Kapahayagan—An Mamuraway na Kulminasyon Kaiyan Harani Na

Kapitulo 5: Naheling ni Juan an Pinamuraway na si Jesus

Bisyon 1—Kapahayagan 1:​10–​3:​22

Tema: Siniyasat ni Jesus an espirituwal na Israel sa daga asin nagtao nin mainit na pagpakosog

Panahon nin kaotoban: An kabtang na ini kan aldaw kan Kagurangnan magpoon kan 1914 sagkod na an ultimo sa maimbod na mga linahidan magadan asin buhayon liwat

1. Paano iinaatubang an enot na bisyon, asin paano ipinarisa ni Juan an panahon kan tunay na aplikasyon kaiyan?

An enot na bisyon sa libro nin Kapahayagan minapoon sa kapitulo 1, bersikulo 10. An bisyon na ini, kapareho kan iba sa Kapahayagan, iiniintrodusir nin pagsabi na si Juan may nadangog o naheling na pambihira. (Kapahayagan 1:​10, 12; 4:​1; 6:1) An enot na bisyon na ini iinaatubang sa kamugtakan kan enot na siglo na dian may mga mensahe na ipinadara sa pitong kongregasyon na nag-eksister kan panahon ni Juan. Alagad ta ipinaririsa ni Juan an panahon kan tunay na aplikasyon kaiyan kan sia magsabi: “Paagi sa pasabong ako napasa aldaw kan Kagurangnan.” (Kapahayagan 1:​10a) Noarin an “aldaw” na ini? An dramatikong mga pangyayari daw sa maribok na ika-20 siglong ini may koneksion dian? Kun igwa, maninigo kitang magtao nin maingat na atension sa hula, bilang nakaaapektar sa sato mismong buhay​—pati sa satong kaligtasan.​—1 Tesalonica 5:​20, 21.

Sa Aldaw kan Kagurangnan

2. Noarin mapoon an aldaw kan Kagurangnan, asin noarin iyan matatapos?

² Sa anong panahon ibinubugtak kaini an kaotoban kan Kapahayagan? Bueno, ano an aldaw kan Kagurangnan? Inaapod iyan ni apostol Pablo na panahon nin paghokom asin pagkaotob nin banal na mga panuga. (1 Corinto 1:​8; 2 Corinto 1:​14; Filipos 1:​6, 10; 2:16) Pag-abot kan “aldaw” na iyan, an makangangalas na mga katuyohan ni Jehova progresibo asin mapangganang nag-aabante pasiring sa kulminasyon kaiyan. An “aldaw” na iyan nagpopoon sa pagkorona ki Jesus bilang langitnon na Hade. Dawa pakatapos na hokoman ni Jesus an kinaban ni Satanas, an aldaw kan Kagurangnan nagpapadagos, sa pagbabalik kan Paraiso asin paggibong sangkap sa katawohan, sagkod na sa katapustapusi si Jesus “itao na an kahadean sa saiyang Dios asin Ama.”​—1 Corinto 15:​24-26; Kapahayagan 6:​1, 2.

3. (a) Paano an hula ni Daniel manongod sa “pitong panahon” nakatatabang sato na masabotan kun noarin mapoon an aldaw kan Kagurangnan? (b) Anong mga pangyayari sa daga an nagpapatunay sa taon 1914 bilang an kapinonan kan aldaw kan Kagurangnan?

