An Pinakadakulang Tawo na Nabuhay Kasuarin Pa Man

Kapitulo 81: Dugang Pang mga Pagprobar na Gadanon si Jesus

HULING panahon ngonyan nin tiglipot, si Jesus naglalakaw sa nalilimpoyan na lugar na inaapod na portiko ni Salomon. Kataed iyan kan templo. Digdi pinalibotan sia kan mga Judio asin nagpoon na magsabi: “Sagkod noarin mo kami pahahalaton? Kun ika an Cristo, sabihi kami nin sayod.”

“Ako nagsabi na sa saindo,” an simbag ni Jesus, “alagad ta dai kamo nagtutubod.” Dai sinda direktang sinabihan ni Jesus na sia an Mesiyas, siring kan sinabi nia sa Samaritana sa may bobon. Pero garo man sana ihinayag nia kun siisay sia kan ipaliwanag nia sa sainda na sia hale sa mga rona sa itaas asin nabuhay na bago pa ki Abraham.

Alagad, gusto ni Jesus na an mga tawo mismo an magkonklusyon na sia an Cristo paagi sa pagkomparar kan saiyang mga aktibidad sa ihinula kan Biblia na ootobon kan Cristo. Iyan an dahelan na kaidto pa pinagbotan nia an saiyang mga disipulo na dai ipagsabi sa kiisay man na sia an Cristo. Asin iyan an dahelan na sinasabi nia ngonyan sa maisog na mga Judiong ini: “An mga gibo na ginigibo ko sa ngaran kan sakong Ama, an mga ini nagpapatotoo manongod sa sako. Alagad dai kamo nagtutubod.”

Taano ta dai sinda nagtutubod? Huli daw sa kakulangan nin ebidensia na si Jesus iyo an Cristo? Bako, kundi huli sa dahelan na itinao ni Jesus kan sabihan nia sinda: “Bako kamong mga karnero ko. An sakong mga karnero naghihinanyog sa sakong tingog, asin midbid ko sinda, patin sinda nagsusunod sa sako. Asin ako nagtatao sa sainda nin buhay na daing katapusan, asin dai sinda noarin man mapapahamak, asin mayo nin siisay man na maagaw sa sainda sa sakuyang kamot. An itinao sa sako kan sakong Ama sarong bagay na orog kisa sa gabos na iba pang bagay, asin mayo nin makakaagaw sa sainda sa kamot kan Ama.”

Dangan ilinadawan ni Jesus an saiyang dayupot na relasyon sa saiyang Ama, na nagpapaliwanag: “Ako asin an Ama saro sana.” Mantang si Jesus yaon digdi sa daga asin an saiyang Ama nasa langit, malinaw na dai nia sinasabi na sia asin an saiyang Ama sa literal, o sa pisikal, saro. Imbes, boot niang sabihon na sinda saro sa katuyohan, na sinda nagkakasaro.

Naanggot sa mga tataramon ni Jesus, an mga Judio nagpurot nin mga gapo tanganing gadanon sia, siring man sana kan ginibo ninda kan nakaagi, durante kan Kapiyestahan nin mga Tabernakulo, o mga Payag-payag. Mapusong hinahampang an mga gustong gumadan sa saiya, si Jesus nagsabi: “Pinahelingan ko kamo nin dakol na marahay na gibo gikan sa Ama. Sa arin na mga gibong idto na ako ginagapo nindo?”

“Ginagapo mi ika, bakong huli sa marahay na gibo,” an simbag ninda, “kundi huli sa paglanghad, huli pa ngani ta ika, minsan ngani tawo, ginigibo mo an saimong sadiri na dios.” Mantang si Jesus dai noarin man naghingakong sarong dios, taano ta sinasabi ini kan mga Judio?

Malinaw na iyan huli ta iinatribuwir ni Jesus sa saiyang sadiri an mga kapangyarihan na sa paghona ninda an Dios sana an igwa kaiyan. Halimbawa, kasasabi pa sana nia manongod sa mga “karnero,” “Ako nagtatao sa sainda nin buhay na daing katapusan,” na sarong bagay na mayong tawo na makakagibo. Alagad, liningawan kan mga Judio an bagay na minimidbid ni Jesus an pag-ako nin autoridad gikan sa saiyang Ama.

Na hinihingako ni Jesus na sia hababa kisa sa Dios, sunod na ipinaheling nia paagi sa paghapot: “Bako daw nasusurat sa saindong Pagboot [sa Salmo 82:6], ‘Ako nagsabi: “Kamo mga dios”’? Kun inapod niang ‘mga dios’ an mga tumang sa sainda nagdatong an tataramon nin Dios, . . . sinasabi daw nindo sa sako na pinakangbanal kan Ama asin isinugo sa kinaban, ‘Ika naglalanghad,’ huli ta ako nagsabi, Ako iyo an Aki nin Dios?”

Mantang an minsan bakong matanos na tawong mga hokom inaapod kan Kasuratan na “mga dios,” anong sala an makukua ki Jesus kan mga Judiong ini sa pagsabing, “Ako iyo an Aki nin Dios”? Idinagdag ni Jesus: “Kun dai ko ginigibo an mga gibo kan sakong Ama, dai nindo ako pagtubodon. Alagad kun ginigibo ko an mga iyan, minsan ngani dai kamo nagtutubod sa sako, tubodon nindo an mga gibo, tanganing kamo makaaram asin padagos na makaaram na an Ama kasaro ko asin ako kasaro kan Ama.”

Kan sabihon ini ni Jesus, hiningoa kan mga Judio na dakopon sia. Pero nakadulag sia, siring kan ginibo nia kaidto sa Kapiyestahan nin mga Tabernakulo. Naghale sia sa Jerusalem asin nag-ibong sa Salog nin Jordan paduman sa lugar na kun saen pinonan ni Juan na magbautismo haros apat na taon na an nakaagi. An lugar na ini puwedeng bakong harayo sa timog na baybayon kan Dagat nin Galilea, duwa o labi pang aldaw na pagbiyahe hale sa Jerusalem.

Dakol na tawo an nagduman ki Jesus sa lugar na ini asin nagpoon na magsabi: “Si Juan, tunay nanggad na dai naggibo nin sarong tanda, alagad an dakol na sinabi ni Juan manongod sa tawong ini gabos totoo.” Kaya dakol digdi an nagtubod ki Jesus. Juan 10:​22-42; 4:26; 8:​23, 58; Mateo 16:20.

▪ Sa anong paagi boot ni Jesus na mamidbid sia kan mga tawo bilang Cristo?

▪ Paanong si Jesus asin an saiyang Ama saro?

▪ Taano ta, malinaw, na sinasabi kan mga Judio na ginigibo ni Jesus na dios an saiyang sadiri?

▪ Paano an pagkotar ni Jesus sa Salmo nagpapaheling na dai sia naghihingakong kapantay nin Dios?

(Ipagpapadagos sa masunod na luwas.)