Pagkaligtas Pasiring sa Bagong Daga
Kapitulo 21: Mainit na Pag-ako sa mga Minabalik
1. Anong klaseng mga tawo an pinag-oolayan sa kapitulong ini?
KADAKOL kan may panahon na nagkaigwa nin igong kaaraman sa katotoohan kan Biblia tanganing maaraman na si Jehova an tunay na Dios asin may masabotan manongod sa saiyang mga katuyohan. Minsan ngani sinda bakong mga Saksi ni Jehova, tibaad nag-adal sinda sa Biblia kaiba kan mga Saksi. O tibaad Saksi an saindang mga magurang. An dakol sa sainda nakaatender sa nagkapirang pagtiripon sa Kingdom Hall. Tibaad nagkaigwa pa ngani sinda nin kabtang sa pagdara kan mensahe kan Kahadean sa iba. Pero dai ninda idinusay an saindang buhay sa pag-otob kan kabotan nin Dios. Taano ta dai?
2. (a) Taano ta naparayo sinda sa organisasyon ni Jehova? (b) Taano ta nagmamawot giraray sinda na makabalik?
2 An kinaban may iinoopresir na mga pan-akit na paghona ninda gusto ninda, mga bagay na sa paghona ninda makadudugang sa saindang kaogmahan sa buhay, asin nakararayo sinda sa organisasyon ni Jehova sa paghanap ninda sa mga bagay na iyan. Alagad, pag-abot nin panahon, an iba sainda nakakarealisar na dai ninda nanompongan an buhay na linalaoman ninda. Napapagmata sinda sa katotoohan na kun sinda magpapadagos na siring, sinda mapapara kaiba kan kinaban. Dai ninda nalingawan an katiwasayan asin espirituwal na abundansia sa “harong” ni Jehova, asin boot nindang mamugtak giraray dian. Alagad ta aakoon daw sinda ni Jehova?
Nagbalik an Aking Gastador
3. (a) Sa parabola kan aking gastador, anong paglaladawan an itinao ni Jesus sa kaagid na kamugtakan? (b) Siisay an ilinaladawan kan ama?
3 An simbag ipinaririsa sa bantog na parabola ni Jesus manongod sa aking gastador. Bilang ilustrasyon, si Jesus nag-estorya manongod sa sarong tawo na may duwang aki. Hinagad kan nguhod sa saiyang ama an saiyang kahirasan. Kan makua ini, sia nagduman sa harayong nasyon, na duman rinawrawan nia an gabos sa buhay nin pagpangana. Kaya sia nagin gastador. Kan magkagutom sa nasyon na iyan, an barobatang ini, huli sa dakulang pangangaipo, napiritan na mag-ataman nin orig, pero dai man lamang sia tinogotan na magkakan sa sakate kan mga ini. Huling medyo nayugyug kan mga problemang uminabot sa saiya, namungawmungawan sia. Nagirumdoman nia kun gurano karahay kan buhay minsan kan mga tangdanan sa harong kan saiyang ama, asin nagdesisyon siang bumalik. Aadmitiron nia an saiyang makasalan na gawe asin makikiolay na akoon, bakong bilang aki, kundi bilang tangdanan na oripon. (Lucas 15:11-19) Alagad pakatapos kan gabos na ginibo nia, totogotan daw siang bumalik kan saiyang ama? Ano an magigin pagheling ni Jehova, na irenerepresentar kan ama sa parabolang ini, sa pagbalik kan siring na tawo?
4. Paano inako kan ama an saiyang aki kan ini bumalik?
4 Buhay na ilinaladawan an pagmate ni Jehova sa bagay, si Jesus nagpadagos: “Mantang [an nguhod na aki] harayo pa, naheling sia kan saiyang ama asin napahiro nin pagkaherak, asin sia duminalagan asin kinugos an saiyang liog patin hinadokan sia. Dangan an aki nagsabi sa saiya, ‘Ama, ako nagkasala tumang sa langit asin tumang sa saimo. Ako bako nang angay na apodon pang aki mo. Giboha akong saro sa saimong mga tangdanan.’ Alagad an ama nagsabi sa saiyang mga oripon, ‘Dali! kua kamo nin gubing, an pinakamarahay, asin isulot nindo iyan sa saiya, asin bugtake nindo nin singsing an saiyang kamot asin nin sandalyas an saiyang mga bitis. Asin daraha nindo digdi an pinatabang ogbon na baka, bunoa nindo iyan asin magkarakan kita patin mag-ogma, huli ta an aki kong ini gadan na asin nabuhay liwat; sia nawara asin nakua.’ Asin sinda nagpoon na mag-orogma.”—Lucas 15:20-24.