³ An kaotoban nin ibang hula sa Biblia nakatatabang sato na masabotan kun kasuarin nagpoon an aldaw kan Kagurangnan. Halimbawa, ilinaladawan ni Daniel an pagpalod sa paghade kan linya ni Hadeng David; pakalihis nin “pitong panahon” mamimidbid “na an Kaharohalangkawe iyo an Hade sa kahadean nin katawohan, asin na iyan itinatao nia sa saro na boot nia.” (Daniel 4:​23, 24, 31, 32) An mayor na kaotoban kan hulang iyan nagpoon sa pagkagaba kan kahadean nin Juda, na ipinaririsa kan ebidensia sa Biblia na natapos kan Oktubre 607 B.C.E. Ipinaheheling kan Kapahayagan 12:​6, 14 na an 3 1/2 panahon bale 1,260 aldaw; kun siring, an pitong panahon (doble sa bilang na iyan) bale 2,520 aldaw. Sa pagkuwenta nin “sarong aldaw para sa sarong taon,” an nakukuwentahan niato 2,520 taon bilang lawig kan “pitong panahon.” (Ezequiel 4:6) Kun siring, pinonan ni Cristo Jesus an saiyang langitnon na paghade sa huring kabtang nin 1914. An pagputok kan enot na guerra mundial kan taon na idto nagtanda sa “kapinonan nin kasakitan” na nagpapadagos na magpasakit sa katawohan. Magpoon kan 1914, pambihira nanggad an pagpapatunay kan mga pangyayari sa dugoan na dagang ini na an taon na idto iyo an kapinonan kan “aldaw” kan presensia ni Jesus!​—Mateo 24:​3-14.a

4. (a) Ano an ipinaririsa mismo kan mga tataramon sa Kapahayagan kun noarin maootob an enot na bisyon? (b) Noarin matatapos an kaotoban kan enot na bisyon?

⁴ Kun siring, an enot na bisyon na ini asin an hatol na laog kaiyan para sa aldaw kan Kagurangnan, magpoon kan 1914. An panahon na ini suportado kan bagay na, sa nahuhuring kabtang kan Kapahayagan, an rekord nagsasaysay kan paggibo kan tunay asin matanos na mga paghokom nin Dios​—mga pangyayari na dian an Kagurangnan na Jesus may pambihirang kabtang. (Kapahayagan 11:​18; 16:​15; 17:​1; 19:​2, 11) Kun an kaotoban kan enot na bisyon nagpoon kan 1914, noarin iyan matatapos? Arog kan ipinaheheling mismo kan mga mensahe, an organisasyon na pinanonongdan iyo an kongregasyon nin Dios kan mga linahidan digdi sa daga. Kun siring, an kaotoban kan enot na bisyon na ini matatapos kun an ultimong maimbod na miembro kan linahidan na kongregasyon na iyan magadan na asin buhayon sa langitnon na buhay. Pero, an Aldaw kan Kagurangnan, na may mga bendisyon sa daganon na ibang karnero, nagpapadagos sagkod sa katapusan kan Milenyal na Paghade ni Jesu-Cristo.​—Juan 10:​16; Kapahayagan 20:​4, 5.

5. (a) Ano an ipinagboot ki Juan nin sarong tingog? (b) Taano an lugar kan “pitong kongregasyon” ta paborable sa pagpadara sa sainda nin balumbon?

⁵ Sa enot na bisyon na ini, bago may naheling si Juan, may nadangog sia: “Asin nakadangog ako sa likod ko nin makosog na tingog na siring kan sa trumpeta, na an sabi: ‘Isurat mo an saimong naheheling sa sarong balumbon asin ipadara mo iyan sa pitong kongregasyon, sa Efeso asin sa Smirna asin sa Pergamo asin sa Tiatira asin sa Sardis asin sa Filadelfia patin sa Laodicea.’” (Kapahayagan 1:​10b, 11) May autoridad asin makosogon siring sa tanog nin trumpeta, may tingog na nagboot ki Juan na sumurat sa “pitong kongregasyon.” Sia mag-aako nin sunod-sunod na mga mensahe asin dapat na ipublikar an mga bagay na saiyang maheheling asin madadangog. Mangnohon na an mga kongregasyon na sinasabi digdi aktuwal na nag-eksister kan aldaw ni Juan. Iyan gabos yaon sa Asia Minor, kahampang kan Patmos sa ibong kan dagat. Pasil na dumanan an lambang saro sa sainda paagi sa marahay na mga tinampong Romano na yaon sa lugar na idto. An sarong mensahero dai masasakitan na darahon an balumbon hale sa sarong kongregasyon pasiring sa masunod. An pitong kongregasyon na ini makaaagid sa sarong kabtang nin modernong sirkito nin mga Saksi ni Jehova.

