Kun Kinukua nin Kagadanan an Sarong Namomotan
“KAN 1981 nagadan sa kanser an sakong ina. Ampon nia ako. Nagin makologon sa boot an saiyang pagkagadan para sa sako asin sa nagin tugang ko sa pagkaampon. 17 anyos ako, asin 11 man an tugang ko. Labi-labi an kapungawan ko sa sakong ina. Pinadakula ako bilang Katoliko, asin huling itinokdo sako na sia yaon sa langit, gusto ko nang maghugot tanganing makaibanan sia. Sia an pinakadayupot kong katood.”—Roberta, 25 anyos.
Nagkaigwa na daw kamo nin kaagid na eksperyensia? Kun iyo, aram mismo nindo an kolog na namamatean sa pagkawara nin sarong namomotan. Garo baga bako nanggad na makatanosan na an kagadanan may kapangyarihan na kuanon an sarong namomotan. Asin kun iyan nangyayari, an pag-isip na dai na nindo noarin man makakaolay, makakangisihan, o makukugos an saindong namomotan talagang masakiton na tioson. Asin arog kan ipinaheheling kan mga tataramon ni Roberta, an kolog na iyan dai nahahale sa pagsabi saindo na an saindong namomotan yaon sa langit.
Alagad, ano an mamamatean nindo kun maaraman nindo na puwedeng makaibanan giraray an saindong gadan na namomotan sa harani nang ngapit, bako, bakong duman sa langit kundi digdi mismo sa daga sa irarom nin matoninong, matanos na mga kamugtakan? Asin ano kun maaraman man nindo na sa panahon na iyan an mga tawo magkakaigwa kan paglaom na magkamit nin sangkap na salud asin dai na sinda noarin man kaipuhan na magadan? ‘Pangarap sana iyan!’ tibaad sabihon nindo.
Pero, kan enot na siglo C.E., si Jesu-Cristo mapusong nagsabi: “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay.“ (Juan 11:25) Idto panuga na an gadan mabubuhay liwat—makaoogma nanggad na paglaom!
Alagad, tibaad iniisip nindo: ‘May marigon daw na pasisikadan sa pagtubod sa siring na panuga? Paano ko maseseguro na iyan bako sanang pangarap? Asin kun may pasisikadan sa pagtubod dian, ano daw an magigin kahulogan kan kaotoban kan panugang ini para sa sako asin sa sakong mga namomotan?’ An minasunod na artikulo ipaliliwanag ini asin an iba pang hapot.