magbinongog sa pagboot nin Dios, na inaabuso an daga asin rinaraot an buhay para sa iba. Napapaatubang sinda sa aldaw nin paniningil sa inaapod kan Biblia na “dakulang aldaw ni Jehova.”—Sofonias 1:2, 3, 14-18.
14. Sa ano tinitipon ngonyan an gabos na nasyon?
14 Sa paghahayag nin mga mangyayari sa huring mga aldaw kan presenteng palakaw nin mga bagay, sinabi ni Jesu-Cristo na an “mga tataramon na ipinasabong nin mga demonyo” maduman sa “mga hade kan bilog na ineerokan na daga, tanganing tiriponon sinda sa ralaban kan dakulang aldaw nin Dios na Makakamhan sa gabos.” Arog kan ipinaheling kan kapahayagan na iyan, “sinda tiniripon ninda sa lugar na sa Hebreo inaapod Har–Magedon [o, Armagedon].” Nangyayari na an pagtipon na iyan!—Kapahayagan 16:14, 16; Authorized Version.
15, 16. (a) Ano an Armagedon? (b) Taano ta kaipuhan iyan?
15 An Armagedon na sinasabi kan Biblia bakong bagay na malilikayan paagi sa pagpondo sa paggibo nin mga armas nuklear. Dai iyan maoolang nin internasyonal na mga negosasyon. An ngaran malinaw na kinua sa suanoy na siudad nin Megido, pero bako sanang sarong lugar sa Tahaw na Sirangan an napapalabot. Sinusutsutan kan dai naheheling na “poon kan kinaban na ini,” an gabos na nasyon, sa ibong kan saindang laen-laen na politikal na ideolohiya, tinitipon sa lakop sa kinaban na situwasyon na nagpapaheling kan saindang pagtumang ki Jehova Dios. An “mga hade kan bilog na ineerokan na daga,” kaiba an gabos nindang parasunod, pinipirit na manindogan. Bago an Armagedon an saindang pagtumang sa Kahadean nin Dios asin sa gabos na nagbabalangibog kaiyan makosog na gayo sa bilog na daga. Baga man minimidbid ninda o dai an pag-eksister ni Satanas, “an bilog na kinaban namumugtak sa kapangyarihan kan maraot,” arog kan sabi kan Tataramon nin Dios. An bilog na maraot na kinaban asin an gabos na nagsasarig dian, iyo, an gabos na nag-aarog sa mga gibo kaiyan, dapat na mawara.—1 Juan 5:19; 2:15-17.
16 Poon sa itaas sagkod sa ibaba, an kinaban na ini pano nin karatan. Bako sanang an mga kriminal kundi an ordinaryong mga siudadano nagpapaheling nin daing pagmateng pagbinongog sa ley asin dai pagmakolog sa persona asin rogaring kan saindang kapwa. Orog sa gabos, habo nindang kuyogon an sinasabi mismo nin Dios sa saiyang Tataramon, an Biblia. Dai ninda iginagalang an saiyang soberaniya. Kaipuhan na an Dios humiro tanganing mahalean an saiyang ngaran kan paglanghad na ibinugtak dian, saka andamon an dalan sa paggibo sa daga na Paraiso na dian an mga mamomoton sa katanosan magkakamit nin tunay na katoninongan asin katiwasayan.
17. (a) Gurano kadakula kan panlaglag? (b) Siisay an magdidirehir sa resulta?
17 Pag-abot kan kalaglagan, dai pagdududahan na iyan gikan ki Jehova. Malakop sa bilog na globo an kagabaan. Maaaraman kan mga nasyon na si Jehova minahiro ta an saiyang mga hukbo sa pagpadusa naghihiro na. Sa pagbagsak nin naggogobyernong autoridad, an kamot kan lambang tawo magigin tumang sa saiyang kaiba. Hale sa kalangitan, an mismong Aki nin Dios an magdidirehir sa resulta.—Kapahayagan 6:16, 17; 19:11-13; Zacarias 14:13.
18. Sairisay an mga makaliligtas?
18 Bakong arog kan mga resulta nin guerra nuklear nin mga tawo, an panlaglag na ini bakong daing pinipili. Pero siisay an mga makaliligtas? Sinda daw an gabos na naghihingakong may relihiyon, o seguro an gabos na nagsasabing Kristiano? Inapod ni Jesus an “dakol” sa mga siring na “mga paragibo nin katampalasanan.” (Mateo 7:21-23) An mga makaliligtas pasiring sa “bagong daga” iyo sana an mga talagang nagkultibar nin haraning relasyon ki Jehova asin sa saiyang naghahadeng Aki, si Cristo Jesus. Paagi sa saindang pamumuhay asin pagpatotoo manongod sa Kahadean, ikinapaheling ninda na sinda talagang “nakakamidbid sa Dios” asin na sinda “nagkukuyog kan maogmang bareta manongod sa satong Kagurangnan na si Jesus.” Pinatutunayan daw nindo na kamo siring na tawo?—2 Tesalonica 1:8; Juan 17:3; Sofonias 2:2, 3.