Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 40: Pagronot sa Payo kan Halas
An Iba kan mga Gadan
14. (a) Anong kapahayagan an isinaliot ni Juan manongod sa “iba kan mga gadan”? (b) Paano an mga kapahayagan ni apostol Pablo nagtatao nin liwanag sa terminong “nabuhay”?
14 Alagad, siisay an hohokoman kan mga hadeng ini kun, arog kan isinaliot digdi ni apostol Juan, “(an iba kan mga gadan dai nabuhay sagkod na natapos an sangribong taon)”? (Kapahayagan 20:5a) Liwat, an tataramon na “nabuhay” kaipuhan na saboton sono sa konteksto. An tataramon na ini puwedeng magkaigwa nin laen-laen na kahulogan sa laen-laen na kamugtakan. Halimbawa, si Pablo nagsabi manongod sa saiyang linahidan na kapwa mga Kristiano: “Kamo an binuhay nin Dios minsan ngani kamo kaidto gadan sa saindong mga kalapasan asin kasalan.” (Efeso 2:1) Iyo, an linahidan nin espiritung mga Kristiano “binuhay,” minsan kan enot na siglo, na ipinahayag na matanos basado sa saindang pagtubod sa atang ni Jesus.—Roma 3:23, 24.
15. (a) Ano an kamugtakan sa atubangan nin Dios kan bago-Kristianong mga saksi ni Jehova? (b) Paano ‘mabubuhay’ an ibang karnero, asin noarin ninda mamanahon an daga sa pinakalubos na sentido?
15 Siring man, an bago-Kristianong mga saksi ni Jehova ipinahayag na matanos kun dapit sa pakikikatood sa Dios; asin si Abraham, Isaac, patin Jacob sinabing “buhay” minsan sinda gadan sa pisikal. (Mateo 22:31, 32; Santiago 2:21, 23) Alagad, sinda asin an gabos pang iba na binuhay liwat, saka an dakulang kadaklan nin maimbod na ibang karnero na makaliligtas sa Armagedon asin an arin man na mga aki na tibaad ipangaki ninda sa bagong kinaban, kaipuhan pang darahon sa pagkasangkap nin tawo. Ini gigibohon ni Cristo asin kan kairiba niang hade asin saserdote sa laog kan sangribong taon na Aldaw nin Paghokom, basado sa pantubos na atang ni Jesus. Sa katapusan kan Aldaw na iyan, “an iba kan mga gadan” “nabuhay” na sa sentido na sinda magigin nang sangkap na mga tawo. Arog kan maheheling niato, sinda kaipuhan na umagi sa ultimong pagbalo, pero aatubangon ninda an pagbalong iyan bilang sangkap nang mga tawo. Kun makapasar sinda sa pagbalo, ipahahayag nin Dios na sinda maninigong mabuhay sagkod lamang, matanos sa pinakalubos na sentido. Maeeksperyensiahan ninda an lubos na kaotoban kan panuga: “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) Kanigoan kamakawiwiling ngapit an natatagama sa makinuyog na katawohan!
An Enot na Pagkabuhay Liwat
16. Paano ilinaladawan ni Juan an pagkabuhay liwat na naeksperyensiahan kan mga magsasakop bilang hade kaiba ni Cristo, asin taano?
16 Sa pagbuwelta ngonyan sa mga ‘nagkaburuhay asin naghade sa kaibanan ni Cristo,’ si Juan nagsurat: “Iyo ini an enot na pagkabuhay liwat.” (Kapahayagan 20:5b) Paano iyan enot? Iyan “an enot na pagkabuhay liwat” kun dapit sa panahon, ta an mga nakakaeksperyensia kaiyan “enot na mga bunga sa Dios asin sa Kordero.” (Kapahayagan 14:4) Iyan enot man sa halaga, ta an mga may kabtang dian nagigin kairibang hade ni Jesus sa saiyang langitnon na Kahadean asin naghohokom sa iba pa sa katawohan. Ultimo, iyan enot sa kuwalidad. Apuwera ki Jesu-Cristo mismo, an mga binuhay liwat sa enot na pagkabuhay liwat iyo an solamenteng mga linalang na sinasabi sa Biblia na nag-ako nin inmortalidad.—1 Corinto 15:53; 1 Timoteo 6:16.
17. (a) Paano ilinaladawan ni Juan an marahay na paglaom para sa linahidan na mga Kristiano? (b) Ano an “ikaduwang kagadanan,” asin taano iyan ta “mayo na nin kapangyarihan” sa 144,000 na nakadaog?
