Pag-apresyar sa Mahalagang Balaog na Buhay

BUHAY​—kanigoan kahalagang rogaring! Kun mayo iyan mayo kita nin magiginibo. Oras na iyan mawara, dai iyan ikababalik nin ano man na paagi nin tawo. Kun nanganganib an satong buhay, ginigibo niato an gabos na mapupuwede tanganing maingatan iyan. Tara, an iba mahagad pa ngani nin mas halangkaw sa tawong tabang kun nasa kasakitan!

Ipinagigirumdom kaini an tala sa Biblia manongod sa sarong barko na inabot nin makosog na bagyo sa dagat. Kan iyan madali nang malunod, “an mga marinero nagpoon na matakot asin umapod nin tabang, an kada saro sa saiyang dios.” Kan huri, sinda gabos nag-arang sa tunay na Dios: “A, ngonyan, O Jehova, kami logod, tabi, dai mapara.” Sinasabi man kan tala sa Biblia: “Inapon ninda sa dagat an mga kasangkapan na yaon sa barko, tanganing iyan gumian dian.”​—Jonas 1:​4-6, 14; ikomparar an Gibo 27:​18, 19.

An mga marinerong idto andam ngani na isakripisyo an iniingatan na materyal na mga rogaring sa paghihingoa na maingatan an saindang buhay. Masasalidahan niato an materyal na mga rogaring​—pero an buhay dai. Asin huling kanaturalan niato na padangaton an satong buhay, natatakot kita sa peligro. Satuyang pinakakakan, ginugubingan, asin inaataman an satong hawak. Nagpapabolong kita kun kita naghehelang.

Minsan siring, an hinahagad sato kan Kagtao nin buhay bako sanang pagsunod sa satong mga kanaturalan na ingatan an sadiri. Total, an buhay balaog na daing kaagid sa halaga, asin iyan gikan sa pinakamahalagang Persona sa bilog na uniberso. Huli sa odok na pag-apresyar sa Kagtao asin sa balaog, bako daw na maninigo niatong padangaton an buhay? Asin bako daw na kaiba dian an pagpahalaga sa buhay nin iba?

Kaya dai niato maninigong ipagngalas na an Pagboot na itinao ni Jehova Dios sa nasyon nin Israel may kaibang mga togon na may katuyohan na protehiran an buhay asin salud nin iba. (Exodo 21:29; Deuteronomio 22:8) An mga Kristiano ngonyan maninigo man na magin mapaggirumdom sa kaligtasan. Halimbawa, kun kamo may mga aki sa harong, kamo daw daing pagmamaan na nagwawalat sa mga lugar na madaling maabot nin mga bagay na arog baga nin mga butones, alpiler, o matatarom na bagay na makadadanyos nin grabe sa sarong aki na inosenteng kinakawatan o hinahalon iyan? Nasasaray daw an peligrosong mga kemikal asin bolong sa dai maaabot nin mga aki? Kun may naulang tubig sa salog, listo daw kamong linigon iyan tanganing malikayan an aksidente? Inaasikaso daw nindong mahirahay tolos an may diperensiang mga kasangkapan na de koryente? Regular daw an mantension sa saindong sasakyan? Kamo daw maingat na drayber? Kun kamo talagang nag-aapresyar sa kahalagahan nin buhay, mapahihiro kamong gumibo nin rasonableng mga pagmamaan digdi asin sa kaagid na mga bagay.

Alagad ta makamomondo, an iba dai pinahahalagahan pati an sadiri nindang buhay. Halimbawa, siisay an dai nakaaaram ngonyan na an pagsisigarilyo maraot sa salud? Pero, minilyon an oripon kan bisyong iyan, mantang nagluluya an saindang salud sa kada supsup ninda sa nakaiilong aso. An iba ginagamit sa sala an droga, asin an iba man an inomon na de alkohol, gabos sa ikararaot ninda. An AIDS helang na nakagagadan na mayo nin aram na bolong. Alagad ta an dakol nakalikay kutanang magkahelang kaiyan kun saindang isinikwal an seksuwal na inmoralidad, an nagkapirang klase nin salang paggamit sa droga, asin pagpasalin nin dugo. Kanigoan kamakaturotristeng kadaihan nin pag-apresyar sa buhay!​—Roma 1:​26, 27; 2 Corinto 7:1.

Posible an Pagbakle!

