Kapahayagan—An Mamuraway na Kulminasyon Kaiyan Harani Na
Kapitulo 42: An Bagong Langit Asin Bagong Daga
1. Ano an ilinadawan ni Juan kan dinara sia kan anghel na pabalik sa kapinonan kan Sangribong Taon na Paghade?
An mamuraway na bisyon na ini nagpadagos na mangyari mantang an anghel dinara si Juan pabalik sa kapinonan kan Sangribong Taon na Paghade. Ano an ilinadawan nia? “Asin naheling ko an bagong langit asin bagong daga; huli ta nakalihis na an dating langit asin an dating daga, asin an dagat mayo na.” (Kapahayagan 21:1) Kanigoan kamakawiwiling tanawon an naglataw!
2. (a) Paano an hula ni Isaias manongod sa bagong kalangitan asin sarong bagong daga naotob sa nakabalik na mga Judio kan 537 B.C.E.? (b) Paano niato naaraman na may orog pang aplikasyon an hula ni Isaias, asin paano naotob an panugang ini?
2 Ginatos na taon bago an aldaw ni Juan, sinabi ni Jehova ki Isaias: “Uya ako naglalalang nin bagong kalangitan asin sarong bagong daga; asin an dating mga bagay dai na magigirumdoman, ni masabong pa iyan sa puso.” (Isaias 65:17; 66:22) An hulang ini enot na naotob kan an maimbod na mga Judio nagbalik sa Jerusalem kan 537 B.C.E. pakatapos kan saindang 70-taon na pagkadistiyero sa Babilonya. Sa pagbalik na iyan, pinorma ninda an nalinig na sosyedad, “sarong bagong daga,” sa irarom nin bagong palakaw sa pamamahala, an “bagong kalangitan.” Alagad, si apostol Pedro, nagtokdo sa orog pang aplikasyon kan hula, na sinasabing: “Alagad igwa nin bagong kalangitan asin sarong bagong daga na satong hinahalat oyon sa saiyang panuga, asin dian an katanosan an mag-eerok.” (2 Pedro 3:13) Ngonyan ipinaheling ni Juan na an panugang ini naotob durante kan aldaw nin Kagurangnan. “An dating langit asin an dating daga,” an organisadong palakaw nin mga bagay ni Satanas kaiba an istruktura nin gobyerno kaiyan na impluwensiado ni Satanas asin kan saiyang mga demonyo, malihis na. An maalon na “dagat” nin maraot, rebelyosong katawohan dai na mag-eeksister. Kasalihid kaiyan iyo an “bagong langit asin bagong daga”—sarong bagong daganon na sosyedad sa irarom nin bagong gobyerno, an Kahadean nin Dios.—Ikomparar an Kapahayagan 20:11.
3. (a) Ano an ilinadawan ni Juan, asin ano an Bagong Jerusalem? (b) Paano an Bagong Jerusalem ‘naghihilig hale sa langit’?
3 Nagpadagos si Juan: “Naheling ko man an banal na siudad, an Bagong Jerusalem, na naghihilig hale sa langit hale sa Dios asin inandam siring sa nobya na sinamnohan para sa saiyang agom.” (Kapahayagan 21:2) An Bagong Jerusalem iyo an nobya ni Cristo, na kompuwesto nin linahidan na mga Kristiano na nagdanay na maimbod sagkod sa kagadanan asin binuhay liwat tanganing magin mga hade asin saserdote kaiba an pinamuraway na si Jesus. (Kapahayagan 3:12; 20:6) Kun paanong an daganon na Jerusalem nagin sentro nin gobyerno sa suanoy na Israel, an pambihirang Bagong Jerusalem asin an saiyang Nobyo minakompuwesto sa gobyerno kan bagong palakaw nin mga bagay. Ini an bagong langit. An ‘nobya naghihilig hale sa langit,’ bakong sa literal, kundi sa pakahulogan nin pagtao nin atension sa daga. An nobya kan Kordero an magigin saiyang katabang sa pagpadalagan nin matanos na gobyerno sa bilog na katawohan. Kanigoan na bendisyon nanggad para sa sarong bagong daga!
