“Siyasaton Mo Ako, o Dios”
“Siyasaton mo ako, O Dios, asin midbida an sakong puso. . . . Giyahi ako sa dalan nin panahon na daing katapusan.”—SALMO 139:23, 24.
1. Paano tinatratar ni Jehova an saiyang mga lingkod?
KITA gabos gustong pakiibanan nin saro na may pagsabot, saro na kinokonsiderar an satong mga kamugtakan, saro na nagtatabang kun kita nagkukulang, saro na dai naghahagad sato nin labi sa kaya niatong gibohon. Arog kaiyan an pagtratar ni Jehova Dios sa saiyang mga lingkod. An Salmo 103:14 nagsasabi: “Aram niang gayo an satong kamugtakan, na ginigirumdom na kita kabokabo.” Asin si Jesu-Cristo, na sangkap na nagpapamidbid kan saiyang Ama, nagtatao kan mainit na pangagda: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan. Pasana nindo an sakong sakal [o, “Pumairarom kamo sa sakal ko kaiba ko,” nota sa ibaba] asin magin sakong mga disipulo, huli ta ako maboot asin mapakumbaba sa puso, asin makakakua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.”—Mateo 11:28-30.
2. Isabi an kalaenan kan punto-de-vista ni Jehova sa punto-de-vista nin mga tawo kun dapit (a) ki Jesu-Cristo, asin (b) sa mga parasunod ni Cristo.
2 An pagheling ni Jehova sa saiyang mga lingkod sa parate laen na marhay sa pagheling nin mga tawo. Hiniheling nia an mga bagay sa laen na punto-de-vista asin kinokonsiderar an mga bagay na tibaad dai aram nin iba. Kan si Jesu-Cristo yaon digdi sa daga, sia “pinagduhagi asin isinikwal nin mga tawo.” An mga dai nagturubod saiya bilang an Mesiyas ‘ibinilang siang daing halaga.’ (Isaias 53:3; Lucas 23:18-21) Pero, sa mga mata nin Dios, sia an “Aki [nin Dios], an namomotan,” na sinabihan kan Ama: “Inoyonan taka.” (Lucas 3:22; 1 Pedro 2:4) Kabilang sa mga parasunod ni Jesu-Cristo an mga tawo na minimenus ta sinda dukha sa materyal asin nagtatagal nin dakol na kasakitan. Pero, sa mga mata ni Jehova asin kan saiyang Aki, tibaad mayaman an mga siring. (Roma 8:35-39; Kapahayagan 2:9) Taano ta magkalaen an punto-de-vista?
3. (a) Taano an pagheling ni Jehova sa mga tawo ta sa parate laen na marhay sa pagheling nin mga tawo? (b) Taano ta mahalagang marhay na siyasaton niato kun anong klase kitang tawo sa laog?
3 An Jeremias 11:20 minasimbag: “Si Jehova . . . sinisiyasat an mga bato asin an puso.” Naheheling nia kun ano kita sa laog, pati an mga kabtang kan satong personalidad na natatago sa mata nin iba. Sa pagsiyasat nia, tinatawan nia nin pangenot na halaga an mga kuwalidad asin kamugtakan na kaipuhan sa marahay na relasyon sa saiya, an mga pinakahalawig an pakinabang sa sato. An pakaaram niato kaiyan nakapakokosog sa boot; iyan nakapapepensar man. Mantang tinatawan ni Jehova nin atension kun ano kita sa laog, mahalaga na siyasaton niato kun ano kita sa laog tangani na kita magin an klase nin mga tawo na boot nia sa saiyang bagong kinaban. Tinatabangan kita kan saiyang Tataramon na gumibo kan siring na pagsiyasat.—Hebreo 4:12, 13.
Kanigoan Kamahalaga kan mga Kaisipan nin Dios!
4. (a) Ano an nagmotibar sa salmista na sabihon na an mga kaisipan nin Dios mahalaga sa saiya? (b) Taano iyan ta maninigong magin mahalaga sa sato?