17 Kanigoan karahay na paglaom para sa mga linahidan na ini! Arog kan sinasabi ni Juan: “Maogma asin banal an siisay man na may kabtang sa enot na pagkabuhay liwat; sa mga ini mayo na nin kapangyarihan an ikaduwang kagadanan.” (Kapahayagan 20:6a) Arog kan ipinanuga ni Jesus sa mga Kristiano sa Smirna, an mga nakadaog na ini na may kabtang sa “enot na pagkabuhay liwat” mayong peligrong madanyaran kan “ikaduwang kagadanan,” na nangangahulogan nin pagkapara, kalaglagan na mayo nin paglaom na buhayon liwat. (Kapahayagan 2:11; 20:14) An ikaduwang kagadanan “mayo na nin kapangyarihan” sa mga nakadaog na iyan, ta sinda nagsolog na nin pagkadaing kalapaan asin inmortalidad.—1 Corinto 15:53.
18. Ano ngonyan an sinasabi ni Juan manongod sa bagong mga hade sa daga, asin ano an gigibohon ninda?
18 Laen nanggad sa mga hade sa daga sa panahon kan pagkapot nin kapangyarihan ni Satanas! An mga ini sa pinakahalawig namahala sa laog sana nin 50 o 60 taon, asin an mayoriya sa pira sanang taon. An dakol sa sainda inapi an katawohan. Ano man an nangyari, paano makikinabang nin permanente an mga nasyon na sakop nin paliwatliwat na mga namamahala na may paliwatliwat na mga palakaw? Kabaliktaran, sinasabi ni Juan manongod sa bagong mga mamamahala sa daga: “Kundi sinda magigin mga saserdote nin Dios asin kan Cristo, patin maghahade sinda sa kaibanan nia sa laog nin sangribong taon.” (Kapahayagan 20:6b) Kaiba ni Jesus, sinda an makompuwesto sa solamenteng gobyerno sa laog nin sangribong taon. An saindang makasaserdoteng paglilingkod, sa pag-aplikar kan merito kan sangkap na atang ni Jesus bilang tawo, ilalangkaw an makinuyog na mga tawo sa espirituwal, moral, asin pisikal na pagkasangkap. An saindang makahadeng paglilingkod magbubunga nin pagtogdok nin panglobong sosyedad nin tawo na nagpapaheling kan katanosan asin kabanalan ni Jehova. Bilang mga hokom sa laog nin sangribong taon, sinda, kaiba ni Jesus, mamomoton na gigiyahan an makinuyog na katawohan pasiring sa pasohan na buhay na daing katapusan.—Juan 3:16.
An Huring Pagbalo
19. Ano an magigin kamugtakan kan daga asin kan katawohan sa katapusan kan Sangribong Taon na Paghade, asin ano ngonyan an gigibohon ni Jesus?
19 Sa katapusan kan Sangribong Taon na Paghade, an bilog na daga magigin kaagid na kan orihinal na Eden. Iyan magigin aktuwal na paraiso. An sangkap na katawohan dai na mangangaipo nin halangkaw na saserdote tanganing mangoltanan kaiyan sa atubangan nin Dios, mantang an gabos na gira kan Adanikong kasalan nawara na asin an huring kaiwal, an kagadanan, napara na. Naotob na kan Kahadean ni Cristo an katuyohan nin Dios na maglalang nin sarong kinaban na may sarong gobyerno. Sa puntong ini, “itatao [ni Jesus] an kahadean sa saiyang Dios asin Ama.”—1 Corinto 15:22-26; Roma 15:12.
20. Ano an sinasabi sato ni Juan na mangyayari kun panahon na para sa huring pagbalo?
20 Panahon na ngonyan para sa huring pagbalo. Iyan daw na sangkap nang kinaban nin katawohan, bilang kabaliktaran kan enot na mga tawo sa Eden, maninindogan nin marigon sa integridad kaiyan? Sinasabi sato ni Juan kun ano an mangyayari: “Ngonyan pakatapos tolos kan sangribong taon, si Satanas paluluwason sa saiyang bilanggoan, asin sia maluwas tanganing mandaya sa mga nasyon sa apat na kanto kan daga, ki Gog asin Magog, tanganing tiriponon sinda para sa ralaban. An kabilangan kan mga ini siring kadakol kan mga baybay kan dagat. Asin sinda nagturukad sa kahiwasan kan daga asin pinalibotan ninda an kampo kan mga banal asin an mahal na siudad.”—Kapahayagan 20:7-9a.