An mga inaapresyar an saindang Kaharohalangkaweng Kaglalang, si Jehova, may makosog na dahelan na ibilang na mahalaga an buhay. An buhay saiyang banal na balaog. Kaya andam sindang gibohon an ano man na pagbakleng kaipuhan tanganing matratar iyan na banal na balaog. Helinga an eksperyensia ni Kwaku, sarong maestro sa Ghana. Sarong ragap na buratsero, sinasayang nia an saiyang buhay.

Nagigirumdoman ni Kwaku: “Prinobaran kong piriton an sakong agom na igalang ako, na sa parate minasagkod sa mainit na diskutiran asin iriwal, nangorogna kun burat ako. Huli sa pagpalabilabi sa alkohol, parate akong daing kuwarta, asin parate akong nagkukulang sa pagtagama nin kuwarta na sustento sa pamilya. Siyempre, ini ipinag-iinit na marhay kan payo kan sakong agom. Kun nauubosan ako nin kuwarta (asin ini parateng marhay na mangyari), ginigibo ko an ano man na makakaya ko tanganing masustentohan an bisyo ko. Sarong beses ginamit ko pa para sa personal an kuwartang kinolekta ko sa sakong mga eskuwela sa katuyohan na iparehistro sinda para sa pampublikong eksaminasyon. Nag-inom ako asin nanlibre man sa mga kainoman ko. Dai nahaloy inabotan ako kan panahon nin pagbabayad. Kun bakong huli sa napapanahon na pakikilabot kan sakong prinsipal, nawaran kutana ako nin trabaho.

“Maraoton an buhay ko. Nasosopog ako, pero dai nahaloy nahale ko iyan. Dangan nagpoon akong tuboan nin kaisipan na maghugot ta an pagmate ko bigo ako sa buhay. Pero, dai pa man giraray ako nakapopondo sa pag-inom. Alagad ta kan sarong aldaw sa sarong inoman napalabot ako sa iriwal nin mga burat asin nasaksak, narealisar ko na maabot an aldaw na mawawara an buhay ko huli sa pagkamoot ko sa alkohol.

“Kan panahon na idto, an mga Saksi ni Jehova minasongko sa harong mi sa panapanahon, na hinihingoang pukawon an interes mi sa Biblia. Kami mag-agom perming nagdudulag sainda ta an paghona mi istorbo sinda. Alagad ta sarong beses, nagdesisyon akong hinanyogon sinda huli sa simpatiya. Dai nahaloy an sakong mga mata binukasan nin pag-adal sa Biblia sa makangangalas na paglaom na mabuhay sagkod lamang sa bagong palakaw nin Dios. Mientras na orog akong nag-aadal sa Biblia sa tabang kan mga Saksi ni Jehova, orog man na minararom an pag-apresyar ko ki Jehova bilang satong Paratao nin Buhay asin sa saiyang balaog na buhay, asin orog kong hinangaan an pagigin praktikal kan hatol kan Biblia. Ini nakadagka pa sako na linigan an buhay ko. Ini bakong pasil, ta kaipuhan na padagos kong paglabanan an arak saka an mga dati kong kairiba. Si Jehova, an Paradangog sa pamibi, naheling an determinasyon sa sakong puso asin dinangog ako.a

“An agom ko, minsan ngani bakong Saksi ni Jehova, ngonyan iginagalang na ako asin an relihiyon ko huli sa dakulang pagbakle na namasdan nia sa buhay ko asin sa relasyon mi mag-agom. An samong kataraed dai na kaipuhan na mangoltanan sa mga pag-iiwal mi mag-agom. Namomotan ko an katoninongan nin isip na nakakamtan ko ngonyan. Tunay na an pag-apresyar ki Jehova Dios bilang satong Paratao nin Buhay, na inaarog an saiyang punto-de-vista sa kahalagahan nin buhay, asin kinukuyog an saiyang mga instruksion sa kun paano mamumuhay iyo an solamenteng kapakipakinabang na dalan nin buhay.”

An Alok nin Dios na Buhay na Daing Sagkod

An rinibo, kapareho ni Kwaku, natabangan kan mga Saksi ni Jehova na “magsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.” (Efe. 4:24) Inapresyar ninda bako sanang an presente nindang buhay kundi pati an paglaom na buhay na daing sagkod sa sarong daganon na paraiso. Ipinanunuga kan Biblia na sa Paraisong iyan na gigibohon nin Dios, mayo nin nag-eerok sa daga na makamamate liwat kan dai nahahaleng gutom, ta “si Jehova kan mga hukbo magibo para sa gabos na banwaan . . . nin bangkete nin matatabang putahe.”​—Isaias 25:6.

