Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 10: Pagkabalde sa “Hararom na mga Bagay ni Satanas”
“An Nasa Saindo Na Pangaptan Nindo nin Marigon”
15. (a) Ano an sinabi ni Jesus sa mga dai naraot ni Jesabel? (b) Ano an nagpapaheling na bakong gabos na naghingakong Kristiano kan 1918 naraot kan apostatang Kakristianohan?
15 An sumunod na mga tataramon ni Jesus nakararanga: “Minsan siring, ako nagsasabi sa saindo na mga yaon sa Tiatira, an gabos na mayo kan katokdoan na ini, an mga dai nakaaram kan ‘hararom na mga bagay ni Satanas,’ siring sa sinasabi ninda: Dai ako nagbubugtak sa saindo nin ibang pasan. Minsan siring, an nasa saindo na pangaptan nindo nin marigon sagkod na ako dumatong.” (Kapahayagan 2:24, 25) May maimbod na mga kalag sa Tiatira na dai naimpluwensiahan ni Jesabel. Siring man, sa laog nin 40 taon bago an 1918 asin poon kaidto, bakong gabos na naghihingakong Kristiano nagkonsinte sa inmoral, maraot na mga gibo na lakop na gayo sa Kakristianohan. An sadit na grupo nin Mga Estudyante sa Biblia, na ngonyan midbid na mga Saksi ni Jehova, na naghingoa na tabangan an mga miembro nin iglesya na makasabot sa bakong Kristianong mga ginikanan nin dakol na doktrina nin Kakristianohan, naghiro na haleon an gabos na Babilonikong paniniwala asin kaugalean na inako paagi sa apostatang Kakristianohan. Kaiba digdi an mapagkonsinteng katokdoan kan “babaeng si Jesabel.”
16. Minsan ngani si Jesus asin an Kristianong namamahalang grupo kan enot na siglo dai nagbugtak nin dagdag na pasan, anong mga bagay an kaipuhan na likayan?
16 An grupong Juan ngonyan nagsadol man sa saindang kairiba, an dakulang kadaklan, na mag-ingat sa inmoral na mga impluwensia, arog kan yaon sa maraot na kinaban nin pag-aling-aling. Dai kaipuhan na magheling o makaeksperyensia nin karatan huli sa pag-usyoso o tanganing maaraman kun ano an dapat na likayan. Sarong kadonongan na rumayo nanggad sa “hararom na mga bagay ni Satanas.” Arog kan sabi ni Jesus: “Dai ako nagbubugtak sa saindo nin ibang pasan.” Ipinagigirumdom kaini sa sato an pagboot kan Kristianong namamahalang grupo kan enot na siglo: “Pinagmarahay kan banal na espiritu asin niamo na dai na kamo dugangan nin pasan, puwera sana sa kinakaipuhan na mga bagay, na kamo maglikay sa mga bagay na idinolot sa mga ladawan asin sa dugo asin sa mga bagay na tinook patin sa pakikisaro. Kun maingat kamong maglilikay sa mga bagay na ini, mapakakarhay kamo.” (Gibo 15:28, 29) Para sa espirituwal na prosperidad, likayan an falsong relihiyon, salang paggamit sa dugo (arog baga sa pagsasalin nin dugo), asin inmoralidad! Asin posibleng mapoprotehiran man an saindong pisikal na salud.
17. (a) Paano sinugotan ni Satanas an mga tawo ngonyan paagi sa “hararom na mga bagay”? (b) Ano an maninigong magin kaisipan niato manongod sa “hararom na mga bagay” kan komplikadong kinaban ni Satanas?
17 Si Satanas igwa man nin “hararom na mga bagay” ngonyan, arog baga nin komplikadong mga pagbanabana asin pilosopiya na nakararanga sa isip. Apuwera sa mapagkonsinte, inmoral na mga pangangatanosan, kabale man digdi an espiritismo asin teoriya nin ebolusyon. Ano an pagmansay kan pinakamadonong na Kaglalang sa “hararom na mga bagay” na ini? Kinotar sia ni apostol Pablo sa pagsabi: “Lalaglagon ko an kadonongan kan mga madonong.” Kabaliktaran kaiyan, an “hararom na mga bagay nin Dios” simple, malinaw, asin nakaoogma sa puso. An madonong na mga Kristiano isinisikwal an “hararom na mga bagay” kan komplikadong kinaban ni Satanas. Girumdoma, “an kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.”—1 Corinto 1:19, Kingdom Interlinear; 2:10; 1 Juan 2:17.
18. Anong mga bendisyon an ipinanuga ni Jesus sa linahidan na mga Kristiano na magmamaimbod sagkod sa katapusan, asin ano an magigin pribilehiyo kan mga binuhay liwat na ini sa Armagedon?
18 Sa mga Kristianong idto sa Tiatira, si Jesus ngonyan nagsabi nin nakaoogmang mga tataramon. Iyan man nakapakokosog sa linahidan na mga Kristiano ngonyan: “Asin an makadaog asin nag-ootob kan sakong mga gibo sagkod sa katapusan tatawan ko nin kapangyarihan sa mga nasyon, asin papastoran nia an mga tawo paagi sa sogkod na batbat kaya sinda magkakaparasa siring sa mga koron, siring kan inako ko sa sakong Ama.” (Kapahayagan 2:26, 27) Makangangalas nanggad ining pribilehiyo! An kapangyarihan na ini na inaako nin linahidan na mga nakadaog pagkabuhay ninda liwat pakikiiba ki Jesus sa paggamit kan “sogkod na batbat” na panlaglag tumang sa rebeldeng mga nasyon sa Armagedon. An mga bomba nuklear kan mga nasyon mapisik sana na garo basang kuwitis kun ronoton na ni Cristo an saiyang mga kaiwal siring sa mga lalagan na dalipay.—Salmo 2:8, 9; Kapahayagan 16:14, 16; 19:11-13, 15.