4 Pakahorophoropa kan lakbang asin rarom kan kaaraman nin Dios sa saiyang mga lingkod, saka kan pambihirang abilidad nin Dios na itao an ano man na tabang na kaipuhan ninda, an salmistang si David nagsurat: “Kaya, kanigoan kamahalaga sa sako kan saimong mga kaisipan!” (Salmo 139:17a) An mga kaisipan na iyan, na ipinahayag sa saiyang nasusurat na Tataramon, mas halangkaw nanggad kisa ano man na gikan sa mga tawo, minsan garo baga madonongon an saindang mga ideya. (Isaias 55:8, 9) An mga kaisipan nin Dios nagtatabang sato na isentro an satong atension sa tunay na mahahalagang bagay sa buhay asin magmahigos sa paglilingkod sa saiya. (Filipos 1:9-11) Ipinaheheling kaiyan sato kun paano hehelingon an mga bagay arog kan pagheling nin Dios. Tinatabangan kita kaiyan na magin sadiosan sa satong sadiri, admitiron kun ano an tunay niatong pagkatawo sa puso. Andam daw kamong gibohon iyan?
5. (a) Ano an isinasadol sato kan Tataramon nin Dios na ingatan nin “orog sa gabos”? (b) Paano kita makikinabang sa tala kan Biblia manongod ki Cain? (c) Minsan kita bakong sakop kan Pagboot ni Moises, paano kita tinatabangan kaiyan na masabotan kun ano an ikinaoogma ni Jehova?
5 An mga tawo may tendensiang idoon nin sobra an panluwas na itsura, alagad ta hinahatolan kita kan Kasuratan: “Orog sa gabos na maninigong ingatan, ingatan mo an saimong puso.” (Talinhaga 4:23) Kapwa paagi sa mga pagboot asin halimbawa, tinatabangan kita kan Biblia na gibohon iyan. Sinasabi kaiyan sato na si Cain mayo sa boot na nagdolot nin mga atang sa Dios mantang sa puso nia nagsusulwak an saiyang pagsentir, dangan pagkaongis, sa saiyang tugang na si Abel. Asin sinasadol kita kaiyan na dai umarog saiya. (Genesis 4:3-5; 1 Juan 3:11, 12) Itinatala kaiyan an kahagadan sa Pagboot ni Moises na pagkuyog. Pero idinodoon man kaiyan na an pangenot na kahagadan kan Pagboot iyo na an mga nagsasamba ki Jehova dapat na kamotan sia sa bilog nindang puso, isip, kalag, asin kosog; asin sinasabi kaiyan na an sumunod na mahalaga iyo an pagboot na kamotan ninda an saindang kataed nin siring sa sainda man sana.—Deuteronomio 5:32, 33; Marcos 12:28-31.
6. Sa pag-aplikar kan Talinhaga 3:1, anong mga hapot an maninigo niatong ihapot sa satong sadiri?
6 Sa Talinhaga 3:1, sinasadol kita na bako sanang otobon an mga pagboot nin Dios kundi siertohon na an pagkuyog kapahayagan kan tunay na nasa satong puso. An kada saro sato kaipuhan na hapoton an sadiri, ‘Totoo daw iyan sa sakong pagkuyog sa mga kahagadan nin Dios?’ Kun marealisar niato na sa nagkapirang bagay an satong motibasyon o kaisipan kulang—asin mayo sato nin makasasabi na kita daing kanawayan—dangan kaipuhan na ihapot niato, ‘Ano an ginigibo ko tanganing maparahay an kamugtakan?’—Talinhaga 20:9; 1 Juan 1:8.
7. (a) Paano an pagdenunsiar ni Jesus sa mga Fariseo sa Mateo 15:3-9 puwedeng makatabang sato sa pag-iingat sa satong puso? (b) Anong mga situwasyon an tibaad mag-obligar sato na gumibo nin marigon na mga paagi na madisiplina an satong isip asin puso?
