Kapahayagan—An Mamuraway na Kulminasyon Kaiyan Harani Na

Kapitulo 18: Mga Linog sa Aldaw kan Kagurangnan

1, 2. (a) Ano an kamugtakan kun may mangyaring makuring linog? (b) Ano an ilinadawan ni Juan kan bukasan an ikaanom na tatak?

¹ Nakaeksperyensia na daw kamo nin grabeng linog? Bako ining marahay na eksperyensia. An makosog na linog puwedeng magpoon sa nakababaldeng pagyugyog asin ragobrob nin ribok. An pagyugyog puwedeng maggrabe sa sunod-sunod na pagyugyog mantang kamo minadalagan tanganing makaligtas​—tibaad sa irarom nin lamesa. O puwede ining mag-abot bilang bigla, nakararaot na pagtanyog, na sinusundan nin pagkahulog kan mga mapapasaon, kasangkapan, minsan ngani nin mga edipisyo. An danyos puwedeng magin grabeng kapahamakan, na may danay na pagyugyog na nagdadara nin orog pang danyos asin nagdadagdag sa kasakitan.

² Nasa isip ini, konsideraron an ilinadawan ni Juan sa pagbubukas kan ikaanom na tatak: “Asin naheling ko kan bukasan an ikaanom na tanda, asin nangyari an sarong makosog na linog.” (Kapahayagan 6:​12a) Maninigo ining mangyari sa iyo man sanang panahon siring sa pagbubukas kan ibang tatak. Noarin sa aldaw kan Kagurangnan mangyayari an linog na ini, asin anong klase nin linog ini?​—Kapahayagan 1:10.

3. (a) Anong mga pangyayari an ihinula ni Jesus sa hula manongod sa tanda kan saiyang presensia? (b) Ano an koneksion kan literal na mga linog sa simbolikong linog sa Kapahayagan 6:12?

³ Sinambit nin nagkapirang beses sa Biblia an literal asin piguratibong mga linog sa daga. Sa saiyang dakulang hula dapit sa tanda kan saiyang presensia sa kapangyarihan sa Kahadean, ihinula ni Jesus an “mga linog sa surunod-sunod na lugar.” Magigin kabtang ini kan “kapinonan nin kasakitan.” Magpoon kan 1914, sa pagputok kan populasyon sa daga na nagin rinibong milyones, an literal na mga linog nakakontribuwir na gayo sa mga kasakitan sa satong panahon. (Mateo 24:​3, 7, 8) Alagad, minsan siring na naootob kaini an hula, an mga linog na ini natural, pisikal na mga kalamidad. An mga ini pagpoon kan dakulang simbolikong linog sa Kapahayagan 6:12. Ini nanggad, maabot bilang an nakakalaglag nin biyo na pantapos sa serye nin patienot na mga linog na nagtanyog kan sa-tawong daganon na sistema nin mga bagay ni Satanas sagkod sa mga pundasyon kaini.a

Mga Linog sa Sosyedad nin Tawo

4. (a) Poon kasuarin linaoman kan banwaan ni Jehova an mga pangyayari nin biyong kalaglagan na nagpoon kan 1914? (b) Anong kapanahonan an tatandaan kan 1914 an katapusan kaiyan?

⁴ Magpoon kan kabangaan kan mga 1870, hinahalat na kan banwaan ni Jehova an mga pangyayaring iyan nin biyong kalaglagan mapoon kan 1914 asin magtatanda kan katapusan kan Panahon nin mga Hentil. Ini an kapanahonan kan “pitong panahon” (2,520 taon) magpoon kan pagpabagsak sa Davidikong kahadean sa Jerusalem kan 607 B.C.E. sagkod sa pagpuwesto sa trono ni Jesus sa langitnon na Jerusalem kan 1914 C.E.​—Daniel 4:​24, 25; Lucas 21:​24, King James Version.b

5. (a) Anong paisi an ipinahayag kan enot na presidente kan Sosyedad kan Oktubre 2, 1914? (b) Anong grabeng kariribokan sa politika an nangyari magpoon kan 1914?