21. Sa saiyang huring pagmamaigot, ano an gigibohon ni Satanas, asin taano ta dai kita maninigong magngalas na an iba masunod ki Satanas maski pakatapos kan Sangribong Taon na Paghade?
21 Ano an magigin resulta kan huring pagmamaigot ni Satanas? Madadaya nia an “mga nasyon sa apat na kanto kan daga, ki Gog asin Magog,” asin gigiyahan sinda “sa ralaban.” Sairisay daw an posibleng makikiiba ki Satanas pakatapos kan sangribong taon nin magayagaya, nakakapakosog na teokratikong pamamahala? Bueno, dai niato paglingawan na nahimo ni Satanas na dayaon an sangkap na si Adan asin Eva mantang naoogma sinda sa buhay sa Paraiso nin Eden. Asin nahimo niang dayaon an langitnon na mga anghel na nakaheling kan maraot na mga bunga kan enot na rebelyon. (2 Pedro 2:4; Judas 6) Kaya dai kita dapat magngalas na an ibang sangkap na tawo masusugotan na sumunod ki Satanas maski ngani pakatapos kan magayagayang sangribong taon nin pamamahala kan Kahadean nin Dios.
22. (a) Ano an ipinaririsa kan ekspresyon na “mga nasyon sa apat na kanto kan daga”? (b) Taano an mga rebelde ta inapod na “Gog asin Magog”?
22 Inapod kan Biblia an mga rebeldeng ini na “mga nasyon sa apat na kanto kan daga.” Ini dai nangangahulogan na an katawohan magkakabaranga liwat sa esklusibong nasyonal na kamugtakan. Iyan nagpaparisa sana na an mga ini isisiblag an saindang sadiri sa mga matanos, maimbod ki Jehova asin ipaheheling an iyo man sanang maraot na espiritu na ipinaheheling ngonyan kan mga nasyon. Sinda “makakaisip nin maraot na mukna,” siring kan ginibo ni Gog kan Magog sa hula ni Ezequiel, na may pasohan na laglagon an teokratikong gobyerno sa daga. (Ezequiel 38:3, 10-12) Kaya, inapod sinda na “Gog asin Magog.”
23. Ano an ipinaririsa kan bagay na an bilang kan mga rebelde “siring kadakol kan mga baybay kan dagat”?
23 An bilang kan mga makiiiba ki Satanas sa saiyang pagrebelde magigin “siring kadakol kan mga baybay kan dagat.” Gurano iyan kadakol? Mayo nin itinalagang bilang. (Ikomparar an Josue 11:4; Hokom 7:12.) An magigin bilang nin mga rebelde madepende sa kun ano an reaksion kan kada indibiduwal sa mapandayang mga pakana ni Satanas. Alagad, daing duwa-duwa na iyan magigin awad-awad na bilang, mantang sinda makakamateng makosog tanganing madaog an “kampo kan mga banal asin an mahal na siudad.”
24. (a) Ano an “mahal na siudad,” asin paano iyan mapalilibotan? (b) Ano an irinirepresentar kan “kampo kan mga banal”?
24 “An mahal na siudad” siertong an siudad na sinambit kan pinamuraway na si Jesu-Cristo sa saiyang mga parasunod sa Kapahayagan 3:12 asin na inapod niang “siudad nin sakong Dios, an bagong Jerusalem na naghihilig hale sa langit hale sa sakong Dios.” Mantang ini sarong langitnon na organisasyon, paano an daganon na mga puwersang idto ‘pinalibotan’ iyan? Iyan sa puntong pinalibotan ninda an “kampo kan mga banal.” An kampo nasa luwas kan siudad; kaya, “an kampo kan mga banal” siertong nagrerepresentar sa mga nasa daga sa luwas kan langitnon na namumugtakan kan Bagong Jerusalem na maimbod na nagsusuportar sa areglo nin gobyerno ni Jehova. Kun salakayon na kan mga rebelde sa irarom ni Satanas an mga maimbod na idto, ibibilang iyan kan Kagurangnan na si Jesus na pagsalakay saiya. (Mateo 25:40, 45) An “mga nasyon” na iyan magmamaigot na paraon an gabos na nagibo kan langitnon na Bagong Jerusalem sa paggibo kan daga na paraiso. Kaya sa pagsalakay “sa kampo kan mga banal,” sinasalakay man ninda “an mahal na siudad.”
An Danaw nin Kalayo Asin Asupre
25. Paano ilinaladawan ni Juan an resulta kan pagsalakay kan mga rebelde sa “kampo kan mga banal,” asin ano an kahulogan kaini para ki Satanas?