7 Kan an Judiong mga Fariseo magsagin nagtataong onra sa Dios mantang tusong nagpapalakop nin gibo na pansadiring interes an motibo, pinagdenunsiar sinda ni Jesus bilang mga parasaginsagin asin ibinuyagyag na an saindang pagsamba basang sana. (Mateo 15:3-9) Nagpatanid man si Jesus na tanganing mapaogma an Dios, na nakakaheling sa puso, bakong igo na magkaigwa nin moral na pamumuhay sa luwas mantang, tanganing magkaigwa nin malaad na kasingawan, padagos man kitang naghohorophorop nin inmoral na mga bagay. Tibaad kaipuhan kitang gumibo nin madahas na mga paagi na madisiplina an satong isip asin puso. (Talinhaga 23:12; Mateo 5:27-29) Kaipuhan man an siring na disiplina kun bilang resulta kan satong sekular na trabaho, kan satong mga pasohan sa edukasyon, o kan satong pinipiling aling-alingan, kita nagigin mga paraarog sa kinaban, na tinotogotan iyan na moldehon kita sono sa mga pamantayan kaiyan. Nungka logod niatong lingawan na inaapod ni disipulo Santiago na “mga parapakisambay” an mga naghihingakong sa Dios pero boot na magin mga katood kan kinaban. Taano? Huli ta “an bilog na kinaban namumugtak sa kapangyarihan kan maraot.”—Santiago 4:4; 1 Juan 2:15-17; 5:19.
8. Tanganing lubos na makinabang sa mahahalagang kaisipan nin Dios, ano an kaipuhan niatong gibohon?
8 Tanganing lubos na makinabang sa mga kaisipan nin Dios digdi asin sa iba pang bagay, kaipuhan na kita magtagama nin oras na basahon iyan o dangogon iyan. Orog pa kaiyan, kaipuhan na kita mag-adal dian, magtaram manongod kaiyan, asin maghorophorop dian. An dakol na parabasa kan An Torrengbantayan regular na nag-aatender sa pankongregasyon na mga pagtiripon kan mga Saksi ni Jehova, na duman pinag-oolayan an Biblia. Tinutubos ninda an panahon sa ibang gibo tanganing magibo iyan. (Efeso 5:15-17) Asin an inaako ninda bilang balos orog pa sa materyal na kayamanan an halaga. Bako daw na iyan man an saboot nindo?
9. Taano an iba na nag-aatender sa Kristianong pagtiripon ta mas marikas an pag-oswag kisa iba?
9 Minsan siring, an ibang nag-aatender sa mga pagtiripon na ini mas marikas an espirituwal na pag-oswag kisa iba. Orog nindang ikinaaaplikar an katotoohan sa saindang buhay. Ano an dahelan kaini? Sa parate, an dakulang bagay iyo an kahigosan ninda sa personal na pag-adal. Nasasabotan ninda na dai kita nabubuhay sa tinapay sana; an espirituwal na kakanon aroaldaw arog kahalaga kan regular na pagkakan nin pisikal na kakanon. (Mateo 4:4; Hebreo 5:14) Kaya naghihingoa sinda na gumamit nin kisuerra kadikit na oras aroaldaw sa pagbasa kan Biblia o mga publikasyon na nagpapaliwanag kaiyan. Nag-aandam sinda para sa mga pagtiripon kan kongregasyon, na patienot na inaadalan an mga leksion asin binabasa an mga teksto. Dai sana ninda binabasa an materyal; hinohorophorop ninda iyan. Kaiba sa saindang paagi nin pag-adal an odok na paghorophorop sa maninigong magin epekto sa saindang buhay kan saindang nanonodan. Mantang nagtatalubo an saindang espirituwalidad, an nagigin saboot ninda kapareho kan salmista na nagsurat: “Kanigoan an sakong pagkamoot sa saimong pagboot! . . . An saimong mga pagirumdom makangangalas.”—Salmo 1:1-3; 119:97, 129.
10. (a) Gurano kahaloy na kapakipakinabang na ipadagos an pag-adal sa Tataramon nin Dios? (b) Paano ini ipinaheheling kan Kasuratan?
10 Baga man sarong taon, 5 taon, o 50 taon na niatong inaadalan an Tataramon nin Dios, iyan nungka na paorootro na sana—dai kun mahalaga sa sato an mga kaisipan nin Dios. Gurano man an nanodan sa kasuratan kan siisay man sa sato, dakol pa an dai niato aram. “O Dios, gurano kadakol kan bilog na kabilangan kaiyan!” sabi ni David. “Kun poprobaran kong bilangon iyan, labi pa iyan kadakol sa baybay.” An mga kaisipan nin Dios dai niato kayang bilangon. Kun sasarosaroon niato an mga kaisipan nin Dios sa bilog na aldaw asin napatorog kita na ginigibo iyan, pagmata niato sa aga, kadakol pa kan iisip-isipon. Kaya, si David nagsurat: “Nagmata na ako, pero yaon pa man giraray ako sa kaibanan mo.” (Salmo 139:17, 18) Sa bilog na panahon na daing sagkod dakol pa an kaipuhan niatong manodan manongod ki Jehova asin sa saiyang mga dalan. Nungka na kita makaaabot sa punto na aram na niato an gabos.—Roma 11:33.