6. (a) Ano an kahulogan kan “mga bagay na iyo ngonyan”? (b) Taano ta makasisierto kita na an mga kamugtakan sa kongregasyon nin linahidan na mga Kristiano ngonyan seguradong makaaagid sa kamugtakan kaidtong aldaw ni Juan?

⁶ An kadaklan na hula sa Kapahayagan maootob pakalihis kan panahon ni Juan. An mga iyan manongod sa “mga bagay na mangyayari pakatapos kaini.” Alagad an hatol sa pitong kongregasyon manongod sa “mga bagay na iyo ngonyan,” mga situwasyon na talagang yaon sa pitong kongregasyon kan panahon na idto. An mga mensahe mahahalagang pantabang sa maimbod na nombradong kamagurangan sa pitong kongregasyon na idto, patin sa gabos na ibang kongregasyon nin linahidan na mga Kristiano kaidto.b Mantang an bisyon may pangenot na aplikasyon sa aldaw kan Kagurangnan, an isinabi ni Jesus nagpapaisi na an kaagid na mga kamugtakan malalaoman sa kongregasyon nin linahidan na mga Kristiano sa satong aldaw.​—Kapahayagan 1:​10, 19.

7. Siisay an naheling ni Juan sa enot na bisyon na ini, asin taano iyan ta napakahalaga asin nakaoogma para sa sato ngonyan?

⁷ Sa enot na bisyon na ini, naheling ni Juan an mamuraway na Kagurangnan na Jesu-Cristo sa Saiyang langitnon na kamurawayan. Ano an maorog pa kaini kaangay para sa sarong libro nin mga hula na may koneksion sa dakulang aldaw kan Kagurangnan na ini na hale sa langit? Asin ano an maorog pa sa halaga para sa sato, na nabubuhay ngonyan sa panahon na iyan asin nagtatao nin maingat na atension sa kada pagboot nia? Dugang pa, nakaoogma nanggad para sa mga parasuportar sa soberaniya ni Jehova na makaseguro na an Mesiyanikong Banhi, pakapagtagal sa gabos na pagbalo asin paglamag na itinao ni Satanas asin pakapagtios nin makolog na kagadanan kan an Saiyang “bool” lugadon 1,900 na taon na an nakaagi, ngonyan buhay sa langit, na tinawan nin kapangyarihan na darahon sa mapangganang katapusan an makangangalas na katuyohan nin Dios!​—Genesis 3:15.

8. Sa anong paghiro andam ngonyan si Jesus?

⁸ Malinaw na si Jesus andam na ngonyan na humiro bilang natutukaw sa tronong Hade. Sia ninombrahan na Pangenot na Parakastigo ni Jehova tanganing otobon an ultimong mga paghokom ni Jehova tumang sa daan, maraot na palakaw na ini nin mga bagay asin sa makadiablong dios kaiyan, si Satanas. Yaon man sia tanganing hokoman an mga kaiba sa saiyang kongregasyon nin mga linahidan asin an dakulang kadaklan kan saindang kairiba, saka hokoman an kinaban.​—Kapahayagan 7:​4, 9; Gibo 17:31.

9. (a) Paano ilinaladawan ni Juan an pinamuraway na si Jesu-Cristo sa tahaw kan mga kandelerong bulawan? (b) Ano an ipinaririsa kan garo sa templong kamugtakan asin kan sulot ni Jesus? (c) Ano an kahulogan kan saiyang hagkos na bulawan?