Paano Minaaplikar Ngonyan an Parabola?
5. (a) Siisay an ilinadawan kan matuang aki sa parabola ni Jesus? (b) Kun siring, siisay an irenerepresentar kan nguhod na aki, an gastador?
5 Sa ilustrasyon na ini an matuang aki, an panganay, angay na katimbang kan “kongregasyon kan mga panganay na nalilista sa kalangitan.” (Hebreo 12:23) Ano man an nguhod na aki? Sia dapat na magrepresentar sa sarong grupo na laen sa “sadangoton na aripompon” na may langitnon na paglaom. Bakong gabos sa “ibang karnero” kan Kagurangnan nakatatama sa paglaladawan sa nguhod na aki, pero an iba iyo. Bago pa man espesyalmenteng narisa an pagtipon sa “ibang karnero,” poon kan 1935, may mga tawo na nakaaaram nang si Jehova iyo an solamenteng tunay na Dios. Aram ninda an manongod sa paglaom sa daganon na buhay na sakop kan saiyang Kahadean, asin dai man lamang sinda nag-isip na kabilang sa “kongregasyon kan mga panganay” na may langitnon na mga paglaom. Pero imbes na idusay an saindang sadiri sa paglilingkod ki Jehova, sinda nabangkag sa kinabanon na mga bagay. Kinua ninda an “rogaring” na itinao sa sainda nin Dios, an panahon asin buhay na itinogot nia sa sainda, asin ginamit ini para sa paslong pagpanigo sa sadiri. Alagad kan 1935 kan enot na masabotan nin malinaw kan mga lingkod ni Jehova kun siisay an “dakulang kadaklan,” an dakol na katimbang kan nguhod na aki bilog na pusong nagpresentar na maglingkod sa harong kan Ama. Idto panahon nin pag-ogma arog kan ilinadawan ni Jesus sa saiyang parabola.
6. Sa kaotoban, paano an nagkapira nagpaheling kan gawe kan matua, alagad totoo daw iyan sa gabos na natatada?
6 Totoo na, kan panahon na idto, bakong gabos uminiba sa pag-ogmang ini huli sa pagdatong kan grupo na irenerepresentar kan nguhod na aki. Sa saiyang parabola ipinarisa ni Jesus na ini an mangyayari. Alagad bakong gabos sa natatada sa “sadangoton na aripompon” nagpaheling nin siring na espiritu, asin sa saiyang ilustrasyon binukasan ni Jesus an dalan minsan para sa mga dai naogma sa primero, na makikabtang sa kaogmahan na namamatean mismo ni Jehova kun tunay na nagsosolsol an siring na mga parakasala.—Lucas 15:7, 10, 25-32.
7, 8. (a) Sa mas bago pa sanang mga taon, ano an dahelan na an iba ruminayo sa harong ni Jehova? (b) Sa anong mga paagi na an iba nakamate na garo aking gastador? (c) Taano sinda ta maninigong bumalik?
7 Alagad, poon kan mga pangyayaring idto sa kabangaan nin mga 1930, an iba nakarealisar na sinda man, sa nagkapirang bagay kapareho kan aking gastador. Midbid na gayo ninda an espirituwal na pamilya ni Jehova, an saiyang naheheling na organisasyon, alagad irinayo sinda dian kan saindang pamumuhay, garo baga pasiring sa “harayong daga.” Dai sinda nagkontra sa mga lingkod ni Jehova, pero an sainda mismong pamumuhay bakong kaoyon sa mga pamantayan kan Tataramon nin Dios. Tibaad isinentro ninda an bilog nindang buhay sa saindang trabaho asin sa saindang sadiri pero dai tinawan nin tamang pagpapahalaga an saindang mga obligasyon sa atubang nin Dios asin an pagkaseryoso kan mga panahon na nabubuhayan niato. An iba naanggot sa mga pagkabakong sangkap nin iba na kabilang kaidto sa kongregasyon asin dai sinda mapasensiang naghalat ki Jehova na itanos an mga bagay. Pero ano an nagin kamugtakan kan gabos na ini kan sinda sumiblag sa harong nin pagtubod?