Pagkaongis sa Ikinaoongis ni Jehova
11. Taano ta mahalaga na bako sanang maaraman an mga kaisipan nin Dios kundi magin kapareho sa saiya an satong saboot?
11 An pag-adal niato sa Tataramon nin Dios bako sanang sa katuyohan na panoon an satong payo nin mga katotoohan. Mantang pinaaabot niato iyan sa satong puso, nagpopoon man kitang magkaigwa kan mga saboot nin Dios. Mahalaga nanggad iyan! Kun dai niato mapatatalubo an siring na mga saboot, ano an puwedeng ibunga? Minsan tibaad narerepetir niato an sinasabi kan Biblia, pero tibaad ibinibilang pa niatong masiram an ipinangangalad, o tibaad isipon niato na sarong pagabat an hinahagad. Totoo na dawa kun ikinaoongis niato an sala, tibaad makilaban kita huli sa pagkabakong sangkap nin tawo. (Roma 7:15) Alagad kun dai kita magibo nin odok na paghihingoa na ioyon an satong panlaog na pagkatawo sa tama, makalalaom daw kita na mapaogma si Jehova, “an parasiyasat sa puso”?—Talinhaga 17:3.
12. Gurano kahalaga an diosnon na pagkamoot asin diosnon na pagkaongis?
12 An diosnon na pagkaongis mapuwersang proteksion tumang sa paggibo nin sala, kun paanong an diosnon na pagkamoot ginigibong kaalingan an paggibo kan tama. (1 Juan 5:3) Paorootro kitang sinasadol kan Kasuratan na pataluboon kapwa an pagkamoot asin pagkaongis. “O kamong mga namomoot ki Jehova, ikaongis nindo an maraot.” (Salmo 97:10) “Ikabalde an maraot, magdanay sa marahay.” (Roma 12:9) Ginigibo daw niato iyan?
13. (a) Sa anong pamibi ni David manongod sa paglaglag sa mga maraot na kita lubos na oyon? (b) Arog kan ipinaheheling sa pamibi ni David, sairisay an maraot na ipinamibi niang laglagon nin Dios?
13 Malinaw na isinabi ni Jehova an katuyohan nia na paraon sa daga an mga maraot asin establisaron an sarong bagong daga na dian katanosan an magdadanay. (Salmo 37:10, 11; 2 Pedro 3:13) An mga mamomoton sa katanosan nagmamawot na dumatong na an panahon na iyan. Biyo sindang oyon sa salmistang si David, na namibi: “O gadanon mo logod, O Dios, an maraot! Sa siring pati an mga tawong makasalan sa dugo marayo sa sako, na nagsasarabi nin mga bagay manongod sa saimo sono sa sadiri nindang kaisipan; ginamit ninda an saimong ngaran sa basang na paagi—an saimong mga kaiwal.” (Salmo 139:19, 20) Si David dai nagmawot na personal na gadanon an mga maraot na iyan. Sia namibi na dumatong an pamalos sa kamot ni Jehova. (Deuteronomio 32:35; Hebreo 10:30) An mga ini bakong mga tawo na nakagibo sana nin maraot ki David. Saindang pinagmisrepresentar an Dios, na ginagamit sa basang na paagi an saiyang ngaran. (Exodo 20:7) Sa madayang paagi, sinda naghingako na naglilingkod sa saiya, pero ginagamit ninda an saiyang ngaran sa pagsuportar sa sadiri nindang mga pakana. Si David daing pagkamoot sa mga nagpiling magin mga kaiwal nin Dios.
