“Hanapa Nindo si Jehova, Kamo Gabos na Mahoyo”
“HANAPA nindo si Jehova, kamo gabos na mahoyo sa daga, na naggibo kan Saiyang hatol. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.”—Sofonias 2:3.
Ipinanongod ni propeta Sofonias an mga tataramon na iyan sa mga “mahoyo sa daga,” asin dinagka nia sinda na ‘hanapon an kahoyoan’ tanganing maprotehiran sa “aldaw kan kaanggotan ni Jehova.” Kakadikit kan pagduda na an kahoyoan sarong kahagadan para sa kaligtasan. Pero taano?
Taano ta Dapat Hanapon an Kahoyoan?
An kahoyoan iyo an kuwalidad nin pagigin suwabe sa ugale, na mayo nin pagpaabaw-abaw o kahambogan. Iyan konektadong marhay sa iba pang marahay na kuwalidad, arog baga nin kapakumbabaan asin pagigin kalmado nin boot. Huling totoo iyan, an mga mahoyo madaling tokdoan asin andam na umako nin disiplina sa kamot nin Dios, dawa ngani iyan garo baga nakakamondo sa presente.—Salmo 25:9; Hebreo 12:4-11.
An kahoyoan mismo puwedeng kakadikit an koneksion sa edukasyon o kamugtakan nin saro sa buhay. Alagad, an mga halangkaw an inadalan o mapanggana sa kinabanon na paagi may tendensia na makamate na sinda kuwalipikado na gumibo nin mga desisyon para sa sainda man sana sa gabos na bagay, dawa sa mga bagay dapit sa pagsamba. Oolangon sinda kaini na togotan an ibang tawo na tokdoan sinda o na umako nin sadol asin gumibo nin kinakaipuhan na mga pagliliwat sa saindang buhay. An iba na mayaman sa materyal tibaad maholog sa salang kaisipan na an saindang seguridad yaon sa saindang materyal na mga rogaring. Kaya, dai na sinda nakakamate nin pangangaipo para sa espirituwal na mga kayamanan na gikan sa Tataramon nin Dios, an Biblia.—Mateo 4:4; 5:3; 1 Timoteo 6:17.
Horophoropa an mga eskriba, Fariseo, asin poon na mga saserdote kan kaaldawan ni Jesus. Sa sarong okasyon kan an mga opisyal na sinugo ninda sa pag-arestar ki Jesus bumalik na dai sia kaiba, nagsabi an mga Fariseo: “Ano nadaya man kamo? Mayo ni saro sa mga poon o mga Fariseo na nagtubod sa saiya, bako daw? Alagad an kadaklan na ini na dai tatao kan Pagboot mga tawong sinumpaan.” (Juan 7:45-49) Sa ibang pagtaram, sono sainda, solamente an ignorante asin mayong inadalan an inosenteng gayo na maniwala ki Jesus.
Minsan ngani siring, may mga Fariseong nadara sa katotoohan, asin idinepensa pa ngani ninda si Jesus asin an mga Kristiano. Kaiba sa mga ini si Nicodemo asin Gamaliel. (Juan 7:50-52; Gibo 5:34-40) Pagkagadan ni Jesus, “an dakulang kadaklan nin mga saserdote nagpoon na magkuyog sa pagtubod.” (Gibo 6:7) Daing duwa-duwa na an pinakaekselenteng halimbawa iyo si apostol Pablo. Sia nag-adal sa pamitisan ni Gamaliel asin nagin matibay na gayo asin iginagalang na paradepensa nin Judaismo. Minsan siring, pag-abot nin panahon mapakumbaba siang suminimbag sa pangapodan ni Cristo Jesus asin nagin maigot na parasunod nia.—Gibo 22:3; 26:4, 5; Galacia 1:14-24; 1 Timoteo 1:12-16.
