Kapahayagan—An Mamuraway na Kulminasyon Kaiyan Harani Na

Kapitulo 12: “Padagos Mong Pangaptan an Nasa Saimo Na”

1. An ikaanom na mensahe ni Jesus para sa kongregasyon na yaon sa anong siudad, asin ano an kahulogan kan ngaran kan siudad na iyan?

Pagkamoot sa tugang​—kanigoan karahay na kuwalidad! Daing duwa-duwa na ini nasa isip ni Jesus kan saiyang itao an saiyang ikaanom na mensahe, na para sa kongregasyon sa Filadelfia, huli ta an ngaran na iyan nangangahulogan “Pagkamoot sa Tugang.” Nagigirumdoman pa kan gurang nang si Juan an pangyayari, na labi nang 60 taon an nakaagi, kan si Pedro tolong beses na mag-insister ki Jesus na sia, si Pedro, may mainit na pagkamoot sa saiyang Kagurangnan. (Juan 21:​15-17) An mga Kristiano daw sa Filadelfia nagpapaheling man nin pagkamoot sa tugang? Malinaw na iyo!

2. Anong klaseng siudad an Filadelfia, anong klaseng kongregasyon an yaon duman, asin ano an sinasabi ni Jesus sa anghel kan kongregasyon na ini?

² Mga 30 milyas sa parteng timog-sirangan nin Sardis (sa lugar kan modernong Turkong siudad nin Alasehir), an Filadelfia kan kaaldawan ni Juan medyo maasensong siudad. Alagad mas mahalagang mangnohon an prosperidad kan Kristianong kongregasyon duman. Segurado na kanigoan an kagayagayahan ninda sa pag-ako sa ministro na nagbiyahe pasiring sa sainda, na posibleng nag-agi sa Sardis! An mensaheng dara nia may nakapupukaw na sadol sa sainda. Alagad primero iyan nagtataram manongod sa autoridad kan bantog na Nagpadara kaiyan. Sia nagsasabi: “Asin suratan mo an anghel kan kongregasyon sa Filadelfia: Iyo ini an mga bagay na isinasabi nia na iyo an banal, iyo an totoo, iyo an igwa kan liyabe ni David, na nagbubukas tanganing mayo nin siisay man na makapinto, asin minapinto tanganing mayo nin siisay man na makabukas.”​—Kapahayagan 3:7.

3. Taano ta angay na si Jesus apodon na “banal,” asin paano masasabi na sia “totoo”?

³ Nadangog ni Juan si Pedro na nagsabi sa tawong si Jesu-Cristo: “Yaon sa saimo an mga tataramon nin buhay na daing sagkod; asin kami nagtubod asin nakaaram na ika iyo an Banal na Saro nin Dios.” (Juan 6:​68, 69) Mantang si Jehova Dios an pinakapersonipikasyon nin kabanalan, an saiyang bugtong na Aki kaipuhan man na magin “banal.” (Kapahayagan 4:8) Si Jesus “totoo” man. An termino sa Griego na ginamit digdi (a·le·thi·nosʹ) nagpaparisa nin pagigin tunay. Sa sentidong ini, si Jesus iyo an totoong liwanag asin an totoong tinapay na naghilig hale sa langit. (Juan 1:​9; 6:32) Sia an totoong poon nin ubas. (Juan 15:1) Si Jesus totoo man sa sentido na sia masasarigan. Permi siang nagtataram kan katotoohan. (Helingon an Juan 8:​14, 17, 26.) An Aking ini nin Dios tunay na maninigo na maglingkod bilang Hade asin Hokom.​—Kapahayagan 19:​11, 16.

An “Liyabe ni David”

4, 5. Sa anong tipan konektado an “liyabe ni David”?

⁴ Si Jesus igwa kan “liyabe ni David.” Sa paggamit kaiyan, sia “nagbubukas tanganing mayo nin siisay man na makapinto, asin minapinto tanganing mayo nin siisay man na makabukas.” Ano an “liyabe ni David” na ini?

⁵ Ki Hadeng David nin Israel na si Jehova nakipagtipan para sa sarong daing katapusan na kahadean. (Salmo 89:​1-4, 34-37) An harong ni David naghade gikan sa trono ni Jehova sa Jerusalem magpoon 1070 sagkod 607 B.C.E., alagad ta hinokoman nin Dios an kahadean na idto huli ta iyan nagin maraot. Sa siring pinonan ni Jehova na otobon an saiyang hula sa Ezequiel 21:​27: “Gagabaon ko, gagabaon ko, gagabaon ko iyan [an daganon na Jerusalem]. Asin kun dapit man kaini, dai iyan [an setro kan pagkahade sa linya ni David] magigin sadiri nin siisay man sagkod na magdatong sia na igwa kan legal na katanosan, asin iyan itatao ko sa saiya.”

6, 7. Noarin asin paano malataw an sarong may “legal na katanosan”?

⁶ Noarin asin paano malataw an sarong ini na may “legal na katanosan”? Paano itatao sa saiya an setro kan kahadean ni David?

