An Pinakadakulang Tawo na Nabuhay Kasuarin Pa Man
Kapitulo 79: Sarong Nasyon na Nawara, Alagad Bakong Gabos
DAI nahaloy pakatapos kan pakipag-olay ni Jesus sa mga nagtiripon duman sa luwas kan harong nin sarong Fariseo, may nagkapira na nagsabi sa saiya “manongod kan mga taga-Galilea na an dugo isinalak [kan Romanong gobernador na si Poncio] Pilato sa saindang mga atang.” An mga taga-Galileang ini puwedeng iyo an mga ginadan kan an rinibong Judio nagprotesta sa paggamit ni Pilato kan kuwarta hale sa kaha nin kayamanan kan templo tanganing magpatogdok nin sarong pabulosan na magdadara nin tubig pasiring sa Jerusalem. Idtong mga nagsasaysay kan bagay na ini ki Jesus puwedeng nagsusuherir na an mga taga-Galilea nag-agi nin kalamidad huli sa sainda mismong maraot na mga gibo.
Alagad, itinanos sinda ni Jesus, na naghahapot: “Naghohona daw kamo na an mga taga-Galileang ini napatunayan na orog na mga parakasala kisa sa gabos na iba pang taga-Galilea huli ta nagtios sinda kan mga bagay na ini? Dai nanggad,” an simbag ni Jesus. Dangan ginamit nia an pangyayari tanganing patanidan an mga Judio: “Kun dai kamo magsorolsol, kamo man gabos magkakagaradan.”
Sa pagpadagos, nagirumdoman ni Jesus an saro pang lokal na trahedya, na posibleng konektado man sa pagtogdok kan pabulosan nin tubig. Sia naghapot: “O idtong kagwalo na narumpagan kan torre sa Siloam, na guminadan sa sainda, naghohona daw kamo na sinda napatunayan na orog na may utang kisa sa gabos na iba pang tawo na nag-eerok sa Jerusalem?” Dai, bako iyan huli sa karatan kan mga tawong ini na sinda nagkagaradan, an sabi ni Jesus. Imbes, “panahon asin pagkanorongod” an pankagabsan na may paninimbagan sa siring na mga trahedya. Alagad, ginamit giraray ni Jesus an okasyon tanganing magpatanid: “Alagad, kun dai kamo magsorolsol, kamo gabos magkakagaradan sa iyo man sanang paagi.”
Dangan nagtao si Jesus nin sarong angay na ilustrasyon, na ipinapaliwanag: “May sarong tawong nagtanom nin higuerra sa saiyang ubasan, asin sia nagdatong na naghahanap nin bunga kaiyan, alagad dai nakakua. Dangan nagsabi sia sa nag-aataman sa ubasan, ‘Uya tolong taon na akong nagdidigdi na naghahanap nin bunga sa higuerrang ini, alagad dai nakakua. Paloda iyan! Taano man nanggad ta papagdanayon kaiyan na daing pakinabang an daga?’ Bilang simbag sia nagsabi sa sainda: ‘Kagurangnan, pabayae nguna iyan ngonyan na taon, sagkod na maggudak ako sa palibot kaiyan asin magbugtak nin pataba; dangan kun iyan magbunga sa ngapit, marahay man; alagad kun dai, papalodon mo iyan.’”
Labing tolong taon na hiningoa ni Jesus na magpatalubo nin pagtubod sa tahaw kan Judiong nasyon. Pero nagkapira sanang gatos na disipulo an ikakabilang na mga bunga kan saiyang mga pagpapagal. Ngonyan, durante kaining ikaapat na taon kan saiyang ministeryo, pinakokosog nia an saiyang mga paghihingoa, na sa simbolikong paagi kinokotkot asin binubugtakan nin pataba an palibot kan Judiong higuerra paagi sa maigot na paghuhulit asin pagtotokdo sa Judea asin Perea. Pero mayong nangyari! An nasyon nagsayumang magsolsol asin sa siring nakatalagang laglagon. Solamente sarong natatada kan nasyon an naghimate.
Dai nahaloy pakatapos kaiyan si Jesus nagtotokdo sa sarong sinagoga sa sarong Sabbath. Duman nakaheling sia nin sarong babae na, huli sa sarong demonyo na nagpapasakit sa saiya, buktot nang marhay sa laog nin 18 nang taon. Sa madinamayon na paagi, kinaolay sia ni Jesus: “Babae, talingkas ka na sa saimong panluluya.” Dangan ibinugtak nia an saiyang kamot sa saiya, asin tolos-tolos na sia nagin tanos asin nagpoon na pamurawayon an Dios.
Alagad, an nangengenot na opisyal kan sinagoga naanggot. “Igwa nin anom na aldaw na maninigong gibohon an trabaho,” an pagkontra nia. “Kaya sa mga iyan, magdigdi kamo asin maomayan, asin bakong sa aldaw nin sabbath.” Sa siring minimidbid kan opisyal an kapangyarihan ni Jesus na magpaomay pero kinokondenar an mga tawo huli sa pagduman tanganing maomayan sa Sabbath!
“Mga parasaginsagin,” an simbag ni Jesus, “bako daw na an lambang saro sa saindo kun sabbath hinuhubadan an saiyang baka o asno hale sa kuwadra asin ginuguyod iyan tanganing painomon? Kaya, bako daw na angay sana para sa babaeng ini na aking babae ni Abraham, asin ginapos ni Satanas, uya! sa laog nin kagwalong taon, na hubadan sa gapos na ini sa aldaw nin sabbath?”
Bueno, kan madangog ini, an mga nagtutumang ki Jesus nagpoon na masopog. Alagad, an kadaklan naggayagaya sa gabos na mamuraway na bagay na naheling nindang ginibo ni Jesus. Bilang simbag inotro ni Jesus an duwang makahulang ilustrasyon mapadapit sa Kahadean nin Dios, mga hula na isinaysay nia gikan sa sakayan sa Dagat nin Galilea mga sarong taon an nakaagi. Lucas 13:1-21; Eclesiastes 9:11; Mateo 13:31-33.
▪ Anong mga trahedya an nasasambitan digdi, asin anong leksion an kinua dian ni Jesus?
▪ Anong pag-aplikar an puwedeng gibohon mapadapit sa dai nagbubungang higuerra, siring man sa mga pagprobar na pabungahon iyan?
▪ Paano minidbid kan nangengenot na opisyal an kakayahan ni Jesus sa pagpaomay, pero paano ibinuyagyag ni Jesus an pagsaginsagin kan lalaki?