Kapahayagan—An Mamuraway na Kulminasyon Kaiyan Harani Na

Kapitulo 38: Omawon si Jah Para sa Saiyang mga Paghokom!

1. Anong mga tataramon an nadadangog ni Juan na “sarong makosog na tingog nin sarong dakulang kadaklan sa langit”?

Mayo na an Dakulang Babilonya! Ini tunay na magayagayang bareta. Bakong makangangalas na nadangog ni Juan an maogmang mga kagsing nin pag-omaw sa langit! “Pakalihis kan mga bagay na ini nadangog ko an sarong makosog na tingog nin sarong dakulang kadaklan sa langit. Sinda nagsarabi: ‘Aleluya!a An kaligtasan asin an kamurawayan patin an kapangyarihan sadiri nin satong Dios, huli ta an saiyang mga paghokom totoo asin matanos. Huli ta hinokoman na nia an dakulang patotot na nanraot sa daga paagi sa saiyang pakikisaro, asin siningil na nia an dugo kan saiyang mga oripon sa saiyang kamot.’ Asin tolos-tolos sinda nagsabi sa ikaduwang beses: ‘Aleluya!’b Asin an aso hale saiya padagos na nag-itaas sagkod lamang.”​—Kapahayagan 19:​1-3.

2. (a) Ano an kahulogan kan terminong “Aleluya,” asin ano an ipinaheheling kan pakadangog kaiyan ni Juan nin makaduwa sa puntong ini? (b) Siisay an nag-aako kan kamurawayan para sa paglaglag sa Dakulang Babilonya? Ipaliwanag.

² Aleluya nanggad! An termino nangangahulogan “Omawa nindo si Jah, banwaan,” na an “Jah” iyo an pinahalipot na porma kan banal na ngaran, an Jehova. Nagigirumdoman niato digdi an sadol kan salmista: “An lambang bagay na naghahangos​—mag-omaw iyan ki Jah. Omawa nindo si Jah, banwaan!” (Salmo 150:6) An pakadangog ni Juan sa maogmang koro sa langit na inaawit an “Aleluya!” nin makaduwa sa puntong ini sa Kapahayagan nagpapaheling kan pagpapadagos kan pagpapahayag nin Dios nin katotoohan. An Dios kan Kristianong Griegong Kasuratan iyo man sana an Dios kan naenot na Hebreong Kasuratan, asin Jehova an saiyang ngaran. An Dios na nagpangyari sa pagbagsak kan suanoy na Babilonya hinokoman asin linaglag na ngonyan an Dakulang Babilonya. Itao sa saiya an gabos na kamurawayan para sa aktong iyan! Saiya an kapangyarihan na nagmaniobra sa pagbagsak kaini imbes na sa mga nasyon na ginamit nia bilang mga instrumento sa paggaba kaini. Ki Jehova sana dapat niatong iatribuwir an kaligtasan.​—Isaias 12:2; Kapahayagan 4:11; 7:​10, 12.

3. Taano an dakulang patotot ta talagang maninigo sa paghokom sa saiya?

³ Taano ta maninigo nanggad sa dakulang patotot an paghokom na ini? Sono sa pagboot na itinao ni Jehova ki Noe​—asin paagi sa saiya sa bilog na katawohan—​an daing pakundangan na pagpabolos nin dugo naghahagad kan sentensiang kagadanan. Ini sinabi liwat sa Pagboot nin Dios sa Israel. (Genesis 9:6; Bilang 35:​20, 21) Dugang pa, sa irarom kan Pagboot na iyan ni Moises kapwa an pisikal asin espirituwal na pagsambay maninigo sa kagadanan. (Levitico 20:10; Deuteronomio 13:​1-5) Sa laog nin rinibong taon, an Dakulang Babilonya nagkasala sa dugo, asin sia grabeng parapakisaro. Halimbawa, an palakaw kan Iglesya Katolika Romana na pagbawalan na mag-agom an saiyang mga padi nagbunga nin grabeng inmoralidad kan dakol sa sainda, na dakol sa mga ini ngonyan an may AIDS. (1 Corinto 6:​9, 10; 1 Timoteo 4:​1-3) Pero an saiyang mayor na mga kasalan, na ‘nakaabot na sagkod sa langit,’ iyo an saiyang nakakukubhan na mga akto nin espirituwal na pakikisaro​—an huring ini sa pagtotokdo nin kaputikan asin pakikialyansa sa maraot na mga politiko. (Kapahayagan 18:5) Mantang nag-abot na saiya an saiyang padusa, an langitnon na kadaklan nag-aaningal ngonyan nin ikaduwang Aleluya.

