Kapahayagan—An Mamuraway na Kulminasyon Kaiyan Harani Na
Kapitulo 4: Si Jesus Nagdatong na May Pagpakosog
1. Siisay ngonyan an sinusuratan ni Juan, asin siisay ngonyan an maninigong mawili sa saiyang mensahe?
An suminunod maninigong magin kawiliwili sa gabos na kaiba sa mga kongregasyon kan banwaan nin Dios ngonyan. Uya an sarong serye nin mga mensahe. An mga iyan may partikular na aplikasyon mantang nagrarani an “itinalaan na panahon.” (Kapahayagan 1:3) Para sa satong daing katapusan na pakinabang na kuyogon niato an mga kapahayagan na iyan. An rekord nagsasabi: “Si Juan sa pitong kongregasyon na yaon sa distrito nin Asia: Mapasaindo logod an dai na kutana maninigong kabootan asin katoninongan hale sa ‘Saro na iyo ngonyan asin iyo kaidto patin iyo an madatong,’ asin hale sa pitong espiritu na nasa atubangan kan saiyang trono, asin hale ki Jesu-Cristo.”—Kapahayagan 1:4, 5a.
2. (a) Ano an kahulogan kan bilang na “pito”? (b) Sa aldaw kan Kagurangnan, kiisay minaaplikar an mga mensahe sa “pitong kongregasyon”?
2 Digdi kinakaolay ni Juan an “pitong kongregasyon,” asin an mga ini nginangaranan para sa sato sa huring kabtang kan hula. An bilang na iyan, “pito,” parateng inootro sa Kapahayagan. Iyan nangangahulogan nin pagkakompleto, nangorogna may koneksion sa mga bagay nin Dios asin sa saiyang linahidan na kongregasyon. Mantang an kabilangan kan mga kongregasyon sa banwaan nin Dios sa bilog na kinaban nagin nang manampulong ribo sa panahon kan aldaw kan Kagurangnan, masisierto niato na an sinasabi sa pangenot sa “pitong kongregasyon” nin mga linahidan aplikado man sa bilog na banwaan nin Dios ngonyan. (Kapahayagan 1:10) Iyo, si Juan may mahalagang mensahe para sa gabos na kongregasyon nin mga Saksi ni Jehova asin sa gabos na kaiba dian, sa gabos na lugar sa ibabaw kan dagang ini.
3. (a) Sa pataratara ni Juan, saen naghahale an “dai na kutana maninigong kabootan asin katoninongan”? (b) Anong mga tataramon ni apostol Pablo an nakaaagid sa pataratara ni Juan?
3 “Dai na kutana maninigong kabootan asin katoninongan”—marahayon nanggad ini asin nangorogna kun inaapresyar niato an ginikanan kaiyan! An “Saro” na ginigikanan kaiyan iyo an Soberanong Kagurangnan na Jehova mismo, an “Hade na dai nin katapusan,” na nabubuhay “poon sa panahon na daing katapusan sagkod sa panahon na daing katapusan.” (1 Timoteo 1:17; Salmo 90:2) Napapalabot man digdi an “pitong espiritu,” termino na nagpaparisa kan kalubosan kan paghiro kan puwersa aktiba nin Dios, o banal na espiritu, sa pagtao kaiyan nin pakasabot asin bendisyon sa gabos na naghihinanyog sa hula. May pangenot man na kabtang si “Jesu-Cristo,” na manongod sa saiya si Juan nagsurat: “Sia pano nin dai na kutana maninigong kabootan asin katotoohan.” (Juan 1:14) Kaya, an pataratara ni Juan may mga elemento na kapareho kan sinabi ni apostol Pablo sa pagtatapos kan saiyang ikaduwang surat sa kongregasyon sa Corinto: “An dai na kutana maninigong kabootan kan Kagurangnan na Jesu-Cristo asin kan pagkamoot nin Dios patin an pakisumaro sa banal na espiritu mapasaindo logod gabos.” (2 Corinto 13:14) An mga tataramon na iyan umaplikar man logod sa lambang saro sa sato na namomoot sa katotoohan ngonyan!—Salmo 119:97.
