Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 3: Mga Bagay na Kaipuhan na Mangyari sa Dai Na Mahahaloy
9. (a) Kapareho ni Juan, anong kaisipan an ipinaheling kan grupong Juan? (b) Paano itinotokdo sato ni Juan kun paano magigin maogma?
9 Si Juan maimbod sa pagpatotoo sa mensahe na itinao sa saiya nin Dios paagi ki Jesu-Cristo. Isinaysay nia nin detalyado an “gabos na bagay na saiyang naheling.” An grupong Juan maigot na naghagad nin giya sa Dios asin ki Jesu-Cristo tanganing lubos na masabotan an hula asin ipahayag sa banwaan nin Dios an marahay na mga punto kaiyan. Para sa kapakinabangan kan linahidan na kongregasyon (asin pati kan internasyonal na dakulang kadaklan na iingatan nin Dios na buhay sa dakulang kahorasaan), si Juan nagsurat: “Maogma an nagbabasa nin makosog asin nagdadangog sa mga tataramon kan hulang ini, asin an nagkukuyog sa mga bagay na nasusurat dian; huli ta harani na an itinalaan na panahon.”—Kapahayagan 1:3.
10. Ano an dapat niatong gibohon mapadapit sa Kapahayagan tanganing magkamit nin kaogmahan?
10 Makikinabang kamo nin dakula sa pagbasa sa Kapahayagan asin orog na sa pagkuyog sa mga nasusurat dian. Ipinaliwanag ni Juan sa saro kan saiyang mga surat: “Ini iyo an boot sabihon kan pagkamoot sa Dios, na kuyogon niato an saiyang mga kapagbootan; asin an saiyang mga kapagbootan bakong magabat, huli ta an gabos na namundag gikan sa Dios nakadadaog sa kinaban. Asin ini an kapangganahan na nakadaog sa kinaban, an satong pagtubod.” (1 Juan 5:3, 4) Puwede kamong maogma nin labi-labi paagi sa pagkaigwa nin siring na pagtubod!
11. (a) Taano ta napakahalaga na kuyogon niato an mga tataramon kan hula? (b) Anong panahon an seguradong haranihon na ngonyan?
11 Napakahalaga na kuyogon niato an mga tataramon kan hula, “huli ta harani na an itinalaan na panahon.” An itinalaan na panahon para sa ano? Para sa kaotoban kan mga hula sa Kapahayagan, kaiba an mga paghokom nin Dios. Harani na an panahon na hokoman nin ultimo nin Dios asin ni Jesu-Cristo an palakaw sa kinaban ni Satanas. Kan si Jesus yaon digdi sa daga, sinabi nia na solamente an saiyang Ama an nakaaaram “sa aldaw na iyan o sa oras” na iyan. Sa pagtanaw sa mga kariribokan na nagdakol sa daga magpoon kan Guerra Mundial I, sinabi man ni Jesus: “An kapag-arakian na ini dai malihis sagkod na mangyari an gabos na bagay na ini.” Kaya an itinalaan na panahon para sa pagpaotob sa desisyon nin Dios seguradong haranihon na. (Marcos 13:8, 30-32) Arog kan sabi kan Habacuc 2:3: “An bisyon para sa itinalaan na panahon pa, asin padagos iyan na maghihidali sagkod sa katapusan, asin dai iyan magpuputik. Minsan pa iyan maatraso, padagos iyan na halaton; huli ta sierto nanggad na iyan maootob. Dai iyan mahuhuri.” An kaligtasan niato sa dakulang kahorasaan depende sa satong pagkuyog sa makahulang Tataramon nin Dios.—Mateo 24:20-22.