4. Ano an isinisimbolo kan bagay na an aso kan Dakulang Babilonya “padagos na nag-itaas sagkod lamang”?

⁴ An Dakulang Babilonya sinolo siring sa daog na siudad, asin an aso hale saiya “nag-itaas sagkod lamang.” Kun an literal na siudad sinosolo nin nandaog na mga hukbo, an aso padagos na nag-iitaas sagkod na mainit pa an abo. An siisay man na magprobar na itogdok iyan liwat mantang iyan nag-aaso pa mapapaso sana kan nagbabagang kagabaan. Mantang an aso kan Dakulang Babilonya maitaas “sagkod lamang” bilang tanda kan pagigin pangultimo kan paghokom sa saiya, mayo nin siisay man na makatotogdok liwat kan makasalanon na siudad na iyan. An falsong relihiyon napara na sagkod lamang. Aleluya man nanggad!​—Ikomparar an Isaias 34:​5, 9, 10.

5. (a) Ano an ginigibo asin sinasabi kan 24 magurang asin kan apat na nabubuhay na linalang? (b) Taano an korong Aleluya ta mas magayon nanggad kisa ano man na koro nin Aleluya na inaawit sa mga simbahan kan Kakristianohan?

⁵ Sa mas naenot na bisyon, naheling ni Juan sa palibot kan trono an apat na nabubuhay na linalang, kaiba kan 24 magurang na naglaladawan sa mga nagmana kan Kahadean sa saindang mamuraway na langitnon na kamugtakan. (Kapahayagan 4:​8-11) Ngonyan naheling nia sinda liwat mantang saindang pinadadagoldol an ikatolong Aleluya huli sa pagkalaglag kan Dakulang Babilonya: “Asin an duwang polo may apat na magurang asin an apat na buhay na linalang nagralaob asin nagsaramba sa Dios na nagtutukaw sa trono, asin nagsarabi: ‘Amen! Aleluya!’”c (Kapahayagan 19:4) Kun siring, an magayonon na korong ini nin Aleluya apuwera pa sa “bagong awit” nin pag-omaw sa Kordero. (Kapahayagan 5:​8, 9) Inaawit ninda ngonyan an magayonon na koro sa kapangganahan, na iinaatribuwir an gabos na kamurawayan sa Soberanong Kagurangnan na Jehova huli sa saiyang dai mapagdududahan na kapangganahan sa dakulang patotot, an Dakulang Babilonya. An mga Aleluyang ini mas magayon nanggad an tanog kisa ano man na mga koro nin Aleluya na inaawit sa mga simbahan kan Kakristianohan, na dian si Jehova, o Jah, hinalean nin onra asin dinuhagi. An siring na mapagsaginsagin na pag-awit na naglalanghad sa ngaran ni Jehova ngonyan pinaontok na sagkod lamang!

6. Kiisay na “tingog” an nadangog, ano an isinasadol kaiyan, asin siisay an nakikiiba sa pagsimbag?

⁶ Kan 1918 pinonan ni Jehova na balosan ‘an mga natatakot sa saiyang ngaran, an saradit asin an darakula’​—na an enot iyo an linahidan na mga Kristiano na nagadan na maimbod, na saiyang binuhay liwat asin idinestino sa langitnon na puwesto kan 24 magurang. (Kapahayagan 11:18) An iba pa uminiba sa mga ini sa pag-awit kan mga Aleluya, ta ibinabareta ni Juan: “Siring man, may sarong tingog na nagluwas sa trono asin nagsabi: ‘Mag-oromaw kamo sa satong Dios, kamo gabos na saiyang mga oripon, na natatakot sa saiya, an saradit asin an darakula.’” (Kapahayagan 19:5) Ini an “tingog” kan Parataram ni Jehova, an saiya mismong Aki, si Jesu-Cristo, na nagtitindog “sa tahaw kan trono.” (Kapahayagan 5:6) Bako sanang sa langit kundi pati digdi sa daga, “kamo gabos na saiyang mga oripon” nakikiiba sa pag-awit, na an linahidan na grupong Juan an nangengenot digdi sa daga. Maogmahon nanggad sindang nakikiiba sa pagkuyog sa pagboot na: “Mag-oromaw kamo sa satong Dios”!

7. Pakalaglaga kan Dakulang Babilonya, siisay an mag-oomaw ki Jehova?

⁷ Iyo, an mga kabilang sa dakulang kadaklan ibinibilang man na kaiba sa mga oripon na ini. Poon 1935 an mga ini nagruluwas sa Dakulang Babilonya asin nakaeksperyensia kan kaotoban kan panuga nin Dios: “Saiyang bebendisyonan an mga natatakot ki Jehova, an saradit saka an darakula.” (Salmo 115:13) Kun laglagon na an garo patotot na Babilonya, an minilyon sa sainda maiba sa ‘pag-omaw sa satong Dios’​—kaiba kan grupong Juan asin kan gabos na hukbo sa langit. Dangan, an mga binuhay liwat sa daga, baga man prominente kaidto o bako, daing duwa-duwa na mag-aarawit pa nin Aleluya kun maaraman ninda na an Dakulang Babilonya napara na sagkod lamang. (Kapahayagan 20:​12, 15) Itao an gabos na kaomawan ki Jehova para sa saiyang dai mapagdududahan na kapangganahan sa suanoy nang patotot!

