Kapahayagan—An Mamuraway na Kulminasyon Kaiyan Harani Na
Kapitulo 39: An Guerrero-Hade Nanggana sa Armagedon
Bisyon 13—Kapahayagan 19:11-21
Tema: Pinangenotan ni Jesus an langitnon na mga hukbo sa paglaglag kan palakaw nin mga bagay ni Satanas
Panahon nin Kaotoban: Pakatapos kan kalaglagan kan Dakulang Babilonya
1. Ano an Armagedon, asin ano an nagdadara dian?
ARMAGEDON—makatatakot na termino para sa dakol! Pero para sa mga namomoot sa katanosan, iyan nangangahulogan kan haloy nang hinahalat na aldaw na gigibohon ni Jehova an ultimong paghokom sa mga nasyon. Iyan bakong ralaban nin tawo kundi “ralaban kan dakulang aldaw nin Dios na Makakamhan sa gabos”—an saiyang aldaw nin pamalos tumang sa mga namomoon sa daga. (Kapahayagan 16:14, 16; Ezequiel 25:17) Paagi sa paglaglag sa Dakulang Babilonya, nagpoon na an dakulang kahorasaan. Dangan, sa sutsut ni Satanas, an mapulang mabangis na hayop asin an sampulong sungay kaiyan itotorohok an saindang pagsalakay sa banwaan ni Jehova. An Diablo, na mas anggot kisa kasuarin pa man sa garo babaeng organisasyon nin Dios, determinadong gamiton an saiyang mga nadaya sa pakikilaban sagkod sa katapusan sa natatada sa saiyang banhi. (Kapahayagan 12:17) Ini an ultimong oportunidad ni Satanas!
2. Siisay si Gog nin Magog, asin paano sia imamaniobra ni Jehova na salakayon an Saiyang sadiring banwaan?
2 An maringis na pagsalakay kan Diablo buhay na ilinaladawan sa Ezequiel kapitulo 38. Dian, an ruminaot na si Satanas inaapod na “Gog kan daga nin Magog.” Binugtakan ni Jehova nin piguratibong mga banwit sa salang ni Gog, na dinadara sia asin an saiyang dakulang hukbo militar sa pagsalakay. Paano nia ginigibo ini? Paagi sa pagpangyari na maheling ni Gog an Saiyang mga saksi na sarong banwaan na daing depensa “na tiniripon hale sa mga nasyon, saro na nagtitipon nin kayamanan asin rogaring, an mga nag-eerok sa tahaw kan daga.” An mga ini iyo an lataw sa daga bilang an sarong banwaan na nagsayumang sumamba sa mabangis na hayop asin sa ladawan kaiyan. An saindang espirituwal na kosog asin prosperidad ikinaaanggot ni Gog. Kaya si Gog asin an saiyang dakulang puwersa militar, kaiba an mabangis na hayop hale sa dagat na may sampulong sungay, burunyog na maabot sa pangadan. Alagad, bakong arog kan Dakulang Babilonya, an malinig na banwaan nin Dios may proteksion nin Dios!—Ezequiel 38:1, 4, 11, 12, 15; Kapahayagan 13:1.
3. Paano paparaon ni Jehova an militarisadong mga hukbo ni Gog?
3 Paano paparaon ni Jehova si Gog asin an gabos niang kadaklan? Hinanyoga! “‘Aapodon ko tumang sa saiya sa gabos kong kabukidan an sarong espada,’ an sabi kan Soberanong Kagurangnan na Jehova. ‘An espada nin lambang saro magigin tumang sa saiyang sadiring tugang.’” Alagad ta minsan nuklear o kombensional na mga armas dai mapapakinabangan sa ralaban na iyan, ta sinasabi ni Jehova: “Asin maghohokom ako sa saiya, na dara an peste asin dugo; asin an makosogon na oran asin mga gapong graniso, kalayo asin asupre paooranon ko sa saiya asin sa saiyang mga kairiba patin sa dakol na banwaan na kaibanan nia. Asin padadakulaon ko nanggad an sakong sadiri asin papakangbanalon ko an sakong sadiri patin ipapamidbid ko an sakong sadiri sa mga mata nin dakol na nasyon; asin makakaaram sinda na ako si Jehova.”—Ezequiel 38:21-23; 39:11; ikomparar an Josue 10:8-14; Hokom 7:19-22; 2 Cronica 20:15, 22-24; Job 38:22, 23.
An Sarong Inapod na “Maimbod Asin Totoo”
4. Paano ilinadawan ni Juan si Jesu-Cristo na andam sa pakikilaban?
4 Inapod ni Jehova an sarong espada. Siisay an may dara kan espadang ini? Sa pagbuwelta sa Kapahayagan, manonompongan niato an simbag sa saro pang makaoogmang bisyon. Sa pagheling ni Juan an langit nabukasan tanganing ipaheling an sarong kahangahanga nanggad—si Jesu-Cristo mismo na andam na makilaban! Sinasabi sato ni Juan: “Asin naheling ko an langit na nabukasan, asin, uya! sarong maputing kabayo. Asin an saro na nangangabayo dian inaapod Maimbod asin Totoo, asin sia naghohokom asin nakikipaglaban sa katanosan. An saiyang mga mata laad nin kalayo, asin nasa saiyang payo an dakol na diadema.”—Kapahayagan 19:11, 12a.