⁵ Kaya, kan si C. T. Russell, an enot na presidente kan Watch Tower Society, magluwas para sa pan-agang pagsamba kairiba kan pamilyang Bethel sa Brooklyn, Nueva York, kan aga nin Oktubre 2, 1914, ipinahayag nia an dramatikong paisi: “An Panahon nin mga Hentil natapos na, an saindang mga hade nagkaigwa na kan saindang panahon.” Iyo nanggad, lakop nanggad an panbilog na dagang karibokan na nagpoon kan 1914 na an haloy nang mga monarkiya nagkawarara. An pagpabagsak sa mga czar sa rebolusyon sa Bolshevik kan 1917 naggiya sa presenteng komprontasyon sa pag-oltanan kan Marxismo asin kapitalismo. An mga pagyugyog sa politikal na pagbago nagpadagos na ribokon an sosyedad nin tawo sa bilog na daga. Ngonyan, an kadakol na gobyerno dai na nalawig nin labi sa saro o duwang taon. An kakulangan nin karigonan sa langtad nin politika iniilustrar kan kamugtakan sa Italia, na nagkaigwa nin 47 bagong gobyerno sa laog sana nin 42 na taon pakatapos kan Guerra Mundial II. Alagad an siring na naenot na mga pagyugyog patienot sana sa kulminasyon kan grabeng kariribokan sa gobyerno. An resulta? An Kahadean nin Dios an solamenteng mamamahala sa bilog na daga.​—Isaias 9:​6, 7.

6. (a) Paano ilinadawan ni H. G. Wells an bago asin makasaysayan na kapanahonan? (b) Ano an isinurat nin sarong pilosopo asin estadista manongod sa kapanahonan poon kan 1914?

⁶ An mga historyador, pilosopo, asin politikal na mga lider nagtokdo sa taon na 1914 bilang kapinonan kan bago asin makasaysayan na panahon. Desisieteng taon pasiring sa panahon na iyan, an historyador na si H. G. Wells nagkomento: “Maogmang naghuhula an propeta nin marahay na mga bagay. Alagad an saiyang katongdan iyo an pagtaram kan saiyang naheheling. Naheheling nia an kinaban na marigon na nakokontrol nin mga soldados, eroe, usurero, asin pinansial na mga abenturero; sarong kinaban na pano nin pagduda asin pagkaongis, na marikas na gayong nawawara an natada kan pribadong mga libertad, na nasasalang gayo pasiring sa mapait na mga ralaban, asin nag-aandam para sa bagong mga guerra.” Kan 1953 an pilosopong si Bertrand Russell nagsurat: “Magpoon kan 1914, aram kan gabos an mga kamugtakan sa kinaban na napurisaw na gayo paagi kan garo siring kan sa kapaladan asin patienot na dineterminar na pagmartsa pasiring sa mas dakulang kapahamakan . . . Naheling ninda an rasa nin tawo, siring kan eroe sa Griegong trahedya, na pinahihiro kan anggot na mga dios asin bako nang kagurangnan kan kapaladan.” Kan 1980 an estadistang si Harold Macmillan, sa paghorophorop kan matoninong na pagpoon kan satong ika-20 siglo, nagsabi: “An gabos nagigin mas marahay asin mas marahay. Ini an kinaban na kinamundagan ko. . . . Biglang bigla, sa dai linalaoman, sarong aga kan 1914 an gabos na bagay natapos.”

7-9. (a) Anong grabeng kariribokan an nagyugyog sa sosyedad nin tawo poon kan 1914? (b) Paano ilinadawan kan hula ni Jesus sa Lucas kapitulo 21 an grabeng kariribokan sa sosyedad nin tawo asin an mga epekto kaini?

⁷ An Guerra Mundial II nagdara nin saro pang balod nin grabeng kariribokan. Asin an mas saradit na mga guerra padagos na nagtatanyog sa daga mantang nagdadangadang kita sa katapusan kan siglong ini. Alagad maghahaloy pa daw an presenteng sistema? An makatatakot na mga uma kan biyong pagkatumtom sa nuklear iniisip nin kadakol na tawo. Makaoogma nanggad, na an solusyon bakong sa tawo kundi sa saiyang Kaglalang.​—Jeremias 17:5.

