Gurano Kahalaga kan Itsura?

“Naanggot ako huli sa sakong itsura,” an isinurat nin sarong hoben hale sa Beaver Falls, Pennsylvania, E.U.A. “An paghona ko makanos ako asin daing itsura.” Ipinaliliwanag nia: “Haros dai ako nin kinakakan sa laog nin pirang aldaw, asin talagang naiinaan nin mga duwang libra an gabat ko, pero nagugutom ako nin marhay sa dai pagkakan kaya kinakakanan ko man nin todo sa sunod na aldaw asin nababawi ko an nawarang gabat.”

Dangan, sa sarong Kristianong kombension, sabi nia: “Nanalming ako asin sinabi ko sa sarong amiga, ‘Makanoson ako!’

“An mabooton na amiga kong ini hinapot ako kun nabasa ko na an ‘A Look at How You Look’ sa librong Questions Young People Ask—Answers That Work. Sabi ko saiya dai pa. Sabi nia sako, ‘Amiga, kaipuhan na magpuli ka ngonyan na banggi asin basahon mo iyan.’ Asin iyan man nanggad an ginibo ko.

“Garo ko binabasa an sadiri kong kasaysayan. Dangan nag-abot ako sa hapot na nagpaisip sa sako, ‘Siisay an nagpapalakop kan ideya na kaipuhan mo an sarong itsura tangani kang magin popular, asensado, o maogma?’”

An simbag sa hapot na iyan, sabi kan hoben na ini, nakagibo nin dramatikong pagkaliwat sa saiyang buhay. Sia nagkonklusyon: “Paagi sa nakatatabang na mga suhestion sa librong Young People Ask, naheling ko an pangangaipo na itanos an mga bagay na dapat kong ipaorog.”

An mga hobenes kadakol kan problema ngonyan. Kaipuhan ninda nin tabang tanganing maatubang iyan nin mapanggana. An Questions Young People Ask—Answers That Work nagtatao kan tabang na ini. Para sa impormasyon kun paano aakoon an librong ini na magayonon an mga retrato, llenaran asin ipadara an kupon.

Boot kong makaresibi kan 320-pahinas na librong Questions Young People Ask—Answers That Work. (Sumurat sa adres na nasa ibaba para sa impormasyon. Sa luwas kan Pilipinas, sumurat sa lokal na sanga kan Watch Tower para sa impormasyon. Helingon an pahina 2.)