8 Pag-abot nin panahon, narealisar nin iba na sinda nagin dukha sa espiritu. Narisa ninda na an ano man na haralipot na panahon ninda nin kaalingan dai nagtatao sainda nin nagdadanay na kaogmahan. Tibaad marisa man ninda na an saindang pamumuhay nakadadanyar sa pisikal, emosyonal asin espirituwal. Sa laog kulang sinda, arog kan gabos na mayo nin Dios asin mayo nin paglaom. (Efeso 2:12) Narealisar ninda na an solamenteng panahon na sinda tunay na maogma iyo an sa “harong” ni Jehova. Boot nindang bumalik. Maninigo daw? Ano an pakinabang sa pagpapadagos sa saindang kamugtakan na dukha? Puwedeng magin kapahapahamak an pag-atraso. Kun sinda magdadanay sa kinaban, kun iyan laglagon na sinda mawawaran kan saindang buhay.
9. (a) Taano ta boot ni Jehova na an siring na mga tawo bumalik? (Ezequiel 18:23) (b) Ano an kaipuhan sa parte ninda?
9 Alagad puwede daw na bumalik an siring na mga tawo? Mainit sindang inaagda ni Jehova na bumalik, asin an saiyang naheheling na organisasyon nagtatao nin mamomoton na tabang sa mga minagibo kaiyan. (Zacarias 1:3, 4) Ano an kinakaipuhan? Arog kan ipinaheheling sa parabola ni Jesus, kaipuhan na bumalik sinda sa toltol na pag-isip, magsadiring boot na bumalik asin admitiron na sinda nagkasala tumang sa Dios. Kun sinda naggibo nin maraot nanggad, kaipuhan sindang magtao sa kamagurangan nin nakakokombensir na ebidensia na tinalikdan na ninda ngonyan an pamumuhay na iyan asin talagang nagsosolsol. An odok nindang kamawotan kaipuhan na maglingkod na ki Jehova bilang kabtang kan saiyang naheheling na organisasyon. (Lucas 15:18-21; Talinhaga 28:13) Kun iyan man nanggad an nasa saindang puso, makaseseguro sinda na an saindang pagtalikod sa saindang maraot na mga gibo asin kaisipan saka pagbabalik ki Jehova magtatao nin dakulang kaogmahan. (Isaias 55:7) Minsan siring, tanganing an kagayagayahan ninda bako sanang sagkod sa kaogmahan na sinda mainit na inako liwat sa Kingdom Hall, kaipuhan an marigon na pagtogdok liwat sa espirituwal.
Pagtotogdok sa Sarong Marigon na Pundasyon
10. (a) Anong kaisipan manongod sa mga kahagadan ni Jehova an kaipuhan na kultibaron nin mga nagsosolsol? (b) Paano ninda makukultibar an dayupot na personal na relasyon ki Jehova?
10 Espesyalmenteng mahalaga sa siisay man na magbalik sa harong ni Jehova na mamidbid na gayo an laen-laen na kabtang kan personalidad ni Jehova asin magkultibar nin dayupot na personal na relasyon sa saiya. Kaipuhan na marealisar ninda na an gabos na hinahagad sato ni Jehova sa katunayan para sa sato mismong kapakinabangan. An saiyang mga togon dai nakahahale kan kaogmahan sa buhay kundi, imbes, nagpoprotehir sato sa mga bagay na tibaad magtao nin temporaryong kaalingan pero nagdadara sa mapait na pag-ani. (Isaias 48:17; Galacia 6:7, 8) Kun kita dinidisiplina nia, iyan huli sa saiyang pagkamoot sa sato. (Talinhaga 3:11, 12) An personal na pag-adal na sinusundan nin paghorophorop sa nanodan, odok na pamibi asin regular na pag-atender sa mga pagtiripon makatatabang sato na makanood na ibugtak an satong lubos na pagsarig ki Jehova, humagad sa saiya nin paggiya sa gabos na ginigibo niato.—Talinhaga 3:5, 6.
11. Paano an mga nalagalag matatabangan paagi sa (a) pagkultibar nin pagkaongis sa karatan? (b) paghanap nin pakasabot? (c) daing pagliwatliwat sa pag-aplikar nin diosnon na mga pamantayan? (d) pakanood na horophoropon an resulta nin ano man na pinaplano nindang gibohon? (e) pagpaheling nin mamomoton na pagmakolog sa iba?
