Kapahayagan—An Mamuraway na Kulminasyon Kaiyan Harani Na

Kasumpay kan Kapitulo 43: An Magayon na Siudad

22. (a) Saen naggikan an salog, asin taano ta angay ini? (b) Ano an kalabot sa tubig nin buhay, asin ano an kabilang sa simbolikong salog na ini?

²² An salog naggigikan sa “trono nin Dios asin kan Kordero.” Angay ini, mantang an basihan kan nagtataong buhay na mga probisyon ni Jehova iyo an pantubos na atang, asin itinao ini huli ta si Jehova “namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Kalabot man sa tubig nin buhay an Tataramon nin Dios, na sinasambit bilang tubig sa Biblia. (Efeso 5:26) Alagad, bako sana an katotoohan an kabilang sa salog nin tubig nin buhay kundi siring man an gabos pang ibang probisyon ni Jehova, basado sa atang ni Jesus, para sa pagbalukat sa makinuyog na mga tawo hale sa kasalan asin kagadanan asin pagtao sainda nin buhay na daing katapusan.​—Juan 1:29; 1 Juan 2:​1, 2.

23. (a) Taano ta angay na an salog nin tubig nin buhay nagbobolos sa tahaw kan lansangan kan Bagong Jerusalem? (b) Anong banal na panuga ki Abraham an maootob kun abunda nang bumolos an tubig nin buhay?

²³ Durante kan Sangribong Taon na Paghade, an mga pakinabang sa pantubos iaaplikar nin lubos paagi kan pagkasaserdote ni Jesus asin kan saiyang 144,000 na katabang na mga saserdote. Angay nanggad kun siring, an salog nin tubig nin buhay bumubolos sa tahaw kan lansangan kan Bagong Jerusalem. Ini kompuwesto kan espirituwal na Israel, na kairiba si Jesus minakompuwesto sa tunay na banhi ni Abraham. (Galacia 3:​16, 29) Kun siring, kun an tubig nin buhay abunda nang bumolos sa tahaw kan lansangan kan simbolikong siudad, “an gabos na nasyon sa daga” magkakaigwa nin lubos na oportunidad na bendisyonan an saindang sadiri paagi sa banhi ni Abraham. An panuga ni Jehova ki Abraham lubos nang maootob.​—Genesis 22:​17, 18.

Mga Kahoy nin Buhay

24. Ano an naheling ngonyan ni Juan sa magkaibong na pangpang kan salog nin tubig nin buhay, asin ano an ilinaladawan kaiyan?

²⁴ Sa bisyon ni Ezequiel, an salog nagin pang masologon na agos, asin an propeta nakaheling sa man-ibong-ibong na pangpang kaiyan nin gabos na klase nin nagbubungang mga kahoy. (Ezequiel 47:12) Alagad ano an naheling ni Juan? Ini: “Asin sa man-ibong-ibong na pangpang kan salog igwa nin mga kahoy nin buhay na nagbubunga nin kagduwang gusi nin bunga, na nagbubunga bulan-bulan. Asin an mga dahon kan mga kahoy para sa pagpaomay sa mga nasyon.” (Kapahayagan 22:2b) An “mga kahoy nin buhay” na ini siertong naglaladawan man sa kabtang kan probisyon ni Jehova sa pagtao nin daing sagkod na buhay sa makinuyog na katawohan.

25. Anong abundang probisyon an ginibo ni Jehova para sa naghimateng mga tawo sa panglobong Paraiso?

²⁵ Kanigoan nanggad kaabundang probisyon an ginigibo ni Jehova para sa naghimateng mga tawo! Bako sanang makananamit sinda kan nakagiginhawang tubig na iyan kundi puwede man sindang kumua sa mga kahoy na iyan nin nagpapadagos na manlaenlaen na sumusustenir na bunga. O, kun nanigoan na kutana an satong orihinal na mga magurang kan kaagid na “magayon na paghelingon” na probisyon sa Paraiso sa Eden! (Genesis 2:9) Alagad ngonyan an panglobong Paraiso uya na, asin si Jehova naggibo pa ngani nin probisyon paagi sa mga dahon kan simbolikong mga kahoy na idto para sa “pagpaomay sa mga nasyon.”a Orog nanggad na superyor sa arin man na bolong, hale man sa masitas na panbolong o sa iba pa, na ipinalalakop ngonyan, an nakakapaomay na paggamit kan simbolikong mga dahon na idto magdadara sa nagtutubod na katawohan sa pagkasangkap sa espirituwal asin sa hawak.

