An Pinakadakulang Tawo na Nabuhay Kasuarin Pa Man

Kapitulo 77: An Hapot Dapit sa Pamana

MALINAW na aram kan mga tawo na si Jesus nakikikakan sa harong kan Fariseo. Kaya nagtiripon sinda sa luwas na manriboribo asin naghahalat sa pagluwas ni Jesus. Bakong arog kan mga Fariseo na tinutumang si Jesus asin naghihingoang dakopon sia sa pagsabi nin sala, an mga tawo galagang naghinanyog sa saiya na may pag-apresyar.

Kinakaolay nguna an saiyang mga disipulo, si Jesus nagsabi: “Mag-ingat kamo sa lebadura kan mga Fariseo, na iyo an pagsaginsagin.” Siring kan ipinaheling durante kan pagkakan, an bilog na relihiyosong palakaw kan mga Fariseo pano nin pagsaginsagin. Pero minsan ngani an karatan kan mga Fariseo puwedeng itago paagi sa pagpaheling nin kabanalan, sa katapustapusi iyan mabubuyagyag. “Mayo nin maingat na natatahoban,” an sabi ni Jesus, “na dai mahahayag, asin hilom na dai maaaraman.”

Padagos na inotro ni Jesus an pampakosog na itinao nia sa 12 kan sugoon nia sinda sa biyahe nin paghuhulit sa Galilea. Sia nagsabi: “Dai kamo matakot sa mga minagadan sa hawak asin pakatapos kaini mayo na nin nagigibo.” Mantang dai linilingawan nin Dios minsan an sarong dignos, inaasegurar ni Jesus an saiyang mga parasunod na dai sinda lilingawan nin Dios. Sia nagsabi: “Kun darahon ninda kamo sa atubangan nin pampublikong mga asamblea asin nin mga opisyal asin autoridad nin gobyerno, . . . an banal na espiritu itotokdo sa saindo sa mismong oras na iyan an mga bagay na maninigo nindong sabihon.”

Sarong lalaki sa kadaklan an nagtaram: “Paratokdo,” an pakimaherak nia, “sabihi an sakong tugang na hirasan ako kan pamana.” Kahagadan kan Pagboot ni Moises na an matuang aking lalaki maako nin duwang kabtang kan pamana, kaya mayo nanggad nin dahelan para sa pagpasuruhay. Pero malinaw na gusto kan lalaki nin labi pa sa saiyang legal na hiras sa pamana.

Tamang nagsayuma si Jesus na mapalabot. “Lalaki, siisay an nagnombra sako na magin hokom o parahiras saindo?” an hapot nia. Dangan itinao nia an mahalagang sadol na ini sa kadaklan: “Magpuka kamo asin lumikay kamo sa gabos na klase nin kaaraan, huli ta minsan kun an sarong tawo abunda an saiyang buhay dai minagikan sa mga bagay na saiyang nasasadirihan.” Iyo, gurano man an nasasadirihan nin tawo, natural na sia magagadan asin babayaan nia iyan gabos. Tanganing idoon an bagay na ini, asin tangani man na ipaheling an karungawan nin pagkasudyang gumibo nin marahay na dangog sa Dios, si Jesus guminamit nin sarong ilustrasyon. Sia nagpaliwanag:

“An daga nin sarong tawong mayaman nagbunga nin marahay. Kaya nagpoon siang maghorophorop sa saiya man sana, na an sabi, ‘Ano daw an gigibohon ko, ngonyan na mayo ako nin matitiponan kan sakong mga inani?’ Kaya sia nagsabi, ‘Ini an gigibohon ko: gagabaon ko an sakong mga tambobong asin magtotogdok ako nin orog pa kadarakula, asin dian titiponon ko an gabos kong inani asin an gabos kong rogaring; asin masabi ako sa sakong kalag: “Kalag, dakol ka nang rogaring na naririmpos para sa dakol na taon; magpahingalo ka, magkakan, mag-inom, magpasiramsiram.”’ Alagad an Dios nagsabi sa saiya, ‘Ika na bakong makatanosan, ngonyan na banggi babawion ninda an saimong kalag. Kaya, siisay an magkakamit sa mga bagay na saimong tinipon?’”

Bilang konklusyon, si Jesus nagkomento: “Siring an nangyayari sa tawo na nagtitipon nin kayamanan para sa saiya man sana alagad bakong mayaman sa Dios.” Baga man an mga disipulo tibaad dai man nadadaya kan karungawan nin pagtipon nin kayamanan, huli sa aroaldaw na mga paghadit sa buhay sinda puwedeng madaling malingling sa bilog na kalag na paglilingkod ki Jehova. Kaya ginamit ni Jesus an okasyon tanganing otrohon an marahay na hatol na saiyang itinao sa Sermon sa Bukid mga sarong taon may kabanga an nakaagi. Sa pagsalingoy sa saiyang mga disipulo, sia nagsabi:

“Huli kaini ako nagsasabi sa saindo, Umontok na kamo sa paghadit dapit sa saindong kalag sa kun baga ano an saindong kakakanon o dapit sa saindong hawak sa kun ano an saindong gugubingon. . . . Masdan nindong marhay na an mga uwak dai nagtatanom ni nag-aani, asin mayo man sinda nin kamalig ni tambobong, pero pinapakakan sinda nin Dios. . . . Masdan nindong marhay kun paano nagtutubo an mga liryo; dai sinda nagpapagal ni naghahabol; alagad ako nagsasabi saindo, Minsan si Salomon sa bilog niang kamurawayan dai nagubingan nin siring sa saro sa mga ini. . . .

“Kaya umontok na kamo sa pagparahanap kan saindong kakakanon asin kan saindong iinomon, asin umontok na kamo sa pagparahadit; huli ta ini gabos an mga bagay na pinagpaparahanap kan mga nasyon sa kinaban, alagad ta aram kan saindong Ama na kaipuhan nindo an mga bagay na ini. Alagad, padagos nindong hanapon an saiyang kahadean, asin an mga bagay na ini idadagdag sa saindo.”

Nangorogna sa mga panahon nin kadepisilan sa pagbuhay na an mga tataramon ni Jesus maninigong horophoropon na marhay. An saro na nagigin labi-labi an paghadit manongod sa saiyang materyal na mga pangangaipo asin minapoon na magpabaya sa espirituwal na mga pinag-aaabot, sa katunayan, nagpapaheling nin kakulangan nin pagtubod sa kakayahan nin Dios na magtagama para sa Saiyang mga lingkod. Lucas 12:​1-31; Deuteronomio 21:17.

▪ Taano, tibaad, ta naghapot an lalaki manongod sa pamana, asin anong sadol an itinao ni Jesus?

▪ Anong ilustrasyon an ginamit ni Jesus, asin ano an punto kaiyan?

▪ Anong hatol an inotro ni Jesus, asin taano ta angay iyan?