“An Maimbod na Saksi”
4. Paano ilinadawan ni Juan si Jesu-Cristo, asin taano ta angay na gayo an mga paglaladawan na ini?
4 Ikaduwa ki Jehova, si Jesus an pinakamamuraway na persona sa uniberso, siring sa minimidbid ni Juan, na inaapod siang “ ‘an Maimbod na Saksi,’ ‘An panganay sa mga gadan,’ asin ‘An Poon kan mga hade kan daga.’ ” (Kapahayagan 1:5b) Kapareho kan bulan sa kalangitan, sia marigon na namumugtak bilang an pinakadakulang Saksi sa pagka-Dios ni Jehova. (Salmo 89:37) Pakatapos na sia magdanay sa integridad sagkod sa kagadanan bilang atang, sia an enot sa mga tawo na binuhay liwat sa inmortal na espiritung buhay. (Colosas 1:18) Ngonyan nasa presensia ni Jehova, sia ilinangkaw sa gabos na daganon na hade, na tinawan kan “gabos na kapangyarihan sa langit asin sa daga.” (Mateo 28:18; Salmo 89:27; 1 Timoteo 6:15) Kan 1914 sia ibinugtak na Hade tanganing magsakop sa tahaw kan daganon na mga nasyon.—Salmo 2:6-9; Mateo 25:31-33.
5. (a) Paano ipinagpadagos ni Juan an pagpahayag nin pag-apresyar sa Kagurangnan na Jesu-Cristo? (b) Siisay an nakikinabang sa pagregalo ni Jesus kan saiyang sangkap na buhay na tawo, asin paano an linahidan na mga Kristiano nakikabtang sa espesyal na bendisyon?
5 Ipinagpadagos ni Juan an pagpahayag nin pag-apresyar sa Kagurangnan na Jesu-Cristo sa magayonon na mga tataramon na ini: “Mapasasaiya na namomoot sa sato asin nagtao sa sato nin katalingkasan hale sa satong mga kasalan paagi sa saiyang sadiring dugo—asin ginibo nia kitang magin sarong kahadean, mga saserdote sa saiyang Dios asin Ama—iyo, mapasasaiya logod an kamurawayan asin an kakosogan sagkod lamang. Amen.” (Kapahayagan 1:5c, 6) Itinao ni Jesus an saiyang sangkap na buhay na tawo tanganing an mga nasa kinaban nin katawohan na tumubod sa saiya makabalik sa sangkap na buhay. Kamo, namomotan ming parabasa, puwedeng makaiba digdi! (Juan 3:16) Alagad an kagadanan ni Jesus bilang atang nagbukas kan dalan para sa sarong espesyal na bendisyon sa mga nagigin linahidan na Kristiano kapareho ni Juan. An mga ini ipinahayag na matanos basado sa pantubos na atang ni Jesus. Tinatalikdan an gabos na paglaom sa daganon na buhay, arog kan ginibo ni Jesus, an mga kaiba sa sadangoton na aripompon pinaniaki kan espiritu nin Dios, na may paglaom na buhayon liwat tanganing maglingkod bilang mga hade asin saserdote kaiba ni Jesu-Cristo sa saiyang Kahadean. (Lucas 12:32; Roma 8:18; 1 Pedro 2:5; Kapahayagan 20:6) Kanigoan kadakulang pribilehiyo! Bakong makangangalas na positibong gayong ipinahayag ni Juan na an kamurawayan asin kakosogan yaon ki Jesus!
“MadatongKaiba kan mga Panganoron”
6. (a) Ano an ipinaisi ni Juan manongod sa pagdatong ni Jesus “kaiba kan mga panganoron,” asin anong hula ni Jesus an tibaad nagirumdoman ni Juan? (b) Paano ‘madatong’ si Jesus, asin siisay an makamamate nin makuring kamondoan sa daga?
6 Sumunod, ogmahon na ipinaisi ni Juan: “Uya! Sia madatong kaiba kan mga panganoron, asin an gabos na mata makaheheling sa saiya, asin an mga suminaksak sa saiya; asin an gabos na tribo sa daga magmomorondo nin labi-labi huli sa saiya. Iyo, Amen.” (Kapahayagan 1:7) Sierto na nagirumdoman digdi ni Juan an naenot na hula ni Jesus manongod sa pagtatapos kan palakaw nin mga bagay. Dian si Jesus nagsabi: “Dangan an tanda kan Aki nin tawo malataw sa langit, asin an gabos na tribo kan daga mananangis, asin maheheling ninda an Aki nin tawo na nagdadangadang sa mga panganoron nin langit na may kapangyarihan asin dakulang kamurawayan.” (Mateo 24:3, 30) Kaya, si Jesus ‘madatong’ paagi sa pagtao kan saiyang atension sa paggibo kan mga paghokom ni Jehova sa mga nasyon. Ini magbubunga nin mahahalagang pagkaliwat sa daga, asin mantang “an gabos na tribo sa daga” dai nagmangno sa katunayan kan pagkahade ni Jesus, mananamitan nanggad ninda an “kaanggotan kan kabangisan nin Dios na Makakamhan sa gabos.”—Kapahayagan 19:11-21; Salmo 2:2, 3, 8, 9.
