An Pinakadakulang Tawo na Nabuhay Kasuarin Pa Man

Kapitulo 78: Padagos na Magin Andam!

PAKATAPOS na patanidan an mga kadaklan manongod sa pagkauri, asin pinapagmaan an saiyang mga disipulo manongod sa pagtao nin labi-labing atension sa materyal na mga bagay, si Jesus nagpakosog: “Dai kamo matakot, sadangoton na aripompon, huli ta an saindong Ama nag-oyon na itao sa saindo an kahadean.” Sa siring ihinahayag nia na solamente sarong sadit nanggad na bilang (kan huri minidbid na 144,000) an mapapaduman sa langitnon na Kahadean. An mayoriya kan mga mag-aako nin buhay na daing sagkod magigin daganon na mga sakop kan Kahadean.

Kanigoan kamakangangalas na balaog, “an kahadean”! Ilinaladawan an maninigong magin tamang reaksion kan mga disipulo sa pag-ako kaiyan, sinadol sinda ni Jesus: “Pabakalan nindo an saindong mga rogaring asin maglimos kamo.” Iyo, maninigo nindang gamiton an saindang mga kayamanan tanganing magtao nin espirituwal na pakinabang sa iba asin sa siring makaestablisar “nin dai nawawarang kayamanan sa kalangitan.”

Dangan sinadol ni Jesus an saiyang mga disipulo na magdanay na andam para sa saiyang pagbalik. Sia nagsabi: “Hagkosi nindo an saindong habayan asin papaglaada nindo an saindong mga ilawan, patin mani kamo siring sa mga tawo na naghahalat sa saindang kagurangnan sa saiyang pagpuli hale sa kasal, tanganing kun sia dumatong na asin tumoktok bukasan tolos ninda sia. Maogma idtong mga oripon na sa pagdatong kan kagurangnan maabotan na nagpupuka! Sa katotoohan ako nagsasabi saindo, Sia mismo mahagkos asin pasasandigon sinda sa lamesa asin madolok patin maglilingkod sa sainda.”

Sa ilustrasyon na ini, an pagigin andam kan mga lingkod sa pagbalik kan saindang kagurangnan ipinapaheling kan pagbaton ninda kan saindang haralabang gubing asin pagsukbit kaiyan sa irarom kan saindang mga hagkos asin kan saindang padagos na pag-asikaso kan saindang mga obligasyon sagkod sa matangang banggi paagi sa liwanag nin mga ilaw na may igong lana. Si Jesus nagpaliwanag: ‘Kun an kagurangnan dumatong sa ikaduwang pagbantay [poon sa mga alas nuwebe nin banggi sagkod sa matanga], minsan pa sa ikatolo [poon sa matanga sagkod sa mga alas tres nin aga], asin maabotan sindang andam, maogma sinda!’

Binalosan kan kagurangnan an saiyang mga lingkod sa sarong pambihirang paagi. Pinasandig nia sinda sa lamesa asin pinonan na pagserbihan sinda. Trinatar nia sinda, bakong bilang mga oripon, kundi bilang maimbod na mga katood. Kanigoan karahay na balos para sa padagos na pagtrabaho ninda para sa saindang kagurangnan sa bilog na banggi mantang hinahalat an saiyang pagbalik! Si Jesus nagkoklusyon: “Kamo man, padagos na mag-andam, huli ta sa oras na dai nindo pinaghohona madatong an Aki nin tawo.”

Naghapot ngonyan si Pedro: “Kagurangnan, ano isinasabi mo an ilustrasyon na ini sa samo o siring man sa gabos?”

Imbes na sumimbag nin direkta, si Jesus nagtao nin saro pang ilustrasyon. “Siisay man nanggad an maimbod na mayordomo?” an hapot nia, “na paniniwalaan kan saiyang kagurangnan kan saiyang grupo nin mga katabang tanganing padagos na magtao sainda nin kakanon sa igong panahon? Maogma an oripon na iyan, kun sa pagdatong kan saiyang kagurangnan makua siang naggigibo nin siring! Sa katotoohan sinasabi ko sa saindo, Paniniwalaan nia sia kan gabos niang rogaring.”

An “kagurangnan” malinaw na si Jesu-Cristo. An “mayordomo” naglaladawan sa “sadit na aripompon” nin mga disipulo bilang sarong kolektibong grupo, asin an “grupo nin mga katabang” nanonongod sa grupo man sanang ini kan 144,000 na mag-aako kan langitnon na Kahadean, pero an ekspresyon na ini nagtatampok kan saindang gibohon bilang mga indibiduwal. An “mga rogaring” na ipinaniwalang asikasohon kan maimbod na mayordomo iyo an makahadeng intereses kan kagurangnan digdi sa daga, na kabale an daganon na mga sakop kan Kahadean.

Sa pagpadagos kan ilustrasyon, ipinaliwanag ni Jesus an posibilidad na bakong gabos na miembro kan grupong mayordomo, o oripon na iyan, magigin maimbod, na ipinapaliwanag: “Kun an oripon na iyan magsabi sa saiyang puso, ‘An sakong kagurangnan maaatraso,’ asin ponan na pakolon an mga oripon na lalaki asin mga oripon na babae, asin magkakan asin mag-inom patin magburat, an Kagurangnan kan oripon na iyan madatong sa aldaw na dai nia sia linalaoman . . . , asin papadusahan nia sia na may makuring kaisogan.”

Sinabi ni Jesus na an saiyang pagdigdi nagdara nin panahon nin dakulang pagbalo sa mga Judio, mantang an iba inaako asin an iba sinasayumahan an saiyang mga katokdoan. Kan nakaaging labing tolong taon, sia binautismohan sa tubig, pero ngonyan an saiyang bautismo sa kagadanan orog na nagrarani sa pagtatapos, asin siring kan sabi nia: “Kanigoan an sakong kahaditan sagkod na iyan matapos!”

Pakasabiha kaini sa saiyang mga disipulo, kinaolay giraray ni Jesus an mga kadaklan. Ikinamondo niang marhay an saindang may katagasan na pagsayumang akoon an malinaw na ebidensia dapit sa kun siisay sia asin an kahulogan kaiyan. “Kun nakakaheling kamo nin panganoron na naghahale sa solnopan,” an sabi nia, “minasabi tolos kamo, ‘May nagdadangadang na bagyo,’ asin iyan nangyayari. Asin kun naheheling nindo na minahoyop an doros hale sa timog, sinasabi nindo, ‘Magigin mainit,’ asin iyan nangyayari. Mga parasaginsagin, tatao kamong magsiyasat sa panluwas na itsura kan daga asin langit, alagad tadaw ta dai kamo tataong magsiyasat sa partikular na panahon na ini?” Lucas 12:​32-59.

▪ Pira an kabilang sa “sadit na aripompon,” asin ano an aakoon ninda?

▪ Paano idinoon ni Jesus an pangangaipo kan saiyang mga lingkod na magin andam?

▪ Sa ilustrasyon ni Jesus, siisay an “kagurangnan,” an “mayordomo,” an “grupo nin mga katabang,” asin an “mga rogaring”?