5, 6. Ano an isinisimbolo kan (a) “maputing kabayo”? (b) ngaran na “Maimbod asin Totoo”? (c) mga matang siring sa “laad nin kalayo”? (d) “dakol na diadema”?
5 Arog sa naenot na bisyon sa apat na parakabayo, an “maputing kabayo” angay na simbolo nin matanos na pakikilaban. (Kapahayagan 6:2) Asin siisay sa mga aki nin Dios an mas matanos pa kisa makosog na Guerrerong ini? Mantang “inaapod Maimbod asin Totoo,” segurado na sia “an maimbod asin totoong saksi,” si Jesu-Cristo. (Kapahayagan 3:14) Sia nakikipaglaban tanganing gibohon an matanos na mga paghokom ni Jehova. Kaya, sia minahiro sa saiyang katongdan bilang nombradong Hokom ni Jehova, an “Makosog na Dios.” (Isaias 9:6) An saiyang mga mata makatatakot, siring sa “laad nin kalayo,” na nagtatanaw sa malaad na pagkalaglag kan saiyang mga kaiwal.
6 Mga diadema an korona sa payo kan Guerrero-Hadeng ini. An mabangis na hayop na naheling ni Juan na nagluwas sa daga may sampulong diadema, na ilinaladawan an temporaryong paghade kaiyan sa daga. (Kapahayagan 13:1) Pero si Jesus may “dakol na diadema.” An saiyang mamuraway na paghade daing kabaing, ta sia an “Hade kan mga nagsasakop bilang mga hade asin Kagurangnan kan mga nagsasakop bilang mga kagurangnan.”—1 Timoteo 6:15.
7. Ano an nasusurat na ngaran ni Jesus?
7 Nagpapadagos an paglaladawan ni Juan: “Igwa sia nin ngaran na nasusurat na mayo nin nakakaaram kundi sia sana.” (Kapahayagan 19:12b) Dati nang inaapod kan Biblia an Aki nin Dios na Jesus, Emmanuel, asin Miguel. Alagad an dai sinabing “ngaran” na ini minalataw na nagrerepresentar sa katongdan asin mga pribilehiyo na kakamtan ni Jesus sa aldaw kan Kagurangnan. (Ikomparar an Kapahayagan 2:17.) Si Isaias, sa paglaladawan ki Jesus poon kan 1914, nagsasabi: “An saiyang ngaran aapodon na Makangangalas na Parahatol, Makosog na Dios, Amang Daing Katapusan, Prinsipe nin Katoninongan.” (Isaias 9:6) Iinasosyar ni apostol Pablo an ngaran ni Jesus sa Saiyang halangkawon na mga pribilehiyo nin paglilingkod kan sia sumurat: “Ilinangkaw . . . nin Dios [si Jesus] sa superyor na kamugtakan asin may kabootan na itinao saiya an ngaran na halangkaw kisa lambang ibang ngaran, tanganing sa ngaran ni Jesus an lambang tuhod lumuhod.”—Filipos 2:9, 10.
8. Taano ta solamente si Jesus an makaaaram kan ngaran na isinurat, asin kiisay nia ihihiras an saiyang halangkaw na mga pribilehiyo?
8 An mga pribilehiyo ni Jesus pambihira. Apuwera ki Jehova mismo, solamente si Jesus an makasasabot kun ano an kahulogan nin pagkapot sa siring kalangkaw na katongdan. (Ikomparar an Mateo 11:27.) Kun siring, sa gabos na linalang nin Dios, solamente si Jesus an lubos na makasasabot sa ngaran na ini. Minsan siring, iiniiba ni Jesus an saiyang nobya sa pirang pribilehiyong ini. Kaya sia nanunuga: “An makadaog . . . isusurat ko sa saiya . . . an sakong bagong ngaran.”—Kapahayagan 3:12.
9. Ano an ipinaririsa kan (a) pagkasamno ki Jesus “nin pan-ibabaw na gubing na winirikan nin dugo”? (b) pag-apod ki Jesus na “An Tataramon nin Dios”?
9 Idinugang ni Juan: “Asin sia nasasamnohan nin pan-ibabaw na gubing na winirikan nin dugo, asin an inginaran sa saiya An Tataramon nin Dios.” (Kapahayagan 19:13) Kiisay na “dugo” ini? Posible na iyan dugo ni Jesus, na pinabolos para sa katawohan. (Kapahayagan 1:5) Pero, sa kontekstong ini, mas posible na iyan nanonongod sa dugo kan saiyang mga kaiwal na paboboloson kun sinda hokoman na ni Jehova. Ipinagigirumdom sato an naenot na bisyon na dian an ubasan kan daga ginuno asin binatayan sa dakulang ligisan kan kaanggotan nin Dios sagkod na an dugo nakaabot “sagkod sa mga busal kan mga kabayo”—na nangangahulogan nin dakulang kapangganahan sa mga kaiwal nin Dios. (Kapahayagan 14:18-20) Siring man, an dugo na nawiwirik sa panluwas na gubing ni Jesus nagpapatunay na an saiyang kapangganahan dai mapagdududahan asin kompleto. (Ikomparar an Isaias 63:1-6.) Ngonyan si Juan nagtaram liwat manongod sa pag-apod ki Jesus sa sarong ngaran. Ngonyan iyan bantog nang ngaran—“An Tataramon nin Dios”—na ipinamimidbid an Guerrero-Hadeng ini bilang an Pangenot na Parataram ni Jehova asin Paradepensa sa katotoohan.—Juan 1:1; Kapahayagan 1:1.