Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 13: Bumakal nin Bulawan na Dinalisay sa Kalayo
Sarong Trono Para sa mga Nakadaog
23, 24. (a) Ano pang balos an sinasabi ni Jesus? (b) Kasuarin tuminukaw si Jesus sa saiyang Mesiyanikong trono, asin kasuarin nia pinonan an paghokom sa naghihingakong mga Kristiano? (c) Anong makangangalas na panuga an itinao ni Jesus sa saiyang mga disipulo kan ponan nia an Memorial kan saiyang kagadanan?
23 Si Jesus nagtataram manongod sa dugang pang balos, na sinasabi: “An makadaog totogotan kong tumukaw sa kaibanan ko sa sakong trono, kun paanong ako nakadaog asin tuminukaw sa kaibanan kan sakong Ama sa saiyang trono.” (Kapahayagan 3:21) Bilang kaotoban kan mga tataramon ni David sa Salmo 110:1, 2, an nagdanay sa integridad na si Jesus, mantang nakadaog sa kinaban, binuhay liwat kan 33 C.E. asin ilinangkaw na tumukaw kaiba kan saiyang Ama sa Saiyang langitnon na trono. (Gibo 2:32, 33) Sa saro pang mahalagang taon, 1914, si Jesus nagdatong tanganing tumukaw sa saiyang sadiring Mesiyanikong trono bilang Hade asin Hokom. An paghokom nagpoon kan 1918 sa naghihingakong mga Kristiano. An linahidan na mga nakadaog na nagadan bago kaidto bubuhayon liwat sa panahon na iyan asin maiba ki Jesus sa saiyang Kahadean. (Mateo 25:31; 1 Pedro 4:17) Ipinanuga nia ini kan pinoponan an Memorial kan saiyang kagadanan, na sinasabi sa saiyang mga disipulo: “Ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean, tanganing kamo kumakan asin uminom sa lamesa ko sa sakong kahadean, asin tumukaw sa mga trono tanganing maghokom sa doseng tribo nin Israel.”—Lucas 22:28-30.
24 Kanigoan kamakangangalas na asignasyon—an tumukaw kaiba kan nagsasakop na Hade sa panahon kan “paglalang liwat” asin makikabtang sa saiya, basado sa saiyang sangkap na atang, sa pagdara sa kinaban nin makinuyog na katawohan sa Edenikong pagkasangkap! (Mateo 19:28; 20:28) Arog kan sinasabi sato ni Juan, ginigibo ni Jesus an mga nakadaog na magin “sarong kahadean, mga saserdote sa saiyang Dios asin Ama,” tanganing tumukaw sa mga trono na nasa palibot kan mamuraway na langitnon na trono ni Jehova. (Kapahayagan 1:6; 4:4) Kita logod gabos—baga man kabilang sa linahidan o sa bagong dagang sosyedad na naglalaom na makikabtang sa pagbabalik kan Paraiso—magsapuso kan mga tataramon ni Jesus sa mga taga-Laodicea!—2 Pedro 3:13; Gibo 3:19-21.
25. (a) Kapareho nin naenot na mga mensahe, paano tinapos ni Jesus an saiyang mensahe sa Laodicea? (b) Ano an maninigong magin reaksion ngonyan nin indibiduwal na mga Kristiano sa mga tataramon ni Jesus sa kongregasyon sa Laodicea?
25 Kapareho nin naenot na mga mensahe, tinatapos ni Jesus an sarong ini paagi sa mga tataramon nin pagsadol: “An igwa nin talinga magdangog sa sinasabi kan espiritu sa mga kongregasyon.” (Kapahayagan 3:22) Nabubuhay kita sa huri nang kabtang kan panahon nin katapusan. Napalilibotan kita nin ebidensia na an Kakristianohan malipot kun manongod sa pagkamoot. Kabaliktaran, kita logod bilang tunay na mga Kristiano kumuyog nin odok sa mensahe ni Jesus sa kongregasyon sa Laodicea, iyo, sa gabos na pitong mensahe kan satong Kagurangnan sa mga kongregasyon. Ini magigibo niato paagi sa pagkaigwa nin mahigos na kabtang sa pag-otob sa dakulang hula ni Jesus para sa satong aldaw: “Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:12-14.
26. Kasuarin direktang nagtaram liwat si Jesus ki Juan, alagad sa ano sia nakikakabtang?
26 Tapos na an hatol ni Jesus sa pitong kongregasyon. Dai na sia liwat nakipag-olay ki Juan sa Kapahayagan sagkod sa ultimong kapitulo; alagad sia nakikakabtang sa dakol na bisyon, halimbawa, sa paggibo kan mga paghokom ni Jehova. Umiba kita ngonyan sa grupong Juan sa pagsiyasat sa ikaduwang pambihirang bisyon na ipinahayag kan Kagurangnan na Jesu-Cristo.