Bareta kan mga Parabalangibog kan Kahadean

Sinunod Nia an Saiyang Konsensia na Natokdoan sa Biblia

AN HADE sa Israel na si David namibi para sa tabang ni Jehova kan sia magsabing: “Para sa sako, maglalakaw ako sa sakong integridad. O tubosa ako asin pahelingi ako nin pabor.” (Salmo 26:11) An Dios tinawan nanggad sia nin pabor huli sa pagpapadanay sa saiyang integridad. Si Jehova binendisyonan man si Jesus huling saiyang inotob an kabotan kan saiyang langitnon na Ama, asin Saiya man na binendisyonan an sarong barobata sa Colombia na sinunod an saiyang konsensia na natokdoan sa Biblia asin determinadong otobon an kabotan nin Dios. An barobatang lalaking ini nagsaysay:

“Kan magpoon akong makipag-adal nin Biblia sa mga Saksi ni Jehova, saro akong estudyante sa Katolikong eskuwelahan. Alagad, rinibok ako kan sakong konsensia kan mag-atender ako sa Misa, kaya dinumanan ko an prinsipal kan eskuwelahan (na sarong padi), an parakonseho, asin an bantay sa sakuyang grupo asin hinagad ko na palibrehon ako sa pag-atender sa Misa. Minsan ngani pinalibre ako, may nagkapira na pinirit akong umatender. An pangigipit nag-orog pakabautismohi tolos sako bilang saro sa mga Saksi ni Jehova. An tatay ko naghumang palalayason ako sa harong kun mapahale ako sa eskuwelahan. Plano nia an edukasyon sa unibersidad asin propesyonal na karera para sa sako.

“An prinsipal paorootrong nagpatanid manongod sa siisay man na dai naggigibo kan mga obligasyon nin Katoliko. Pag-abot kan oras para sa enot na Misa kan taon, nagtago ako sagkod na natapos iyan. Dangan tinawan ko an maestro (sarong padi) nin kopya kan brochure na School and Jehovah’s Witnesses asin sinabihan ko sia na bilang saro sa mga Saksi ni Jehova, dai ako puwedeng umatender sa Misa. An sabi nia: ‘Marahay pang magpoon ka nang maghanap nin ibang eskuwelahan.’ Aram ko na an pagkapahale sa eskuwelahan magbubunga nin pagpalayas sako sa harong kan sakong ama. Minsan siring, ako namibi ki Jehova asin padagos na nagtao nin lubos na patotoo sa sakong mga kaeskuwela.

“Nagdatong an panahon nin bakasyon. Dangan, pagbalik sa eskuwelahan pakabakasyon, oras na naman para sa Misa. An rektor asin iba pang padi nasa atubangan kan kapilya, na andam na magpakumpisal. Haros nadaog na ako nin takot. Luminaog ako asin nagtukaw, pero rinibok ako kan sakong konsensia. Pagpoon kan pagkanta, inisip-isip ko, ‘Ano an pinaggigibo ko digdi? Si Jehova an sakuyang Dios. Dai ako puwedeng magin matalaw asin traydoron ko sia. Dai ko sia puwedeng pamondoon. Dai nia ako babayaan.’ Namibi ako para sa kosog nin boot. Dangan, luminuwas ako sa kapilya asin nagtindog sa pila kan mga magkukumpisal. Pag-abot ko sa prinsipal, sinabi ko saiya: ‘Ser, dai po ako nagdigdi para magkumpisal.’ Sia nagsabi: ‘Aram ko.’ Sinabi ko saiya na andam akong tioson an mga ibubunga pero na an sakong konsensia dai ako tinotogotan na makikabtang sa Misa. Dai ko puwedeng lapason an mga nanodan ko sa Biblia.

“Hineling nia ako, naghuyom, asin nagsabi: ‘Hanga ako saimo. Kamo gabos na Saksi maninigong hangaan. Para sa saindo, enot an Dios, asin andam kamong kuyogon an saiyang mga pagboot ano man an mangyari. Ipadagos nindo iyan. Marahayon an saindong ginigibo. Gusto ko kutana gabos na Katoliko arog saindo, na nagpapaheling kan siring na kaigotan, kan siring na pagkamoot sa Dios. Magpoon ngonyan, libre ka na sa pagpartisipar sa relihiyosong mga seremonya niamo.’ Kanigoan an ogma ko! Binendisyonan ni Jehova an sakong determinasyon na kuyogon an sakong konsensia na natokdoan sa Biblia.

“Kan sunod na aldaw sinabihan kan prinsipal an mga estudyante: ‘An ibang relihiyon nakalalabi sato. Taano ta bako kitang arog sainda, maigot, may hararom na pagkamoot sa Dios asin pagmawot na paglingkodan sia nin orog sa gabos na iba pa? Ini sarong bagay na dapat nasa puso niato.’

“Sa katapustapusi an rektor ibinalyo sa Roma, asin an bagong rektor dai na sana inintindi an dai ko pagpartisipar. An sakong ama naghale sa harong, na binayaan akong libre na aboton an sakong pasohan na pambilog na panahon na ministeryo pagkagraduwar.”

Binendisyonan ni Jehova an barobatang ini na sinunod an saiyang konsensia na natokdoan sa Biblia. Bebendisyonan man nia an gabos na nagmamaigot na otobon an saiyang kabotan.​—Talinhaga 3:​5, 6.