Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 12: “Padagos Mong Pangaptan an Nasa Saimo Na”
An “Oras nin Pagbalo”
15. (a) Ano an ipinanuga ni Jesus sa mga Kristiano sa Filadelfia, asin ano an isinadol sa saindang gibohon? (b) Anong “korona” an linalaoman na akoon kan mga Kristiano?
15 Si Jesus nagpapadagos sa pagsabi: “Huli ta ika nag-otob kan tataramon dapit sa sakong pakatagal, iingatan taka man sa oras nin pagbalo, na madatong sa bilog na ineerokan na daga, tanganing baloon an mga nag-eerok sa ibabaw kan daga. Ako madatong sa madali. Padagos mong pangaptan an nasa saimo na, tanganing mayo nin makakua kan saimong korona.” (Kapahayagan 3:10, 11) Minsan ngani an mga Kristiano kan kaaldawan ni Juan dai mabubuhay sagkod sa aldaw kan Kagurangnan (poon kan 1914), an saindang pagsarig na si Jesus madatong magtatao sainda nin kapangyarihan na magpadagos sa paghuhulit. (Kapahayagan 1:10; 2 Timoteo 4:2) An “korona,” o premyong buhay na daing katapusan, naghahalat sa sainda sa langit. (Santiago 1:12; Kapahayagan 11:18) Kun sinda maimbod sagkod sa kagadanan, mayo nin siisay man na makaoolang sa pag-ako ninda kan balos na iyan.—Kapahayagan 2:10.
16, 17. (a) Ano an “oras nin pagbalo, na madatong sa bilog na ineerokan na daga”? (b) Ano an kamugtakan kan mga linahidan sa pagpopoon kan “oras nin pagbalo”?
16 Alagad ta ano an “oras nin pagbalo”? Daing duwa-duwa, an mga Kristianong idto sa Asia kinaipuhan na atubangon an dugang pang teribleng paglamag kan imperyal na Roma.a Minsan siring, an mayor na kaotoban iyo an oras nin pagsaligsig asin paghokom na sa katapustapusi nag-abot sa aldaw kan Kagurangnan, na an kulminasyon magpoon 1918 padagos. An pagbalo tanganing determinaran kun baga an saro para sa napatindog nang Kahadean nin Dios o para sa kinaban ni Satanas. Iyan sa halipot sanang panahon, sarong “oras,” pero iyan dai pa tapos. Sagkod na iyan matapos, dai niato noarin man lingawan na kita nabubuhay sa “oras nin pagbalo.”—Lucas 21:34-36.
17 Kan 1918 an grupong Juan nin linahidan na mga Kristiano—kapareho kan maimbod na kongregasyon na idto sa Filadelfia—kinaipuhan na umatubang sa pagtumang kan modernong “sinagoga ni Satanas.” An relihiyosong mga namomoon sa Kakristianohan, na naghingakong espirituwal na mga Judio, tusong minaniobra an mga namomoon na olangon an tunay na mga Kristiano. Minsan siring, an mga ini naghingoang gayo na ‘otobon an tataramon dapit sa pakatagal ni Jesus’; kaya, paagi sa espirituwal na tabang, sa mahalagang “kadikit na kapangyarihan,” sinda nakaligtas asin napukaw na lumaog sa tata na ngonyan nabukasan sa atubangan ninda. Sa anong paagi?
Sarong “Bukas na Tata”
18. Anong pagnombra an ginibo ni Jesus kan 1919, asin paano an ninombrahan nagin arog kan maimbod na oripon ni Ezequias?
18 Kan 1919 inotob ni Jesus an saiyang panuga asin minidbid an sadit na grupo nin tunay na linahidan na mga Kristiano bilang saiyang “maimbod asin madonong na oripon.” (Mateo 24:45-47) An mga ini naglaog sa sarong pribilehiyo na nakaaagid sa nakamtan kan maimbod na oripon na si Eliaquim kan panahon ni Hadeng Ezequias.b Si Jehova nagsabi manongod ki Eliaquim: “Ibubugtak ko an liyabe kan harong ni David sa saiyang abaga, asin sia mabukas na mayo nin siisay man na makapipinto, asin sia mapinto na mayo nin siisay man na makabubukas.” Si Eliaquim nagsaabaga nin magabat na mga paninimbagan para ki Ezequias, an makahadeng aki ni David. Siring man ngonyan, an linahidan na grupong Juan binugtakan kan “liyabe kan harong ni David” sa abaga kaiyan sa bagay na iyan pinaniwalaan kan daganon na mga intereses kan Mesiyanikong Kahadean. Pinakosog ni Jehova an saiyang mga lingkod para sa pribilehiyong ini, na pinakokosog an saindang kadikit na kapangyarihan na magin dinamikong kosog na bastante para sa mahiwason na pagpatotoo sa bilog na globo.—Isaias 22:20, 22; 40:29.