7. Paano an “gabos na mata,” pati an sa mga masumbikal, “makaheheling” ki Jesus?
7 Kaidtong huring banggi ni Jesus kaiba kan saiyang mga disipulo, sinabihan nia sinda: “Kadikit pang panahon asin an kinaban dai na makaheheling sa sako.” (Juan 14:19) Kun siring, paano na “an gabos na mata makaheheling sa saiya”? Dai niato maninigong laoman na an mga kaiwal ni Jesus makaheheling sa saiya sa pisikal na mga mata, ta sinabi ni apostol Pablo, pagkasakat ni Jesus sa langit, na si Jesus ngonyan “nag-eerok sa liwanag na dai maranihan,” asin “sa saiya mayo ni saro sa mga tawo na nakaheling o makaheheling.” (1 Timoteo 6:16) Malinaw na an boot sabihon ni Juan sa “makaheheling” sa sentido na “makamansay,” kun paanong satuyang naheheling, o namamansayan, an dai naheheling na mga kuwalidad nin Dios paagi sa saiyang mga linalang. (Roma 1:20) Si Jesus “madatong kaiba kan mga panganoron” ta sia dai maheheling kan literal na mata arog kan aldaw kun iyan nasa likod nin panganoron. Dawa kun an aldaw natatago sa mga panganoron sa bilog na aldaw, aram niato na iyan yaon huli sa liwanag na nasa palibot niato. Kapareho kaiyan, minsan ngani an Kagurangnan na Jesus dai naheheling, sia mahahayag na siring sa ‘naglalaad na kalayo, kun sia mamalos na sa mga dai nagkukuyog kan maogmang bareta manongod sa saiya.’ An mga ini man mapipiritan na ‘makaheling sa saiya.’—2 Tesalonica 1:6-8; 2:8.
8. (a) Sairisay an “mga suminaksak sa saiya” kan 33 C.E., asin sairisay sinda ngonyan? (b) Mantang si Jesus mayo na digdi sa daga, paano sia ‘masasaksak’ nin mga tawo?
8 Si Jesus ‘maheheling’ man kan “mga suminaksak sa saiya.” Sairisay daw ini? Kan si Jesus gadanon kan 33 C.E., sia literal na sinaksak kan mga soldados na Romano. An mga Judio may kabtang sa kasalan sa paggadan na idto, ta sinabihan ni Pedro an nagkapira sa sainda kan Pentecostes: “Ginibo sia nin Dios na magin Kagurangnan asin Cristo, an Jesus na ini na saindong ipinako.” (Gibo 2:5-11, 36; ikomparar an Zacarias 12:10; Juan 19:37.) An mga Romano asin Judiong idto haros 2,000 na taon nang gadan. Kaya an mga “suminaksak sa saiya” ngonyan seguradong nagrerepresentar sa mga nasyon asin banwaan na nagpapaheling kan may pagkaongis na gawe na arog kan ipinaheling kan ipako si Jesus. Si Jesus mayo na digdi sa daga. Alagad kun an mga nagtutumang magsalang aktibong naglalamag sa mga Saksi ni Jehova, na nagpapatotoo ki Jesus, o daing girong na nagkokonsinte sa siring na tratamiento, garo man sana ‘sinasaksak’ si Jesus mismo kan mga nagtutumang na iyan.—Mateo 25:33, 41-46.
“An Alfa Asin an Omega”
9. (a) Siisay ngonyan an nagtaram, asin pirang beses nia iyan ginibo sa Kapahayagan? (b) Sa pag-apod ni Jehova sa saiyang sadiri na “an Alfa asin an Omega” asin “an Makakamhan sa gabos,” ano an boot sabihon kaini?