⁸ An iba pang bagay apuwera sa guerra, nagtanyog sa sosyedad nin tawo sagkod sa mga pundasyon kaini magpoon kan 1914. An saro kan pinakamakasusustong grabeng kariribokan nagpoon sa pagbagsak kan stockmarket sa E.U. kan Oktubre 29, 1929. Ini an nagdara kan Great Depression, na nakaapektar sa gabos na kapitalistang nasyon. An kasakitan na iyan nangyari sa pag-oltanan kan 1932 asin 1934, alagad namamatean pa niato an mga epekto kaini. Magpoon kan 1929 an nagsasakit sa ekonomiang kinaban tinakopan nin temporaryong mga pakana. An mga gobyerno nagbugtak nin kuwarta sa depisit. An krisis sa asayte kan 1973 asin an pagbaba kan stock market kan 1978 nagdagdag sa mga pagtanyog sa pinansial na imperyo. Mientras tanto, minilyon na tawo an nagbabakal na kadaklan paagi sa hulogan. An dai makuwentang tawo nabibiktima kan pinansial na mga paagi, mga pakanang pyramid, asin mga loteriya asin iba pang mapandayang sugal, na an kadaklan kaiyan sinusuportaran kan mga gobyerno na maninigo kutanang magprotehir sa mga tawo. Minsan an mga ebanghelista sa telebisyon kan Kakristianohan nagkakaigwa kan saindang hiras na milyon-milyon na dolyar!​—Ikomparar an Jeremias 5:​26-31.

⁹ Mas amay pa kaini, an mga kasakitan sa ekonomia nagbukas kan dalan tanganing magkaigwa nin kapangyarihan si Mussolini asin si Hitler. An Dakulang Babilonya dai nagsayang nin panahon sa pagmawot kan saindang pabor, asin an Vaticano naglaog sa pakipagtipan sa Italia kan 1929 asin sa Alemania kan 1933. (Kapahayagan 17:5) An madiklom na mga aldaw na suminunod sierto nanggad na kabtang kan kaotoban kan hula ni Jesus na kairiba sa tanda kan saiyang presensia an “kahandalan kan mga nasyon, na dai naaaraman an gigibohon . . . mantang an mga tawo nalulunosan huli sa takot asin paghalat sa mga bagay na maabot sa ineerokan na daga.” (Lucas 21:​7-9, 25-31)c Iyo, nagpadagos an mga linog na nagpoon na nagtanyog sa sosyedad nin tawo kan 1914, na may mapuwersang mga kasunod na pagyugyog.

Si Jehova an Nagyuyugyog

10. (a) Taano ta nagkaigwa nin kadakol na gayong linog sa mga palakaw nin tawo? (b) Ano an ginigibo ni Jehova, bilang pag-andam para sa ano?

¹⁰ An siring na mga linog sa palakaw nin tawo resulta kan pagkadaing kakayahan nin tawo na giyahan an saiyang mga lakad. (Jeremias 10:23) Dugang pa, an gurang na Halas na iyan, si Satanas, “na nandadaya sa bilog na ineerokan na daga,” nagdadara nin mga kasakitan sa saiyang pangultimong pagmamaigot na irayo an bilog na katawohan sa pagsamba ki Jehova. An modernong teknolohiya an nagin dahelan tanganing an daga magin saro sanang kapalibotan, kun saen tinatanyog kan nasyonalistiko asin rasyal na mga pagkaongis an sosyedad nin tawo sagkod sa mga pundasyon kaini, asin an inaapod na Naciones Unidas, dai nakakanompong nin epektibong solusyon. Dai pa nangyari kasuarin man, an tawo nagsakop sa tawo sa saiyang ikararaot. (Kapahayagan 12:​9, 12; Eclesiastes 8:9) Minsan siring, an Soberanong Kagurangnan na si Jehova, an Kaggibo kan langit asin kan daga, naggigibo kan saiyang sadiring klase nin pagyugyog sa nakaaging 70 taon, sa pag-andam sa lubos na pagresolber sa mga problema nin tawo. Paano?

11. (a) Anong pagyugyog an ilinadawan sa Haggeo 2:6, 7? (b) Paano naootob an hula ni Haggeo?

