Taano ta Mapasensiang Marhay an Dios?
HELINGA an mamondong lauog nin nagugutom na aki. Helinga an saiyang maniwangon na hawak asin an saiyang butog na tulak. Isipa an makuri niang pangangaipo nin pagkakan, asin masdi an dara niang mangko na daing laog. Tibaad an saiyang ina nagmamasid na may sulnod na mga mata, na an lauog nia man mamondong ladawan nin kadaihan nin paglaom. Dangan probaran na pogolan an saindong kamondoan—iyo, asin pogolan an saindong luha.
An eksenang ini minilyon na beses na naootro sa 6 milyones na kilometro kuwadrado na hiwas kan nagugutom na lugar na inaapod Sahel. Iyan labing 4,800 kilometros kalaba sa Aprika sa timog kan Sahara Desert, hale sa Senegal sa may Baybayon Atlantiko sagkod sa Etiopia sa Dagat na Pula. Siyempre, namemeligro man sa gutom an dakol sa ibang nasyon. Ibinabareta kan World Health Organization na mga 1.1 mil milyones katawo sa palibot kan daga an magabat an helang o kulang nin sustansia.
Siyempre, an gutom saro sanang kabtang kan pagsakit nin tawo. Inaatian nin tawo an daga, asin kita gabos apektado. Inooyonan nin politikal na mga sistema an inhustisya asin guerra na nagtatao nin kasakitan asin kagadanan sa dakol. Taano ta itinotogot nin Dios an siring na mga bagay? May pagmakolog daw sia sa sato?
An Dios Tunay na May Pagmakolog!
An satong Kaglalang tunay na may pagmakolog sa sato. Kadakol na pruweba digdi asin sa saiyang kakayahan na papangyarihon na an mga bagay magtarabangan para sa satong ikararahay asin sa pagkaoroyon sa gabos niang linalang. Halimbawa, helinga an retrato digdi nin sarong sugod na minasongko sa sarong burak nin kahoy na namumunga. An sugod nagdedepende sa burak para sa tagok na kaipuhan kaiyan bilang pagkakan. An kahoy naman nagdedepende sa polen na dara kan hawak kan sugod hale sa kaagid na kahoy. Sa paaging ini, an burak napopolinisar tanganing mabilog an bunga. Bakong gabos na kahoy na namumunga napopolinisar sa paaging ini, alagad an Dios tunay na nag-areglo nin pambihirang kooperasyon sa bagay na ini. Asin an saiyang karahayan nagreresulta sa bunga na puwede niatong kakanon na may kaogmahan asin pakinabang.
An sugod mismo kabtang nin marahay an pagkaorganisar na bunyog nin labing 30,000 na sugod. An iba nagbabantay sa putyukan, mantang an iba man naglilinig o nagtatao nin bentilasyon dian. An iba man nagtitipon nin tagok asin polen, nagpapakakan sa mga ulalo, o naghahanap nin bagong mga makukuanan nin tagok. Inareglo mismo nin Dios an mga bagay tangani kitang makinabang kun an sibot na mga sugod na iyan naggigibo nin mahamis asin masustansiang tangguli na masiramon sa satong pagnamit.
An milagro nin kooperasyon sa pag-oltanan nin mga sugod asin tinanom saka sa tahaw nin mga insekto mismo saro sana sa dakol na pruweba na an Kaglalang may sangkap na kakayahan na papangyarihon na magtarabangan an mga nabubuhay na bagay. Manonongod dian, “an Dios sarong Dios, bakong nin karibarawan, kundi nin katoninongan.” (1 Corinto 14:33) Kun siring, taano ta tinogotan nia an katawohan na mabuhay sa siring na pagkariribok, na nagbubunga nin makuring kasakitan sa kadakol? Kun nagmamakolog sato an Dios, taano ta haloyon an saiyang paghalat na itanos an kamugtakan na ini? Tunay nanggad, taano ta mapasensiang marhay an Dios?
Sinisimbag kan Tataramon nin Dios, an Biblia, an siring na mga hapot. An pambihirang librong ini nagsasabi sato na si Jehova Dios nagin mapasensia huli sa marahay na dahelan. Ano an dahelan na iyan? Asin gurano pa an ilalawig kan pasensia nin Dios?
[Picture Credit Line sa pahina 2]
Cover photo: Frilet/Sipa