An Pinakadakulang Tawo na Nabuhay Kasuarin Pa Man

Kapitulo 12: An Bautismo ki Jesus

MGA anom na bulan pakatapos na si Juan magpoon na maghulit, si Jesus, na ngonyan 30 anyos na, nagdolok sa saiya sa Jordan. Huli sa anong dahelan? Tanganing dumalaw? Si Jesus daw interesado sana sa kun paano nag-ooswag an gibohon ni Juan? Bako, hinagad ni Jesus ki Juan na bautismohan sia.

Tolos-tolos na nagsayuma si Juan: “Ako an nagkakaipo na bautismohan mo, asin ika an minadigdi sa sako?” Aram ni Juan na an saiyang pinsan na si Jesus espesyal na Aki nin Dios. Tara, si Juan luminukso na may kaogmahan sa tulak kan saiyang ina kan si Maria, na ipinangingidam si Jesus, dinalaw sinda! An ina ni Juan, si Elizabet, daing duwa-duwa na kan huri isinaysay ini sa saiya. Asin siertong isinaysay man nia sa saiya an manongod sa kapahayagan kan anghel dapit sa pagkamundag ni Jesus asin an manongod sa pagpaheling kan mga anghel sa mga pastor kan bangging namundag si Jesus.

Kaya si Jesus midbid na ni Juan. Asin aram ni Juan na an saiyang pagbautismo bakong para ki Jesus. Iyan para duman sa mga nagsosorolsol sa saindang mga kasalan, pero si Jesus mayo nin kasalan. Minsan siring, apisar kan pagsayuma ni Juan, si Jesus nag-insister: “Pabayae nguna, ngonyan, huli ta sa paaging iyan maninigo para sa sato na otobon an gabos na matanos.”

Taano ta tama na mabautismohan si Jesus? Huli ta an bautismo ki Jesus simbolo, bakong nin pagsolsol sa mga kasalan, kundi kan pagpresentar nia kan saiyang sadiri na gibohon an kabotan kan saiyang Ama. Si Jesus sarong panday, pero ngonyan nagdatong na an oras na ponan na nia an ministeryo na isinugo sa saiya ni Jehova na otobon digdi sa daga. Paghona daw nindo si Juan may linalaoman na pambihirang mangyayari kun baustismohan na nia si Jesus?

Bueno, kan huri si Juan nagbareta: “An mismong Saro na nagsugo sako na magbautismo sa tubig nagsabi sa sako, ‘An siisay man na maheling mong hiligan kan espiritu asin ontokan kaiyan, sia iyo an magbabautismo sa banal na espiritu.’” Kaya linalaoman ni Juan an espiritu nin Dios na mahilig sa saro na babautismohan nia. Kun siring, puwedeng dai man talaga sia napangalas kan, mantang naghahawas si Jesus sa tubig, naheling ni Juan “an espiritu nin Dios na siring sa salampati na naghihilig sa saiya.”

Alagad labi pa dian an nangyari mantang binabaustismohan si Jesus. ‘An kalangitan nagkakaburukasan’ sa saiya. Ano an kahulogan kaini? Malinaw na nangangahulogan ini na mantang sia binabautismohan, nagbalik sa saiya an pakagirumdom dapit sa saiyang buhay sa langit bago sia nagin tawo. Kaya, biyong nagirumdoman ngonyan ni Jesus an saiyang buhay bilang espiritung aki ni Jehova Dios, kabale an gabos na itinaram saiya nin Dios sa langit durante kan saiyang pag-eksister bago nagin tawo.

Dugang pa, sa oras kan pagbautismo sa saiya, may sarong tingog hale sa langit na nagpapahayag: “Ini an sakong Aki, an namomotan, na sakong inooyonan.” Kiisay daw na tingog iyan? Tingog daw mismo ni Jesus? Siyempre bako! Sa Dios iyan. Malinaw nanggad, si Jesus Aki nin Dios, bakong an Dios mismo, siring sa paniwala nin ibang tawo.

Alagad, si Jesus tawong aki nin Dios, kapareho kan enot na tawo, si Adan. An disipulong si Lucas, pakatapos na iladawan an bautismo ki Jesus, nagsurat: “Si Jesus mismo, kan sia magpoon sa saiyang gibohon, mga tolong polo nang taon an edad, na, sa paghona, aki ni Jose, na aki ni Eli, . . . na aki ni David, . . . na aki ni Abraham, . . . na aki ni Noe, . . . na aki ni Adan, na aki nin Dios.”

Kun paano na si Adan sarong tawong “aki nin Dios,” iyo man si Jesus. Si Jesus an pinakadakulang tawo na nabuhay kasuarin pa man, na nagigin malinaw mantang sinisiyasat niato an buhay ni Jesus. Alagad, kan pagbautismo saiya, si Jesus luminaog sa sarong bagong relasyon sa Dios, na nagigin man espirituwal na Aki nin Dios. Garo man sana pinababalik sia ngonyan nin Dios sa langit paagi sa pagpapapoon sa saiya sa sarong dalan na masagkod sa pagtao nia sagkod lamang kan saiyang buhay bilang tawo bilang atang sa kapakanan kan kondenadong katawohan. Mateo 3:13-17; Lucas 3:21-38; 1:34-36, 44; 2:10-14; Juan 1:32-34; Hebreo 10:5-9.

▪ Taano ta si Jesus midbid na ni Juan?

▪ Mantang mayo siang nagibong kasalan, taano ta binautismohan si Jesus?

▪ Huli sa aram na ni Juan dapit ki Jesus, taano ta puwedeng dai sia napangalas kan an espiritu nin Dios humilig ki Jesus?