¹¹ Sa Haggeo 2:​6, 7 satong mababasa: “Iyo ini an isinabi ni Jehova kan mga hukbo, ‘Sarong beses pa​—kadikit na sanang panahon—​asin papagkokonogkonogon ko an kalangitan asin an daga asin an dagat patin an mamarang daga. Asin yuyugyugon ko an gabos na nasyon, asin an mga kawiliwiling bagay kan gabos na nasyon dapat na maglaog; asin papanoon ko nin kamurawayan an harong na ini,’ si Jehova nin mga hukbo nagsabi.” Magpoon kan taon nin 1919 partikularmente, ipinabalangibog ni Jehova sa saiyang mga saksi an saiyang mga paghatol sa tahaw kan gabos na elemento kan sosyedad nin tawo sa daga. An pankinaban na sistema ni Satanas yinugyog asin natanyog kan panglobong patanid na ini.d Mantang nagkokosog an patanid, an natatakot sa Dios na mga tawo, “an mga kawiliwiling bagay,” napahiro na isiblag an saindang sadiri sa mga nasyon. Bakong huli ta natanyog sinda kan paglinog sa organisasyon ni Satanas. Kundi mantang nasasabotan ninda an kamugtakan, ginibo ninda an saindang desisyon na makikabtang sa linahidan na grupong Juan sa pagpano nin kamurawayan sa harong nin pagsamba ki Jehova. Paano ini nagibo? Paagi kan maigot na gibohon nin paghuhulit kan maogmang bareta kan naestablisar nang Kahadean nin Dios. (Mateo 24:14) An Kahadean na ini, na binibilog ni Jesus asin kan saiyang linahidan na mga parasunod, padagos na magdadanay sa kamurawayan ni Jehova bilang “an kahadean na dai matatanyog.”​—Hebreo 12:​26-29.

12. Kun nagpoon na kamong maghimate sa paghuhulit na ihinula sa Mateo 24:14, ano an maninigo nindong gibohon bago mangyari an dakulang linog kan Kapahayagan 6:12?

¹² Saro daw kamo sa nagpoon nang maghimate sa paghuhulit na iyan? Kairiba daw kamo kan labing walong milyones na sa nakaagi pa sanang mga taon nag-atender sa selebrasyon kan Memorial kan kagadanan ni Jesus? Kun iyo, padagos na mag-oswag sa pag-adal nindo kan katotoohan kan Biblia. (2 Timoteo 2:​15; 3:​16, 17) Bayaan nin lubos an maating estilo nin buhay kan malalaglag na daganon na sosyedad ni Satanas! Maglaog nanggad sa Kristianong bagong kinaban na sosyedad asin makikabtang nin lubos sa mga gibohon kaini bago an pinal na pangultimong kalaglagan sa “linog” na maronot sagkod na magkapidapidaso an bilog na kinaban ni Satanas. Alagad ano an dakulang linog na iyan? Helingon niato ngonyan.

An Dakulang Linog!

13. Sa anong paagi bago nanggad sa eksperyensia nin tawo an dakulang linog?

¹³ Iyo, an delikadong mga panahon na ini nagin panahon nin mga linog​—literal asin piguratibo. (2 Timoteo 3:1) Alagad mayo sa mga linog na ini an pankatapusan na dakulang pagtanyog na naheling ni Juan sa pagbukas kan ikaanom na tatak. Natapos na an panahon nin patienot na mga linog. Nag-abot na ngonyan an dakulang linog na bago nanggad sa eksperyensia nin tawo. Dakulaon nanggad na linog iyan mala ta an grabeng kariribokan asin madahas na mga pagkapurisaw na dara kaiyan dai masosokol sa Richter na sokolan o paagi nin iba pang pansokol nin tawo. Bako ining ordinaryo sanang pagkasusto kundi kapahapahamak na pagtanyog na nakakalaglag nin biyo sa bilog na “kinaban,” an boot sabihon, an bilog na marigsok na sosyedad nin tawo.

14. (a) Anong hula an naghuhula kan dakulang linog asin kan mga resulta kaini? (b) Ano nanggad an itinotokdo kan hula ni Joel asin kan Kapahayagan 6:​12, 13?

