Maninigo daw Kamong Tumubod sa Trinidad?: Sambahon an Dios Sono sa Saiyang mga Kondisyon
1. Anong klaseng kaaraman an kaipuhan para sa buhay na daing katapusan?
SI Jesus nagsabi sa Dios sa pamibi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” (Juan 17:3) Anong klaseng kaaraman? “An kabotan [nin Dios] iyo na an gabos na klase nin tawo makaligtas asin makaabot sa tamang kaaraman kan katotoohan.” (1 Timoteo 2:4) Arog kaini an pagkatradusir kan Amplified Bible sa nahuhuring frase: “Maaraman nin eksakto asin tama an [banal na] Katotoohan.”
2. (a) Isabi kun arin an burabod kan katotoohan manongod sa Dios. (b) An pakaaram sa katotoohan makatatabang sato na malikayan an ano?
2 Kaya boot nin Dios na mamidbid niato sia asin an saiyang mga katuyohan nin tama, oyon sa banal na katotoohan. Asin an Tataramon nin Dios, an Banal na Biblia, iyo an burabod kan katotoohan na iyan. (Juan 17:17; 2 Timoteo 3:16, 17) Kun naaaraman nin tama nin mga tawo kun ano an sinasabi kan Biblia manongod sa Dios, malilikayan ninda an magin arog kan sinasabi sa Roma 10:2, 3, na igwa nin “kaigotan para sa Dios, alagad bakong oyon sa tamang kaaraman.” O, arog kan mga Samaritano, na sinabihan ni Jesus: “Kamo nagsasamba kaidtong dai nindo namimidbid.”—Juan 4:22.
3. Kun boot niatong kamtan an pag-oyon nin Dios, ano an kaipuhan na ihapot niato sa satong sadiri?
3 Kun siring, kun boot niatong kamtan an pag-oyon nin Dios, kaipuhan na ihapot niato sa satong sadiri: Ano an sinasabi nin Dios manongod sa saiyang sadiri? Paano nia gustong sambahon? Ano an saiyang mga katuyohan, asin paano kita maninigong makabagay dian? An tamang kaaraman sa katotoohan nagtatao sato kan tamang simbag sa siring na mga hapot. Sa siring masasamba niato an Dios sono sa saiyang mga kondisyon.
Naghahale nin Onra sa Dios
4. Paano an katokdoan sa Trinidad naghahale kan onra nin Dios?
4 “An nagtataong onra sa sako tatawan ko nin onra,” sabi nin Dios. (1 Samuel 2:30) Pagtao daw nin onra sa Dios an pag-apod sa siisay man na kapantay nia? Nagtatao daw nin onra sa saiya an pag-apod ki Maria na “ina nin Dios” asin “Mediadora . . . sa pag-oltanan kan Kaglalang asin kan Saiyang mga linalang,” arog kan ginigibo kan New Catholic Encyclopedia? Dai, an mga ideyang iyan insulto sa Dios. Mayo siang kapantay; ni nagkaigwa man sia nin ina sa laman, ta si Jesus bakong Dios. Asin mayo nin “Mediadora,” ta an Dios nagnombra sana nin “sarong tagapag-oltanan sa tahaw nin Dios asin nin mga tawo,” si Jesus.—1 Timoteo 2:5; 1 Juan 2:1, 2.
5. Ano an ibinunga kan katokdoan sa Trinidad?
5 Daing duwa-duwa, an doktrina nin Trinidad nakaribaraw asin nakapalibog sa pagsabot nin mga tawo sa tunay na kamugtakan nin Dios. Inoolang kaiyan an mga tawo sa pakamidbid nin tama sa Unibersal na Soberano, si Jehova Dios, asin sa pagsamba sa saiya sono sa saiyang mga kondisyon. Arog kan sabi kan teologong si Hans Küng: “Taano ta bobooton nin siisay man na dagdagan an pagigin saro asin nasosolo nin Dios na daing ibang magigibo kundi palibogon o halean nin halaga an pagigin saro asin pagigin nasosolong iyan?” Alagad ta iyan an ginibo kan pagtubod sa Trinidad.
6. Kun an mga tawo dai inaako an Dios sa “tamang kaaraman,” anong gibo an minasunod?
6 An mga nagtutubod sa Trinidad dai ‘inaako an Dios sa tamang kaaraman.’ (Roma 1:28) An bersikulong iyan nagsasabi man: “Pinabayaan sinda nin Dios sa kaisipan na dai inooyonan, tanganing gumibo kan mga bagay na bakong maninigo.” Ilinilista kan bersikulo 29 sagkod 31 an pira sa “bakong maninigong” mga bagay na iyan, arog baga kan ‘paggadan, iriwal, paglapas sa mga tipan, pagigin mayong pagkamoot, mayong pagkaherak.’ An mismong mga bagay na iyan ginibo nin mga relihiyon na naniniwala sa Trinidad.