14. Igwa daw nin mga maraot na matatabangan? Kun igwa, paano?
14 Binilyon an tawo na dai nakamimidbid ki Jehova. An dakol sa sainda daing pakaaram na naggigibo nin mga bagay na ipinaheheling na maraot kan Tataramon nin Dios. Kun sinda magpapadagos sa dalan na ini, makakabilang sinda sa mga mapapara sa dakulang kahorasaan. Pero si Jehova dai nawiwili sa kagadanan kan maraot, ni kita. (Ezequiel 33:11) Sagkod na itinotogot kan panahon, pinagmamaigotan niato na tabangan an mga tawong iyan na makanood asin iaplikar an mga dalan ni Jehova. Alagad ano kun may mga tawo na nagpapaheling nin makuring pagkaongis ki Jehova?
15. (a) Sairisay an mga ibinilang kan salmista na “tunay na mga kaiwal”? (b) Paano niato ikapaheheling ngonyan na “ikinaoongis” niato an mga nagrerebelde tumang ki Jehova?
15 Manongod sa sainda, an salmista nagsabi: “Bakong naoongis ako sa mga naoongis nin labi-labi sa saimo, O Jehova, asin bakong nababalde ako sa mga nagrerebelde tumang saimo? Ikinaoongis ko sinda na may lubos na pagkaongis. Sinda nagin tunay na mga kaiwal para sa sako.” (Salmo 139:21, 22) Huli ta sinda naoongis nin labi-labi ki Jehova kaya si David nababalde sa sainda. An mga apostata kabilang sa mga nagpapaheling kan saindang pagkaongis ki Jehova paagi sa pagrebelde tumang sa saiya. An apostasiya, sa katotoohan, pagrebelde tumang ki Jehova. An ibang apostata naghihingakong nakamimidbid asin naglilingkod sa Dios, pero isinisikwal ninda an mga katokdoan o kahagadan na yaon sa saiyang Tataramon. An iba naghihingakong nagtutubod sa Biblia, pero isinisikwal ninda an organisasyon ni Jehova asin aktibong naghihingoa na olangon an gibohon kaiyan. Kun tuyo nindang pinipili an siring na karatan pakatapos na maaraman an tama, kun an karatan nakatanom nang marhay na iyan dai na ikasusuhay na kabtang kan saindang pagkatawo, kun siring an Kristiano kaipuhan na ikaongis (sa sentido kan termino sa Biblia) an mga dai na minasuhay sa karatan. An tunay na mga Kristiano kapareho an saboot sa saboot ni Jehova sa siring na mga apostata; dai sinda nag-uusyoso sa mga kaisipan na apostata. Al kontraryo, “nababalde” sinda sa mga ginibo an sadiri na mga kaiwal nin Dios, pero ipinamamahala ninda ki Jehova an pamalos.—Job 13:16; Roma 12:19; 2 Juan 9, 10.
Kun Sinisiyasat Kita nin Dios
16. (a) Taano ta boot ni David na siyasaton sia ni Jehova? (b) Ano an manongod sa satong puso na maninigo niatong hagadon sa Dios na tabangan kitang mamansayan?
16 Habo ni David na makaarog kan maraot sa ano man na paagi. An dakol na tawo hinihingoang itago an panlaog nindang pagkatawo, pero si David mapakumbabang namibi: “Siyasaton mo ako, O Dios, asin midbida an sakong puso. Baloa ako, asin arama an sakuyang mga kaisipan na nakariribok, asin helinga kun baga igwa sa sakuya nin ano man na nakararaot na dalan, asin giyahi ako sa dalan nin panahon na daing katapusan.” (Salmo 139:23, 24) Kan nasasabihan an saiyang puso, bakong an pisikal na organo an boot sabihon ni David. Kaoyon sa piguratibong kahulogan kan mga tataramon na iyan, an boot niang sabihon an pagkatawo nia sa laog, an panlaog na tawo. Kita man maninigong magmawot na siyasaton nin Dios an satong puso asin mansayon kun baga kita igwa nin salang mga kamawotan, namomotan, emosyon, katuyohan, kaisipan, o motibo. (Salmo 26:2) Inaagda kita ni Jehova: “Aki ko, tawan sako an saimong puso, asin an saimo logod na mga mata maogma sa sakong mga dalan.”—Talinhaga 23:26.