9 Ngonyan, kamakangangalas! An Soberanong Kagurangnan na Jehova mismo nagtataram. Ini angay na gayo bilang introduksion sa mga bisyon na maheheling, huli ta sia an satong Kaharohalangkaweng Paratokdo asin an pinaka-Gikanan kan Kapahayagan! (Isaias 30:20) An satong Dios nagpapahayag: “Ako an Alfa asin an Omega, . . . an Saro na iyo ngonyan asin iyo kaidto patin iyo an madatong, an Makakamhan sa gabos.” (Kapahayagan 1:8) Ini an enot sa tolong beses sa Kapahayagan na si Jehova mismo nagtataram hale sa langit. (Helingon man an Kapahayagan 21:5-8; 22:12-15.) An mga Kristiano kan enot na siglo madaling mamimidbid an alfa asin omega bilang an enot asin ultimong letra sa abakadang Griego. An pag-apod ni Jehova sa saiyang sadiri sa duwang letrang iyan nagdodoon na bago sa saiya, mayo nin Dios na makakamhan sa gabos, asin mayo nin masunod sa saiya. Dadarahon nia sa mapangganang katapusan, sa panahon na daing sagkod, an isyu nin pagka-Dios. Sia sagkod lamang na mabibindikar bilang an saro asin solamenteng makakamhan sa gabos na Dios, an Supremong Soberano sa gabos niang linalang.—Ikomparar an Isaias 46:10; 55:10, 11.
10. (a) Paano sumunod na ilinadawan ni Juan an saiyang sadiri, asin saen sia nabibilanggo? (b) An balumbon na isinurat ni Juan seguradong ipinadara sa mga kongregasyon sa kooperasyon niisay? (c) Paano parateng itinatagama ngonyan an espirituwal na kakanon?
10 Kompiado na gigiyahan ni Jehova an resulta nin mga bagay, sinasabihan ni Juan an saiyang mga kapwa oripon: “Ako si Juan, an saindong tugang asin kadamay nindo sa kahorasaan asin kahadean patin pagtagal sa kaibanan ni Jesus, namugtak sa isla na inaapod Patmos huli sa pagtaram dapit sa Dios asin pagpatotoo ki Jesus.” (Kapahayagan 1:9) Sarong bilanggo sa Patmos huli sa maogmang bareta, nagtatagal nin mga kasakitan kaiba kan saiyang mga tugang, na marigon na naglalaom na makikabtang sa nagdadangadang na Kahadean, naheling ngonyan kan gurang nang si Juan an enot sa mga bisyon kan Kapahayagan. Daing duwa-duwa na sia napakosog na gayo kan mga bisyon na ini, kun paanong an grupong Juan napakokosog ngonyan sa pakaheling sa mga kaotoban kaiyan. Dai niato aram kun paano ipinadara ni Juan an balumbon nin Kapahayagan sa mga kongregasyon, ta sia nabibilanggo kaidto. (Kapahayagan 1:11; 22:18, 19) An mga anghel ni Jehova seguradong nagkooperar na ini magibo, kun paanong parate nindang iniingatan an maimbod na mga saksi ni Jehova na naglilingkod sa irarom nin mga pagprohibir asin restriksion ngonyan, kaya sinda nakapagpadara nin napapanahon na espirituwal na kakanon sa saindang mga tugang na nagugutom sa katotoohan.—Salmo 34:6, 7.
11. Anong pribilehiyo, kapareho kan pinahalagahan ni Juan, an pinahahalagahan na gayo ngonyan kan grupong Juan?
11 Segurado na hararomon an pagpahalaga ni Juan sa pribilehiyo nia na gamiton ni Jehova bilang Saiyang pinakapaagihan sa pagkomunikar sa mga kongregasyon! Sa kaparehong paagi, an grupong Juan ngonyan pinahahalagahan na gayo an pribilehiyo kaiyan na magtao sa harong nin Dios nin espirituwal na “kakanon sa igong panahon.” (Mateo 24:45) Magin logod kamo saro sa mga pinakokosog kan espirituwal na probisyon na ini tanganing makaabot sa mamuraway na pasohan na buhay na daing katapusan!—Talinhaga 3:13-18; Juan 17:3.
[Tsart sa pahina 25]
Simbolikong mga Bilang sa Kapahayagan
Bilang Simbolikong Kahulogan
2 Nangangahulogan nin marigon na pagpapatunay sa sarong bagay. (Kapahayagan 11:3, 4; ikomparar an Deuteronomio 17:6.)
3 Tanda nin pagdodoon. Nagpaparisa man nin puwersa. (Kapahayagan 4:8; 8:13; 16:13, 19)
4 Nangangahulogan nin pagigin unibersal o pagigin kuwadrado. (Kapahayagan 4:6; 7:1, 2; 9:14; 20:8; 21:16)
6 Nangangahulogan nin pagkabakong sangkap, bagay na bakong normal, labi-labi karaot. (Kapahayagan 13:18; ikomparar an 2 Samuel 21:20.)