19. Paano inasikaso kan grupong Juan an mga paninimbagan na itinao sainda ni Jesus kan 1919, asin may anong resulta?
19 Magpoon kan 1919 an linahidan na natatada, sa pag-arog sa halimbawa ni Jesus, nagpoon sa sarong makosog na kampanya nin pagpapahayag kan maogmang bareta kan Kahadean. (Mateo 4:17; Roma 10:18) Bilang resulta, an nagkapira sa modernong sinagoga ni Satanas, an Kakristianohan, nagdolok sa linahidan na natatadang ini, nagsolsol asin ‘duminoko,’ na minimidbid an autoridad kan oripon. Sinda man naglingkod ki Jehova kasaro kan mas gurang na mga miembro kan grupong Juan. Ini nagpadagos sagkod na matipon an bilog na kabilangan kan linahidan na mga tugang ni Jesus. Pagkatapos kaini, “an sarong dakulang kadaklan . . . hale sa gabos na nasyon” nagdolok tanganing ‘dumoko’ sa linahidan na oripon. (Kapahayagan 7:3, 4, 9) Magkaibanan, an oripon asin an dakulang kadaklan na ini naglilingkod bilang an sarong aripompon nin mga Saksi ni Jehova.
20. Taano an mga Saksi ni Jehova ngonyan ta kaipuhan na magin espesyalmenteng makosog sa pagtubod asin aktibo sa paglilingkod sa Dios?
20 Sararo kapareho kan mga Kristiano sa Filadelfia sa bogkos nin tunay na pagkamoot sa tugang, an mga Saksi ni Jehova ngonyan nakasasabot na an saindang gibong paghuhulit kaipuhan na apretaran. Sa dai na mahahaloy, tatapuson kan dakulang kahorasaan an maraot na kinaban ni Satanas. Sa panahon na iyan, an lambang saro logod sa sato manompongan na makosog sa pagtubod asin aktibo sa paglilingkod sa Dios, tanganing an satong ngaran dai paraon sa libro nin buhay ni Jehova. (Kapahayagan 7:14) Isapuso nanggad niato an hatol ni Jesus sa kongregasyon sa Filadelfia tanganing mapangaptan niato nin marigon an satong mga pribilehiyo sa paglilingkod asin kamtan an balos na buhay na daing katapusan.
An mga Bendisyon sa mga Nakadaog
21. Paano an linahidan na mga Kristiano ngonyan ‘nag-otob kan tataramon dapit sa pakatagal ni Jesus,’ asin anong paglaom an naghahalat sa sainda?
21 An grupong Juan ngonyan ‘nag-otob kan tataramon dapit sa pakatagal ni Jesus,’ an boot sabihon, sinda nag-arog sa saiyang halimbawa asin nagtagal. (Hebreo 12:2, 3; 1 Pedro 2:21) Kaya sinda napakosog na gayo kan dugang pang mga tataramon ni Jesus sa kongregasyon sa Filadelfia: “An makadaog—gigibohon ko siang harigi sa templo kan sakong Dios, asin dai na sia noarin man maluwas dian.”—Kapahayagan 3:12a.
22. (a) Ano an templo kan Dios ni Jesus? (b) Paano an linahidan na mga Kristiano na makadadaog magigin mga harigi sa templong ini?