19. (a) Siisay an “bitoon na makaaaga,” asin paano sia itatao sa mga makadadaog? (b) Anong pagpakosog an itinatao sa dakulang kadaklan?
19 Idinugang pa ni Jesus: “Asin itatao ko sa saiya an bitoon sa makaaaga.” (Kapahayagan 2:28) Ipinaliwanag mismo ni Jesus sa huri kun ano an “bitoon” na ini, na an sabi: “Ako iyo an gamot asin an gikan ni David, asin an maliwanag na bitoon sa makaaaga.” (Kapahayagan 22:16) Iyo, si Jesus an nakaootob sa hula na pinirit ni Jehova na paluwason sa nagsasayumang mga ngabil ni Balaam: “An sarong bitoon maluwas ki Jacob, asin ta matindog an setro ki Israel.” (Bilang 24:17) Paano itatao ni Jesus an “bitoon sa makaaaga” sa mga makadadaog? Malinaw na paagi sa pagtao kan saiyang sadiri sa sainda, paagi sa pagdara sa sainda sa pinakaharani, pinakadayupot na relasyon sa saiya. (Juan 14:2, 3) Ini tunay nanggad na makosogon na pandagka na magtagal! Nakapahihiro man para sa dakulang kadaklan na maaraman na “an maliwanag na bitoon sa makaaaga” madali nang gamiton an saiyang kapangyarihan sa Kahadean sa pagbabalik kan Paraiso digdi sa daga!
Papagdanayon an Integridad
20. Anong mga pangyayari sa Kakristianohan an nagpapagirumdom sato kan pira sa mga kaluyahan sa kongregasyon sa Tiatira?
20 An mensaheng ini seguradong nakapakosog na gayo sa mga Kristiano sa Tiatira. Isip-isipa na sana—an pinamuraway na Aki nin Dios sa langit personal na nakipag-olay sa mga Kristiano sa Tiatira manongod sa pira nindang problema! Segurado na kisuerra an nagkapira sa kongregasyon naghinanyog sa siring kamamomoton na pagpapastor. An mensaheng ini na pinakahalawig sa pito nakatatabang man sato na mamidbid an tunay na Kristianong kongregasyon ngonyan. Kan 1918 kan si Jesus dumatong sa templo ni Jehova para sa paghokom, an mayoriya sa mga organisasyon na naghihingakong Kristiano nadigtaan nin pagsamba sa ladawan asin espirituwal na inmoralidad. (Santiago 4:4) An iba ibinasar an saindang mga paniniwala sa mga katokdoan nin mga babaeng may independienteng kaisipan kan ika-19 siglo, arog ni Ellen White kan Seventh-Day Adventists asin ni Mary Baker Eddy kan Christian Scientists, asin ngonyan dakol na mga babae an naghuhulit sa pulpito. (Ipaheling an pagkakalaen kan 1 Timoteo 2:11, 12.) Sa laen-laen na klase nin Katolisismo, si Maria parateng inoomaw nin orog kisa Dios asin ki Cristo. Dai sia tinawan nin siring na onra ni Jesus. (Juan 2:4; 19:26) An mga organisasyon daw na nag-aako nin siring na salang impluwensia nin babae talagang puwedeng akoon na Kristiano?
21. Anong mga leksion para sa mga indibiduwal an yaon sa mensahe ni Jesus sa Tiatira?
21 An indibiduwal na mga Kristiano, baga man kabilang sa grupong Juan o sa ibang karnero, marahay na horophoropon an mensaheng ini. (Juan 10:16) An iba tibaad masugotan na lumakaw sa dalan nin kapasilan, arog kan mga disipulo kaidto ni Jesabel sa Tiatira. Yaon man an sugot na makikompromiso. Ngonyan, an mga isyu na arog kan pagkakan nin dugo o pagpasalin nin dugo kaipuhan na atubangon. An iba tibaad maghona na an kaigotan sa paglilingkod sa langtad o pagpapahayag nagtatao sainda nin diretso na dai na magin estrikto sa ibang bagay, arog baga sa pagheling nin madahas asin inmoral na mga pelikula asin video tape, o pagpangana sa alkohol. An patanid ni Jesus sa mga Kristiano sa Tiatira nagsasabi sato na dai kita dapat na mag-abuso. Boot ni Jehova na kita magin malinig, bilog na kalag, bakong baranga, arog kan dakol na Kristiano sa Tiatira.
22. Paano idinodoon ni Jesus an halaga kan pagkaigwa nin talingang nagdadangog?
22 Ultimo, si Jesus nagsabi: “An igwa nin talinga magdangog sa isinasabi kan espiritu sa mga kongregasyon.” (Kapahayagan 2:29) Sa ikaapat na beses, inotro digdi ni Jesus an nakapupukaw na koro, asin iyan an konklusyon sa tolo pang maabot na mensahe. Igwa daw kamo nin talingang nagdadangog? Kun siring padagos kamong maghinanyog nin atento mantang an Dios, paagi sa saiyang espiritu, nagpapadagos na magtao nin hatol paagi sa saiyang pinakapaagihan.