¹⁴ Ihinula kan ibang propeta ni Jehova an linog na iyan asin an pangultimong kalaglagan na bunga kaini. Bilang halimbawa, kan mga 820 B.C.E., nagtaram si Joel manongod sa “pagdatong kan dakula asin makatatakot na aldaw ni Jehova,” na sinasabing sa panahon na iyan “an aldaw magigin kadikloman, asin an bulan magigin dugo.” Pakatapos, idinugang nia an mga tataramon na ini: “Igwa nin mga kadaklan, kadaklan, sa hababang kaplanodohan kan desisyon, ta an aldaw ni Jehova harani na sa hababang kaplanodohan nin desisyon. An aldaw asin bulan madiklom, asin an mismong mga bitoon hahaleon an saindang liwanag. Asin hale sa Sion si Jehova mag-uungal, asin hale sa Jerusalem ipadadangog nia an saiyang tingog. Asin magkukunogkunog an langit asin daga; alagad ta si Jehova magigin pailihan kan saiyang banwaan, asin kuta para sa mga aki ni Israel.” (Joel 2:​31; 3:​14-16) An pagkunogkunog na ini puwedeng iaplikar sana sa pagsagibo ni Jehova nin paghokom sa dakulang kahorasaan. (Mateo 24:21) Kaya an kaparehong tala sa Kapahayagan 6:​12, 13 tama sanang magkaigwa nin parehong aplikasyon.​—Helingon man an Jeremias 10:​10; Sofonias 1:​14, 15.

15. Anong makapangyarihan na pagkunogkunog an ihinula ni propeta Habacuc?

¹⁵ Mga 200 na taon pakatapos ni Joel, si propeta Habacuc nagsabi sa pamibi sa saiyang Dios: “O Jehova, nadangog ko an bareta manongod sa saimo. Natakot ako, O Jehova, sa saimong ginibo. Sa tahaw kan mga taon O buhaya iyan! Sa tahaw kan mga taon ipamidbid mo logod iyan. Sa panahon nin kariribokan, magirumdoman mo logod na magpaheling nin pagkaherak.” Magigin ano daw an “kariribokan” na iyan? Nagtao si Habacuc nin malinaw na pagladawan kan dakulang kahorasaan, na sinasabi manongod ki Jehova: “Sia nagtindog nin tanos, tanganing mayugyog nia an daga. Sia nagheling, dangan pinalukso nia an mga nasyon. . . . Ika nagmartsa na may pagdenunsiar sa bilog na daga. Huli sa kaanggotan saimong gininikan an mga nasyon. Minsan siring, ako mag-oogmang gayo dian ki Jehova; maggagayagaya ako sa Dios nin sakong kaligtasan.” (Habacuc 3:​1, 2, 6, 12, 18) Makosogon nanggad na pagyugyog an gigibohon ni Jehova sa bilog na daga kun saiya nang ginikan an mga nasyon!

16. (a) Ano an ihinula ni propeta Ezequiel dapit sa panahon na gibohon na ni Satanas an saiyang pangultimong pag-atake sa banwaan nin Dios? (b) Ano an magigin resulta kan dakulang linog sa Kapahayagan 6:12?

¹⁶ Naghula man si Ezequiel na kun si Gog kan Magog (an pinababa nang si Satanas) maggibo na kan saiyang pangultimong pag-atake sa banwaan nin Dios, magpapangyari si Jehova nin “dakulang linog” “sa daga nin Israel.” (Ezequiel 38:​18, 19) Minsan siring na tibaad magkaigwa nin literal na mga linog, kaipuhan niatong girumdomon na an Kapahayagan iinatubang sa mga tanda. An hulang ini asin an iba pang hula na sinitar simbolikong gayo. Kaya, an pagbukas kan ikaanom na tatak garo nagpapahayag kan kulminasyon kan gabos na pagyugyog sa daganon na sistemang ini nin mga bagay​—an dakulang linog na dian lalaglagon an gabos na tawong tumang sa soberaniya ni Jehova Dios.