8. Anong dahelan an maninigong itao sato ngonyan kan langitnon na mga koro nin pag-omaw na naheling ni Juan, bago laglagon an Dakulang Babilonya?

⁸ Ini makosogon na dahelan na kita lubos na makikabtang sa gibohon nin Dios ngonyan! An gabos logod na lingkod ni Jah idusay an saindang sadiri nin bilog na puso asin kalag sa pagpahayag kan mga paghokom nin Dios, kaiba an makangangalas na paglaom sa Kahadean, ngonyan, bago an Dakulang Babilonya pahaleon sa natutukawan kaiyan asin laglagon.​—Isaias 61:​1-3; 1 Corinto 15:58.

‘Aleluya​—Si Jehova Hade Na!’

9. Taano an huring Aleluya ta bilog, makosogon na tanog?

⁹ Igwa nin dugang pang mga dahelan na mag-ogma, mantang padagos na sinasabi sato ni Juan: “Asin nakadangog ako nin siring sa tingog nin dakulang kadaklan asin siring sa hagobohob nin dakol na katubigan asin siring sa tanog nin makosog na mga dagoldol. Sinda nagsabi: ‘Aleluya,d huli ta si Jehova na satong Dios, an Makakamhan sa gabos, nagpoon nang magsakop bilang hade.’” (Kapahayagan 19:6) An ultimong Aleluyang ini iyo an minagibo sa proklamasyon na kuwadrado, o proporsionado. Iyan makosogon na tanog sa langit, mas magayon kisa ano pa man na koro nin tawo, mas kahangahanga kisa ano pa man na busay sa daga, asin mas makatatakot kisa ano pa man na bagyo sa daga na may kaibang mga kikilat asin dagoldol. An manorosampulong ribong tingog sa langit siniselebrar an bagay na “si Jehova na satong Dios, an Makakamhan sa gabos, nagpoon nang magsakop bilang hade.”

10. Sa anong sentido na masasabi na si Jehova nagpoon na magsakop bilang hade pagkalaglag kan Dakulang Babilonya?

¹⁰ Alagad, paano na si Jehova nagpoon na magsakop? Rinibo nang taon an nakaagi poon kan sabihon kan salmista: “An Dios iyo an sakuyang Hade magpoon pa kaidto.” (Salmo 74:12) An pagkahade ni Jehova kaidto pa suanoy na, kaya paano makaaawit an unibersal na koro na “si Jehova . . . nagpoon nang magsakop bilang hade”? Iyan huli ta kun laglagon na an Dakulang Babilonya, si Jehova mayo na nin pangahas na karibal na makaoolang sa pagkuyog sa saiya bilang an Unibersal na Soberano. An falsong relihiyon dai na magsusutsut sa mga namomoon sa daga na tumangon sia. Kan an suanoy na Babilonya bumagsak sa pagdominar sa kinaban, nadangog kan Sion an mapangganang proklamasyon: “An saimong Dios nagin hade na!” (Isaias 52:7) Pagkamundag kan Kahadean kan 1914, an 24 magurang nagpahayag: “Kami nagpapasalamat saimo, Jehova Dios, . . . huli ta saimong pinangaptan an saimong dakulang kapangyarihan asin nagpoon na magsakop bilang hade.” (Kapahayagan 11:17) Ngonyan, pagkagaba kan Dakulang Babilonya, inotro an kurahaw: “Si Jehova . . . nagpoon nang magsakop bilang hade.” Mayo nin gibo nin tawong dios na nagdadanay tanganing angaton an soberaniya kan tunay na Dios, si Jehova!

(Ipagpapadagos sa masunod na luwas.)

[Mga Nota sa Ibaba]

[Kahon sa pahina 27]

“Surat sa Sodoma Asin Gomorra”

Sa irarom kan tampok na temang ini, an Daily Telegraph sa Londres kan Nobyembre 12, 1987, nagbareta dapit sa sarong proposisyon sa Sinodo Heneral kan Iglesya nin Inglaterra. Hinagad kaini an pagpapatalsik kan homoseksuwal na mga “Kristiano” sa iglesya. An kolumnistang si Godfrey Barker nagsabi: “An Arsobispo sa Canterbury mamondong nagpahayag nin opinyon kasuodma: ‘Kun si San Pablo mapadara nin sarong surat sa Iglesya nin Inglaterra, marahay na ihapot ta kun anong surat iyan.’” Si Mr. Barker mismo nagkomento: “Sarong surat sa Sodoma asin Gomorra an simbag,” asin idinugang: “Si Dr Runcie [an arsobispo] naghona na iyan kababasahan nin siring kan sa Roma, Kap 1.”

