Kapahayagan—An Mamuraway na Kulminasyon Kaiyan Harani Na
Kapitulo 6: Pagbukas sa Banal na Hilom
1. Ano an maninigong magin reaksion niato sa mamuraway na paglaladawan na nasusurat sa Kapahayagan 1:10-17?
Pambihira nanggad an bisyon sa pinamuraway na si Jesus! Daing duwa-duwa, kun kita nakaheling man kaidto kaiba ni apostol Juan, kita man madidismayo sa nagkikinang na kamurawayan na idto, na minalaob kapareho nia. (Kapahayagan 1:10-17) An daing kabaing na ipinasabong na bisyon na ini ipreneserbar tanganing pahiroon kita ngonyan. Kapareho ni Juan, maninigo kitang magpaheling nin mapakumbabang pag-apresyar sa gabos na kahulogan kan bisyon. Permi logod kitang magpaheling nin odok na paggalang sa katongdan ni Jesus bilang natutukaw nang Hade, Halangkaw na Saserdote, asin Hokom.—Filipos 2:5-11.
“An Enot Asin an Huri”
2. (a) Sa anong titulo ipinamimidbid ni Jesus an saiyang sadiri? (b) Ano an boot sabihon sa pagsabi ni Jehova na: “Ako an enot asin ako an huri”? (c) Sa ano nag-aapod nin atension an titulo ni Jesus na “an Enot asin an Huri”?
2 Minsan siring, an satong paghanga dai man kaipuhan na sumagkod sa may pangingiring takot. Pinasarig ni Jesus an boot ni Juan, arog kan sumunod na isinasaysay kan apostol. “Asin ibinugtak nia an saiyang toong kamot sa sako asin nagsabi: ‘Dai ka matakot. Ako an Enot asin an Huri, asin an sarong nabubuhay.’” (Kapahayagan 1:17b, 18a) Sa Isaias 44:6, tama sanang ilinaladawan ni Jehova an saiyang katongdan bilang an saro asin solamenteng makakamhan sa gabos na Dios, na sinasabi: “Ako an enot asin ako an huri, asin laen sa sako mayo na nin Dios.”a Kun iinaatubang ni Jesus an saiyang sadiri sa titulong “an Enot asin an Huri,” dai sia naghihingako na sia kapantay ni Jehova, an Dakulang Kaglalang. Ginagamit nia an sarong titulo na tama sanang itinao sa saiya nin Dios. Sa Isaias, si Jehova nagtataram manongod sa Saiyang daing kaagid na kamugtakan bilang an tunay na Dios. Sia Dios na daing sagkod, asin apuwera sa saiya tunay na mayo nin Dios. (1 Timoteo 1:17) Sa Kapahayagan, si Jesus nagtataram manongod sa titulo na itinao sa saiya, na inaapod an atension sa saiyang pambihirang pagkabuhay liwat.
3. (a) Sa anong paagi na si Jesus “an Enot asin an Huri”? (b) Ano an boot sabihon kan pagkaigwa ni Jesus kan “mga liyabe nin kagadanan asin nin Hades”?
3 Tunay na si Jesus “an Enot” na tawo na binuhay liwat sa inmortal na espiritung buhay. (Colosas 1:18) Dugang pa, sia “an Huri” na personalmenteng binuhay liwat nin siring ni Jehova. Kaya, sia nagin “an sarong nabubuhay . . . nabubuhay sagkod lamang.” Sia may inmortalidad. Digdi, kapareho sia kan saiyang inmortal na Ama, na inaapod “an nabubuhay na Dios.” (Kapahayagan 7:2; Salmo 42:2) Para sa gabos na iba pang tawo, si Jesus mismo “an pagkabuhay liwat asin an buhay.” (Juan 11:25) Kaoyon kaini, sia nagsasabi ki Juan: “Ako nagadan, alagad helinga! ako nabubuhay sagkod lamang, asin igwa ako kan mga liyabe nin kagadanan asin nin Hades.” (Kapahayagan 1:18b) Tinawan sia ni Jehova kan kapangyarihan na buhayon liwat an mga gadan. Iyan an dahelan na nakapagsabi si Jesus na sia igwa kan liyabe sa pagbukas kan mga tata para sa mga nagagapos nin kagadanan asin Hades (lolobngan).—Ikomparar an Mateo 16:18.
4. Anong pagboot an inotro ni Jesus, asin para kiisay na pakinabang?
4 Inotro digdi ni Jesus an saiyang pagboot na isurat an bisyon, na sinasabihan si Juan: “Suratan an mga bagay na naheling mo, asin an mga bagay na iyo ngonyan patin an mga bagay na mangyayari pakatapos kaini.” (Kapahayagan 1:19) Ano pang makaoogmang mga bagay an ipaaaram ni Juan para sa pagtotokdo sa sato?
(Ipagpapadagos sa masunod na luwas.)
[Nota sa Ibaba]
a Sa orihinal na Hebreo sa Isaias 44:6, mayo nin artikulo depinido kaiba kan mga tataramon na “enot” asin “huri,” mantang sa paglaladawan ni Jesus sa saiyang sadiri sa orihinal na Griego sa Kapahayagan 1:17, yaon an artikulo depinido. Kaya, sa gramatika, an Kapahayagan 1:17 nagpapaheling nin titulo, mantang an Isaias 44:6 naglaladawan sa pagigin Dios ni Jehova.