An Panahon nin Kadikloman

17. Paano maaapektaran kan dakulang linog an aldaw, bulan, asin mga bitoon?

¹⁷ Siring kan ipinaheling ni Juan, an dakulang linog sinusundan nin makatatakot na mga pangyayari na kalabot minsan ngani an langit. Sinabi nia: “Asin an aldaw uminitom na siring sa sakong balukag, asin an bilog na bulan nagin siring sa dugo, asin an mga bitoon sa langit nagkahorolog sa daga, kun paanong an higuerra na nayogyog nin makosog na doros nararakdagan nin hilaw na higos.” (Kapahayagan 6:​12b, 13) Pambihirang pangyayari nanggad! Nagrerepresentar ini sa kulminasyon kan kamugtakan nin biyong kalaglagan na mas enot na ihinula ni Jesus sa Mateo 24:29. Maiimahinar daw nindo an makatatakot na kadikloman na magigin resulta kun literal na maotob an hula? Mayo na nin mainit, nakagiginhawang sinag kan aldaw kun aldaw! Mayo na nin makikatood, garo pirak na liwanag kan bulan kun banggi! Asin an minilyon na bitoon dai na magkikinang sa pelus na likodan kan langit. Imbes, magkakaigwa nin malipot, daing ontok na kadikloman.

18. Sa anong paagi ‘an kalangitan tunay na madiklom’ para sa Jerusalem kan 607 B.C.E.?

¹⁸ Sa espirituwal na sentido, an siring na kadikloman ihinula para sa suanoy na Israel. Nagpatanid si Jeremias: “Magigin kagabaan na daing laog an bilog na daga, asin dai daw ako magibo nin biyong pagpoho? Huli kaini an daga magmomondo, asin an kalangitan sa itaas tunay na madiklom.” (Jeremias 4:​27, 28) Kan 607 B.C.E. kan maotob an hulang iyan, tunay nanggad na madiklom an mga bagay para sa banwaan ni Jehova. An kabiserang siudad ninda, an Jerusalem, nasakop kan mga taga-Babilonya. Naraot an saindang templo, pinabayaan an saindang kadagaan. Para sa sainda, mayo nin nakakarangang liwanag hale sa langit. Imbes, idto siring kan mamondong sinabi ni Jeremias ki Jehova: “Guminadan ka; dai ka nagpaheling nin pagkaherak. Inolang mo nin panganoron an pagdolok sa saimo, tanganing dai makaagi an pamibi.” (Lamentacion 3:​43, 44) Para sa Jerusalem, an kadikloman na iyan sa langit nangahulogan nin kagadanan asin kalaglagan.

19. (a) Paano ilinadawan kan propeta nin Dios na si Isaias an kadikloman sa kalangitan mapadapit sa suanoy na Babilonya? (b) Kasuarin asin paano naotob an hula ni Isaias?

¹⁹ Dai naghaloy, an kaagid na kadikloman sa kalangitan nangahulogan nin kalamidad para sa suanoy na Babilonya. Dapit kaini, an propeta nin Dios pinasabngan na magsurat: “Uya! An aldaw ni Jehova madatong, na maisog kapuwa sa kabangisan asin sa naglalaad na kaanggotan, tanganing gibohon an daga na pagngangalasan, asin tanganing paraon kaiyan an mga parakasala sa daga. Huli ta an mismong mga bitoon kan kalangitan asin an saindang mga konstelasyon nin Kesil dai magtatao kan saindang liwanag; an aldaw madiklom sa pagsubang kaiyan, asin an bulan dai pasisirangon an liwanag kaiyan. Asin pababalikon ko an karatan kaiyan sa mabungang daga, asin an saindang kaliwagan sa mga maraot.” (Isaias 13:​9-11) An hulang ini naotob kan 539 B.C.E. kan an Babilonya masakop kan mga taga-Media asin Persia. Ilinadawan nin marahay kaini an kadikloman, an pagkadaing paglaom, an kakulangan nin ano man na nakakarangang liwanag para sa Babilonya mantang sia nawara na sa saiyang posisyon sagkod lamang bilang an pangenot na kapangyarihan sa kinaban.