17. (a) Imbes na itago an nakariribok na mga kaisipan, ano an maninigo niatong gibohon? (b) Maninigo daw niatong ipagngalas an pakakua nin salang mga tendensia sa satong puso, asin ano an maninigo niatong gibohon dian?
17 Kun may natatago sato na ano man na nakararaot, nakariribok na mga kaisipan huli sa salang mga kamawotan o salang motibo o huli sa salang gawe niato, tunay na boot niato na tabangan kita ni Jehova na itanos an bagay. Imbes na an mga tataramon na “ano man na nakararaot na dalan,” ginagamit kan traduksion ni Moffatt an mga tataramon na “salang dalan”; an The New English Bible nagsasabi: “Ano man na dalan na nakapamomondo saimo [an boot sabihon, sa Dios].” Tibaad kita mismo dai malinaw na nakasasabot sa satong nakariribok na mga kaisipan kaya dai niato aram kun paano ipahahayag an satong problema sa Dios, pero nasasabotan nia an satong situwasyon. (Roma 8:26, 27) Dai niato maninigong ipagngalas kun may maraot na mga tendensia an satong puso; pero, dai niato iyan ipanarahotan. (Genesis 8:21) Maninigo na hagadon niato an tabang nin Dios na iyan biyong mahale. Kun tunay niatong namomotan si Jehova asin an saiyang mga dalan, makadodolok kita sa saiya sa paghagad kan siring na tabang na may pagsarig na “an Dios orog kadakula kisa satong puso asin nakakaaram kan gabos na bagay.”—1 Juan 3:19-21.
18. (a) Paano kita ginigiyahan ni Jehova sa dalan nin panahon na daing katapusan? (b) Kun kita magpapadagos na sumunod sa paggiya ni Jehova, anong mainit na komendasyon an malalaoman niatong akoon?
18 Kaoyon sa pamibi kan salmista na giyahan sia ni Jehova sa dalan nin panahon na daing katapusan, talagang ginigiyahan ni Jehova an saiyang mapakumbaba, makinuyog na mga lingkod. Ginigiyahan nia sinda bako sanang sa dalan na puwedeng mangahulogan nin halawig na buhay ta dai sinda nagagadan nin amay huli sa paggibo nin sala kundi sa dalan na nagdadara sa buhay na daing sagkod. Idinodoon nia sa sato an pangangaipo niato kan nakatutubos nin kasalan na halaga kan atang ni Jesus. Paagi sa saiyang Tataramon asin sa saiyang organisasyon, tinatawan nia kita nin kaipuhan na pagtotokdo tangani na maotob niato an saiyang kabotan. Idinodoon nia sa sato an halaga nin paghimate sa saiyang tabang tangani na sa laog kita magin an klase nin tawo na sinasabi niato sa luwas. (Salmo 86:11) Asin dinadagka nia kita paagi sa paglaom sa sangkap na salud sa sarong matanos na bagong kinaban na igwa nin daing sagkod na buhay na gagamiton sa paglilingkod sa saiya, an solamenteng tunay na Dios. Kun kita magpapadagos na maimbod na maghimate sa saiyang paggiya, sia garo man sana masabi sa sato, arog kan sinabi nia sa saiyang Aki: “Inoyonan taka.”—Lucas 3:22; Juan 6:27; Santiago 1:12.
Ano an Komento Nindo?
◻ Taano an pagheling ni Jehova sa saiyang mga lingkod ta sa parate laen na marhay sa pagheling nin mga tawo?
◻ Ano an makatatabang sato na mamansayan kun ano an naheheling nin Dios kun saiyang sinisiyasat an satong puso?
◻ Anong klaseng pag-adal an nakatatabang sato na makanood nin mga katotoohan asin maingatan an satong puso?
◻ Taano ta mahalaga na bako sanang maaraman kun ano an sinasabi nin Dios kundi makapareho nia an saboot?
◻ Taano ta maninigo na kita mismo mamibi: “Siyasaton mo ako, O Dios, asin midbida an sakong puso”?
[Ritrato sa pahina 16]
Kun nag-aadal, pagmaigotan na magin saindo man an mga kaisipan asin saboot nin Dios
[Ritrato sa pahina 18]
An mga kaisipan ni Jehova ‘labi pa kadakol sa baybay’
[Credit Line]
Pictorial Archive (Near Eastern History) Est.