25 An huring pagmamaigot daw na ini ni Satanas magigin mapanggana? Siertong dai—kun paanong an pagsalakay na gigibohon ni Gog kan Magog sa espirituwal na Israel sa satong aldaw dai magigin mapanggana! (Ezequiel 38:18-23) Buhay na marhay na ilinadawan ni Juan an resulta: “Alagad an kalayo naholog hale sa langit asin tinunaw sinda. Asin an Diablo na nandadaya sa sainda iinapon sa danaw nin kalayo asin asupre, na namumugtakan na kan mabangis na hayop asin kan falsong propeta.” (Kapahayagan 20:9b-10a) Imbes na nakabilanggo sana, ngonyan si Satanas, an enot na Halas, aktuwal na roronoton, pupolboson, biyong lalaglagon na siring kan sa kalayo.
26. Taano an “danaw nin kalayo asin asupre” ta dai puwedeng magin literal na lugar nin pagpadusa?
26 Nasabi na niato na “an danaw nin kalayo asin asupre” dai puwedeng magin literal na lugar nin pagpadusa. (Kapahayagan 19:20) Tanganing si Satanas magsakit nin labi-labi kakolog na padusa duman sagkod lamang, kaipuhan na papagdanayon sia ni Jehova na buhay. Alagad, an buhay sarong regalo, bakong padusa. An kagadanan padusa para sa kasalan, asin sono sa Biblia, an mga gadan dai nakokolgan. (Roma 6:23; Eclesiastes 9:5, 10) Saro pa, nababasa niato sa eroenotan pa na an kagadanan mismo, kaiba an Hades, iaapon sa iyo man sanang danaw nin kalayo asin asupre. Sierto nanggad, an kagadanan asin Hades dai puwedeng makamate nin kolog!—Kapahayagan 20:14.
27. Paano an nangyari sa Sodoma asin Gomorra nakatatabang sato na masabotan an terminong danaw nin kalayo asin asupre?
27 Ini gabos nagpaparigon sa punto-de-vista na an danaw nin kalayo asin asupre simboliko. Saro pa, an pagsambit sa kalayo asin asupre nagpapagirumdom kan nangyari sa suanoy na Sodoma asin Gomorra, na linaglag nin Dios huli sa saindang grabeng karatan. Kan nagdatong an panahon ninda, “pinaoranan ni Jehova nin asupre asin kalayo hale ki Jehova, gikan sa langit, an Sodoma asin Gomorra.” (Genesis 19:24) An nangyari sa duwang siudad inapod na “silot na kalayong daing katapusan.” (Judas 7) Alagad, an duwang siudad na idto dai nagsakit sa daing sagkod na padusa. Imbes, iyan pinara, biyong linaglag, kairiba an bikong mga nag-eerok dian. An mga siudad na idto dai na nag-eeksister ngonyan, asin daing makasasabi nin sierto kun saen an dating lugar kaiyan.
28. Ano an danaw nin kalayo asin asupre, asin paano iyan bakong arog kan kagadanan, Hades, asin bungaw?
28 Kaoyon kaini, an Biblia mismo nagpapaliwanag kan kahulogan kan danaw nin kalayo asin asupre: “Ini iyo an ikaduwang kagadanan, an danaw nin kalayo.” (Kapahayagan 20:14) Malinaw na ini iyo man sana an Gehenna na sinambit ni Jesus, an lugar na dian nagdadanay na laglag an mga maraot, bakong pinadudusahan sagkod lamang. (Mateo 10:28) Iyan lubos, biyong kalaglagan na daing paglaom sa pagkabuhay liwat. Kaya, mantang may mga liyabe para sa kagadanan, Hades, asin bungaw, daing sinambit na liyabe sa pagbukas kan danaw nin kalayo asin asupre. (Kapahayagan 1:18; 20:1) Nungkang bubutasan kaiyan an mga bihag dian.—Ikomparar an Marcos 9:43-47.
Pasasakitan Aldaw-Banggi Sagkod Lamang
29, 30. Ano an sinasabi ni Juan manongod sa Diablo siring man sa mabangis na hayop asin sa falsong propeta, asin paano ini maninigong saboton?
29 Sa pagsambit sa Diablo siring man sa mabangis na hayop asin sa falsong propeta, sinasabi sato ngonyan ni Juan: “Asin sinda pasasakitan aldaw-banggi sagkod lamang.” (Kapahayagan 20:10b) Ano an kahulogan kaini? Siring kan nasambit na, bakong rasonableng sabihon na an mga simbolo, arog baga kan mabangis na hayop asin falsong propeta, siring man an kagadanan asin Hades, puwedeng magsakit nin padusa sa literal na paagi. Kaya, mayo kitang rason na magtubod na si Satanas magsasakit sagkod lamang. Sia lalaglagon.