An kagsurat kinotar an mga tataramon ni Pablo sa Roma 1:​26-32: “Pinabayaan sinda nin Dios sa mga horot kan saindang puso sa kalaswaan. . . . An mga lalaki naggigibo nin bastos na mga gibo sa kaibanan nin mga lalaki . . . minsan ngani aram ninda an pagboot nin Dios na an mga naggigibo nin siring dapat na magadan, bako sanang ginigibo ninda iyan kundi inooyonan pa an mga naggigibo kaiyan.” Nagkonklusyon sia: “Si San Pablo nahahadit sana dapit sa mga lalaki sa mga tukawan. An problema ni Dr Runcie iyo an mga lalaki sa mga pulpito.”

Taano ta siring an problema kan arsobispo? An darakulang tampok na bareta sa Daily Mail sa Londres kan Oktubre 22, 1987, nagpahayag: “‘Sarong bikaryo sa tolo an bakla’ . . . An kampanya sa pagpahale sa mga homoseksuwal ‘masirrado sa Iglesya nin Inglaterra.’” An mga bareta kinotar an “reberendo” na sekretaryo heneral kan Lesbian and Gay Christian Movement na nagsasabing: “Kun inako an proposisyon na ini raraoton kaiyan an Iglesya, asin aram iyan kan Arsobispo nin Canterbury. Sa pankagabsan na bilang, naniniwala kami na 30 sagkod 40 porsiento sa mga klerigo kan Iglesya nin Inglaterra an bakla. Asin sinda an mga pinakaaktibong tawo na nakakakontribuwir sa ministeryo kan Iglesya.” An nagdidiit na bilang nin mga parasimba daing duwa-duwa na sa sarong kabtang pagpaheling nin pagkabalde sa nagdadakulang homoseksuwal na ministeryong iyan.

Ano an desisyon kan sinodo nin iglesya? An nakadadaog na mayoriya nin 388 miembro (95 porsiento kan klero) nagboto apabor sa pinaluyang proposisyon. Mapadapit kaini, an The Economist kan Nobyembre 14, 1987, nagbareta: “An Iglesya nin Inglaterra tumang sa homoseksuwal na mga gawe, pero bakong gayo. An sinodo heneral, an parlamento kan Iglesya, na nasa isip an homoseksuwal na mga klerigo, nagdesisyon ngonyan na semana na an homoseksuwal na mga gawe, bakong siring kan pakikisaro asin pagsambay, bakong kasalan: iyan ‘nagkulang sana sa pamantayan’ na an ‘seksuwal na pagdodorog sarong akto nin lubos na kapanugaan na may tamang lugar sa permanenteng relasyon nin mag-agom.’” Sa pagpaheling kan kalaenan kan paninindogan kan Arsobispo nin Canterbury sa marigon na pahayag ni apostol Pablo sa Roma 1:​26, 27, iiniksibir kan The Economist an sarong kotasyon kan mga tataramon ni Pablo sa itaas kan kapsion na “Aram ni San Pablo an saiyang iniisip.”

Aram man ni Jesu-Cristo an saiyang iniisip asin itinaram iyan sa malinaw na mga termino. Saiyang sinabi na magigin “mas magian pa para sa daga nin Sodoma sa Aldaw nin Paghokom” kisa sa mga relihiyonista na nagsikwal kan saiyang mensahe. (Mateo 11:​23, 24) Naggamit digdi si Jesus nin pasobrang pagtaram tanganing ipaheling na an relihiyosong mga poon na idto na nagsikwal sa Aki nin Dios asin sa saiyang katokdoan orog na dapat sagweon kisa sa mga Sodomita. An Judas 7 nagsasabi na an mga Sodomitang idto nag-agi nin “hudisyal na padusa na daing katapusan na kalayo,” na an boot sabihon daing sagkod na pagkalaglag. (Mateo 25:​41, 46) Masakiton nanggad, kun siring, an magigin paghokom sa Kristiano daang mga poon na butang ginigiyahan an saindang binutang mga aripompon parayo sa halangkaw na moral na mga pamantayan kan Kahadean nin Dios pasiring sa mapagkonsinte, maraoton na mga gibo kaining kinaban! (Mateo 15:14) Manongod sa falsong relihiyon, an Dakulang Babilonya, an tingog hale sa langit nangangapodan na may pag-apreta: “Lumuwas kamo saiya, banwaan ko, kun habo nindong makikabtang sa saiyang mga kasalan, asin kun habo nindong mag-ako nin kabtang kan saiyang mga damat.”​—Kapahayagan 18:​2, 4.