26. Ano an puwede man na iladawan kan mga kahoy nin buhay, asin taano?

²⁶ An mga kahoy na idto, na matubig huli sa salog, dugang pang puwedeng lumadawan sa 144,000 na miembro kan agom kan Kordero. Mantang nasa daga pa sinda man nag-iinom kan probisyon nin Dios para sa buhay paagi ki Jesu-Cristo asin inaapod na “darakulang kahoy nin katanosan.” (Isaias 61:​1-3; Kapahayagan 21:6) Sinda nakapamunga na nin kadakol na bunga sa kaomawan ni Jehova. (Mateo 21:43) Asin sa Sangribong Taon na Paghade, magkakaigwa sinda nin kabtang sa pagpalakop kan mga probisyon kan pantubos na magseserbi para sa “pagpaomay sa mga nasyon” hale sa kasalan asin kagadanan.​—Ikomparar an 1 Juan 1:7.

Dai na Magkakaigwa nin Banggi

27. Ano pang orog na bendisyon an sinambit ni Juan para sa mga nagkapribilehiyo na lumaog sa Bagong Jerusalem, asin taano ta sinasabing “dai na magkakaigwa nin sumpa”?

²⁷ An paglaog sa Bagong Jerusalem​—sierto nanggad, na dai nang ibang mas pambihira pang pribilehiyo! Horophoropon sana​—idtong kan dati harababa, bakong sangkap na mga tawo masurunod ki Jesus sa langit tanganing magin kabtang kan siring kamuraway na areglo! (Juan 14:2) Tinawan kita ni Juan nin ideya manongod sa mga bendisyon na kakamtan kan mga ini, na sinasabing: “Asin dai na magkakaigwa nin sumpa. Kundi an trono nin Dios asin kan Kordero mamumugtak sa siudad, asin an saiyang mga oripon magdodolot saiya nin banal na paglilingkod; asin maheheling ninda an saiyang lalauogon, asin an saiyang ngaran mamumugtak sa saindang angog.” (Kapahayagan 22:​3, 4) Kan nagraot an pagkasaserdoteng Israelita, iyan isinumpa ni Jehova. (Malaquias 2:2) An daing pagtubod na “harong” kan Jerusalem ipinahayag ni Jesus na pinabayaan na. (Mateo 23:​37-39) Alagad sa Bagong Jerusalem, “dai na magkakaigwa nin sumpa.” (Ikomparar an Zacarias 14:11.) An gabos na nag-eerok dian binalo na sa kalayo nin pagbalo digdi sa daga, asin huling nagin mapanggana, sinda ‘magubing nin pagkadaing kalapaan asin pagkadaing kagadanan.’ Sa kamugtakan ninda, aram ni Jehova, kun paanong aram nia sa kamugtakan ni Jesus, na dai nanggad sinda masuway. (1 Corinto 15:​53, 57) Saro pa, “an trono nin Dios asin kan Kordero” magigin yaon duman, na nagpoprotehir sa kamugtakan kan siudad sa bilog na panahon na daing sagkod.

28. Taano an mga miembro kan Bagong Jerusalem ta nasusuratan kan ngaran nin Dios sa saindang angog, asin anong nakapupukaw sa boot na paglaom an nasa enotan ninda?

²⁸ Siring ki Juan mismo, an gabos na miembro sa ngapit kan langitnon na siudad na iyan “mga oripon” nin Dios. Bilang siring, prominenteng nasusurat sa saindang angog an ngaran nin Dios, na nagpapamidbid sa saiya bilang saindang Kagsadiri. (Kapahayagan 1:1; 3:12) Ibibilang ninda na daing kaagid na pribilehiyo an pagtao saiya nin banal na paglilingkod bilang kabtang kan Bagong Jerusalem. Mantang nasa daga si Jesus, itinao nia an nakapupukaw nin boot na panuga sa siring na mga tagapamahala sa ngapit, na sinasabi: “Maogma an mga malinig sa puso, huli ta maheheling ninda an Dios.” (Mateo 5:8) Kanigoan nanggad kaogma an mga oripon na ini na aktuwal na maheling asin sambahon nin personal si Jehova!

29. Taano ta sinabi ni Juan manongod sa langitnon na Bagong Jerusalem na “dai na magkakaigwa nin banggi”?

²⁹ Nagpadagos si Juan: “Siring man, dai na magkakaigwa nin banggi, asin dai na sinda magkakaipo nin liwanag nin ilaw ni liwanag nin aldaw, huli ta si Jehova magtatao sa sainda nin liwanag. (Kapahayagan 22:5a) An suanoy na Jerusalem, arog kan arin man na siudad sa daga, naglalaom sa aldaw para sa liwanag kun aldaw asin sa liwanag kan bulan asin sa artipisyal na liwanag kun banggi. Alagad sa langitnon na Bagong Jerusalem, an siring na liwanag dai na kaipuhan. An siudad paliliwanagon ni Jehova mismo. An “banggi” puwedeng gamiton man sa piguratibong pakahulogan, na nanonongod sa kasakitan o pagbulag ki Jehova. (Miqueas 3:6; Juan 9:4; Roma 13:​11, 12) Dai nanggad magkakaigwa kan klaseng iyan nin banggi sa mamuraway, maliwanag na presensia kan makakamhan sa gabos na Dios.