⁷ Pakalihis nin mga 600 na taon, an sarong gikan ni Hadeng David, an daragang Judia na si Maria, nagbados paagi sa banal na espiritu. Isinugo nin Dios an anghel na si Gabriel tanganing paaramon si Maria na sia mangangaki nin lalaki, na ngangaranan nin Jesus. Idinugang ni Gabriel: “An sarong ini magigin dakula asin aapodon Aki kan Kaharohalangkawe; asin itatao saiya ni Jehova Dios an trono ni David na saiyang ama, asin sia magsasakop bilang hade sa harong ni Jacob sagkod lamang, asin dai magkakaigwa nin katapusan an saiyang kahadean.”​—Lucas 1:​31-33.

8. Paano pinatunayan ni Jesus na sia kuwalipikadong magmana kan pagkahade ni David?

⁸ Kan, kaidtong 29 C.E., si Jesus bautismohan sa Salog nin Jordan asin linahidan nin banal na espiritu, sia nagin Piniling Hade sa linya ni David. Nagpaheling sia nin arogan na kaigotan sa paghuhulit kan maogmang bareta kan Kahadean asin isinugo man an saiyang mga disipulo na maghulit. (Mateo 4:​23; 10:​7, 11) Si Jesus nagpakumbaba, sagkod sa kagadanan sa sarong hariging pasakitan, sa siring pinatutunayan na sia biyong kuwalipikado na magmana kan pagkahade ni David. Si Jesus binuhay liwat ni Jehova bilang inmortal na espiritu asin ilinangkaw sia sa Saiyang toong kamot sa kalangitan. Duman minana nia an gabos na diretso sa kahadean ni David. Sa igong panahon gagamiton ni Jesus an saiyang katanosan na ‘mandaog sa tahaw kan saiyang mga kaiwal.’​—Salmo 110:​1, 2; Filipos 2:​8, 9; Hebreo 10:​13, 14.

9. Paano na ginagamit ni Jesus an liyabe ni David sa pagbubukas asin pagpinto?

⁹ Mientras tanto gagamiton ni Jesus an liyabe ni David, na binubukasan an mga oportunidad asin pribilehiyo na konektado sa Kahadean nin Dios. Paagi ki Jesus, ililigtas ngonyan ni Jehova an linahidan na mga Kristiano sa daga “hale sa autoridad kan kadikloman,” na ibinabalyo sinda sa “kahadean kan Aki nin saiyang pagkamoot.” (Colosas 1:​13, 14) An liyabe gagamiton man tanganing dai palaogon sa siring na mga pribilehiyo an siisay man na dai nagin maimbod. (2 Timoteo 2:​12, 13) Mantang an permanenteng paramanang ini sa kahadean ni David may tabang ni Jehova, mayo nin linalang na makaoolang sa saiya sa pag-otob sa mga trabahong iyan.​—Ikomparar an Mateo 28:​18-20.

10. Anong pagpakosog an itinatao ni Jesus sa kongregasyon sa Filadelfia?

¹⁰ Mantang gikan sa de autoridad na pinaghalean, an mga tataramon ni Jesus sa mga Kristiano sa Filadelfia seguradong nakararanga nanggad! Inomaw nia sinda, na sinasabi: “Aram ko an saimong mga gibo​—uya! ibinugtak ko sa atubang mo an bukas na tata, na mayo nin siisay man na makapipinto—​na ika igwa nin kadikit na kapangyarihan, asin inotob mo an sakong tataramon asin dai nagpainda sa sakong ngaran.” (Kapahayagan 3:​8) An kongregasyon aktibo, asin may nabukasan na tata sa atubangan kaiyan​—daing duwa-duwa na tata nin oportunidad para sa ministeryal na paglilingkod. (Ikomparar an 1 Corinto 16:​9; 2 Corinto 2:12.) Kun siring, dinadagka ni Jesus an kongregasyon na lubos na aprobetsaran an oportunidad na maghulit. Sinda nagtagal asin nagpaheling na sinda may igong kapangyarihan, sa tabang kan espiritu nin Dios, na magpadagos sa orog pang “mga gibo” sa paglilingkod ki Jehova. (2 Corinto 12:​10; Zacarias 4:6) Kinuyog ninda an mga pagboot ni Jesus asin dai ninigaran si Cristo, magsalang sa tataramon o sa gawe.