Sa presente, an buhay, minsan ngani makangangalas na balaog, temporaryo sana. An gabos napaaatubang sa kagadanan, asin kanigoan kakolog an kagadanan! Masakit nanggad na maheling an saro na saindong namomotan na mawara sa kaibanan nin mga buhay pasiring sa malipot na lolobngan. Alagad sa pagsakop kan Kahadean nin Dios, na pinaghahadean ni Cristo, maootob an panuga ni Jehova: “An kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”​—Kapahayagan 21:4.

Sa panahon na iyan an balaog na buhay itatao sa makangangalas na paagi. An mga nakaligtas sa ultimong kahorasaan sa dagang ini magkakaoportunidad na lumaog sa lubos na buhay. Dangan, paagi sa pagbuhay liwat, pagbabalik sa buhay, ibabalik ni Jehova Dios an saiyang daing kaagid sa halagang balaog sa mga natotorog sa kagadanan. (Juan 5:​24, 28, 29) Ini mangangahulogan kan pagbuwelta nin gadan nang mga namomotan asin matatakton sa Dios na mga tawo kan suanoy!

Ini daw gabos sobra karahay tanganing magin totoo? Bako, ta “sa Dios mayo nin tataramon na imposible.”​—Lucas 1:37; ikomparar an Job 42:2.

Dugang pa, si Jehova Dios mismo nagtao sa katawohan nin garantiya na ini gabos mangyayari. Paano? Paagi sa pag-atang kan pinakapadangat kan saiyang puso, an saiyang namomotan na Aki, si Jesu-Cristo, tanganing tubuson kita sa kasalan asin kagadanan. Sinisierto sato kan Roma 8:32: “Sia [si Jehova Dios] na minsan an saiya mismong Aki dai ilinikay kundi itinao sia dahel sa sato gabos, tadaw ta dai man sia maboot na magtatao sa sato kan gabos na iba pang bagay kaiba nia?” Sinasabi sato kan Biblia na kaiba digdi an paghale sa tawo kan moral na kalapaan asin pagpara sa gabos na klase nin inhustisya, krimen, asin kadahasan. (Isaias 11:9) An buhay nungka pang ibibilang na daing halaga.

Minsan ngonyan, sa bakong sangkap na mga kamugtakan, puwedeng magin maogmahon an buhay. Siisay an dai nawiwili sa nakagugutom na hamot nin kakanon, sa huyop-huyop nin doros sa mahanglas na aldaw, sa pagheling sa mamuraway na bukid, magayon na pagsolnop nin aldaw, toninong an sulog na sapa, makolor na mga burak, sa tanog nin magayon an tonong musika, o awit nin mga gamgam? Pondo nin kadikit. Isipa, gurano daw kasiram na kamtan an siring na mga bagay sagkod lamang?

Kun siring, rasonable daw na iapon an mahalagang pribilehiyo na mabuhay sagkod lamang huli sa ano man na temporaryong kasiraman na tibaad itao nin rungaw, mapagpanigo sa sadiring pamumuhay? (Ikomparar an Hebreo 11:25.) Madonong na nagsasadol sato an Biblia ‘na mamuhay sa natatada pa niatong buhay, bako nang huli sa mga horot nin tawo, kundi huli sa kabotan nin Dios.’ (1 Pedro 4:2) Kami odok na nagdadagka sa saindo, iyo, nagsasadol saindo, na gibohon iyan paagi sa pag-adal sa Tataramon nin Dios, an Biblia, asin paggibo kan saindong nanonodan. (Juan 13:17) Sa siring magkakaigwa kamo nin marahay na relasyon ki Jehova, an Dios na nagsusulwak an karahayan asin pagkaherak, na makababalos saindo nin buhay na daing sagkod!

[Nota sa Ibaba]

[Ritrato sa pahina 5]

An saindo daw na pamumuhay nagpaparisa nin pag-apresyar sa buhay?

[Ritrato sa pahina 7]

An bagong kinaban nin Dios matogot sato na kamtan sagkod lamang an mga kasiraman sa buhay!