30. Paano tinapos ni Juan an mamuraway na bisyon, asin ano an sinisierto sato kan Kapahayagan?

³⁰ Tinatapos ni Juan ining mamuraway na bisyon sa pagsabi manongod sa mga oripon na ini nin Dios: “Asin sinda maghahade sagkod lamang.” (Kapahayagan 22:5b) Totoo, sa katapusan kan sangribong taon, an mga pakinabang kan pantubos iinaplikar nang lubos, asin iaatubang ni Jesus sa saiyang Ama an sinangkap nang rasa nin tawo. (1 Corinto 15:​25-28) Kun ano an nasa isip ni Jehova para ki Jesus asin sa 144,000 pakatapos kaiyan, dai niato aram. Alagad an Kapahayagan nagsisierto sato na an saindang pribilehiyong banal na paglilingkod ki Jehova magpapadagos sagkod lamang.

An Maogmang Kulminasyon kan Kapahayagan

31. (a) Anong kulminasyon an tinandaan kan bisyon kan Bagong Jerusalem? (b) Ano an ginibo kan Bagong Jerusalem para sa iba pang maimbod sa katawohan?

³¹ An kaotoban kan bisyon na ini kan Bagong Jerusalem, an nobya kan Kordero, iyo an maogmang kulminasyon na itinotokdo kan Kapahayagan, asin angay nanggad. An gabos na kapwa Kristiano ni Juan kan enot na siglo na sa sainda enot na ipinadara an libro naglaom sa paglaog sa siudad na iyan bilang inmortal na espiritung kairibang tagapamahala ni Jesu-Cristo. An natatada kan linahidan na mga Kristiano na buhay pa sa daga ngonyan may siring man na paglaom. Kaya an Kapahayagan nagpapadagos sa mamuraway na kulminasyon kaiyan, mantang an kompletong nobya nakikisumaro sa Kordero. Dangan, paagi sa Bagong Jerusalem, an mga pakinabang kan pantubos na atang ni Jesus iaaplikar sa katawohan, tanganing sa katapustapusi an gabos na maimbod magkaigwa nin buhay na daing katapusan. Sa paaging ini an nobya, an Bagong Jerusalem, bilang an maimbod na katabang kan saiyang Nobyong Hade, makikikabtang sa pagpatindog nin matanos na bagong kinaban para sa panahon na daing sagkod​—gabos sa kamurawayan kan satong Soberanong Kagurangnan na si Jehova.​—Mateo 20:28; Juan 10:​10, 16; Roma 16:27.

32, 33. Ano an nanodan niato sa Kapahayagan, asin ano an maninigo niatong magin odok sa boot na reaksion?

³² Kaya, kanigoan nanggad na kagayagayahan an namamatean niato, mantang kita nagtatapos na sa pagkonsiderar ta kan libro nin Kapahayagan! Naheling ta na an pangultimong mga paghingoa ni Satanas asin kan saiyang banhi biyo nanggad na nasudya asin an matanos na mga paghokom ni Jehova ginibo nin lubos. An Dakulang Babilonya siertong lalaglagon sagkod lamang, na susundan kan gabos pang ibang daing paglaom sa karatan na elemento kan kinaban ni Satanas. Si Satanas mismo asin an saiyang mga demonyo ihoholog sa bungaw dangan lalaglagon. An Bagong Jerusalem maghahade kaiba ni Cristo hale sa kalangitan mantang nagpapadagos an pagbuhay liwat asin an paghokom, asin an sinangkap na katawohan sa katapustapusi magkakaigwa nin buhay na daing katapusan sa Paraisong daga. Kanigoan nanggad kalinaw na ilinadawan kan Kapahayagan an gabos na bagay na ini! Kanigoan nanggad na panpakosog iyan sa satong determinasyon na ‘ipahayag an daing katapusan na maogmang baretang ini sa lambang nasyon asin tribo asin tataramon patin banwaan’ sa daga ngonyan! (Kapahayagan 14:​6, 7) Kamo daw mismo lubos na nagmamaigot sa dakulang gibohon na ini?

³³ Paagi sa satong puso na pano-pano nanggad nin pagpahalaga, tumao kita nin atension sa pantapos na mga tataramon kan Kapahayagan.

[Mga Nota sa Ibaba]