“Sinda Madoko sa Saimo”

11. Anong bendisyon an ipinanunuga ni Jesus sa mga Kristiano, asin paano ini naotob?

¹¹ Kaya, pinanunugaan sinda ni Jesus nin bunga: “Uya! itatao ko an mga gikan sa sinagoga ni Satanas na nagsasarabing sinda Judio, alagad ta bako man kundi nagpuputik​—uya! papangyayarihon ko na sinda dumolok asin maghuruhod sa saimong pamitisan asin ipaaaram sa sainda na ika namotan ko.” (Kapahayagan 3:​9) Seguro, arog sa Smirna, an kongregasyon nagkaigwa nin mga problema sa lokal na mga Judio. Inaapod ni Jesus an mga ini na “sinagoga ni Satanas.” Minsan siring, an kisuerra nagkapira sa mga Judiong iyan madali nang makarealisar na an ihinuhulit kan mga Kristiano manongod ki Jesus iyo an katotoohan. An saindang ‘paghuruhod’ posibleng sa paagi na sinasabi ni Pablo sa 1 Corinto 14:​24, 25, kaya sinda aktuwal na magsosolsol asin magigin mga Kristiano, na lubos na pinahahalagahan an dakulang pagkamoot ni Jesus sa pagtao kan saiyang kalag para sa saiyang mga disipulo.​—Juan 15:​12, 13.

12. Taano an mga miembro kan Judiong sinagoga sa Filadelfia ta posibleng mabigla na maaraman na an iba sa sainda ‘mahuruhod’ sa lokal na Kristianong komunidad?

¹² An mga kabilang sa Judiong sinagoga sa Filadelfia posibleng mabigla na maaraman na an iba sa sainda ‘mahuruhod’ sa lokal na Kristianong komunidad. Huli sa bagay na siertong dakol an bakong Judio sa kongregasyon na iyan, lalaoman ninda na kabaliktaran kaini an mangyari. Taano? Huli ta si Isaias naghula: “An [bakong Judiong] mga hade magigin mga paraaling sa saimo [an banwaan nin Israel], asin an saindang mga prinsesa magigin mga mamay para sa saimo. Nakadoko sa daga sinda madoko sa saimo.” (Isaias 49:​23; 45:​14; 60:14) Sa kabaing na punto, si Zacarias pinasabngan na sumurat: “Mangyayari sa mga aldaw na iyan na an sampulong tawo [bakong Judio] hale sa gabos na tataramon kan mga nasyon makarapot, iyo, sinda nanggad makarapot sa gayad kan gubing nin sarong tawo na Judio, na nagsasarabi: ‘Maiba kami saindo, huli ta nabaretaan niamo na an Dios yaon dian sa saindo.’” (Zacarias 8:23) Iyo, an mga bakong Judio madoko sa mga Judio, bakong an kabaliktaran!

13. Sairisay an mga Judio na makaeeksperyensia nin kaotoban kan mga hula na itinaram sa suanoy na Israel?

¹³ An mga hulang iyan isinabi sa piniling nasyon nin Dios. Kan iyan itaram, an Israel sa laman an nasa iginagalang na kamugtakan na iyan. Alagad kan isikwal kan nasyon na Judio an Mesiyas, isinikwal sinda ni Jehova. (Mateo 15:​3-9; 21:​42, 43; Lucas 12:​32; Juan 1:​10, 11) Kan Pentecostes 33 C.E., pinili nia bilang karibay ninda an tunay na Israel nin Dios, an Kristianong kongregasyon. An mga miembro kaiyan iyo an espirituwal na mga Judio na may tunay na pagkaturi sa puso. (Gibo 2:​1-4, 41, 42; Roma 2:​28, 29; Galacia 6:16) Poon kaidto, an solamenteng paagi na an indibiduwal na mga Judio sa laman makababalik sa inooyonan na relasyon ki Jehova iyo an pagtubod ki Jesus bilang an Mesiyas. (Mateo 23:​37-39) Maliwanag na ini madali nang mangyari sa nagkapira sa Filadelfia.a

14. Paano an Isaias 49:​23 asin Zacarias 8:​23 nagkaigwa nin makahulogan na kaotoban sa modernong mga panahon?

¹⁴ Sa modernong mga panahon, an mga hula na arog kan Isaias 49:​23 asin Zacarias 8:​23 nagkaigwa nin makahulogan nanggad na kaotoban. Bilang bunga kan paghuhulit kan grupong Juan, an dakol na tawo naglaog sa bukas na tata pasiring sa paglilingkod sa Kahadean.b An kadaklan kaini nagluwas sa Kakristianohan, na an mga relihiyon putik na naghihingakong iyo an espirituwal na Israel. (Ikomparar an Roma 9:6.) An mga ini, bilang dakulang kadaklan, hinuhugasan an saindang gubing asin pinapuputi iyan paagi sa pagtubod sa atang na dugo ni Jesus. (Kapahayagan 7:​9, 10, 14) Sa pagkuyog sa pagsakop kan Kahadean ni Cristo, sinda naglalaom na magmana sa mga bendisyon kaiyan digdi sa daga. Sinda minadolok sa linahidan na mga tugang ni Jesus asin ‘minadoko’ sa sainda, sa espirituwal na pagtaram, huli ta ‘nabaretaan ninda na an Dios yaon dian sa sainda.’ Sinda naglilingkod sa mga linahidan na ini, na nagigin kasaro ninda sa sarong lakop sa kinaban na kasararoan nin mga tugang.​—Mateo 25:​34-40; 1 Pedro 5:9.

(Ipagpapadagos sa masunod na luwas.)

[Mga Nota sa Ibaba]