⁹ Sinalingoy ni Juan an pinaghalean kan makosog na tingog, asin iyo ini an saiyang naheling: “Nagsalingoy ako sa pagheling sa tingog na nagtataram sa sako, asin, pakasalingoy ko, ako nakaheling nin pitong kandelerong bulawan.” (Kapahayagan 1:​12) Kan huri, naaraman ni Juan kun ano an isinisimbolo kan pitong kandelerong ini. Alagad ta an persona na nasa tahaw kan mga kandelero an nakaapod sa saiyang atension. Yaon “sa tahaw kan mga kandelero an saro na kabaing nin aki nin tawo, na nagugubingan nin gubing na sagkod sa bitis, asin nabobogkos sa daghan nin sarong hagkos na bulawan.” (Kapahayagan 1:​13) Si Jesus, an “aki nin tawo,” iinaatubang digdi an saiyang sadiri sa namungnan huli sa paghangang saksi, si Juan, bilang mamuraway, nagkikilyab na persona. Sia maheheling sa makinang na kamurawayan sa tahaw nin naglalaad na mga kandelerong bulawan. An garo sa templong kamugtakan na ini nagdodoon ki Juan kan bagay na si Jesus presente sa katongdan na dakulang Halangkaw na Saserdote ni Jehova, na may kapangyarihan na maghokom. (Hebreo 4:​14; 7:​21-25) An saiyang halaba, kahangahangang gubing angay sa saiyang katongdan bilang saserdote. Kapareho kan Judiong mga halangkaw na saserdote kan suanoy, sia may hagkos​—hagkos na bulawan sa saiyang daghan sa lugar na iyan nakatatahob sa saiyang puso. Ini nangangahulogan na saiyang bilog na pusong ootobon an saiyang banal na trabaho na itinao ni Jehova Dios.​—Exodo 28:​8, 30; Hebreo 8:​1, 2.

10. (a) Ano an ipinaririsa kan garo niyebe sa puting buhok asin naglalaad na mga mata ni Jesus? (b) Ano an kahulogan kan pagigin siring sa makintab na kalongkaki kan mga bitis ni Jesus?

¹⁰ An paglaladawan ni Juan nagpapadagos: “Dugang pa, an saiyang payo asin an saiyang buhok maputi siring sa maputing balukag nin karnero, siring sa niyebe, asin an saiyang mga mata siring sa laad nin kalayo.” (Kapahayagan 1:​14) An saiyang buhok na garo niyebe sa puti nagpaparisa nin kadonongan huli sa lawig nin buhay. (Ikomparar an Talinhaga 16:31.) Asin an saiyang naglalaad na mga mata nagpapaheling na sia mapagmansay, alisto, sa saiyang pagsiyasat, pagbalo, o pagpahayag nin kaanggotan. Pati an mga bitis ni Jesus nakaapod sa atension ni Juan: “Asin an saiyang mga bitis siring sa pinong kalongkaki kun nagkikintab sa horno; asin an saiyang tingog siring sa tanog nin dakol na katubigan.” (Kapahayagan 1:​15) Sa bisyon, an bitis ni Jesus siring sa kalongkaki, makintab, maliwanag​—tamang-tama para sa saro na naglalakaw nin may kaigotan asin may marahay na kamugtakan sa atubangan ni Jehova Dios. Dugang pa, mantang sa Biblia an banal na mga bagay parateng ilinaladawan nin bulawan, an mga bagay na sa tawo kun beses irinirepresentar nin kalongkaki.c Kaya an makintab na bitis ni Jesus na siring sa pinong kalongkaki nagpapagirumdom sato kun gurano “kagayon” kan saiyang mga bitis kan sia maglakaw sa ibabaw nin daga na naghuhulit kan maogmang bareta.​—Isaias 52:​7; Roma 10:15.

11. (a) Ano an ipinagigirumdom sato kan mamuraway na mga bitis ni Jesus? (b) Ano an ipinaririsa kan bagay na an tingog ni Jesus “siring sa tanog nin dakol na katubigan”?

¹¹ Totoo nanggad, bilang sangkap na tawo, si Jesus may kamurawayan na risa kan mga anghel asin nin mga tawo. (Juan 1:14) An saiyang mamuraway na mga bitis nagpapagirumdom man sato na sia naglalakaw sa banal na lugar sa laog kan organisasyon ni Jehova, na dian sia Halangkaw na Saserdote. (Ikomparar an Exodo 3:5.) Saro pa, an saiyang tingog nag-aaningal na siring sa dakulaon na nag-uulakbong busay. Iyan kahangahanga, makangingirhat, siring sa angay sa saro na opisyal na inaapod na Tataramon nin Dios, an saro na napadigdi tanganing “hokoman an ineerokan na daga sa katanosan.”​—Gibo 17:​31; Juan 1:1.

