Mainit daw an Impierno?
“SA NAGKAPIRANG punto kan mga taon nin mil nuebe sientos sesenta, nawara an Impierno.” Iyan an sinabi kan Britanong autor na si David Lodge sa saiyang libro na Souls and Bodies, asin an saiyang mga tataramon naglaladawan kan paghonahona nin kadakol na Katoliko asin Protestante durante kan mga dekada pakatapos kan ikaduwang guerra mundial. Sa nagkapirang panahon, an kadakol na darakulang iglesya man sana an nagtago kan saindang opisyal na doktrina manongod sa naglalaad na impierno sa saindang mga pagmamaigot na makaadaptar sa modernong kaisipan.
An ideya nin padusa pakatapos nin kagadanan espesyalmenteng dai inaako nin mga tawo huli ta an pakasabot manongod sa kasalan nagin malibog sa saindang mga kaisipan. Kan interbiohon kan 1984, si Cardinal Ratzinger kan Roma nagsabi: “An satong sibilisasyon . . . nakapokus sa mga kamugtakan asin sarahotan sa pagprobar na haleon sa mga tawo an kaisipan nin pagkakulpable, sa kasalan . . . , na an mismong katunayan kairiba sa paniniwala sa impierno asin Purgatoryo.”
Posible daw ngonyan na magtubod sa katunayan nin kasalan na dai inaako an doktrina nin pagpadusa pakatapos nin kagadanan sa purgatoryo asin impierno? Sarong libro kasuarin sana, an Abrégé de la foi catholique (Summary of the Catholic Faith), na an introduksion isinurat kan Pranses na Cardinal Decourtray, naghapot nin direkta: “Kaipuhan daw na magtubod sa impierno?” An simbag: “Bakong posible na likayan an nakatatakot na hapot manongod sa impierno.” An librong Vatican Council II—More Postconciliar Documents (1982) nagkokotar “An Kredo kan Banwaan nin Dios” na nagsasabi: “Nagtutubod kami . . . [na] idtong mga naghihimate sa pagkamoot asin pagkaherak nin Dios mapasa daing sagkod na buhay. An mga minasayuma sa mga ini sa katapusan dadarahon sa kalayo na dai napaparong.”
Kaya, sa ibong kan gabos na teolohikal na mga paghihingoa tanganing patunayan an kabaliktaran, an kalayo sa impierno padagos pa man na kabtang na gayo kan opisyal na Katolikong doktrina. Alagad an A New Dictionary of Christian Theology (1983) nagsasabi kan “pagkasopog” asin “pagkadaing ranga” na dara kan doktrina nin daing sagkod na pagpadusa sa kadakol na miembro kan mga iglesya nin Kakristianohan ngonyan. Igwa sinda nin kasakitan na ioyon an doktrinang ini sa kaisipan na igwa nin Dios nin pagkamoot. Nagngangalas sinda: ‘An mainit na impierno daw tunay na sarong Kristiano asin Biblikal na doktrina? Kun bako, saen ini naghale?’
[Ritrato sa pahina 3]
Bourges Cathedral, Pransia