An Pinakadakulang Tawo na Nabuhay Kasuarin Pa Man

Kapitulo 80: An mga Toril nin Karnero Asin an Pastor

SI Jesus nagduman sa Jerusalem para sa Kapiyestahan nin Pagdusay, o Hanuka, sarong kapiyestahan na nagseselebrar kan pagdusay giraray sa templo ki Jehova. Kan 168 B.C.E., mga 200 na taon bako kaini, binihag ni Antioco IV Epifane an Jerusalem asin pinaglapastangan an templo asin an altar kaiyan. Alagad, pakalihis nin tolong taon nabawi giraray an Jerusalem asin an templo idinusay giraray. Pakatapos kaiyan, ginibo an taonan na selebrasyon sa pagdusay giraray.

An Kapiyestahan na ini nin Pagdusay nangyayari kun Chislev 25, an Judiong bulan na katimbang kan huring kabtang nin Nobyembre asin enot na kabtang nin Disyembre sa satong modernong kalendaryo. Kaya, labi na sanang sanggatos na aldaw an natatada sagkod sa mahalagang Paskua nin 33 C.E. Huling malipot na panahon iyan, inapod iyan ni apostol Juan na “tiglipot.”

Naggamit ngonyan si Jesus nin ilustrasyon na dian nasasambitan nia an tolong toril nin mga karnero asin an saiyang kabtang bilang an Marahay na Pastor. An enot na toril nin mga karnero na sinasabi nia ipinamimidbid na konektado sa areglo kan tipan nin Mosaikong Pagboot. An Pagboot nagserbing kudal, na isiniseparar an mga Judio sa nakararaot na mga gibo kan mga tawo na bakong sa espesyal na tipan na ini sa Dios. Si Jesus nagpaliwanag: “Sa katotoohan, sa katotoohan ako nagsasabi saindo, An dai minalaog sa toril nin mga karnero paagi sa tata kundi minasakat sa ibang lugar, an sarong iyan parahabon asin tulisan. Alagad an minalaog sa tata iyo an pastor kan mga karnero.”

May iba na nagdatong asin naghingakong Mesiyas, o Cristo, pero bako sinda an tunay na pastor na dapit sa saiya nagsabi si Jesus: “An sarong ini binubukasan kan bantay sa tata, asin an mga karnero naghihinanyog sa saiyang tingog, asin inaapod nia an saiya mismong mga karnero sa ngaran asin ginigiyahan sinda paluwas. . . . Sa estranghero dai nanggad sinda masunod kundi madulag sa saiya, huli ta dai ninda midbid an tingog nin mga estranghero.”

An “bantay sa tata” kan enot na toril nin mga karnero iyo si Juan na Bautisador. Bilang bantay sa tata ‘binuksan’ ni Juan si Jesus paagi sa pagpamidbid sa saiya sa simbolikong mga karnerong idto na gigiyahan nia pasiring sa sabsaban. An mga karnerong ini na inaapod ni Jesus sa ngaran asin ginigiyahan nia paluwas sa katapustapusi pinalaog sa saro pang toril nin mga karnero, siring kan paliwanag nia: “Sa katotoohan, sa katotoohan, ako nagsasabi saindo, Ako iyo an tata kan mga karnero,” an boot sabihon, an pinto kan bagong toril nin mga karnero. Kan ponan ni Jesus an bagong tipan kaiba kan saiyang mga disipulo asin hale sa langit ibinubo sa sainda an banal na espiritu kasunod kan Pentecostes, pinalaog sinda sa bagong toril na ini nin mga karnero.

Ipinaliliwanag pa an saiyang kabtang, si Jesus nagsabi: “Ako iyo an tata; an siisay man na lumaog paagi sa sako maliligtas, asin sia malaog asin maluwas asin makakakua nin sabsabon. . . . Ako napadigdi tanganing sinda magkaigwa nin buhay asin makamtan iyan nin abunda. . . . Ako an marahay na pastor, asin midbid ko an sakong mga karnero patin midbid ako kan sakong mga karnero, kun paanong namimidbid ako kan Ama asin namimidbid ko an Ama; asin itinatao ko an sakong kalag para sa mga karnero.”

Dai pa sana nahahaloy, rinanga ni Jesus an saiyang mga parasunod, na an sabi: “Dai kamo matakot, sadangoton na aripompon, huli ta an saindong Ama nag-oyon na itao sa saindo an kahadean.” An sadit na aripompon na ini, na pag-abot nin panahon magigin 144,000 an bilang, minalaog sa bago, o ikaduwang toril na ini nin mga karnero. Pero nagkomento si Jesus: “Igwa pa ako nin ibang karnero, na bakong sa toril na ini; kaipuhan man na darahon ko an mga ini, asin sinda maghihinanyog sa sakong tingog, asin sinda manini sarong aripompon, sarong pastor.”

Mantang an “ibang karnero” “bakong sa toril na ini,” sinda siertong nasa ibang toril, an ikatolo. An huring duwang toril na ini, o laoman nin mga karnero, igwa nin magkalaen na mga padudumanan. An “sadit na aripompon” sa sarong toril maghahade kaiba ni Jesus sa langit, asin an “ibang karnero” na nasa ibang toril mag-eerok sa Paraisong daga. Pero, baga man sinda nasa duwang toril, an mga karnero mayo nin pag-imon, ni nakakamate man sinda nin pagkasiblag, huli ta siring kan sabi ni Jesus, sinda “manini sarong aripompon” na sakop nin “sarong pastor.”

An Marahay na Pastor, si Jesu-Cristo, gikan sa boot na itinao an saiyang buhay para sa duwang toril nin mga karnero. “Itinatao ko iyan sa sadiri kong boot,” an sabi nia. “May autoridad akong itao iyan, asin may autoridad akong akoon giraray iyan. Inako ko hale sa sakong Ama an pagboot dapit kaini.” Kan sabihon ini ni Jesus, nagkaigwa nin pagkabaranga sa tahaw kan mga Judio.

Dakol sa kadaklan an nagsabi: “Igwa sia nin demonyo asin narurungaw. Taano kamo ta naghihinanyog sa saiya?” Pero an iba nagsimbag: “Bako ini mga tataramon nin tawong may demonyo.” Dangan, malinaw na pinanonongdan an nangyari duwang bulan na an nakaagi kan paomayan nia an lalaking namundag na buta, idinugang ninda: “An demonyo dai makakapabuklat nin mga mata kan mga tawong buta, bako daw?” Juan 10:​1-22; 9:1-7; Lucas 12:32; Kapahayagan 14:​1, 3; 21:​3, 4; Salmo 37:29.

▪ Ano an Kapiyestahan nin Pagdusay, asin noarin iyan siniselebrar?

▪ Ano an enot na toril nin mga karnero, asin siisay an bantay sa tata kaiyan?

▪ Paano binuksan kan bantay sa tata an Pastor, asin sa ano pinalaog an mga karnero pakatapos kaiyan?

▪ Sairisay an kabilang sa duwang toril kan Marahay na Pastor, asin sinda nagin pirang aripompon?