30 An Griegong tataramon na ginamit digdi para sa “pasakit,” ba·sa·niʹzo, sa pangenot nangangahulogan na “baloon (an mga metal) paagi sa gapong pangilatis.” “Imbestigaron paagi sa pagpadusa” an ikaduwang kahulogan. (The New Thayer’s Greek-English Lexicon of the New Testament) Sa konteksto, an paggamit kaining Griegong termino nagpaparisa na an mangyayari ki Satanas magseserbi, sa gabos na panahon, bilang gapong pangilatis sa isyu nin pagigin tama asin pagigin makatanosan kan pamamahala ni Jehova. An isyung iyan nin soberanong pamamahala lubos na mahuhusay. Nungka liwat na an angat sa soberaniya ni Jehova kaipuhan na baloon sa halawig na panahon tanganing mapatunayan na sala.—Ikomparar an Salmo 92:1, 15.
31. Paano an duwang Griegong termino na konektado sa saro na nangangahulogan “pasakit” nakatatabang sato na masabotan an padusa na maeeksperyensiahan ni Satanas na Diablo?
31 Dugang pa, an konektadong termino na ba·sa·ni·stesʹ, “parapasakit,” ginagamit sa Biblia na nangangahulogan “parabilanggo.” (Mateo 18:34, Kingdom Interlinear) Kaoyon kaini, si Satanas ibibilanggo sa danaw nin kalayo sagkod lamang; dai sia nanggad bubutasan. Ultimo, sa Griegong Septuagint, na aram na marhay ni Juan, an konektadong termino na baʹsa·nos ginagamit manongod sa kasopganan na masagkod sa kagadanan. (Ezequiel 32:24, 30) Ini nakatatabang sato na masabotan na an padusa na mangyayari ki Satanas makasosopog, daing katapusan na kagadanan sa danaw nin kalayo asin asupre. An saiyang mga gibo magagadan kaiba nia.—1 Juan 3:8.
32. Anong padusa an maeeksperyensiahan kan mga demonyo, asin paano niato naaraman?
32 Sa liwat, an mga demonyo dai nasambitan sa bersikulong ini. Bubutasan daw sinda kairiba ni Satanas sa katapusan kan sangribong taon dangan magsasakit kan padusa na daing katapusan na kagadanan kaiba nia? An ebidensia minasimbag nin iyo. Sa parabola kan mga karnero asin kanding, sinabi ni Jesus na an mga kanding pasiring “sa daing katapusan na kalayo na inandam para sa Diablo asin sa saiyang mga anghel.” (Mateo 25:41) An ekspresyon na “daing katapusan na kalayo” siertong nanonongod sa danaw nin kalayo asin asupre na dian iaapon si Satanas. An mga anghel kan Diablo ihinolog hale sa langit kairiba nia. Maliwanag, nagduman sinda sa bungaw kairiba nia sa pagpoon kan Sangribong Taon na Paghade. Kaoyon kaini, kun siring, lalaglagon man sinda kaiba nia sa danaw nin kalayo asin asupre.—Mateo 8:29.
33. Anong ultimong detalye kan Genesis 3:15 an maootob sa panahon na iyan, asin sa anong bagay dinadara ngonyan kan espiritu ni Jehova an atension ni Juan?
33 Sa paaging ini, an ultimong detalye kan hula na nasusurat sa Genesis 3:15 maootob. Kun iapon na si Satanas sa danaw nin kalayo, sia magigin gadan siring sa halas na an payo rinonot sa irarom nin batbat na bool. Sia asin an saiyang mga demonyo mawawara na sagkod lamang. Mayo na nin dugang pang pagsambit sainda sa libro nin Kapahayagan. Ngonyan, mantang natapos na an mga ini sa makahulang paagi, an espiritu ni Jehova dinadara an atension sa bagay na mahalagang marhay sa mga nagmamawot kan daganon na paglaom: Ano an magigin resulta sa katawohan kan langitnon na pamamahala kan “Hade nin mga hade” asin “kaidtong mga inapod asin pinili asin maimbod sa kaibanan nia”? (Kapahayagan 17:14) Sa pagsimbag, dinadara kita liwat ni Juan sa kapinonan kan Sangribong Taon na Paghade.