4. Ano an ipinanuga nin Dios na kaagid kan saro na ginibo nia sa bagong napormang nasyon nin Israel?
4 Sinasabi nin orog pa ni Juan sa sato: “Dangan nakadangog ako nin makosog na tingog hale sa trono na nagsabi: ‘Uya! An tabernakulo nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda.’” (Kapahayagan 21:3) Kan ginibo ni Jehova an tipan nin Pagboot sa bagong nasyon kaidto na Israel, nanuga sia: “Ibubugtak ko an sakuyang tabernakulo sa tahaw nindo, asin an sakuyang kalag dai maoongis sa saindo. Asin ako maglalakaw dian sa tahaw nindo asin patutunayan ko na ako Dios nindo, asin kamo, sa saindong kabtang, patutunayan nindo na kamo sakuyang banwaan.” (Levitico 26:11, 12) Ngonyan si Jehova nanunuga man sa maimbod na mga tawo. Durante kan sangribong taon na Aldaw nin Paghokom, sinda magigin espesyal nanggad na banwaan sa saiya.
5. (a) Paano an Dios mag-eerok sa kaibanan kan katawohan durante kan Milenyal na Paghade? (b) Paano an Dios mag-eerok sa kaibanan kan katawohan pakatapos kan Sangribong Taon na Paghade?
5 Durante kan Milenyal na Paghade, si Jehova “mag-eerok” sa tahaw kan katawohan sa temporaryong areglo, sia irerepresentar kan saiyang makahadeng Aki, si Jesu-Cristo. Alagad, sa katapusan kan Sangribong Taon na Paghade, iiintrega ni Jesus an Kahadean sa saiyang Ama, na dai mangangaipo nin makahadeng representante o tagapag-oltanan. Si Jehova mag-eerok sa espirituwal sa “saiyang mga banwaan” sa permanente asin direktang paagi. (Ikomparar an Juan 4:23, 24.) Kanigoan kadakulang pribilehiyo para sa ibinalik na katawohan!
6, 7. (a) Anong pambihirang mga panuga an ihinayag ni Juan, asin sairisay an magkakamit kan mga bendisyon? (b) Paano ilinadawan ni Isaias an paraiso na kapwa espirituwal asin pisikal?
6 Si Juan nagpadagos sa pagsabi: “Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Kapahayagan 21:4) Liwat, ipinagirumdom sa sato an mas naenot na ipinasabong na mga panuga. Si Isaias naglaom man sa panahon na an kagadanan asin an pagmondo mayo na asin an kamondoan riribayan nin kagayagayahan. (Isaias 25:8; 35:10; 51:11; 65:19) Sinierto ngonyan ni Juan na an mga panugang ini may makangangalas na kaotoban durante kan sangribong taon na Aldaw nin Paghokom. Enot an dakulang kadaklan magkakamit nin mga bendisyon. “An Kordero, na nasa tahaw kan trono,” sa padagos na pagpastor sainda, “gigiyahan sinda sa mga burabod kan tubig nin buhay. Asin papahidon nin Dios an gabos na luha sa saindang mga mata.” (Kapahayagan 7:9, 17) Alagad sa katapustapusi an gabos na bubuhayon liwat asin naggigibo nin pagtubod sa mga probisyon ni Jehova magigin kairiba ninda, na naggagayagaya sa paraiso kapwa sa espirituwal asin pisikal.
7 “Sa panahon na iyan,” an sabi ni Isaias, “an mga mata kan mga buta magkakaburuklat, asin an mismong mga talinga kan mga bongog magkakaburukasan.” Iyo, “sa panahon na iyan an pilay matukad na garo usa, asin an dila kan pula magkukurahaw sa kaogmahan.” (Isaias 35:5, 6) Sa panahon na iyan man, “sinda siertong magtotogdok nin mga harong asin mag-oontok sinda dian; asin siertong magtatanom sinda nin mga ubasan asin kakakanon ninda an bunga kaiyan. Dai sinda magtotogdok asin iba an mag-oontok; dai sinda matanom asin iba an makakan. Huli ta magigin siring sa mga aldaw nin kahoy an mga aldaw kan sakuyang banwaan; asin an ginibo kan saindang mga kamot lubos na gagamiton kan sakuyang mga pinili.” (Isaias 65:21, 22) Kaya dai sinda hahaleon sa daga.