An gabos na ini nag-iilustrar na ano man an pinaghalean nin saro o an saboot nia ngonyan manongod sa mensahe kan Biblia, an mga tataramon ni Sofonias minaaplikar pa man giraray. Kun boot nin saro na oyonan nin Dios asin giyahan kan saiyang Tataramon, kaipuhan an kahoyoan.
An mga ‘Naghahanap nin Kahoyoan’ Ngonyan
Minilyon na tawo sa bilog na kinaban an naghihimate sa maogmang bareta kan Kahadean. Nagkokondukta an mga Saksi ni Jehova nin labing apat na milyon na pag-adal sa Biblia serosemana sa harong kan mga tawong iyan. An mga ini naggikan sa dakol asin manlaenlaen na pinaghalean patin laen-laen na ekonomiko asin sosyal na mga kamugtakan. Minsan siring, an sarong bagay na parareho sinda iyo na igwa sinda nin igong kapakumbabaan na akoon an mensahe kan Biblia na iinatubang sa sainda nin sarong tawo sa sadiri nindang harong o sa ibang lugar. Dakol sa sainda an naggigibo nin marahay na pag-oswag huli ta andam sindang maghingoa na mapangganahan an mga kaolangan sa saindang dalan. Iyo, sinda kabilang sa mga “mahoyo sa daga” ngonyan.
Halimbawa, si Maria sa Mejico. Nag-adal sia nin abogasiya sa unibersidad asin segurado an pinansial na kamugtakan huli sa pamana. Huli kaini, tinubuan sia nin liberal na gayong mga paniniwala na nakaliwat saiya, arog kan pagkasabi nia, na magin sarong tawong “rebelyoso, daing modo, dominante, asin ateistiko.” “Naghona ako na an gabos na bagay mareresolberan paagi sa kuwarta asin na an Dios bakong importante. An totoo, paghona ko dai ngani sia nag-eeksister,” an paggirumdom ni Maria. “Para sa sako an iglesya makangingisi asin saro sanang sosyal na kahagadan,” dugang pa nia.
Dai nahaloy, narisa ni Maria an mga pagbabago sa saiyang pinsan kan nagin ining saro sa mga Saksi ni Jehova. “Makatatakot sia kaidto, asin ngonyan sia matoninong asin matanos nang marhay na tawo,” an paliwanag ni Maria. “Nagsabi an mga paryentes mi na sia sarong parahulit asin nagbabasa nin Biblia, asin sa rason na iyan dai na sia nag-iinom o nambababae. Kaya gusto ko siang dumigdi asin basahon sako an Biblia huli ta iniisip ko na sa paaging ini manonompongan ko an katoninongan asin katrangkilohan na minamawot kong marhay.” An resulta iyo na inako ni Maria an pakipag-adal sa Biblia sa sarong mag-agom na Saksi.
Kadakol siang dapat na mapangganahan, asin depisil man na gayo para saiya na akoon an prinsipyo nin pagkapayo sa Biblia tanganing makapasakop sa saiyang agom. Pero guminibo sia nin dakulang mga pagliliwat sa saiyang buhay asin gawe. Inako nia: “Sa paghona ko poon kan magdigdi sa sakong harong an mga tugang asin darahon an tabang ni Jehova, igwa na nin kaogmahan, katrangkilohan, asin bendisyon nin Dios na nagdadanay sa sakong harong.” Ngonyan, si Maria saro nang nagdusay, bautisadong Saksi ni Jehova.
