Ginana Nia an Premyo

“UTANG ko iyan gabos saindo,” an isinurat ni Kiyoe, sarong nasa kuwarto anyo sa haiskul, sa sangang opisina kan Watch Tower Society sa Hapon. Ano an pinasasalamatan niang marhay? Bago pa sanang ganahon ni Kiyoe an pinakaprimerang premyo sa nasyonal na kontest sa komposisyon, na inisponsor kan Asosasyon sa Ligtas na Trapiko sa Hapon. Kaiba sa dakulang premyo an biyahe pa-Sweden.

Nagsurat si Kiyoe sa pagpahayag kan saiyang pagpasalamat sa dakol na magagayon na publikasyon na ipinupublikar kan Watch Tower Bible and Tract Society, na sa paghona nia nakatabang na gayo sa saiya na manggana. Apuwera sa kontest na ini, irinepresentar nia an saiyang eskuwelahan sa dakol na kontest sa pagdiskurso asin komposisyon. “Sa kadaklan kan mga kontest na ini,” sabi nia, “may itinataong tema, asin an mga estudyante nag-aadal para sa saindang mga komposisyon sa librariya. Pero, dai ko na kaipuhan na gibohon iyan. May nakukua na akong magayonon na materyales sa bugtakan nin libro sa harong!” Ipinagpadagos nia: “Ano man an tema, baga man problema sa paggurang, sa palibot, internasyonal na relasyon, o pagpakarhay sa sadiri, sa parate may kompletong paliwanag sa mga magasin na An Torrengbantayan asin Awake!”

Pero, bako sanang an mga publikasyon an nakatabang ki Kiyoe. Sinasabi nia na an edukasyon na inako nia paagi sa mga programa sa pagtotokdo kan mga Saksi ni Jehova nakatabang saiya na umoswag an saiyang pagbasa asin pagsurat, asin nagpangyari ini saiya na magprimera sa mga kontest. “Kaidto, talagang gusto kong mag-eskuwela sa unibersidad,” an pag-admitir nia. “Pero saen ko manonompongan an pagtotokdong arog kaini?” Ngonyan naglalaom siang magtrabaho nin bilog na panahon sa pagtabang sa iba na makinabang sa edukasyon na inako nia. Minsan ngani ogmahon sa premyo sa komposisyon, an puso ni Kiyoe nasisentro sa panggana kan premyong buhay.​—Ikomparar an Filipos 3:14.