12. Ano an kahulogan kan “matarom, halabang minasbad na may duwang tarom”?

¹² “Asin igwa sia sa saiyang toong kamot nin pitong bitoon, asin nagluluwas sa saiyang ngoso an sarong matarom, halabang minasbad na may duwang tarom, asin an saiyang lalauogon siring sa aldaw kun iyan nagliliwanag sa bilog na kakosogan kaiyan. Asin kan maheling ko sia, ako napukan siring sa gadan sa saiyang pamitisan.” (Kapahayagan 1:​16, 17a) Dai nahaloy si Jesus mismo an nagpaliwanag kan kahulogan kan pitong bitoon. Alagad mangnoha kun ano an nagluluwas sa saiyang ngoso: “sarong matarom, halabang minasbad na may duwang tarom.” Angay nanggad ini! Huli ta si Jesus an ninombrahan na magpahayag kan ultimong mga paghokom ni Jehova tumang sa Saiyang mga kaiwal. An desididong mga tataramon hale sa saiyang ngoso nagbubunga kan paggadan sa gabos na maraot.​—Kapahayagan 19:​13, 15.

13. (a) An maliwanag, nagkikinang na lalauogon ni Jesus nagpapagirumdom sato nin ano? (b) Ano an pankagabsan na impresyon na nakukua niato sa pagkaladawan ni Juan ki Jesus?

¹³ An maliwanag, nagkikinang na lalauogon ni Jesus nagpapagirumdom sato na an lalauogon ni Moises nagkikilyab kaidto kan makipag-olay sa saiya si Jehova sa Bukid nin Sinai. (Exodo 34:​29, 30) Girumdomon man na kan si Jesus maliwat an itsura sa atubangan kan tolo sa saiyang mga apostol 1,900 na taon na an nakaagi, “an saiyang lalauogon nagsirang na siring sa aldaw, asin an saiyang pan-ibabaw na mga gubing nangintab na siring sa liwanag.” (Mateo 17:2) Ngonyan, sa sarong representasyon ki Jesus sa bisyon sa aldaw kan Kagurangnan, an saiyang lalauogon nagpaparisa man kan makinang na kamurawayan nin saro na uminatubang ki Jehova. (2 Corinto 3:18) An totoo, an pankagabsan na impresyon na itinatao kan bisyon ni Juan iyo an kinang nin kamurawayan. Magpoon sa garo niyebe sa puting buhok, naglalaad na mga mata, asin makintab na lalauogon sagkod sa makintab na mga bitis, iyan dai mapantayan na bisyon kan Saro na nag-eerok ngonyan “sa liwanag na dai maranihan.” (1 Timoteo 6:16) An pagigin tunay kan eksenang ini buhay na buhay! Ano an reaksion kan napahangang gayong si Juan? Sinasabi sato kan apostol: “Asin kan maheling ko sia, ako napukan siring sa gadan sa saiyang pamitisan.”​—Kapahayagan 1:17.

14. Paano kita maninigong maapektaran kun binabasa an bisyon ni Juan sa pinamuraway na si Jesus?

¹⁴ Ngonyan, an magayon, detalyadong paglaladawan sa bisyon ni Juan minapano sa banwaan nin Dios nin odok sa pusong pag-apresyar. Ngonyan, inagihan na niato an labing 70 taon kan aldaw kan Kagurangnan, na sa laog kaiyan an bisyon nagpapadagos na magkaigwa kan makaoogmang kaotoban kaiyan. Para sa sato an paghade ni Jesus sa Kahadean buhay, presenteng katunayan, bakong paglaom sa ngapit. Kaya, tama sana para sa sato bilang maimbod na mga sakop kan Kahadean na tumanaw pa na may pagngalas sa ilinaladawan ni Juan sa enot na bisyon na ini asin makinuyog na maghinanyog sa mga tataramon kan pinamuraway na si Jesu-Cristo.

[Mga Nota sa Ibaba]