8. Ano an sinabi mismo ni Jehova manongod sa pagkamapananarigan kan pambihirang mga panugang ini?
8 Kanigoan kamakangangalas na mga patanaw an nakapapano sa satong isip mantang hinohorophorop niato an mga panugang ini! An makangangalas na mga probisyon natatagama sa maimbod na katawohan sa irarom kan mamomoton na gobyerno kan langit. An siring daw na mga panuga masakit magkatotoo? Iyan daw mga pangarap sana kan gurang na lalaking nadistiyero sa isla nin Patmos? Si Jehova mismo an nagsimbag: “Asin an Saro na nagtutukaw sa trono nagsabi: ‘Uya! ginigibo kong bago an gabos na bagay.’ Siring man, sia nagsabi: ‘Isurat mo, huli ta an mga tataramon na ini maimbod asin totoo.’ Asin sinabi nia sa sako: ‘Nangyari na! Ako an Alfa asin an Omega, an kapinonan asin an katapusan.’”—Kapahayagan 21:5, 6a.
9. Taano an mga bendisyon na ini sa ngapit ta maninigong mansayon na biyo nanggad na siertong marerealisar?
9 Iyan garo man sana nagpipirma si Jehova mismo para sa maimbod na katawohan nin garantiya, o titulo, kan mga bendisyon na ini sa ngapit. Siisay daw an mangangahas na kustionon an siring na Garantisador? Tara, sierto nanggad an mga panugang ini ni Jehova kun kaya nasabi niang iyan garo naotob na: “Nangyari na!” Bako daw si Jehova “an Alfa asin an Omega . . . , an Saro na iyo ngonyan asin iyo kaidto patin iyo an madatong, an Makakamhan sa gabos”? (Kapahayagan 1:8) Iyo nanggad! Sia mismo nagpahayag: “Ako an enot asin ako an huri, asin laen sa sako mayo na nin Dios.” (Isaias 44:6) Bilang siring, puwede niang pasabngan an mga hula asin otobon an gabos na detalye kaiyan. Nakakapakosog nanggad sa pagtubod! Kaya nanunuga sia: “Uya! ginigibo kong bago an gabos na bagay”! Imbes na kustionon kun baga an mga ngangalasan na ini tunay na mangyayari, sierto na maninigo kitang maghapot: ‘Ano an maninigo kong gibohon personalmente tanganing magmana kan siring na mga bendisyon?’
“Tubig” Para sa mga Napapaha
10. Anong “tubig” an iinaalok ni Jehova, asin ano an irenerepresentar kaiyan?
10 Si Jehova mismo an nagpahayag: “An siisay man na napapaha tatawan ko na daing bayad hale sa burabod kan tubig nin buhay.” (Kapahayagan 21:6b) Tanganing mapanigoan an pagkapahang iyan, an sarong tawo maninigong nakamamate kan saindang espirituwal na pangangaipo asin magin andam na akoon “an tubig” na itinatao ni Jehova. (Isaias 55:1; Mateo 5:3) Arin na “tubig”? Si Jesus mismo an nagsimbag sa hapot na iyan kan nagpatotoo sa sarong babae sa may bobon sa Samaria. Sinabihan nia an babae: “An siisay man na uminom sa tubig na itatao ko sa saiya dai na nanggayod mapapaha, kundi an tubig na itatao ko sa saiya magigin burabod nin tubig na nagbuburokbusok tanganing magtao nin buhay na daing katapusan.” An “burabod nin tubig nin buhay” na iyan nagbobolos hale sa Dios paagi ki Cristo bilang saiyang probisyon sa pagbalik sa katawohan sa pagkasangkap sa buhay. Arog kan Samaritana, maninigo nanggad na booton niatong uminom sa burabod na iyan! Asin arog kan babaeng iyan, maninigong kanigoan nanggad kaandam kitang sayumahan an kinabanon na mga interes apabor sa pagbareta sa iba kan maogmang bareta!—Juan 4:14, 15, 28, 29.