11 An mga nalagalag tibaad aram kun ano an tama asin kun ano an sala. Pero ngonyan kaipuhan na kultibaron man ninda an pagkaongis sa karatan asin kaipuhan na padagos nindang gibohon iyan sagkod na iyan nakapalibot sa sainda. (Salmo 97:10) Sinda matatabangan digdi kun an hahanapon ninda bako sanang kaaraman kundi pati pakasabot. Enot sa gabos, kalabot digdi an pagmansay sa mga bagay may koneksion sa Dios. Kaipuhan na midbidon niato an laen-laen na paagi na ginagamit nia sa pagtotokdo sa sato asin kun paano an satong reaksion sa saiyang hatol nakaaapektar sa satong relasyon sa saiya. (Talinhaga 4:7; 9:10) Kaipuhan niatong masabotan an halaga nin pagigin daing pagliwatliwat, na iinaaplikar an mga pamantayan ni Jehova sa gabos na panahon, sa gabos na ginigibo niato. (Tito 2:11, 12; 1 Tesalonica 4:7) Kaipuhan man na gibohon an pagmamaan na isipon bako sanang an temporaryong kaalingan kundi kun ano an magigin resulta kan satong mga desisyon. (Ikomparar an Talinhaga 20:21; 23:17, 18; Hebreo 11:24-26.) Maninigo man niatong mamomoton na isipon an magigin epekto sa iba kan satong sinasabi asin ginigibo.—Roma 15:1, 2.
12. (a) An pakaaram sa ano manongod ki Satanas asin sa saiyang mga paagi makatatabang na maingatan kita? (b) Ano an kaipuhan tanganing manggana sa ralaban na ini?
12 Bilang mga Kristiano kita mapakokosog na gayo kan pakarealisar na kita nasa tahaw nin espirituwal na pakikilaban. An pangenot na kaiwal niato iyo si Satanas na Diablo, kaiba an saiyang mga demonyo. Paagi sa gabos na paaging mapupuwede hinihingoa nia na irayo kita sa mahalagang gibohon sa Kahadean na itinao sa sato ni Jehova. An katuyohan nia sugotan kita na ipagilid an mga pamantayan ni Jehova, magin kabtang kan kinaban na sia an poon. An saiyang mga siod parateng nakadadagka sa normal na mga kamawotan (para sa kaogmahan, pisikal na katrangkilohan, pagkamoot asin pagpadangat), pero sinasadol nia kita na tawan nin importansia an mga kamawotan na iyan na minabiribid sa katuyohan kaiyan o panigoan iyan sa salang mga paagi. Solamente paagi sa lubos na paggamit sa espirituwal na pangalasag na itinatao nin Dios na kita magigin mapanggana sa pakikilaban na ini para sa satong espirituwal na buhay.—Efeso 6:11-18.
13. (a) Paano kita makakanompong nin kaginhawahan para sa satong kalag? (b) Taano an paglilingkod ki Jehova bilang pag-arog ki Cristo ta tunay na nagtatao sato nin kaogmahan?
13 Sinabi ni Jesus na kun kita madolok sa saiya asin papasanon an saiyang “sakal,” kita magiginhawahan sa satong kalag. (Mateo 11:29, 30) An pagpasan nin “sakal” nangangahulogan nin paglilingkod. Pero an paglilingkod ki Jehova bilang pag-arog sa saiyang Aki nagtatao nin tunay na kaginhawahan. Taano man? Huli ta iyan nagtatao nin tunay na katalingkasan. Kita bako nang mga oripon nin kasalan, na nagagapos kaiyan, na ginigibo an mga aram niatong dai niato maninigong gibohon asin tibaad nagmamawot na dai niato ginigibo iyan. (Juan 8:32, 34-36) Kun an satong Kristianong personalidad natotogdok ki Jesu-Cristo bilang pundasyon, aapresyaron niato an saiyang kabtang sa katuyohan ni Jehova, maghihinanyog kita sa saiya asin makakanood sa saiya. Ikinaogma niang gibohon an kabotan kan saiyang Ama. Makakanood man kitang gibohon iyan. (Juan 4:34; Salmo 40:8) Huli sa pangangapot sa moral na mga pamantayan nin Dios kita magkakamit nin malinig na konsensia. Imbes na mabuhay sana para sa sadiri, maeeksperyensiahan niato an kaogmahan na gikan sa pagtao. (Gibo 20:35) An buhay magkakaigwa nin tunay na katuyohan para sa sato. Orog sa gabos, makakamtan niato an kaogmahan sa pakaaram na nasa sato an pag-oyon ni Jehova mismo, an Ama kan gabos na nagigin saiyang mga aki.—Talinhaga 10:22.
(Ipagpapadagos sa masunod na luwas.)