22 Kanigoan kadakulang pribilehiyo para sa saro na magin harigi sa templo ni Jehova! Sa suanoy na Jerusalem, an literal na templo iyo an sentro kan pagsamba ki Jehova. Sa laog kan templo, idinodolot kan halangkaw na saserdote an dugo kan mga atang na hayop, sarong aldaw kada taon, sa atubangan kan milagrosong ilaw na nagrirepresentar sa presensia ni Jehova sa “Kabanalbanale.” (Hebreo 9:1-7) Kan bautismohan si Jesus, naglataw an saro pang templo, sarong dakulang espirituwal, garo-templong areglo para sa pagsamba ki Jehova. An kabanalbanale kan templong ini yaon sa langit, na duman si Jesus tuminindog “sa atubang nin Dios.” (Hebreo 9:24) Si Jesus an Halangkaw na Saserdote, asin sasaro sana an atang na idinolot para sa lubos na pagtakop sa mga kasalan: an pinabolos na dugo kan sangkap na tawong si Jesus. (Hebreo 7:26, 27; 9:25-28; 10:1-5, 12-14) Sagkod na sinda nagdadanay na maimbod, an linahidan na mga Kristiano digdi sa daga naglilingkod bilang mga katabang na saserdote sa daganon na patyo kan templong ini. (1 Pedro 2:9) Alagad oras na sinda makadaog, sinda man minalaog sa langitnon na kabanalbanale asin nagigin dai nahihirong mga tukod, siring sa mga harigi, sa garo-templong areglo para sa pagsamba. (Hebreo 10:19; Kapahayagan 20:6) Mayo nin peligro na sinda “maluwas dian.”
23. (a) Ano an sumunod na ipinanunuga ni Jesus sa linahidan na mga Kristiano na makadadaog? (b) Ano an ibubunga kan pagsurat kan ngaran ni Jehova asin kan ngaran kan bagong Jerusalem sa mga nakadaog na Kristiano?
23 Si Jesus nagpapadagos, na sinasabi: “Asin isusurat ko sa saiya an ngaran kan sakong Dios asin an ngaran kan siudad nin sakong Dios, an bagong Jerusalem na naghihilig hale sa langit hale sa sakong Dios, asin an sakong bagong ngaran.” (Kapahayagan 3:12b) Iyo, an mga nakadaog na ini nasusuratan kan ngaran ni Jehova—an saindang Dios asin an Dios ni Jesus. Ini malinaw na nagpapaheling na si Jehova asin si Jesus duwang separadong persona asin bakong duwang kabtang nin tolo sa sarong Dios, o nin Trinidad. (Juan 14:28; 20:17) An gabos na linalang kaipuhan na makaheling na an mga linahidan na ini rogaring ni Jehova. Sinda saiyang mga saksi. Nasusurat man sa sainda an ngaran kan bagong Jerusalem, an langitnon na siudad na naghihilig hale sa langit sa sentido na iyan nagpapaabot kan maboot na paghade kaiyan sa gabos na maimbod na tawo. (Kapahayagan 21:9-14) Sa siring an gabos na daganon na Kristianong karnero makaaaram man na an linahidan na mga nakadaog na ini siudadano kan Kahadean, an langitnon na Jerusalem.—Salmo 87:5, 6; Mateo 25:33, 34; Filipos 3:20; Hebreo 12:22.
24. Ano an irinirepresentar kan bagong ngaran ni Jesus, asin paano iyan isinusurat sa maimbod na linahidan na mga Kristiano?
24 Ultimo, an linahidan na mga nakadaog nasusuratan kan bagong ngaran ni Jesus. Ini nangangahulogan kan bagong katongdan ni Jesus asin kan pambihirang mga pribilehiyo na itinao sa saiya ni Jehova. (Filipos 2:9-11; Kapahayagan 19:12) Mayo nin ibang nakaaaram kan ngaran na iyan, sa sentido na mayo nin ibang nagkaigwa kan mga eksperyensiang iyan o pinaniwalaan kan mga pribilehiyong iyan. Minsan siring, kun isurat ni Jesus an saiyang ngaran sa saiyang maimbod na mga tugang, sinda minalaog sa haraning relasyon sa saiya sa langitnon na lugar na iyan asin nakihihiras pa ngani sa saiyang mga pribilehiyo. (Lucas 22:29, 30) Bakong makangangalas na tinatapos ni Jesus an saiyang mensahe sa mga linahidan na iyan paagi sa pag-otro sa sadol na: “An igwa nin talinga magdangog sa isinasabi kan espiritu sa mga kongregasyon.”—Kapahayagan 3:13.
25. Paano ikaaaplikar kan lambang Kristiano ngonyan an prinsipyong nasa likod kan hatol na itinao ni Jesus sa kongregasyon sa Filadelfia?