An mga Nakadaog
11. Anong panuga an ginibo ni Jehova, asin kiisay enot na aplikado an mga tataramon na iyan?
11 An mga nag-iinom kan nakagiginhawang “tubig” na iyan maninigo man na makadaog, siring kan padagos na isinabi ni Jehova: “An makadaog magmamana kan mga bagay na ini, asin ako an saiyang magigin Dios asin sia magigin sakong aki.” (Kapahayagan 21:7) An panugang ini kaagid kan mga panugang manonompongan sa mga mensahe sa pitong kongregasyon; kaya an mga tataramon na ini maninigong enot na iaplikar sa linahidan na mga disipulo. (Kapahayagan 2:7, 11, 17, 26-28; 3:5, 12, 21) An espirituwal na mga tugang ni Cristo sa gabos na panahon interesadong gayo na nag-antisipar sa pribilehiyo na magin kabtang kan Bagong Jerusalem. Kun makadaog sinda, siring ki Jesus na nakadaog, marerealisar an saindang mga paglaom.—Juan 16:33.
12. Paano an panuga ni Jehova sa Kapahayagan 21:7 maootob para sa dakulang kadaklan?
12 An dakulang kadaklan hale sa gabos na nasyon naglalaom man sa panugang ini. Sinda maninigo man na makadaog, maimbod na naglilingkod sa Dios sagkod na sinda lumuwas hale sa dakulang kahorasaan. Dangan maralaog sinda sa saindang daganon na mana, ‘an kahadean na inandam para sa sainda poon pa kan lalangon an kinaban.’ (Mateo 25:34) An mga ini asin an iba pa kan daganon na mga karnero kan Kagurangnan na nakapasar sa pagbalo sa katapusan kan sangribong taon inaapod na “mga banal.” (Kapahayagan 20:9) Sinda maggagayagaya sa banal asin kan aki sa magurang na relasyon sa saindang Kaglalang, si Jehova Dios, bilang mga miembro kan saiyang unibersal na organisasyon.—Isaias 66:22; Juan 20:31; Roma 8:21.
13, 14. Tanganing magmana kan pambihirang mga panuga nin Dios, anong mga gawe an maninigong desidido niatong likayan, asin taano?
13 Sa pagmansay sa mamuraway na paglaom na ini, kanigoan kahalaga na an mga Saksi ni Jehova ngonyan magdanay na malinig hale sa nakararamog na mga bagay sa kinaban ni Satanas! Kaipuhan kitang magin marigon, desidido, asin determinado na nungkang madara kita kan Diablo na magin kairiba kan mga ilinadawan digdi ni Jehova mismo: “Alagad idtong mga matatakton asin idtong mga dai nin pagtubod asin idtong mga makababalde sa saindang ramog asin mga paragadan asin mga parapakisaro asin idtong mga naggigibo nin espiritismo asin mga parasamba sa ladawan patin an gabos na putikon, an saindang kabtang masasa danaw na naglalaad nin kalayo asin asupre. Ini an ikaduwang kagadanan.” (Kapahayagan 21:8) Iyo, an magigin paramana maninigong likayan an mga gawe na nakaramog sa daan na palakaw nin mga bagay na ini. Kaipuhan siang makadaog paagi sa pagdanay na maimbod sa atubang nin gabos na pangigipit asin sugot.—Roma 8:35-39.
14 An Kakristianohan maski sia naghihingakong nobya ni Cristo, midbid sa makababaldeng mga gawe na ilinadawan digdi ni Juan. Kaya sia masasa daing sagkod na kalaglagan kairiba kan iba pa sa Dakulang Babilonya. (Kapahayagan 18:8, 21) Siring man, an siisay man na kabilang sa linahidan o sa dakulang kadaklan na naggigibo nin siring na karatan, o nagpoon na magpakosog kaiyan, maatubang sa daing sagkod na kalaglagan. Kun magdanay sinda sa mga gaweng ini, dai sinda magmamana kan mga panuga. Asin sa bagong kinaban, an siisay man na mag-introdusir kan siring na paggawe lalaglagon tolos-tolos, na masasa ikaduwang kagadanan na daing paglaom na pagkabuhay liwat.—Isaias 65:20.
15. Sairisay an nangongorog bilang mga nakadaog, asin sa anong bisyon dinadara an Kapahayagan sa mamuraway na kulminasyon?
15 An nangongorog bilang mga nakadaog iyo an Kordero, si Jesu-Cristo, asin an saiyang nobya na 144,000, an Bagong Jerusalem. Kun siring, angay nanggad na an Kapahayagan darahon sa mamuraway na kulminasyon paagi sa ultimo, daing kabaing na pagheling sa Bagong Jerusalem! Ilinadawan ngonyan ni Juan an kahurihurihing bisyon.