7 Nangangahulogan nin pagkakompleto sa pagheling nin Dios, kun manongod sa mga katuyohan ni Jehova o ni Satanas. (Kapahayagan 1:4, 12, 16; 4:5; 5:1, 6; 10:3, 4; 12:3)
10 Nangangahulogan nin pagigin lubos o pagkakompleto sa pisikal na paagi, kun dapit sa mga bagay digdi sa daga. (Kapahayagan 2:10; 12:3; 13:1; 17:3, 12, 16)
12 Nangangahulogan nin organisasyon na ibinugtak nin Dios magsalang sa kalangitan o sa ibabaw nin daga. (Kapahayagan 7:5-8; 12:1; 21:12, 16; 22:2)
24 Nangangahulogan kan abundang (doble) organisasyonal na areglo ni Jehova. (Kapahayagan 4:4)
An ibang bilang na sinasabi sa Kapahayagan dapat na saboton na literal. Sa parate, an konteksto nakatatabang na maaraman ini. (Helingon an Kapahayagan 7:4, 9; 11:2, 3; 12:6, 14; 17:3, 9-11; 20:3-5.)
[Kahon sa pahina 27]
Pagkaigwa nin Espirituwal na Kakanon sa Masakit na mga Panahon
Sa huring mga aldaw na ini, na an mga Saksi ni Jehova nagtitios nin makuring paglamag asin kasakitan, kinaipuhan nindang mag-ako nin espirituwal na kakanon tanganing magdanay na makosog sa pagtubod. Sa kadaklan na kaso, may itinatagamang bastanteng kakanon, sa parate huli sa pambihirang mga kapahayagan kan kapangyarihan ni Jehova.
Halimbawa, sa Alemania na sakop kaidto ni Hitler, an mga Saksi kinopya sa mimeograpo asin iwinaras an mga kopya kan An Torrengbantayan, na opisyal na ipinangangalad kan maringis na mga autoridad na Nazi. Sa Hamburg sinurong kan Gestapo an sarong harong na duman ginigibo an pagkopya sa mimeograpo. Sadit sana an harong, asin mayo nin mapagtataguan nin marhay. An makinilya iwinalat sa sarong estante, asin an dakulaon na mimeograpo sinaray sa sarong baris nin patatas sa sirong. Saro pa, sa likod kan baris may sarong maleta na pano nin mga magasin! Garo baga dai malilikayan na iyan madiskobre. Alagad ta ano an nangyari? An pulis na nagbukas kan estante ginibo iyan sa paagi na dai nia naheling an makinilya. Manongod naman sa sirong, an kagharong nagbabareta: “An tolong pulis nagtindog sa tahaw kan kuwarto, duman mismo sa namumugtakan kan baris na yaon sa likod an maletang pano nin mga Torrengbantayan. Alagad ta garo mayo sa sainda na nakaririsa kaiyan; garo sinda binuta.” Salamat sa pambihirang tabang na ini nin Dios, an pamilya nakapagpadagos sa pagtagama nin espirituwal na kakanon sa masakit asin peligrosong mga panahon.
Kan mga taon nin 1960, nagkaigwa nin guerra sibil sa pag-oltanan nin Nigeria asin kan suminiblag na probinsia nin Biafra. Mantang an Biafra biyong napalilibotan kan teritoryo nin Nigeria, saro sanang landingan nin eroplano an koneksion kaiyan sa ibang parte kan kinaban. Ini nangahulogan na an mga Saksi sa Biafra namemeligrong maputolan nin suplay na espirituwal na kakanon. Dangan, sa pagpopoon nin 1968, an mga autoridad sa Biafra idinestino an saro sa saindang empleyado sa serbisyo sibil sa sarong mahalagang katongdan sa Europa asin may saro man na idinestino sa landingan sa Biafra. Nanongod na an duwang ini pareho Saksi ni Jehova, asin ngonyan yaon sinda sa man-ibong-ibong na kampi kan solamenteng koneksion kan Biafra sa ibang parte kan kinaban. Namidbid kan duwa na an areglo seguradong gikan ki Jehova. Kaya, sinda nagboluntaryo sa delikado asin peligrosong trabaho nin pagpalaog nin espirituwal na kakanon sa Biafra. Asin ini nagibo ninda sa bilog na panahon kan guerra. An saro sa sainda nagkomento: “An areglo labi sa ano man na puwedeng planohon nin tawo.”