Sa paghihingoa sa tunay na pagsamba, may saro pang lugar na an kahoyoan, o an kakulangan kaiyan, igwa nin importanteng kabtang. Sa parate, an agom na babae sa pamilya an nag-aako kan katotoohan asin boot na maglingkod sa Dios, alagad an agom na lalaki nagduduwaduwa. Tibaad depisil para sa nagkapirang agom na lalaki na akoon an ideya na igwa nin saro pa—si Jehova Dios—na kaipuhan na pasakopan ngonyan kan saiyang agom. (1 Corinto 11:3) An sarong misis sa Chihuahua, Mejico, nakiolay na adalan sa Biblia, asin pag-abot nin panahon sia asin an pitong aki nia nakalaog sa katotoohan. Kan enot nagtumang an saiyang agom. Taano? Huli ta habo niang maghulit sa harong-harong an saiyang pamilya, na nag-aalok nin literatura sa Biblia. Malinaw na an saboot nia minimenus kaini an saiyang dignidad. Pero an saiyang pamilya marigon na nanindogan sa saindang desisyon na maglingkod sa Dios. Pag-abot nin panahon nagpoon na maheling kan agom na lalaki an halaga kan pag-ako sa areglo nin Dios. Alagad 15 taon an luminihis bago sia nagdusay kan sadiri ki Jehova.
Sa bilog na Mejico, igwa pa nin dakol na puwerang komunidad na kun saen an mga tagaduman sa Indian pa an mga lenguahe asin mga kaugalean. An mensahe kan Biblia nakakaabot sa mga tawong ini asin nakakatabang sainda na paoswagon an saindang grado sa kultura, mantang an iba nakakanood na bumasa asin sumurat mantang nanonodan ninda an katotoohan. Minsan siring, an bagay na an mga tawo hababa an inadalan o kadikit an materyal na rogaring dai man nangangahulogan na mas madali sindang umako. An kapalangkawan sa rasa asin makosog na pagkadayupot sa mga tradisyon nin apoon kun beses pinadedepisil para sa iba na umako kan katotoohan. Ini nagpapaliwanag man kun taano ta sa ibang baryong Indian, an mga nag-aako kan katotoohan parateng riniribok kan ibang tagabaryo. Kaya an kahoyoan dakol na klase.
Maghimate na May Kahoyoan
Kumusta man kamo personalmente? Naghihimate daw kamo sa katotoohan kan Tataramon nin Dios? O masakit daw para saindo na akoon an pira sa mga katotoohan kan Biblia? Tibaad boot nindong siyasaton an saindong sadiri tanganing helingon kun ano an nakakaolang saindo. Napupurisaw daw kamo huli ta an kadaklan sa mga tawo na nadadara sa katotoohan menus an pinaghalean? An personal na kapalangkawan daw kalabot sa saindong kaisipan? Marahay na horophoropon an mga tataramon ni apostol Pablo: “Pinili nin Dios an mga rungaw sa kinaban, tanganing sopogon nia an mga madonong; asin pinili nin Dios an mga maluya kan kinaban, tanganing sopogon nia an mga makosog; asin pinili nin Dios an mga dusta kan kinaban asin an pinagbabasangbasang, an mga bagay na dai pa, tanganing mahalean nia nin halaga an mga bagay na iyo na, tanganing dai nin laman na makapanagsag sa atubang nin Dios.”—1 Corinto 1:27-29.
Sasayumahan daw nindo an kayamanan huli sana ta nanompongan nindo iyan sa menus na lalagan na laboy? Siyempre dai! Minsan siring, iyan an paaging pinipili nin Dios na iatubang sa sato an saiyang nagliligtas-buhay na Tataramon nin katotoohan, arog kan ipinaliliwanag ni apostol Pablo: “Igwa kami kan kayamanan na ini sa mga lalagan na laboy, tanganing an kapangyarihan na lihis sa ordinaryo magin sa Dios asin bakong an gikan mismo sa samo.” (2 Corinto 4:7) An kahoyoan asin kapakumbabaan papangyayarihon kita na maheling an tunay na halaga kan kayamanan asin bako sanang an “mga lalagan na laboy,” o ginagamit na mga tawo, na nagpapaabot kaiyan sa sato. Sa paggibo kaiyan, madudugangan man niato an posibilidad na kita “matago sa aldaw kan kaanggotan ni Jehova” asin magin kaiba kan mga mahoyo na ‘magmamana kan daga.’—Sofonias 2:3; Mateo 5:5.