7. Paano an Dios hinalean nin onra nin mga Trinitaryo?
7 Halimbawa, an mga Trinitaryo sa parate pinaglamag asin ginadan pa ngani an mga nagsikwal sa doktrina nin Trinidad. Asin labi pa dian an ginibo ninda. Ginadan ninda an mga kapwa ninda Trinitaryo sa panahon nin guerra. Ano an malabi pang “bakong maninigo” kisa paggadan nin Katoliko sa Katoliko, paggadan nin Ortodokso sa Ortodokso, paggadan nin Protestante sa Protestante—gabos sa ngaran kan iyo man sanang Trinitaryong Dios?
8. Paano ipinamimidbid kan Tataramon nin Dios an mga igwa kan katotoohan asin an mga mayo kaiyan?
8 Pero malinaw na sinabi ni Jesus: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) Orog pa ining liniliwanag kan Tataramon nin Dios, na an sabi: “An mga aki nin Dios asin an mga aki kan Diablo namimidbid sa bagay na ini: An gabos na dai naggigibo nin katanosan bakong gikan sa Dios, ni an saro na dai namomoot sa saiyang tugang.” Ibinabaing kaiyan an mga ginagadan an saindang espirituwal na tugang ki “Cain, na naggikan sa maraot [si Satanas] asin guminadan sa saiyang tugang.”—1 Juan 3:10-12.
9. Ano an isinabi nin sarong teologong Danes manongod sa Kakristianohan?
9 Kaya, an pagtotokdo nin nakariribong na mga doktrina manongod sa Dios nagbunga nin mga gibo na naglalapas sa saiyang mga pagboot. Tunay nanggad, an nangyari sa bilog na Kakristianohan arog kan ilinadawan kan teologong Danes na si Søren Kierkegaard: “An Kakristianohan hinale an Kristianismo na dai nia naririsa.”
10. Paano ikalaladawan an espirituwal na kamugtakan nin Kakristianohan?
10 An espirituwal na kamugtakan nin Kakristianohan tama sa isinurat ni apostol Pablo: “Sinda nagpapahayag na midbid ninda an Dios, alagad ta sinda nagpapainda sa saiya paagi sa saindang mga gibo, huli ta sinda makababalde asin masumbikal patin bakong aprobado para sa ano man na marahay na gibo.”—Tito 1:16.
11. Paano hohokoman an Kakristianohan sa dai na mahahaloy, asin taano?
11 Sa dai na mahahaloy, kun tapuson na nin Dios an presenteng maraot na palakaw na ini nin mga bagay, an Trinitaryong Kakristianohan papaninimbagon. Asin sia sisilotan huli sa saiyang mga gibo asin doktrina na naghahale nin onra sa Dios.—Mateo 24:14, 34; 25:31-34, 41, 46; Kapahayagan 17:1-6, 16; 18:1-8, 20, 24; 19:17-21.
Isikwal an Trinidad
12. Taano ta maninigo niatong isikwal an Trinidad?
12 Dai puwedeng ikompromiso an mga katotoohan nin Dios. Kaya, an pagsamba sa Dios sono sa saiyang mga kondisyon nangangahulogan nin pagsikwal sa doktrina nin Trinidad. Iyan kontra sa tinubod asin itinokdo kan mga propeta, ni Jesus, kan mga apostol, asin kan enot na mga Kristiano. Kontra iyan sa sinasabi nin Dios manongod sa saiyang sadiri sa saiyang ipinasabong na Tataramon. Kaya, sia nagsasadol: “Midbida nindo na ako sana an Dios asin na mayo nin ibang arog ko.”—Isaias 46:9, TEV.
13. Siisay an napakakarhay kan katokdoan sa Trinidad?
13 Dai napakakarhay an Dios sa paggibo saiya na nakariribong asin misteryoso. Imbes, mientras na nariribong an mga tawo manongod sa Dios asin sa saiyang mga katuyohan, mas gusto man iyan kan Kaiwal nin Dios, si Satanas na Diablo, an ‘dios kan kinaban na ini.’ Sia an nagpapalakop kan falsong mga doktrinang iyan tanganing ‘butahon an isip nin mga dai nagtutubod.’ (2 Corinto 4:4) Asin an doktrina nin Trinidad nakapararahay man sa mga klerigo na gustong magdanay an saindang impluwensia sa mga tawo, ta pinalalataw ninda na mga teologo sana an nakasasabot kaiyan.—Helingon an Juan 8:44.
14. Taano an tamang kaaraman sa Dios ta nagtatao nin dakulang kaginhawahan?
14 An tamang kaaraman sa Dios nagtatao nin dakulang kaginhawahan. Kinakalda kita kaiyan sa mga katokdoan na kontra sa Tataramon nin Dios asin sa mga organisasyon na nag-apostata. Arog kan sabi ni Jesus: “Mamimidbid nindo an katotoohan, asin bubutasan kamo kan katotoohan.”—Juan 8:32.
15. Ano an napakahalaga niatong dahelan sa pagtaong onra sa Dios?
15 Paagi sa pagtaong onra sa Dios bilang supremo asin pagsamba sa saiya sono sa saiyang mga kondisyon, malilikayan niato an paghokom na madali na niang itao sa apostatang Kakristianohan. Imbes, makalalaom kita sa pag-oyon nin Dios kun matapos na an palakaw na ini: “An kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.”—1 Juan 2:17.