25 An mensaheng iyan seguradong nagin dakulaon na pagpakosog sa maimbod na mga Kristiano sa Filadelfia! Asin iyan tunay na may mapuwersang leksion sa grupong Juan ngonyan, sa panahon kan aldaw kan Kagurangnan. Alagad an mga prinsipyo kaiyan mahalaga para sa kada Kristiano, baga man kabilang sa linahidan o sa ibang karnero. (Juan 10:16) An lambang saro sa sato marahay na padagos na magpaluwas nin mga bunga kan Kahadean kapareho kan mga Kristianong idto sa Filadelfia. Kita gabos igwa nin kisuerra kadikit na kapangyarihan. Kita gabos may magigibo sa paglilingkod ki Jehova. Gamiton niato an kapangyarihan na ini! Mapadapit sa nadugangan na mga pribilehiyo sa Kahadean, magin kitang alisto na lumaog sa ano man na tata na buksan para sa sato. Puwede pa ngani kitang mamibi ki Jehova na buksan an siring na tata. (Colosas 4:2, 3) Mantang inaarog niato an pakatagal ni Jesus asin pinatutunayan na kita maimbod sa saiyang ngaran, ipaheheling niato na kita man may talingang magdadangog sa sinasabi kan banal na espiritu nin Dios sa mga kongregasyon.
[Mga Nota sa Ibaba]
a An Cyclopedia ni McClintock asin Strong (Tomo X, pahina 519) nagsasabi: “An Kristianismo puwersahan na narisa kan mga emperador huli sa kariribokan na pinupundar sa tahaw nin mga tawo kan paganong mga saserdote, na may takot na pinagmasdan an pambihirang pag-oswag kan pagtubod na iyan, asin si Trajan [98-117 C.E.] nadarang magpaluwas nin mga edikto para sa luway-luway na pagpogol sa bagong katokdoan na minagibo sa mga tawo na mga naoongis sa mga dios. An administrasyon kan mas hoben na Pliny bilang gobernador sa Bitinia [kalinderos kan Romanong probinsia nin Asia sa amihanan] nakomplikar nin mga bagay na gikan sa marikas na paglakop nin Kristianismo asin sa ibinungang pagkaanggot kan paganong populasyon sa laog kan saiyang probinsia.”
b An ngaran na Ezequias nangangahulogan “Si Jehova Nagpapakosog.” Helingon an 2 Hade 16:20, nota sa ibaba, New World Translation Reference Bible.
[Tsart sa pahina 24]
Kan 1919 an natutukaw na sa tronong Hade na si Jesus binukasan an sarong tata nin oportunidad para sa Kristianong paglilingkod. An nagdadakol na maimbod na Kristiano nag-aprobetsar sa oportunidad na iyan.
Taon Kadagaan na Naabot nin Paghuhulit Mga Kristianong Nakikabtang sa Paghuhulitc Bilog na Panahon na Parahulitd
1918 14 3,868 591
1928 32 23,988 1,883
1938 52 47,143 4,112
1948 96 230,532 8,994
1958 175 717,088 23,772
1968 200 1,155,826 63,871
1978 205 2,086,698 115,389
1988 212 3,430,926 455,561
1998 233 5,544,059 698,781
2005 235 6,390,022 843,234
[Mga Nota sa Ibaba]
c An mga kabilangan sa itaas bulanan na mga promedyo.
d An mga kabilangan sa itaas bulanan na mga promedyo.
[Tsart sa pahina 25]
An gibohon kan mga Saksi ni Jehova bilog na puso. Halimbawa, helinga an oras na saindang ginamit sa paghuhulit asin pagtotokdo saka an kadakol na libreng pag-adal sa Biblia na saindang ginibo sa harong nin mga tawo.
Oras na Ginamit Ginibong
sa Paghuhulit Pag-adal sa Biblia
Taon (Taonan na Total) (Bulanan na
Promedyo)
1918 19,116 Mayong Rekord
1928 2,866,164 Mayong Rekord
1938 10,572,086 Mayong Rekord
1948 49,832,205 130,281
1958 110,390,944 508,320
1968 208,666,762 977,503
1978 307,272,262 1,257,084
1988 785,521,697 3,237,160
1998 1,186,666,708 4,302,852
2005 1,278,235,504 6,061,534