20. Anong makatatakot na kaaabtan an naghahalat sa sistemang ini nin mga bagay kun mangyari na an dakulang linog?

²⁰ Sa kaagid na paagi, kun mangyari na an dakulang linog, an bilog na sistemang ini nin mga bagay sa kinaban mapalilibotan nin pagkadesesperar sa biyong kadikloman. An maliwanag, nagkikintab na mga liwanag kan daganon na sistema ni Satanas dai magtatao nin sinag nin paglaom. Nangyayari na ngonyan, an politikal na mga lider kan kinaban, espesyalmente sa Kakristianohan, midbid na gayo huli sa saindang karatan, pagputik, asin inmoral na estilo nin buhay. (Isaias 28:​14-19) Dai sinda puwedeng pagtiwalaan. An saindang natatada pang liwanag pasiring sa biyong kadikloman kun isagibo na ni Jehova an saiyang paghatol. An saindang arog sa bulan na impluwensia sa mga palakaw kan kinaban ihahayag bilang madugo, nakagagadan. An saindang kinabanon na mga superstar mapaparong siring sa nahuhulog na mga meteorite asin nagkakawararak siring kan hilaw na mga higos sa makosogon na bagyo. An satong bilog na globo mayuyugyog sa “dakulang kahorasaan na dai pa nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mateo 24:21) Makatatakot nanggad na paglaom!

“An Langit” Nahale

21. Sa saiyang bisyon, ano an naheling ni Juan dapit sa “an langit” asin “gabos na bukid asin gabos na isla”?

²¹ An bisyon ni Juan nagpapadagos: “Asin an langit nahale na siring sa balumbon na linululon, asin an gabos na bukid asin gabos na isla hinale sa saindang mga kamugtakan.” (Kapahayagan 6:​14) Malinaw, na bako ining literal na kalangitan o literal na mga bulod asin isla. Alagad ano an isinisimbolo kaiyan?

22. Sa Edom anong klaseng “kalangitan” an “malululon, siring sa balumbon nin libro”?

²² Mapadapit “sa langit,” matatabangan kita sa pakasabot niato sa kaagid na hula na nagsasabi kan kaanggotan ni Jehova tumang sa gabos na nasyon: “Asin an gabos na nasa hukbo kan kalangitan magkakaralapa. Asin an kalangitan malululon, siring sa balumbon nin libro.” (Isaias 34:4) An Edom partikularmente maninigong magtios. Paano? Dinaog sia kan mga taga-Babilonya pakatapos tolos kan kalaglagan kan Jerusalem kan 607 B.C.E. Kan panahon na iyan, mayo nin nangongorog na mga bagay na ibinaretang nangyari sa literal na kalangitan. Alagad igwa nin mga pangyayari nin biyong kalaglagan sa “kalangitan” kan Edom.e An saiyang mga kapangyarihan sa gobyerno nin tawo ibinaba hale sa saindang halangkaw, siring sa langit na kamugtakan. (Isaias 34:5) “Linulon” iyan asin garo baga iginilid, siring sa lumang balumbon na dai na magagamit nin siisay man.

23. Ano “an langit” na ‘mahahale na siring sa balumbon,’ asin paano an mga tataramon ni Pedro nagpapatunay sa pakasabot na ini?

²³ Kaya, “an kalangitan” na “nahale na siring sa balumbon” nagtotokdo sa tumang sa Dios na mga gobyerno na namamahala sa ibabaw kan daga. Hahaleon sinda nin lubos kan nagsasakop sa gabos na Nangangabayo sa maputing kabayo. (Kapahayagan 19:​11-16, 19-21) Pinatunayan ini kan sinabi ni apostol Pedro kan laoman nia an mga pangyayari na ilinadawan kan pagbubukas kan ikaanom na tatak: “An kalangitan asin daga ngonyan itinagama sa kalayo asin inaandam sa aldaw nin paghokom asin kalaglagan kan maraot na mga tawo.” (2 Pedro 3:7) Alagad ano an boot sabihon kan mga tataramon na, “an gabos na bukid asin gabos na isla hinale sa saindang mga kamugtakan”?

(Ipagpapadagos sa masunod na luwas.)

[Mga Nota sa Ibaba]